Кудайдыҥ Каандыгы ол не?

Кудайдыҥ Каандыгы — Агару Бичиктиҥ тӧс темазы. Иегова Кудай бу Каандыктыҥ болужыла јерди сӱреен јараш рай эдип салар. Кудайдыҥ Каандыгы ол не? Бу Каандык эмди ле башкарып турган деп, бис кайдаҥ билерис? Бӱгӱнги кӱнде Кудайдыҥ Каандыгы нени эдип турган? Келер ӧйдӧ нени эдер? Бу сурактардыҥ карууларын бу уроктоҥ ло келер эки уроктоҥ билип аларыс.

1. Кудайдыҥ Каандыгы ол не? Оныҥ Кааны кем?

Каандык — Иегова Кудайдыҥ тургускан башкарузы. Бу Каандыктыҥ Кааны — Иисус Христос. Ол теҥеридеҥ башкарат (Матфей 4:17; Иоанн 18:36). Кудайдыҥ Каандыгы јерле јажын-чакка башкарар (Лука 1:32, 33). Бастыра јердиҥ ӱстиндеги улус оныҥ башкарузыла јӱрер.

2. Иисусла кожо кемдер башкарат?

Иисус јаҥыскан башкарбас. Оныла кожо «кандый ла ӱйедеҥ, тилдеҥ, калыктаҥ ла уктаҥ» турган улус башкарар (Ачылта 5:9, 10). Олордыҥ тоозы канча болор? Иисустыҥ јерде јӱргенинеҥ бери миллиондор тоолу улус христиандар болуп калган. Је олордоҥ јӱк ле 144 000 кижи Иисусла кожо башкарарга теҥеридӧӧн барат. (Ачылта 14:1—4 кычырыгар.) Арткан улус Кудайдыҥ Каандыгыныҥ албатызы болор. Олор јерде јадар (Сарын 37:29).

3. Кудайдыҥ Каандыгы улустыҥ тургускан башкаруларынаҥ незиле артык?

Кандый бир јакшы кижи јаҥга келзе, ол тӱҥей ле бойыныҥ бастыра санаазын бӱдӱрип болбой јат. Улустыҥ башкарулары јаантайын ла солынып јат. Андый башкараачылардыҥ кезиги улуска болужардыҥ ордына јаҥыс ла бойын сананат. Је Кудайдыҥ Каандыгыныҥ Кааны — Иисус Христос — јажын-чакка башкарар. Оны кем де, качан да солыбас. Агару Бичикте айдылганыла, Кудай «јажын-чакка јоголбойтон каандык» тургузып салган (Даниил 2:44). Иисус бӱдӱн јерле башкарар. Ол бастыра улусты сӱӱп турган. Кемди де талдабай јат. Улуска јалакай баштанат. Ол неге де садынбай јат. Иисус улусты да бой-бойына јалакай баштанзын, бой-бойын сӱӱзин ле кемди де талдабазын деп ӱредип салар. (Исайя 11:9 кычырыгар.)

4. Јерле эҥ кӱчтӱ башкару башкарар

Иисус Христостыҥ башкарар јаҥы ла ийде-кӱчи улустыҥ башкараачыларына кӧрӧ канча киреге артык. Матфей 28:18 кычырып, суракты шӱӱжип ийигер:

• Иисус Христос улустыҥ башкараачыларынаҥ незиле артык?

Улустыҥ башкарулары улам сайын солынат, олор јӱк ле бойыныҥ јерин башкарат. А Кудайдыҥ Каандыгы канайып башкарат? Даниил 7:14 кычырып, сурактарды шӱӱжип ийигер:

• Кудайдыҥ Каандыгыныҥ «качан да бузылбазы» нениҥ учун јакшы болор?

• Кудайдыҥ Каандыгыныҥ бастыра јерле башкарары нениҥ учун јакшы?

5. Улустыҥ башкаруларын солыыр керек

Кудайдыҥ Каандыгы нениҥ учун улустыҥ башкаруларын солыыр? ВИДЕОНЫ кӧрӱп, суракты шӱӱжип ийигер.

ВИДЕО: «Кудайдыҥ Каандыгы ол не?» (ӱзӱги) (1:41)

• Улустыҥ башкарузы неге экелген?

Экклезиаст 8:9 кычырып, сурактарды шӱӱжип ийигер:

• Канайып сананадаар, улустыҥ башкаруларыныҥ ордына Кудайдыҥ Каандыгын тургузар керек пе? Нениҥ учун?

6. Кудайдыҥ башкарузы улусты оҥдоор

Бистиҥ кааныс, Иисус, бойы да кижи болгон, оныҥ учун ол бисти јакшы оҥдоп турган (Еврейлерге 4:15). Иисусла кожо «кандый ла ӱйедеҥ, тилдеҥ, калыктаҥ ла уктаҥ» турган 144 000 эр ле ӱй улус башкарар. Олорды Иегова бойы талдайт (Ачылта 5:9).

• Иисусла кожо Кудайдыҥ Каандыгында башкаратан улус бойлоры да јерде јӱрген, оныҥ учун олор бисти јакшы оҥдоп јадылар. Мыны билгенеер Кудайдыҥ Каандыгына бӱткенеерди тыҥыдат па? Јартап беригер.

7. Кудайдыҥ Каандыгыныҥ јасактары улустыҥ јасактарынаҥ канча катапка артык

Улустыҥ башкарулары албатыны корулаар јасактар чыгарат. Анайып ла Кудайдыҥ Каандыгында база јасактар бар. Бу Каандыкка кирип турган улус бу јасактарды бӱдӱрер учурлу. 1 Коринфтегилерге 6:9—11 кычырып, сурактарды шӱӱжип ийигер:

• Бастыра улус Кудайдыҥ бийик нормаларыла јӱрген болзо, јӱрӱм кандый болор эди?a

• Иегова албатызынаҥ Каандыктыҥ јасактарын бӱдӱрзин деп, некеер јаҥду ба? Јартап беригер.

• Бу јасактарла јӱрбей турган улус солынар аргалу деп недеҥ кӧрӱнет? (11 ӱлгерди кӧрӱгер.)

ТӦС ШӰӰЛТЕЗИ

Кудайдыҥ Каандыгы — теҥеридеҥ башкарып турган чын ла бар башкару. Бу Каандык бастыра јерле башкарар.

Нени билип алдыгар?

• Кудайдыҥ Каандыгында кемдер башкарар?

• Кудайдыҥ Каандыгы улустыҥ башкаруларынаҥ нениҥ учун артык?

• Иегова бойыныҥ Каандыгыныҥ албатызынаҥ нени некейт?

ШИҤДЕЙТЕН МАТЕРИАЛ

Иисус Кудайдыҥ Каандыгын кайда деп айткан?

«Кудайдыҥ Каандыгы кижиниҥ јӱрегинде бе?» (веб-статья)

Иегованыҥ Керечилери нениҥ учун улустыҥ башкаруларына эмес, је Кудайдыҥ Каандыгына чындык болот?

«Кудайдыҥ Каандыгына чындык артадылар» (1:43)

Иисусла кожо башкаратан улус керегинде Агару Бичик нени айдып турганын билип алыгар.

«Теҥериге кемдер барат?» (веб-статья)

Бир ӱй кижи тӱрмеде отурган тужында, јердиҥ ӱстинде чындыкты јӱк ле Кудай тургузар деп канайып билип алганын кычырып алыгар.

«Чындык јеҥип алар деп билип алгам» («Ойгоныгар!», 2011 јыл, кӱчӱрген ай)