8 БАЖАЛЫК
Кудайдыҥ Каандыгы ол не?
1. Бис кандый мӱргӱӱлди шӱӱп кӧрӧрис?
БАСТЫРА јердиҥ ӱстинде миллиондор тоолу улус «Теҥеридеги Адабыс» деген мӱргӱӱлди билип јат. Бу мӱргӱӱлде Иисус не керегинде мӱргӱӱрин кӧргӱскен. Оныҥ учун бу мӱргӱӱлди шӱӱжип, нениҥ учун ого јаан ајару эдер керек деп билип алактар.
2. Иисус не керегинде мӱргӱзин деп ӱреткен?
2 Иисус айткан: «Мынайып мӱргӱгер: „Теҥеридеги Адабыс! Адыҥ Сениҥ агарулалзын, Каандыгыҥ Сениҥ келзин. Канайып теҥериде, анайып јерде де табыҥ Сениҥ болзын“». (Матфей 6:9—13 кычырыгар.) Иисус бисти нениҥ учун мынайып мӱргӱзин деп ӱреткен? (19 Кожултаны кӧрӱгер.)
3. Кудайдыҥ Каандыгы керегинде нени билер керек?
3 Бис Кудайдыҥ ады керегинде, анайда ок Кудай улуска ла јерге нени амадап салганын билип алганыс. Бу мӱргӱӱлде Иисус «Каандыгыҥ Сениҥ келзин» деген сӧстӧрлӧ нени айдарга сананган? Је озо баштап, Кудайдыҥ Каандыгы ол не ле бу Каандык кандый једимдерге једерин ле Кудайдыҥ адын канайып агарулаарын шӱӱжип ийектер.
КУДАЙДЫҤ КААНДЫГЫ ОЛ НЕ?
4. Кудайдыҥ Каандыгы ол не ле оныҥ Кааны кем?
4 Иегова теҥериде башкару тӧзӧп, Иисусты каан эдип кӧстӧгӧн. Бу башкаруны Агару Бичик Кудайдыҥ Каандыгы деп адайт. А Иисусты «каандардыҥ Кааны, кайракандардыҥ Кайраканы» деп айдат (1 Тимофейге 6:15). Иисус телекейдиҥ кандый ла башкараачызына кӧрӧ, улуска кӧпти эдер аргалу. Анайда ок ол сӱрекей кӱчтӱ, керек дезе, јердеги бастыра башкараачылардыҥ ийде-кӱчин бириктирип те ийзе, олордыҥ ийде-кӱчи Иисустыҥ кӱчине једип болбос.
5. Кудайдыҥ Каандыгы кайдаҥ башкарат ла неле башкарар?
5 Иисус, тирилген кийнинде тӧртӧн кӱн ӧдӧ берерде, теҥеридӧӧн кайра јӱре берген. Соондо Иегова оны бойыныҥ Каандыгыныҥ Кааны эдип отургызып салган (Апостолдордыҥ ижи 2:33). Кудайдыҥ Каандыгы теҥеридеҥ јерле башкарар (Ачылта 11:15). Оныҥ учун бу башкару «Теҥеридеги Каандык» деп адалат (2 Тимофейге 4:18).
6, 7. Иисус нениҥ учун кандый ла башкараачынаҥ артык?
6 Бу телекейдиҥ башкараачылары качан бирде божоп калат. Је Иисус Агару Бичикте айдылганыла, качан да ӧлбӧс (1 Тимофейге 6:16). Иисустыҥ башкарганы улуска ӱргӱлјиге туза экелер.
7 Агару Бичикте Иисус чындык ла килеҥкей Каан болор деп мынайып судурлалган: «Ого Иегованыҥ тыны, ойгоры, оҥдомолы, јӧптӧр чыгаратан аргазы, ийде-кӱчи ле билгири берилер. Анайда ок ол Иегованаҥ айап, оноҥ сӱӱнчи табар. Ол јаҥыс ла кӧстӧриниҥ кӧргӧниле јаргылабас, кулагыныҥ укканына тайанып тӱзетпес. Ол јоктуларды чындык јаргыла јаргылаар» (Исаия 11:2—4). Слерди мындый Каан башкарзын деп кӱӱнзейдеер бе?
8. Иисус јаҥыскан башкарбас деп, бис кайдаҥ билерис?
8 Кудай кезик улусты Иисусла кожо теҥеридеҥ башкарзын деп талдап алган. Темдектезе, элчи Павел Тимофейге бичиген: «Чыдажып турган болзобыс, Оныла кожо башкарарыс» (2 Тимофейге 2:12). Иисусла кожо канча кижи башкарар?
9. Иисусла кожо канча кижи башкарар? Кудай бу улусты качан јууп баштаган?
9 7-чи бажалыктаҥ кӧргӧнисле, Иисусла кожо 144 000 каан башкарар деп, элчи Иоаннга кӧрӱлте берилген. Бу каандар кемдер? Иоанныҥ айтканыла, бу улустыҥ «маҥдайларында Оныҥ [Иисустыҥ] ады-јолы ла Адазыныҥ ады-јолы бичилген». Анайда ок олор «Кураан [Иисус] кайдаар ла барганда, Оныҥ кийнинеҥ барып турган улус бу» деп айткан. (Ачылта 14:1, 4, ЈК 2003 кычырыгар.) Айдарда, Кудайдыҥ јерле башкарзын деп тургускан 144 000 каан — Иисустыҥ чындык ӱренчиктери. Бу улус божогон кийнинеҥ, теҥеридеги јӱрӱмге тирилет (Ачылта 20:4, 6). Иегова бу улусты элчилердиҥ ӧйинеҥ ала јууп баштаган.
10. Иисус Христосло кожо 144 000 кижи башкарарынаҥ, Иегованыҥ сӱӱжи канайып кӧрӱнет?
10 Иегованыҥ амадузыла болзо, Иисусла кожо улус башкарар. Мынаҥ Кудайдыҥ килемјизи кӧрӱнет. Иисус јакшы башкараачы болор, не дезе, ол бойы да кижи болуп јӱрӱп, кыйын-шыра ӧткӧн. Элчи Павел, Иисусты бистиҥ «чине јогысты оҥдоор аргалу» ла «бис ле чилеп ончозында ченелген» деп бичиген (Еврейлерге 4:15; 5:8). Анайда ок 144 000 кижи толо кемдӱ эмес јӱрӱм јӱргенинеҥ ле оору-јобол кӧргӧнинеҥ улам, бисти база оҥдоп јат. Оныҥ учун Иисус ла оныҥ кожо башкаратан улузы бистиҥ сезимдеристи ле уур-кӱчтеристи јакшы оҥдоп јат деп алаҥзыбай јадыс.
КУДАЙДЫҤ КААНДЫГЫ КЕЛЕР ӦЙДӦ НЕНИ ЭДЕР?
11. Иисус нениҥ учун теҥериде Кудайдыҥ табы бӱтсин деп мӱргӱӱрге ӱреткен?
11 Иисус ӱренчиктерин Кудайдыҥ табы теҥериде бӱтсин деп, мӱргӱӱрге ӱреткен. Нениҥ учун? Не дезе, 3-чи бажалыктаҥ билип алганысла, Сатана Дьявол Иеговага удура тӱймеен кӧдӱрерде, Кудай ого ло кӧрмӧстӧр деп адалган чындык эмес ангелдерге бир эмеш ӧйгӧ теҥериде артар арга берген. Мынаҥ улам теҥеридеги јайаандардыҥ ончозы Кудайдыҥ табын бӱдӱрип турган деп айдар арга јок болгон. Бу бичиктиҥ 10-чы бажалыгынаҥ бис Сатана ла кӧрмӧстӧр керегинде кӧптӧдӧ билип аларыс.
12. Ачылта 12:10-до кандый эки аҥылу учурал айдылат?
12 Иисус Кудайдыҥ Каандыгыныҥ Кааны болуп отурган кийнинде Сатанага удура јуулажарга туруп чыккан деп, Агару Бичикте айдылат. (Ачылта 12:7—10 кычырыгар.) 10-чы ӱлгерде эки аҥылу учурал бичилет. Баштапкызында, Кудайдыҥ Каандыгы башкарып баштайт ла Иисус Христос оныҥ Кааны болуп калат. Экинчизинде, Сатана теҥеридеҥ јердӧӧн таштадып ийет. Бу эки учурал бӱдӱп калган деп, бис мынаҥ ары билип аларыс.
13. Сатана јердӧӧн ташталарда, теҥеридеги айалга канайып солынган?
13 Агару Бичикте: «Оныҥ учун јыргагар, теҥерилер ле олордо јуртагандар!» — деп бичилген (Ачылта 12:12). Сатана ла оныҥ кӧрмӧстӧри теҥеридеҥ ташталарда, Кудайга чындык арткан ангелдер сӱрекей тыҥ сӱӱнген! Эмди теҥеридеги ончо јайаандар Кудайдыҥ табын бӱдӱрет. Олордыҥ ортозында амыр-энчӱ ле бирлик.
Сатана ла кӧрмӧстӧр теҥеридеҥ ташталган кийнинде, јер кыйын-шырала толуп калган. Је удабас кыйын-шыра база болбос
14. Сатананы теҥеридеҥ таштап ийерде, јердеги айалга кандый болуп калган?
14 Је јердеги айалга чек башка. Улус коркышту шыралап јат, не дезе Дьявол «ӧйи ас болгонын билип» — «тыҥ атыйланып калган» (Ачылта 12:12). Сатана теҥеридеҥ таштадып ийеле, тыҥ чугулданып јат, нениҥ учун дезе удабас јоголтылып каларын билер. Мынаҥ улам јерде ачу-корон, оору-јобол ло кыйын-шыра кӧптӧп јат.
15. Кудай јерди кандый болзын деп кӱӱнзейт?
15 Кудайдыҥ амадузы солынбаган. Ол эмдиге ле јетире јерде рай болзын ла анда толо кемдӱ улус ӱргӱлјиге јӱрзин деп кӱӱнзеп јат (Сарын 37:29). Кудайдыҥ Каандыгы мыны канайып эдер?
16, 17. Даниил 2:44-тӧ бичилген сӧстӧр Кудайдыҥ Каандыгы керегинде нени айдат?
16 Судурчы Даниилдиҥ бичигинде мынайып айдылат: «Ол каандардыҥ кӱндеринде теҥеридеги Кудай чактыҥ-чакка јоголбойтон каандык тургузар, бу каандык ӧскӧ албатыга берилбес; ол бастыра каандыктарды јоголтып, бойы ӱргӱлјиге турар» (Даниил 2:44). Бу судурдаҥ Кудайдыҥ Каандыгы керегинде бис нени билип аладыс?
17 Баштапкызы: Каандык «каандардыҥ кӱндеринде» башкарып баштаар. Бу дезе, теҥеридеги Каандык јердеги башкарулар јоголголокто башкарып баштаарын кӧргӱзет. Экинчизи: Кудайдыҥ Каандыгы ӱргӱлјиге башкарар ла оны кандый да башкару солыбас. Ӱчинчизи: Кудайдыҥ Каандыгы ла јердеги башкарулар ортодо јуу болор. Бу јууда Кудайдыҥ Каандыгы јеҥӱ алып, јердиҥ ӱстинде сок јаҥыс ла эҥ артык башкару болор.
18. Телекейдиҥ башкаруларыныҥ ла Кудайдыҥ Каандыгыныҥ јуу-согужы канайып адалат?
18 Кудайдыҥ Каандыгы бойыныҥ јаҥын јердиҥ ӱстине канайып тургузар? Кӧрмӧстӧр «бастыра телекейдиҥ каандарын... кӱчтӱдеҥ кӱчтӱ Кудайдыҥ улу кӱнинде јуу-согушка јуурга» аскыртып ийер деп, Агару Бичикте айдылат. Телекейдиҥ башкарулары Кудайдыҥ Каандыгына удура јуулажарга баргылаар, је Кудайдыҥ Каандыгы јеҥип алар. Бу јуу-согуш Армагеддон деп адалат (Ачылта 16:14, 16; 10 Кожултаны кӧрӱгер).
19, 20. Кудайдыҥ Каандыгы нениҥ учун биске сӱреен керектӱ?
19 Кудайдыҥ Каандыгы биске нениҥ учун сӱреен керектӱ? Ӱч шылтагын айдып ийектер. Баштапкызында, кинчектеҥ улам ончо улус ооруп, качан бирде божоп калат. Је Кудайдыҥ Каандыгыныҥ башкарузында бис ӱргӱлјиге јӱрерис. Иоанн 3:16-да айдылып калган: «Ого бӱткен кажы ла кижи ӧлбӧй, ӱргӱлји јӱрӱмдӱ болзын деп, Кудай бу телекейдиҥ улузына карузыган учун сок јаҥыс Уулын берген».
20 Экинчизинде, бис коркышту калју телекейде јададыс. Улус там ла там бой-бойын тӧгӱндеп, балыр јӱрӱм јӱргилейт. Бу јаманды бис јоголтып болбозыс, мыны јӱк Кудай јоголтор аргалу. Иегова јаман улусты Армагеддондо јоголтып салар. (Сарын 37:10 кычырыгар.) Ӱчинчизинде, улустыҥ тӧзӧгӧн башкаруларыныҥ кӧбизи кату-казыр ла тӧгӱнчи болот. Бу башкарулар улустыҥ кӱчтериниҥ аайы-бажына чыгып болбойдылар. Олор улуска Кудайды уксын деп болушпай јат. Агару Бичикте: «Кижи кижиле башкарганда, ого каршу јетирет» — деп айдылып калган (Јарлыкчы 8:9).
21. Каандык Кудайдыҥ кӱӱн-табын јерде канайып бӱдӱрер?
21 Армагеддонныҥ кийнинде Кудайдыҥ Каандыгы башкарза, јерде Кудайдыҥ кӱӱн-табы бӱдер. Сатана ла кӧрмӧстӧр болбос (Ачылта 20:1—3). Улус оорубас та, божобос то. Толынты ажыра сӧсуккур улустыҥ ончозына јердиҥ ӱстинде райда ӱргӱлјиге јӱретен арга берилер (Ачылта 22:1—3). Учы-учында Каандык Кудайдыҥ адын агарулап салар. Бу Каандык башкарза, ончо улус Иегованыҥ адын мактап јӱрер. (20 Кожултаны кӧрӱгер.)
ИИСУС ХРИСТОС КАЧАН КААН БОЛУП ОТУРГАН?
22. Иисус јерде де болордо Каан болбогонын, тирилген де кийнинде тургуза ла Каан болуп отурбаганын бис кайдаҥ билерис?
22 Иисус јерде болордо, бойыныҥ ӱренчиктерин: «Каандыгыҥ Сениҥ келзин» — деп мӱргӱӱрге ӱреткен. Бу сӧстӧрдӧҥ кӧрзӧӧс, ол тушта Кудайдыҥ Каандыгы келгелек болгон, ӧскӧртӧ айтса, Иегова бойыныҥ башкарузын тӧзӧгӧлӧк лӧ Иисусты Каан эдип кӧстӧгӧлӧк болгон. Айса болзо, Иисус теҥеридӧӧн кайра барганынаҥ ла ала Каан болуп отурган ба? Јок, ого бу ӧйди база да сакыыр керек болгон. Мыны бис кайдаҥ билерис? Бу керегинде Сарын 110:1-де Иегова мынайып айткан: «Ӧштӱлериҥди будыҥ алдына салып бербегенчем оҥ јаныма отурып ал». Бу судур Петр ла Павелдиҥ јартаганыла, тирилген Иисус керегинде болгон (Апостолдордыҥ ижи 2:32—35; Еврейлерге 10:12, 13). Айдарда, Иисус тирилген ле кийнинеҥ Каан болуп кӧстӧлбӧгӧн. Ого база канча кире сакыыр керек болгон?
Кудайдыҥ Каандыгы башкарза, јерде Кудайдыҥ табы бӱдер
23. а) Иисус Кудайдыҥ Каандыгыныҥ Кааны болуп качан отурган? б) Келер бажалыктаҥ бис нени билип аларыс?
23 Иисус Христос 1914 јылда Каан болуп отурган (Сарын 110:2). Бу јыл аҥылу болор деп, акту јӱректӱ христиандардаҥ турган бир бӧлӱк улус библиялык судурлардыҥ болужыла 1914 јылдаҥ озо оҥдоп алган. Бу судурды олор чын оҥдогон деп, 1914 јылдаҥ ала телекейде болгон учуралдардаҥ кӧрӱнет. Иисус 1914 јылда Каан болуп отурарда, озо ло баштап нени эткен? Ол Сатананы јердӧӧн таштаган. Эмди Ачылта 12:12-ле болзо, Дьяволго ас ӧй артат. Айдарда, Кудайдыҥ Каандыгы, бир эмеш ле ӧйдӧҥ, јерде Кудайдыҥ табын бӱдӱрип баштаар. Келер бажалыкта бис шак ла бу ӧйдӧ јадып турганыстыҥ база ӧскӧ керелерин кӧрӧрис. (21 Кожултаны кӧрӱгер.)