Буурзак Кудайга иштейдис

1. Буурзак деп сӧсти уксаар, слердиҥ санаагарда кандый кижи јуралат?

БУУРЗАК деп сӧсти уксаар, слердиҥ санаагарда кандый кижи јуралат? Болужарга белен, кижини оҥдоп турар, кысканбас кижи јуралар болор. Эмезе слердиҥ санаагарга Иисустыҥ укаа сӧзиндеги јалакай самар кижи кирер болор. Ол тонокчыларга туттуртып, јарым тынду эдип соктыртып салган, бойыныҥ угынаҥ эмес те болзо, еврей кижиге буурзап, сӱӱштеҥ улам болушкан (Лука 10:29—37). Бу укаа сӧс бистиҥ Кудайда бар сӱреен јакшы кылык-јаҥды, буурзашты, кӧргӱзет. Иегова буурзак Кудай, нениҥ учун дезе ол бисти сӱӱп јат. Бис оныҥ мындый кылык-јаҥын кажы ла кӱн кӧрӱп јадыс.

2. Буурзак болоры база недеҥ кӧрӱнет?

² Буурзак болоры база недеҥ кӧрӱнет? Буурзак кижи јастырган кижини капшай ла кату каруузына тургуспас деп сананар аргалу. Сарын 103:10-ло болзо, Иегова бойыныҥ ишчилерине шак ла анайып баштанат: «Ол бисти јастыраларыска келиштире кату каруузына тургуспай јат». Је кезикте Иегова кинчек эткен кижини кату каруузына тургузат.

3. Бу јӧрмӧлдӧ бис кандый сурактар кӧрӧрис?

³ Бу јӧрмӧлдӧ бис ӱч сурак шӱӱжерис: Иегова нениҥ учун буурзак болот? Кату каруузына тургузары буурзак болорын кӧргӱзет пе? Биске нениҥ учун буурзак болор керек? Је эмди бу керегинде Кудайдыҥ Сӧзи нени айдып турганын кӧрӱп ийектер.

ИЕГОВАНЫ БУУРЗАК БОЛОРГО НЕ КӰӰНЗЕДИП ЈАТ?

4. Иегова недеҥ улам буурзак болот?

⁴ Сӱӱш. Павел Ефестегилерге деп самаразыныҥ 2-чи бажалыгында Кудайдыҥ буурзагы керегинде бичиген. Мында ол теҥериде јадар ижемјилӱ, толо кемдӱ эмес майлаткан христиандарга Кудайдыҥ буурзаганы керегинде куучындаган (Еф. 2:4—7). Је Иегова буурзагын јӱк ле майлаткан христиандарга кӧргӱспеген. Давид бойыныҥ сарындарыныҥ бирӱзинде мынайып бичиген: «Иегова ончо улуска јалакай. Оныҥ буурзагы оныҥ ончо керектеринеҥ кӧрӱнет» (Сар. 145:9). Улусты сӱӱп турганынаҥ улам, шылтак бар ла болзо, Иегова буурзагын јаантайын кӧргӱзип јат.

5. Иеговага буурзак болорго јарап турган деп, Иисус кайдаҥ билер?

⁵ Иеговага буурзак болорын кӧргӱзерге сӱреен тыҥ јарап турган деп, Иисус эҥ јакшы билер. Нениҥ учун дезе јерге келердеҥ озо, Иисус Адазыла кожо теҥериде кӧп јылдарга кожо болгон (Укаа 8:30, 31). Кижиликтиҥ бастыра тӱӱкизиниҥ туркунына улустыҥ кинчегине де кӧрбӧй, Иегова олорго јаантайын буурзап туратанын Иисус кӧргӧн (Сар. 78:37—42). Оныҥ да учун Иисус бойыныҥ угаачыларына Адазыныҥ сӱреен јакшы кылык-јаҥына јаантайын ајару эдип туратан.

6. Иисус бойыныҥ Адазыныҥ буурзак болгонын кӧргӱзерге кандый тем тузаланган?

⁶ Иеговага буурзак болорго јарап турганын кӧргӱзерге, Иисус јӱрек томултар, тенибер уул керегинде укаа сӧс айткан. Бу керегинде бис ӧткӧн јӧрмӧлдӧ кӧргӧнис. Бу укаа сӧстӧги уул айылын артыргызып, балыр јӱрӱм јӱрӱп, акчазын ӱреп салган (Лука 15:13). Кийнинде ол кинчегин алынып, бойын јобожыдынып, айылына кайра јанып јат. Оныҥ кайра јанып келгенине адазы канайдар эди? Мыны билерге уулына узак сакыырга келишпеген. Иисус оноҥ ары куучындайт: «Оны адазы ыраагынаҥ кӧрӱп ийеле, ичи ачыган, удура јӱгӱрип келеле, кабыра кучактап, окшой берген». Адазы оны бурулабай, јылу уткыган. Уулы јастырган да болзо, адазы ого буурзап, јаманын таштаган. Нениҥ учун дезе ол кинчегин алынган. Иисус бу укаа сӧстӧги буурзак аданы Иегова болгон деп кӧргӱскен. Иисус бу укаа сӧсти кижиниҥ јӱреги томултар эдип куучындаганынаҥ бистиҥ теҥеридеги Адабыс кинчегин акту јӱрегинеҥ алынган улустыҥ јаманын таштаарга белен деп кӧргӱзет (Лука 15:17—24).

7. Иегованыҥ ойгоры килеҥкей болорыла канай колбулу?

⁷ Ойгор. Иегова ойгорынаҥ улам бистерге буурзап јат. Оныҥ ойгор јӧптӧри биске тузалу болот. Агару Бичикте айдылганыла, «ӧрӧртинеҥ келип турган ойгорлык... буурзашла, јакшы керектерле толо» (Иак. 3:17). Бистиҥ теҥеридеги Адабыс, балдарын килеп турган ада-эне чилеп, бойыныҥ ишчилерин килеер керек деп, оҥдоп јат (Сар. 103:13; Иса. 49:15). Бис јастырып та турзаас, ол биске келер ӧйдӧ сӱреен јакшы ижемји берет. Бистиҥ ойгор Адабыс, бисти килейтен тӧзӧлгӧ бар ла болзо, бистерди јаантайын килеп јат. Је бу ок ӧйдӧ Кудай ойгорынаҥ улам јаман керектерди кӧрбӧӧчи болбой килебей јат.

8. Кинчек эткен ака-эјелерге кезикте кандый кезедӱ болот ло нениҥ учун?

⁸ Ака-эјелердеҥ та кем де биле тура балыр јӱрӱм јӱрӱп турза, бис ого канайып баштанарыс? Апостол Павел андый кижиле куучындашпазын деп бичиген (1 Кор. 5:11). Кинчегин алынбаган кижини јууннаҥ чыгарып салат. Мындый эп-арга Кудайга чындык ака-эјелерди корулап јат ла Иегованыҥ кӧзинде јуун ару артат. Је та кем де, мынайып кату каруузына тургусканын Кудайдыҥ буурзагына келишпей јат деп, сананар болор. Мынайып сананары чын ба? Бу суракты кӧрӱп ийектер.

ЈУУННАҤ ЧЫГАРАРЫ БУУРЗАК БОЛГОНЫН КӦРГӰЗЕТ ПЕ?

9, 10. Јууннаҥ чыгарып салган кижиге Иегованыҥ буурзак болгоны кандый темнеҥ кӧрӱнет? (Еврейлерге 12:5, 6).

⁹ Бистиҥ билер ака-эјелердиҥ та кемизин де, керек дезе најыларыстыҥ та кемизин де јууннаҥ чыгарып салза, биске коркышту јаман болот. Оны јууннаҥ чыннаҥ ла чыгарар керек болгон бо деп, бис оҥдобой до турган болорыс. Кинчегин алынбай турган кижини јууннаҥ чыгарбай турганы ойгор эмести, ого буурзабай, кату баштанып турганын кӧргӱзер (Укаа 13:24). Кижини јууннаҥ чыгарганында туза бар ба? Бар. Јууннаҥ чыгарып салган кӧп ака-эјелердиҥ айтканыла болзо, аксагалдардыҥ мындый јӧп чыгарганы олорго сагыш алынарга, тӱзединерге ле Иеговага кайра јанарга болушкан. (Еврейлерге 12:5, 6 кычырыгар.)

¹⁰ Мындый тем кӧрӱп ийектер. Кӱдӱчи кижи ӱӱрде койлордыҥ кандый бирӱзи ооруп калганын кӧрӱп ийзе, оны ӱӱрдеҥ башкалап јат. Је койлор ӱӱрле јӱрӱп турган мал. Оныҥ учун кой јаҥыскан артып калза, маарап, маҥтап ӱӱрин бедирейт. Айдарда, кӱдӱчи койды эмдеерге јастыра эп-арганы тузаланган ба? Јок эмей. Кӱдӱчи оҥдоп јат, оору койды башкалабаза, ол бастыра ӱӱрдеги койлорды оорыдып салар деп. Оныҥ учун ӱӱрдеги арткан койлорды корулап аларга, ол оору койды башкалап јат. (Левит 13:3, 4 тӱҥдештиригер.)

11. а) Јууннаҥ чыгарып салган кижини нениҥ учун оору койло тӱҥейлеерге јараар? б) Јууннаҥ чыгарылып калган кижи алдындагы ла чылап, нени эдер аргалу ла ого кандый болуш эдилет?

¹¹ Јууннаҥ чыгарып салган кижини бу темдеги койло тӱҥдештирерге јараар. Ол кӧгӱс јанынаҥ оорып калган (Иак. 5:14). Кӧгӱс оору југуш ооруга тӱҥей. Оныҥ учун кезик учуралдарда кӧгӱс јанынаҥ оорып калган кижини чыгарарга келижип јат. Мынаҥ Иегованыҥ бойыныҥ чындык ишчилерине сӱӱжи кӧрӱнип јат. Анайда ок јууннаҥ чыгарып салган кижиге кинчегин оҥдоп, алынзын деп ол болужарга кӱӱнзейт. Јууннаҥ чыгарып салган кижи оорузын эмдерге јуунныҥ туштажуларына јӱрер, бичиктер алып, кычырынар ла JW Broadcasting^®-ги чыгармаларды кӧрӧр аргалу. Кижиниҥ јакшы јанына солынарга албаданып турганын аксагалдар кӧрӱп турза, ого Иеговала колбуларын орныктырарга ла ойто Иегованыҥ Керечизи болуп каларга болужатан јӧптӧр беретb.

12. Кинчегин алынбаган кижиге аксагалдыҥ сӱӱжи ле буурзап турганы канайып кӧрӱнет?

¹² Јууннаҥ јӱк ле кинчегин алынбаган кижини чыгарып јат деп биске ундыбас керек. Оныҥ учун мындый јаан учурлу јӧпти чыгарарга, аксагалдар керекти јазап шиҥдеп, кӧрӱп јат. Иегова кату каруузына ӧйлӱ-кемдӱ тургузып турган деп олор билер, оныҥ учун бойлоры да анайып эдип јат. Олор бастыра ака-эјелерди сӱӱп турганынаҥ улам олордыҥ Иеговала колбулары ӱрелип калбазын деп албаданат. Је андый да болзо, кижини јууннаҥ чыгарып салганынаҥ Иегованыҥ сӱӱжи ле буурзап турганы кӧрӱнет (Иер. 30:11).

13. Коринфтеги бир христиан кижини нениҥ учун јууннаҥ чыгарар керек болгон?

¹³ Баштапкы чакта Коринф калада болгон учуралды кӧрӱп ийектер. Апостол Павелге бир христиан кижи адазыныҥ ӱйиле кожо јуртап турган деп угула берген. Јебрен ӧйдӧ Иегова Израиль албатыга айткан: «Бойыныҥ адазыныҥ ӱйиле кожо јаткан кижи адазын уйатка тӱжӱрет. Олорды ӧлтӱрип салар керек» (Лев. 20:11). Је Павел Моисейдиҥ јасагыла башкарынып, ол кижини ӧлӱмге јаргылар јаҥы јок болгон. Је андый да болзо, Коринфтеги христиандарга ол кижини јууннаҥ чыгарып салзын деп јакарган. Оныҥ балыр јӱрӱми ӧскӧ ака-эјелерге каршузын јетирген. Мынаҥ улам кезик ака-эјелер оныҥ јескинчилӱ кылык-јаҥында јаман неме јок деп кӧргилеген (1 Кор. 5:1, 2, 13).

14. Коринфтеги јууннаҥ чыгарып салган кижиге Павел буурзагын канайып кӧргӱскен ле нениҥ учун? (2 Коринфтегилерге 2:5—8, 11).

¹⁴ Канча да ӧй ӧткӧн кийнинде, бу эр кижи јӱрӱмин солып, чыннаҥ ла кинчегин алынган деп, Павел угуп ийген. Ол эр кижи јуунныҥ адын уйатка да тӱжӱрген болзо, Павел андый кезедӱ ого једер деп оҥдогон. Оныҥ учун ол аксагалдарга мынайып айткан: «Слерге оныҥ бурузын таштап, кооттогоны артык болор». Ол ајаруны неге эткенин кӧрӱп ийзеер де: «Ол тыҥ кунукка алдыртпазын» — деп айткан. Павел кинчегин алынган эр кижиге буурзап, ол тыҥ кунукка алдыртып, кинчеги ташталар деп ижемјизи јылыйбазын деп кӱӱнзеген. (2 Коринфтегилерге 2:5—8, 11 кычырыгар.)

15. Аксагалдар бир ле уунда канайып буурзак болор аргалу ла кату каруузына тургузар аргалу?

¹⁵ Аксагалдарга Иегова ла чылап, буурзагын кӧргӱзерге јарап јат. Олор, тӧзӧлгӧ бар болзо, кинчек эткен кижиге буурзап, оны јууннаҥ чыгарбай јат. Је керек тушта кижини кату каруузына тургузып јат. Оноҥ башка бу буурзаш болбос. Је кинчекти кӧрбӧӧчи болуп, оны ӧткӱрип тургандый болор. Је јӱк ле аксагалдарга буурзак болор керек пе?

БУУРЗАК БОЛОРГО НЕ БОЛУЖАР?

16. Укаа сӧстӧр 21:13-ле болзо, буурзак эмес улуска Иегова канай баштанат?

¹⁶ Кажы ла христиан кижи Иегованаҥ тем алып, буурзак болорго албаданып јат. Нениҥ учун? Шылтактардыҥ бирӱзи: буурзак эмес улустыҥ мӱргӱӱлин Кудай укпас. (Укаа сӧстӧр 21:13 кычырыгар.) Мындый санаадаҥ биске коркымчылу боло берип јат. Оныҥ учун бистиҥ јӱрегисте улуска килебей, олорго ӧткӱре кату баштанып турганыс кӧрӱнип келген болзо, андый кылыкты бойыстаҥ тӱрген ле јоголтор керек. Бис «јокту-јойуныҥ јайнуузын укпаска кулагын бӧктӧп турган» улуска тӱҥей болбоско јадыс. Оныҥ ордына кӱч айалгада болуп калган ака-эјелерге болужарга белен болодыс. Бис Агару Бичиктеги буурзабаган кижиге буурзак јок јаргы болор деген сӧстӧрди ундыбай јадыс (Иак. 2:13). Кажы ла кижи ого улус буурзак баштанзын деп кӱӱнзеп турганын јакшы оҥдоп турзаас, ӧскӧ улуска буурзак баштанарыс. Анчада ла кинчегин алынып, јуунга кайра јанып келген кижиге буурзак баштанар керек.

17. Давидтиҥ чыннаҥ ла буурзак болгоны недеҥ кӧрӱнген?

¹⁷ Улуска буурзак баштанарга ла кату болбоско Агару Бичиктеги темдер болужар. Давидти эске алып ийектер. Ол кӧп учуралдарда чыннаҥ ла буурзак болгонын кӧргӱскен. Темдектезе, Саул каан оны канча катап ӧлтӱрерге албаданган. Је Давид оны Иегованыҥ майлатканы деп оҥдоп, оноҥ ӧч аларга албаданбаган (1 Сам. 24:9—12, 18, 19).

18, 19. Кандый эки учуралда Давидтиҥ буурзак эмези кӧрӱнген?

¹⁸ Је кезик айалгаларда Давидке буурзак болоры јетпей туратан. Темдектезе, кату Навал Давидти јамандап, Давидке ле оныҥ улузына курсак береринеҥ мойноп ийерде, Давид тыҥ ачынып, Навалды ла оныҥ айылындагы бастыра эр улусты ӧлтӱрерге сананган. Бу учуралда Навалдыҥ јобош ло чыдамкай Авигея ӱйи киришпеген болзо, Давид кӧп кан тӧгӧринде бурулу болуп калар эди (1 Сам. 25:9—22, 32—35).

¹⁹ Је эмди база бир учурал кӧрӱп ийектер. Судурчы Нафан Давидке келип, јокту кижиниҥ карузыган койын уурдап апарган бай кижи керегинде куучындаган. Мыны уккан Давид ойто ло тыҥ ачынып: «Иегова Кудайла чертенип јадым, мындый кижини ӧлтӱрер керек!» — деп айткан (2 Сам. 12:1—6). Кандый кату јаргы! Давид кой уурдаган кижи тӧрт катапка кӧп јандырар учурлу деп, Моисейдиҥ јасагын јакшы билген (Чыг. 22:1). Кӧрӧр болзо, Нафан бу сананып тапкан учуралды Давидке оныҥ кинчектери оноҥ јаан деп кӧргӱзерге куучындаган. Је Иегованыҥ Давидке буурзак баштанганы Давидтиҥ ол кижиге чыгарган јаргызынаҥ канча киреге јаан болгон (2 Сам. 12:7—13).

20. Давидтиҥ учуралынаҥ бис неге ӱренедис?

²⁰ Ајардаар ба, Давид ачынала, Навал ла оныҥ улузын ӧлтӱрерге сананган. А кийнинде Давид Нафанныҥ куучындаган бай кижини ӧлӱмге јаргылап салган. Бу экинчи учуралды јазап кӧрӱп ийектер. Јалакай кижи нениҥ учун улусты кату јаргылап баштаган. Мыныҥ шылтагын билерге алдындагы болгон учуралды кӧрӧр керек. Ол тушта Давидтиҥ уйады ару эмес болгон. Ӧйинеҥ ӧткӱре кату болоры ла улусты јаргылаары кижиниҥ кӧгӱзи уйадап калганын кӧргӱзет. Оныҥ учун Иисус бойыныҥ ӱренчиктерине мынайып айткан: «Јаргылабагар, ол тушта слерди де јаргылабас. Кандый јаргыла јаргылаарыгар, анайып ла бойыгарды јаргылаар» (Матф. 7:1, 2). Айдарда, биске ӧйинеҥ ӧткӱре кату болорыла, улусты јаргылаар кылык-јаҥла тартыжар керек. Анайып, буурзак Иегова Кудайыстаҥ тем аларыс.

21, 22. Буурзап турганысты канайып кӧргӱзерис?

²¹ Буурзак болоры јӱк ле килеп турары эмес. Буурзап турары керектердеҥ кӧрӱнет. Оныҥ учун бистиҥ кажыбыска ла улуска кандый болуш керек болуп турганын кӧрӱп турар керек. Бойыстыҥ айылдагы улуска, јуундагы ака-эјелерге ле айылдаштарыска. Бисте буурзап турганысты кӧргӱзетен айалгалар сӱреен кӧп. Темдектезе, та кемди де токунадар, кемге де айылына болужып берер эмезе курсак-тамакла болужып берер. Анайда ок јуунга јаҥы ла јанып келген улуска болуш керек болуп јат. Олорло кожо најылажыгар. Је буурзак болорын кӧргӱзетен эҥ јакшы арга — улуска Агару Бичиктеги сӱӱнчилӱ јарды куучындаары (Иов 29:12, 13; Рим. 10:14, 15; Иак. 1:27).

²² Биске айландыра улуска буурзагысты кӧргӱзетен эп-аргалар сӱреен кӧп. Оныҥ учун улуска кандый болуш керек болуп турганын кӧрӱп турактар. Анайып, Теҥеридеги Адабысты, буурзагын кӧргӱзип турган Кудайды, сӱӱндирерис!