Кудайга иштеп турган ла Кудайга иштебей турган улустыҥ нези башка?

1, 2. Кудайдыҥ ишчилеринде кандый кӱчтер болот? (Јӧрмӧлдиҥ бажындагы јуруктарды кӧрӱгер.)

ЭМЧИЛЕР југуш оорулу улусты эмдеген тушта јаантайын коруланып јат. Не дезе, улуска болужып тура, бойлоры да ооруп калардаҥ айабас. Бистиҥ айалга база мындый. Бистиҥ кӧп сабагыс каршу јетиргедий кӱӱн-санаалу улустыҥ ортозында иштейт те, јадат та. Андый улустыҥ кылык-јаҥы Кудайды ачындырып јат.

² Бу телекейдиҥ калганчы кӱндеринде улус јаманды ла јакшыны там ла ылгаштырбай барат. Элчи Павел Тимофейге бичиген экинчи самаразында, Кудайла јуук колбу јок улустыҥ кылык-јаҥын тоолоп, олордыҥ мындый кылык-јаҥы калганчы кӱндердиҥ јууктаганы сайын оноҥ иле кӧрӱнер деп бичип салган (2 Тимофейге 3:1—5, 13 кычырыгар.) Мындый айалга бисти кайкадып турган болор, је бу телекейдеги улустыҥ кылык-јаҥы ла кӱӱн-санаазы биске салтарын јетирбес деп сананбас керек (Укаа 13:20). Бис бу јӧрмӧлдӧ калганчы кӱндерде јадып турган улустыҥ кылык-јаҥы Кудайдыҥ ишчилериниҥ кылык-јаҥынаҥ чек башка болгонын шӱӱп кӧрӧрис. Анайда ок улуска ич-кӧгӱс јанынаҥ болужып тура, олордыҥ јастыра кӱӱн-санаазын алынбаска, нени эдер керек деген суракты база кӧрӧрис.

3. Павел 2 Тимофейге 3:2—5-те кемдер керегинде бичиген?

³ Павел «калганчы кӱндерде уур-кӱч ӧйлӧр келер» деп бичиген. Оныҥ кийнинде ол ӧйдӧ јадатан улустыҥ 19 јаман кылык-јаҥын тоолоп салган. Мындый ла кылык-јаҥдар Римдегилерге 1:29—31-де база туштайт, је Тимофейге бичилген самарадагы сӧстӧр Христиан Грек Бичимелдерде база кайда да туштабай јат. Је бастыра улус мындый кылык-јаҥду болбос. Чындык христиандардыҥ кылык-јаҥы чек башка. (Малахия 3:18 кычырыгарa.)

БОЙЫСКА КӦРӰМИС КАНДЫЙ

4. Улуркак кижиниҥ кылык-јаҥы кандый?

⁴ Павел улусты јаҥыс бойын сӱӱр ле акчага ӱстӱгер деп бичигениниҥ кийнинеҥ, олордыҥ мактанчак, бийиркек ле улуркак болорын база бичиген. Мындый кылык-јаҥду улус бойыныҥ јайалталарыла, тыш бӱдӱмиле эмезе арга-чагыла ӧскӧ улустаҥ бийик тудунат. Олор улустаҥ мак аларын ла тоомјылу баштанарын сакыйт. Бир билимчи ӧйинеҥ ӧткӱре улуркак кижи керегинде мындый сӧстӧр бичиген: «Оныҥ јӱрегинде кичинек тагыл бар. Андый тагылда ол бойы бойына бажырат». Улуркак болоры коркышту јаман кылык-јаҥ, керек дезе улуркак та улус ӧскӧ улустыҥ улуркагын чек јаратпай јат.

5. Кудайдыҥ чындык ишчилериниҥ бийиркей бергениниҥ темдерин куучындап беригер.

⁵ Улуркак болоры Иегованыҥ кӧзине јескинчилӱ кылык-јаҥ болот. Ол «бийиркек кӧстӧрди» кӧрӧр кӱӱни јок (Укаа 6:16, 17). Улуркак кижиге Кудайга јууктаарга кӱч болот (Сар. 10:4). Бу кылык-јаҥ Дьяволдыҥ кылык-јаҥы (1 Тим. 3:6). Иегованыҥ чындык ишчилериниҥ де кезиги мындый кылык-јаҥду болуп калганы ачынчылу. Иудейлердиҥ кааны Озия канча јылдардыҥ туркунына Иеговага чындык болгон. «Је ол кӱчтӱ болуп каларда, јӱреги бийиркеп, Иегова Кудайга јарабас керектер эткен. Тагылга фимиамды ӧртӧӧргӧ, Иегованыҥ ӧргӧӧзине кирген» — деп, Агару Бичикте айдылат. Кийнинде кандый да ӧйдиҥ туркунына Езекия каан база бийиркей берген (2 Лет. 26:16; 32:25, 26).

6. Давид недеҥ улам бийиркенер аргалу болгон? Је нениҥ учун ол бийиркенбеген?

⁶ Кезик улус јараш, јарлу, кӱӱлик јайалталу, ийде-кӱчтӱ эмезе јамылу болгонынаҥ улам бийиркенип јат. Давидте бу ӱзе неме бар болгон, је ол бастыра јӱрӱмине јобош болуп арткан. Качан ол Голиафты јеҥип аларда, Саул ого бойыныҥ кыстарыныҥ бирӱзин ӱйи эдип алзын деп айткан. Давид: «Каанга кӱйӱ болорго, мен де, мениҥ тӧрӧӧндӧрим де — адамныҥ билези, Израильде кем андый?» — деп айткан (1 Сам. 18:18). Јобош болорго Давидке не болушкан? Кудай јобожыдынып, ого ајару эткенинеҥ улам ол јакшы кылык-јаҥду, јайалталарлу ла јамылу деп билгени болушкан (Сар. 113:5—8). Ончо немени Иегова берген деп ол оҥдоп туратан. (1 Коринфтегилерге 4:7 тӱҥдештиригер.)

7. Јобош болорго биске не болужар?

⁷ Бӱгӱнги кӱнде Иегованыҥ ишчилери Давидтеҥ тем алып, јобош болорго албаданат. Кӱчтӱдеҥ Кӱчтӱ Иегова Кудайдыҥ јобожын сананып ийзеес, ӧзӧк буурыс јымырай берет (Сар. 18:35). Бис Колоссыдагыларга 3:12-де бичилген: «Быйанзышты, буурзашты, быйанзак, тӧп, јобош, узакка чыдамкай болорын кийимди чилеп кийип алыгар» — деген јӧпти бӱдӱрерге кӱӱнзейдис. Анайда ок сӱӱш «мактанбайт, јакшыркабайт» деп база билерис (1 Кор. 13:4). Бистиҥ јобош болгоныс улусты Кудайга јууктадар аргалу. Канайып ӧбӧӧндӧр бойыныҥ ӱйлериниҥ кылык-јаҥын кӧрӱп, Кудайга сӧс јокко баштанат, анайып ла улус бистиҥ јобош кылык-јаҥысты кӧрӱп, чындыкла јилбиркеер болор (1 Пет. 3:1).

УЛУСКА КАНАЙЫП БАШТАНАДЫС

8. а) Балдардыҥ сӧс укпай турганын кезик улус канайып кӧрӧт? б) Агару Бичик балдарды нени эдерине кычырат?

⁸ Элчи Павел улус бой-бойына калганчы ӧйлӧрдӧ канайып баштанарын бичип салган. Темдектезе, балдар ада-энезиниҥ сӧзин укпас болор. Кезик улус мындый кылык-јаҥда јаман неме јок деп сананат. Керек дезе кинолор, бичиктер, телеберилтелер де улусты мындый кылык-јаҥду болорына кӱӱнзедет. Је сӧс укпас болгоны билениҥ курчузын бузат ла бастыра албаты-јонго каршузын јетирет. Мындый немени улус алдынаҥ бери билер. Темдектезе, Јебрен Грецияда ада-энезине колын кӧдӱрген кижи Грецияныҥ кижизи болор аргазын јылыйтып салатан. А Римде адазын соккон кижини, кижи ӧлтӱрген чилеп кату каруузына тургузатан. Агару Бичикти алза, Еврей де Христиан Грек те Бичимелдерде балдар ада-энелерин тооп турарына кычырылат (Чыг. 20:12; Еф. 6:1—3).

9. Ада-энезиниҥ сӧзин угарга, балдарга не болужар?

⁹ Айландыра улус сӧсуккур эмес те болзо, балдарга ада-энезине сӧсуккур болорго не болужар? Ада-энезиниҥ олорго эткен јакшы керектерин шӱӱп сананганы болужат. Олорго сӧсуккур болоры — Кудайдыҥ, теҥеридеги Адабыстыҥ, некелтези деп ундыбай турза, быйанду болорго балдарга јеҥил болор. Балдар ада-энези керегинде јакшыны куучындап турза, јажыт балдарга јакшы тем кӧргӱзет. Је ада-энези јууктарын сӱӱбес болзо, ӧскӧртӧ айтса балдарына соок баштанып турган болзо, сӧсуккур болорго кӱч болот. Је качан ада-энези балдарын акту јӱрегинеҥ сӱӱп турза, керек дезе сӧсуккур болоры ченелип те турза, сӧсуккур болорго јеҥил болот. «Менде адамга јарабай турган керектер эдерге кӱӱнзеген учуралдар кӧп болгон — деп, Остин айдат. Је ада-энем тузалу некелтелер тургузып, олорды нениҥ учун бӱдӱрер керек деп јартап беретен ле менле куучындажарга јаантайын белен болгон. Оныҥ учун меге олордыҥ сӧзин угарга јеҥил болгон. Олордыҥ сӱӱжин кӧрӱп, бойымныҥ кылык-јаҥымла олорды сӱӱндирерге кӱӱнзегем».

10, 11. а) Сӱӱш јок улустыҥ кылык-јаҥы кандый? б) Христиандар јуугыҥды сӱӱп јӱр дегенин канайып оҥдоп јат?

¹⁰ Элчи Павел сӱӱш јок улустыҥ оноҥ до ӧскӧ кылык-јаҥын тоолоп айткан. Ол, ада-энезине сӧс укпас болорын бичигениниҥ кийнинде быйаны јок болоры керегинде айдат. Мынайып ээчий-деечий тоологоны сагышту, нениҥ учун дезе быйаны јок улус олорго эдилген јакшыны баалабай јат. Оноҥ ары Павел сӱӱш јок улуста агару не де болбос деп бичийт. Олордо јаражар кӱӱн јок болор. Анайда ок јамандаар, садынчак болор, чокумдап айтса олор улусты, керек дезе Кудайды да, јаман айдар. Ого ӱзеери, калганчы кӱндерде улус копчы (јабарлаачы, ЈТ) болор, ӧскӧртӧ айтса улусты јамандайтан коп таркадарb.

¹¹ Иегованыҥ Керечилери бу телекейдиҥ улузыныҥ кӧбизинеҥ чек башка болот, нениҥ учун дезе олор улусты акту јӱрегинеҥ сӱӱп јат. Олор јаантайын мындый сӱӱштӱ болгон. Иисус айткан «Јуугыҥды сӱӱп јӱр» деген јакылта Моисейдиҥ јасагында экинчи јерде турат, а баштапкы јерде «Кудайыҥды... сӱӱп јӱр» деген јакылта турат (Матф. 22:37—39). Иисустыҥ айтканыла болзо, бой-бойын сӱӱри — чындык христиандардыҥ аҥылу кылык-јаҥы. (Иоанн 13:34, 35 кычырыгар). Чындык христиандар бойыныҥ ӧштӱлерин де сӱӱр учурлу (Матф. 5:43, 44).

12. Иисус улуска сӱӱжин канайып кӧргӱскен?

¹² Иисус улусты акту јӱрегинеҥ сӱӱген. Ол калалар сайын јӱрӱп, Кудайдыҥ Каандыгы керегинде јарлаган. Ол сокорлорды, аксактарды, капкаш балулу улусты ла ӱскерлерди јазып, божогондорды тиргискен (Лука 7:22). Иисусты кӧп улус кӧрӧр кӱӱндери јок то болгон болзо, ол кижиликти аргадап аларга, бойыныҥ јӱрӱмин де берген. Сӱӱжин кӧргӱзеринде ол бойыныҥ Адазына тӱҥейлешкен. Иегованыҥ бастыра јердиҥ ӱстиндеги Керечилери Иисустаҥ тем алып, улуска сӱӱштӱ баштанат.

13. Бистиҥ сӱӱжис улуска Иеговага јууктаарга канайып болужат?

¹³ Улус бистиҥ сӱӱжисти кӧрӱп, теҥеридеги Адабысла јууктада таныжарга кӱӱнзеер болор. Темдектезе, Таиландтагы бир эр кижи регионныҥ курултайында болгон. Ол андагы улустыҥ сӱӱжин кӧрӱп, тыҥ кайкаган. Оныҥ учун айылына јанып келеле, Агару Бичикти бир неделеде эки катап ӱренерге сураган. Ол бастыра тӧрӧӧндӧрине јарлап баштаган. Анайып, јарым јылдаҥ Каандыктыҥ Туразында Агару Бичикти кычыратан баштапкы јакылтазын бӱдӱрген. Слерге јуугыгарга сӱӱштӱ баштанарга келижет пе? Бойыгардаҥ сурагар: «Мен кожо чыккандарыма, јуундагы ака-эјелеримге ле јарлап турган улуска кӱӱнзеп болужадым ба? Мен улуска Иегова ла чылап баштанарга албаданадым ба?»

БӦРӰЛЕР ЛЕ КУРААНДАР

14, 15. Кӧп улуста тындулардый ок кандый кылык-јаҥдар бар? Кезик улус канайып солынган?

¹⁴ Калганчы кӱндерде Агару Бичикте айдылганыла улуста оноҥ до ӧскӧ јаман кылык-јаҥдар болор. Је христиандар олордоҥ тем албас учурлу. Темдектезе, кӧп улус јакшыны јаман кӧрӧр эмезе Агару Бичиктиҥ ӧскӧ кӧчӱрмелеринде айдылганыла «јакшыныҥ ӧштӱлери» болор ло «јакшыны кӧрӧр кӱӱндери јок» болор. Анайда ок тудунбас ла казыр болор. Кезиги сананбас болор, ӧскӧртӧ айтса улустыҥ сезимдерин сананбай, калјуурып турар.

¹⁵ Јерлик тындулардый кылык-јаҥду улустыҥ кӧбизи солынып калган. Мындый кайкамчылу солынталар Агару Бичикте озодоҥ айдылган. (Исаия 11:6, 7 кычырыгарc.) Исаияныҥ судурында, јерлик тындулар, айылдыҥ тындуларыла амыр јӱрер ӧй керегинде айдылат. Темдектезе, бӧрӱ ле карагула кураанла, бозула кожо јӱрер. Нениҥ учун олордыҥ ортозында амыр болор? Агару Бичик мынайып јартайт: «Не дезе јер, талайды толтырган суудый ок, Кудай керегинде билгирле толор» (Иса. 11:9). Је тындуларда Иегова керегинде билгир алар арга јок, айдарда бу судур улуска бӱдер учурлу.

16. Агару Бичик солынарга канайып болужат?

¹⁶ Кӧп улус качан да казыр бӧрӱлердий болгон, је эмди солынып, улусла амыр јадат. Олордыҥ кезиги керегинде «Агару Бичик јӱрӱмди солыйт» деген јӧрмӧлдӧрдӧҥ кычырарга јараар. Иегова керегинде билгирлер алып, ого иштеп тургандарды Кудайга берингендий болор, бойлоры бериништиҥ кӱчин јектеп јадылар деп айдып болбозыҥ. Ӧскӧртӧ айтса, олор Кудайдыҥ ишчилери болуп тӧгӱнденип турган улуска тӱҥей эмес. Карын бойын тудунып билбес болгон улус «чындаптаҥ акту ла агару эдип јайалган јаҥы кижини» кийип аладылар (Еф. 4:23, 24). Олор Кудай керегинде билгирлер алып, оныҥ некелтелерин бӱдӱрер керек деп оҥдоп јадылар. Анайда ок бойыныҥ кӧрӱм-санаазын ла кылык-јаҥын солыырга белен. Бойын солыыры јеҥил неме эмес, је Кудайды сӱӱндирерге тургандарга агару тын болужар.

«АНДЫЙ УЛУСТАҤ КЫЙЫЖЫП ЈӰР»

17. Кудайга јарабай турган кылык-јаҥду улустыҥ салтарынаҥ коруланарга, биске не болужар?

¹⁷ Кудайга иштеп тургандардыҥ ла Кудайга иштебей тургандардыҥ башказы там ла јарт кӧрӱнет. Улустыҥ јаман кылык-јаҥы бистиҥ кӱӱн-санаабыска салтарын јетирбезин деп, ајарыҥкай болор керек. Иегова 2 Тимофейге 3:2—5-теги бичилген кылык-јаҥду улустаҥ кыйыжып јӱригер деп јакарат. Је Кудайга јарабай турган кылык-јаҥду улусла чек куучындашпай јӱрер арга јок. Нениҥ учун дезе андый улус школдо, иште, айылда да бар. Је бис олордыҥ кӧрӱм-санаазын ла јаман кылык-јаҥын алынбас аргалу. Мынайып эдерге не болужар? Агару Бичикти ӱренери ле бистер чилеп Кудайды сӱӱп тургандарла јуук куучындажары болужар. Анайып, бис Иеговала најылык колбуларды тыҥыдып аларыс.

18. Бистиҥ кылык-јаҥыс ла айткан сӧстӧрис улуска Иеговала таныжып аларга, канайып болужар аргалу?

¹⁸ Бис ӧскӧ дӧ улусты Кудайла таныжып алзын деп кӱӱнзейдис. Оныҥ учун куучындажатан аргалар бедирейдис ле улуска чындыкты кандый ӧйдӧ айдатанын ла нени айдатанын башкарзын деп, Иегованаҥ болуш сурайдыс. Бисти Иегованыҥ Керечилери деп улус билип турзын. Ол тушта бистиҥ јакшы кылык-јаҥыс бойыска эмес, је Иеговага мак экелер. Иегова бисти «кычаларын јектеп, эмдиги ӧйдӧ чын сананып, акту јӱрерге ле Кудайга беринип јӱрерге» ӱреткен (Титке 2:11—14). Бойыстыҥ эткен керектерисле Кудайды сӱӱндирерге албаданып турзаас, улус бистиҥ кылык-јаҥысты кӧрӱп, «бис слерле кожо барарыс, нениҥ учун дезе Кудай слерле кожо деп укканыс» дежер болор (Зах. 8:23).