12 УРОК
Агару Бичикти токтотпой ӱренерге не болужар?
Агару Бичикти ӱренери — јаҥы јерлер кӧрӱп, јорыктап јӱргенине тӱҥей. Бу јолдыҥ учында кӧп алкыштар берилер, је андый да болзо, бу јолдо кӱчтер болордоҥ айабас. Оныҥ учун мындый санаа келер болор: «Агару Бичикти оноҥ ары ӱренетен бе, јок по?» Андый да болзо, ӱредӱни нениҥ учун токтотпос керек? Кӱчтер болуп та турза, оноҥ ары ӱренерге не болужар?
1. Агару Бичикти ӱренерин нениҥ учун баалаар керек?
«Кудайдыҥ сӧзи јӱрӱп, бойыныҥ ижин эдет» (Еврейлерге 4:12). Агару Бичикте Кудайдыҥ санаа-шӱӱлтези бичилген, оныҥ учун ол сӱреен баалу болот. Бу бичиктеҥ Кудай слерди сӱӱп турган деп билип алараар. Агару Бичик јӱк ле билгирлер берип турган бичик эмес, ол кижини ойгор болорго ӱредет ле ижемји берет. Је эҥ учурлузы — Агару Бичик слерге Иегованыҥ најызы болорго болужат. Агару Бичикти ӱренип, слер јӱрӱмеерди јакшы јанындӧӧн солыырга ийде-кӱч алараар.
2. Агару Бичиктеги чындыкты нениҥ учун баалаар керек?
Агару Бичиктеги чындыкты баалу эрјинеге тӱҥдештирерге јараар. Оныҥ учун Агару Бичикте мындый сӧстӧр бар: «Чындыкты садып ал, оны качан да сатпа» (Укаа сӧстӧр 23:23). Бу чындыкты баалу деп ундыбай турзаас, Агару Бичикти ӱренерге ӧйисти де, ийде-кӱчисти де кысканбазыс. Кандый да кӱчтер болотон болзо, тӱҥей ле ӱренерис. (Укаа сӧстӧр 2:4, 5 кычырыгар.)
3. Иегова слерге канайып болужар аргалу?
Иегова — Кӱчтӱдеҥ Кӱчтӱ Кудай, бистиҥ Јайаачыбыс ла Најыбыс. Ол слерле јууктада таныжарга тыҥ кӱӱнзеп јат. Агару Бичикте айдылганыла болзо, ол слерге кӱӱн де, ийде-кӱч те берер аргалу. (Филиппыдагыларга 2:13 (ЈТ) кычырыгар.) Оныҥ учун ол слерге Агару Бичикти ӱренетен ле билип алганаарды тузаланатан кӱӱнеерди тыҥыдарга болужар. Анайда ок удурлажуларды ла кӱчтерди ӧдӧргӧ, ийде-кӱч берер. Оныҥ учун Иеговага мӱргӱп, Агару Бичикти оноҥ ары ӱренерге болушсын деп сурагар (1 Фессалоникадагыларга 5:17).
ТЕРЕҤЖИДЕ КӦРӰГЕР
Слерде бош ӧй јок болзо эмезе улус слердиҥ ӱренип турганаарды јаратпай турган болзо, Агару Бичикти оноҥ ло ары ӱренерге нени эдер керек? Иегова слерге канайып болужар аргалу деп билип алыгар.
4. Агару Бичикти ӱренери баштапкы јерде болор керек
Кезикте иш-тоштыҥ кӧбине слерде Агару Бичикти ӱренерге ӧй јок деп билдирер болор. Мындый айалгада нени эдерге јараар? Филиппыдагыларга 1:10 кычырып, сурактарды шӱӱжип ийигер:
Слердиҥ санаагарла болзо, кижиниҥ јӱрӱминде «эҥ артыгы» не болот?
Агару Бичикти ӱренери јӱрӱмеерде баштапкы јерде болзын деп, слер нени эдер аргалу?
А. Кӧнӧккӧ озо кумак уруп салза, ого таштар батпас
Б. Је озо таштар салза, кумак та бадар. Анайып ла јӱрӱмисте «эҥ артыгын» баштапкы јерге тургузып турзаас, ӧскӧ дӧ керектерге ӧй табыла берер
Агару Бичикти ӱрензеес, Кудайла јууктада таныжып, ого канайып бажыратанын билип аладыс. Матфей 5:3 (ЈК 2003) кычырып, бу суракты шӱӱжип ийигер:
Агару Бичикти ӱренерин баштапкы јерге тургузып турган кижиниҥ јӱрӱми канайып солынат?
5. Ӱренип турганаарды улус јаратпай турза, оноҥ ло ары ӱренигер
Кезик улус бисти Агару Бичикти ӱренбезин деп токтодордоҥ айабас. Франческо деп кижиниҥ учуралын кӧрӱп ийигер. ВИДЕОНЫ кӧрӱп, сурактарды шӱӱжип ийигер:
Франческоныҥ најылары ла тӧрӧӧндӧри, оныҥ Агару Бичик ӱренип турганына кандый кӧрӱмдӱ болгон?
Франческо турумкайы учун кандый кайрал алган?
2 Тимофейге 2:24, 25 кычырып, сурактарды шӱӱжип ийигер:
Тӧрӧӧндӧрӧӧр лӧ најылараар слердиҥ Агару Бичикти ӱренип турганаарга канайып кӧрӧт?
Агару Бичикти ӱренип турганаарды кезик улус јаратпай турза, бу ӱлгерлер аайынча, слерге бойоорды канайып тудунар керек? Јартап беригер.
6. Иегованаҥ болуш сурагар
Иеговага канча ла кире јуук болзоос, ончо ло кире оны сӱӱндирер кӱӱнис келет. Је Иегованыҥ нормалары аайынча бойыстыҥ јӱрӱмисти солыырга јеҥил эмес болот. Андый да болзо, бойыгардаҥ чӧкӧбӧгӧр! Иегова слерге болужар. ВИДЕОНЫ кӧрӱп, сурактарды шӱӱжип ийигер:
Джим Иегованы сӱӱндирерге, јӱрӱмин канайып солыган?
Оныҥ учуралынаҥ слерге нези јарады?
Еврейлерге 11:6 (ЈТ) кычырып, сурактарды шӱӱжип ийигер:
Иегова «оны тыҥ бедиреген улуска», ӧскӧртӧ айтса ол керегинде билип, бойыныҥ јӱрӱмин солыырга албаданып турган улуска нени эдерге кӱӱнзейт?
Бу ӱлгерле болзо, слер кӱчтердеҥ коркыбай оноҥ ло ары Агару Бичикти ӱренип турганаарды кӧрӱп, Иегова нени сезет?
КЕЗИК УЛУС СУРААР БОЛОР: «Агару Бичикти неге керектӱ ӱренип турганаар?»
Слер кандый каруу берер эдеер?
ТӦС ШӰӰЛТЕЗИ
Агару Бичикти ӱренерге јеҥил эмес те болзо, је бу јажын-чакка јӱрер јӱрӱмге апаратан сок јаҥыс јол. Иегованаҥ оноҥ ло ары болуш сурагар, ол слерге кӧп алкыштар берер.
Нени билип алдыгар?
Слер Агару Бичиктеги чындыкты баалап турганаар ба? Нениҥ учун?
«Эҥ артыгын» слер канайып талдаар аргалу?
Агару Бичикти оноҥ ло ары ӱренерге, слерге нениҥ учун Иегованаҥ болуш сурап турар керек?
ШИҤДЕЙТЕН МАТЕРИАЛ
Кӧп улуска ӧйди ойгор тузаланарга тӧрт јӧп болушкан.
«Ӧйди канайып ойгор тузаланар?» («Ойгоныгар!», 2014 јыл, кочкор ай)
Ӧбӧӧни Кудайга бӱтпей турган ӱй кижиге Иегова канайып болушканын кӧрӱп алыгар.
Ӱйи Агару Бичикти токтотпой ӱренерде, бир эр кижиниҥ јӱрӱми канайып солынган?
Иегованыҥ Керечилерин билелер чачылтып турган деп бурулайт. Бу чын ба?
«Иегованыҥ Керечилери чын ла билелерди чачылтып турган ба?» (веб-статья)