07 УРОК

Иегова керегинде нени билерис?

Кепке базылган чыгарма

Слердиҥ санаагарла болзо, Иегова — ол кандый Кудай? Слер оны кайкап турган болороор, је бу ла ок ӧйдӧ ол слерге ӧскӧ галактикадагы ыраак јылдыстардый билдирип турган болор. Эмезе слер оны коркышту јаан ийде-кӱчтӱ, кӧскӧ кӧрӱнбес тын деп бодоп турган болороор. Је чынынча болзо, ол кандый Кудай? Агару Бичиктеҥ бис Кудайдыҥ кезик кылык-јаҥдарын ла ол улусты сӱӱп ле баалап турган деп билип аларыс.

1. Бис Иегованы нениҥ учун кӧрбӧй јадыс?

«Кудай — ол Тын» (Иоанн 4:24). Иеговада кижиде ошкош эт-кан јок. Анайда ок оныҥ теҥериде јадып турган јерин де бистиҥ кӧрӧр аргабыс јок.

2. Иегова — ол кандый Кудай?

Бис оны кӧрбӧй дӧ турган болзоос, ол чын ла бар Кудай. Оныла јууктада таныжып, сӱреен јакшы кылык-јаҥдарын билип алзаар, оны сӱӱп баштараар. Агару Бичикте айдылат: «Иегова справедливостьты сӱӱйт, ол ого чындык улусты артыргыспас» (Сарын 37:28). Анайда ок ол улусты килеп, олорго болужып јат, анчада ла кӱч айалгада болуп калган улуска (Иаков 5:11). Иегова кунугып, чӧкӧп калган улустыҥ јанында (Сарын 34:18). Бис јаман керектер эдип турзаас, ого ачу болот (Сарын 78:40, 41). Је јакшы керектер эдип турзаас, ол сӱӱнип јат. (Укаа сӧстӧр 27:11 кычырыгар.)

3. Иегованыҥ сӱӱжи недеҥ кӧрӱнет?

Кудайдыҥ тӧс кылык-јаҥы — ол сӱӱш. Агару Бичикте: «Кудай — ол сӱӱш» — деп айдылат (1 Иоанн 4:8). Кудай бисти сӱӱп турган деп, бис јӱк ле Агару Бичиктеҥ эмес, оныҥ јайап салган јайаандарынаҥ да кӧрӱп јадыс. (Апостолдордыҥ ижи 14:17 кычырыгар.) Темдектезе, кижи канайып јайалып калганын сананып ийектер: бистиҥ кӧзис — јӱзӱн-јӱӱр ӧҥдӧр кӧрӱп јат, кулагыс — јараш кӱӱниҥ башка-башка табыштарын угат, анайда ок курсактыҥ јӱзӱн-башка амтамын аладыс. Мынаҥ, Кудай бисти јӱрӱмге сӱӱнип ле јакшызынып јӱрзин деп кӱӱнзеп турганы кӧрӱнет.

ТЕРЕҤЖИДЕ КӦРӰГЕР

Иегова ончо немени нениҥ болужыла эдип јат? Ол бойыныҥ сӱреен јакшы кылык-јаҥдарын канайып кӧргӱзип турганын билип алыгар.

4. Агару тын — ол Кудайдыҥ ийде-кӱчи

Јуруктар: Бу ӱзе неме Кудайдыҥ агару тыныла эдилген: 1) Планеталар ла Вселенный, 2) Улус Кудайдыҥ санаа-шӱӱлтезин тӱрбектерге бичиген.

Кандый бир ишти бис колдорысла эдедис, а Иегова — агару тынла. Агару Бичикте айдылганыла, агару тын — ол тирӱ неме эмес, ол Кудайдыҥ ийде-кӱчи. Ол ончо немени оныҥ болужыла эдет. Лука 11:13 ле Апостолдордыҥ ижи 2:17 кычырып, бу суракты шӱӱжип ийигер:

Бис Кудайдаҥ агару тын суразаас, ол биске оны берер. Андый болордо, агару тын — ол тирӱ неме бе эмезе Кудайдыҥ ийде-кӱчи бе? Јартап беригер.

Иегова агару тыныла кайкамчылу немелер эдет. Сарын 33:6 ла 2 Пётр 1:20, 21 кычырып, суракты шӱӱжип ийигер:

Иегова агару тынын тузаланып турган деп, кандый темдер бар?

5. Иегованыҥ кылык-јаҥдары кайкадып јат

Моисей Кудайдыҥ ишчизи болгон. Ол Кудай керегинде кӧпти билген де болзо, је тӱҥей ле ол керегинде оноҥ кӧп билерге кӱӱнзеген. Оныҥ учун ол Кудайдаҥ: «Сени билерге... меге јолдорыҥды ачып берзеҥ» — деп сураган (Чыгыш 33:13). Моисейдиҥ сурагына Иегова бойы керегинде куучындап берген. Чыгыш 34:4—6 кычырып, сурактарды шӱӱжип ийигер:

Иегова Моисейге бойы керегинде нени куучындаган?
Слерге Иегованыҥ кандый кылык-јаҥдары тыҥ јарап јат?

6. Иегова улусты сӱӱп јат

Јебрен ӧйдӧ Кудайдыҥ Израиль албатызы Египетте кулдар болгон. Олордыҥ кыйын-шыразын кӧрӱп, Иегова нени сескен? АУДИОЗАПИСЬТИ иштедип, библиялык ӱлгерлерди угугар эмезе Чыгыш 3:1—10 кычырыгар. Оноҥ бу сурактарды шӱӱжип ийигер.

АУДИОЗАПИСЬ: «Олордыҥ шыразын кӧрӱп, Иеговага ачу болгон» (2:45)

Бу ӱлгерлерле болзо, Иегова улустыҥ кыйын-шыразын кӧрӱп, нени сезет? (7 ле 8 ӱлгерлерди кӧрӱгер.)
Канайып сананадаар, Иегова улуска болужарга кӱӱнзеп турган ба, болужар аргазы бар ба? Јартап беригер.