Сен Кудайла колбуларыҥды канайып орныктырар аргалу?

ХРИСТИАН јуунда кажы ла јыл чыгардырып салган кӧп ака-эјелер орныктырылат. Мынаҥ улам теҥериде јаан сӱӱнчи болот! (Лука 15:7, 10). Јуунга сениҥ кайра јанарыҥды Иегова, Иисус ла ангелдер сӱреен тыҥ сакыган. Је андый да болзо, сеге Кудайла колбуларыҥды орныктырарга кӱч болордоҥ айабас. Сенде кандый кӱчтер болордоҥ айабас? Бу кӱчтерди ӧдӧргӧ сеге нени эдер керек болор деп кӧрӱп ийектер.

КАНДЫЙ КӰЧТЕР БОЛОРДОҤ АЙАБАС?

Јуунда орныктырылып калган кӧп ака-эјелер јаман санаага алдыртат. Темдектезе, Давид каанныҥ кинчегин Иегова таштап салган да болзо, ол мынайып айткан: «Кинчектерим мени јыга базып салган» (Сар. 65:3; 40:12). Мынайып ла кӧп ака-эјелер јуунга орныктырылып калган да болзо, канча јылдардыҥ туркунына уйалып, бойлорын бурулап јадылар. Јууннаҥ чыгарылганы 20 јылдаҥ ажып калган Изабельa деп эје мынайып айткан: «Иегова мениҥ кинчегимди таштап салган деп бӱдерге кӱч болот». Мындый јаман санааларга алдыртып турзаҥ, кӧгӱс јанынаҥ ойто уйадай берериҥ (Укаа 24:10). Оныҥ учун мындый неме болуп калбазын деп, тыҥ албадан.

Кезик ака-эјелер Иеговала колбуларын орныктырарга керектӱ кӧп немени эдип болбос деп санааркап јадылар. Јуунга кайра јанып келген Антуан ака айдат: «Јууннаҥ чыгарылардаҥ озо болгон христиан јӱрӱмле колбулу ончо немени ундып салгам деп билдирген». Мындый санаалардаҥ улам орныктырылган кезик ака-эјелер јуунныҥ керектерине эрчимдӱ туружып болбой јат.

Јаан јотконноҥ улам туразы јемирилип калган кижини сананып ийзеер. Тураны јазарга андый кӧп ийде-кӱч ле ӧй барарын сананала кижиниҥ нени де эдер кӱӱни келбей барардаҥ айабас. Анайып ла уур кинчек эткен кижиниҥ Кудайла колбулары тыҥ ӱрелип калган. Эмди Кудайла колбуларды орныктырарга ого тыҥ албаданар керек болор. Је андый кижи болуш јок артпас.

Иегова сени кычырып јат: «Кел. Керектеристиҥ аайына чыгак» (Иса. 1:18). Кудай сени оныла колбуларыҥды орныктырарга кӧпти эткениҥ учун тыҥ баалап јат. Сени кӧрӱп, Иегова Сатананыҥ јамандап турганына каруу берер аргалу! (Укаа 27:11).

Иеговага кайра јанып, сен ого јууктап калдыҥ, ол до сеге јууктаар деп сӧзин берет (Иак. 4:8). Мындый алтам эткениҥе јуундагы ака-эјелер тыҥ сӱӱнип јат. Је эҥ учурлузы сеге теҥеридеги Адаҥга, најыҥга, Иегова Кудайга, сӱӱжиҥди тыҥыдар керек. Мыны эдерге сеге не болужар?

ЈЕДИНГЕДИЙ АМАДУЛАР ТУРГУС

Сеге эмди нени эдер керек деп сананып кӧр. Сениҥ кӧгӱс тӧзӧлгӧҥ ӱрелбеген. Нениҥ учун дезе Иегова ла оныҥ амадузы керегинде тӧс билгирлерди ундыбагаҥ. Андый болордо, сеге нени орныктырар керек? Кӧгӱс керектерди. Темдектезе, јарлаар ишке туружарын, јуунныҥ туштажуларына јӱрерин ле ака-эјелерле куучындажарын. Сеге мындый амадулар болужар.

Јаантайын Иеговага мӱргӱп тур. Сен бойыҥды бурулап турганыҥнаҥ улам мӱргӱӱрге кӱч болордоҥ айабас деп, Иегова Адаҥ оҥдоп јат (Рим. 8:26). Је андый да болзо, ол бисти ого јаантайын мӱргӱзин деп кӱӱнзедет (Рим. 12:12). Иеговага јуук најы болорго тыҥ кӱӱнзеп турганыҥды айдып тур. Андрей ака мынайып куучындаган: «Меге коркышту уйатту болгон ло бойымды јаантайын бурулап туратам. Је кажы ла мӱргӱӱлдиҥ кийнинеҥ јӱрегиме амыр болуп, мындый сезимдер ӧдӧ беретен». Мӱргӱӱлде нени айдарын билбей турзаҥ, кинчегин алынган Давид каанныҥ 51 ле 65 Сарында бичиген сӧстӧрин кычырып кӧр.

Агару Бичикти јаантайын шиҥдеп тур. Бу сени кӧгӱс јанынаҥ ийде-кӱчтӱ эдер ле Иегованы оноҥ тыҥ сӱӱрге болужар (Сар. 19:7—11). Филипп ака айдат: «Алдында мен Агару Бичикти јаантайын кычырып, шиҥдебей турганымнаҥ кӧгӱс јанынаҥ уйадап, Иегованы артыргызып салгам. База мынайып јастырбаска Агару Бичикти јаантайын шиҥдеерге албадангам». Сен де мынайып эдер аргалу. Је нени шиҥдеерин билбей турзаҥ, кӧгӱзи тереҥ најыҥнаҥ болуш сура.

Ака-эјелерле ойто најылажып башта. Јуунга кайра јанып келген ака-эјелер јуундагы улус оны јаман кӧрӧр деп сананат. Лариса эје эске алат: «Меге коркышту уйатту болгон. Мен ака-эјелерди садып ийгем деп санаалу узак јӱргем». Аксагалдар ла кӧгӱзи тереҥ ака-эјелер сеге Иеговала колбуларыҥды орныктырарга болужар деп, бир де алаҥзыба. («Аксагалдар нени эдер аргалу?» деген рамканы кӧр.) Олор сениҥ кайра јанып келгениҥе сӱӱнип, сеге эҥ јакшыны кӱӱнзеп јат! (Укаа 17:17).

Сеге јуунныҥ улузына јууктарга не болужар? Јуунныҥ туштажуларын бир де божотпой, ака-эјелерле јаантайын јарлаарга албадан. Нениҥ учун мынайып эдер керек? Феликс ака айдат: «Ака-эјелер мениҥ кайра јанып келеримди тыҥ сакыган. Олор мени јылу уткыган. Олордыҥ кажызы ла мен ойто кӧгӱс биледе, Иегова мениҥ јаманымды таштап салган ла мен оноҥ ло ары Иеговага иштеер аргалу деп оҥдоорго болушкан». («Сен нени эдер аргалу?» деген рамканы кӧр.)

Сен нени эдер аргалу?

Бойыҥныҥ кӧгӱс јӱрӱмиҥди шиҥдеп кӧр.

ИЕГОВАГА ЈААНТАЙЫН МӰРГӰП ТУР

Ойто оныҥ најызы болорго тыҥ кӱӱнзеп турганыҥды куучында. Аксагалдар база сен учун бойлоры да, сениле кожо до мӱргӱӱр.

АГАРУ БИЧИКТИ ЈААНТАЙЫН ШИҤДЕП ТУР

Бу сени кӧгӱс јанынаҥ ийде-кӱчтӱ эдер ле Иегованы оноҥ тыҥ сӱӱрге болужар.

АКА-ЭЈЕЛЕРЛЕ ОЙТО НАЈЫЛАЖЫП БАШТА

Олорло кожо јарла, јаантайын куучындажып тур ла јуунныҥ туштажузын бир де божотпо.

ЧӦКӦБӦ!

Иеговала колбуларыҥды орныктырып турганыҥды кӧрӱп, Сатана тегин отурбас (Лука 4:13). Ол сениҥ ийде-кӱчиҥди айрыырга, оноҥ ары јаҥы јоткондор ийер. Оныҥ учун тудуп јаткан кӧгӱс тураҥ бек болзын деп, Иеговала колбуларыҥды тыҥыт.

Иегова баалу койлоры керегинде мынайып айдат: «Јылыйып калганды табып аларым, уурдап апарылганын кайра экелерим, шыркалатканын таҥып саларым, ооруганын јазып саларым» (Иез. 34:16). Иегова качан да оныла кожо колбулары бузулып, уйадап калган кӧп ака-эјелерге болушкан. Ол сеге де колбуларыҥды орныктырарга ла кӧгӱзиҥ оноҥ бек болуп калзын деп болужар.

Аксагалдар нени эдер аргалу?

Аксагалдар, слерде јуунга кайра јанып келген ака-эјелерге Иеговала колбуларын орныктырарга болужатан кӧп аргалар бар. Бу аргаларды кӧрӱп ийектер.

Сӱӱжигерди кӧргӱзигер. Апостол Павел кинчегин алынган Коринфтеги ака «тыҥ кунукка алдырт[кан]» болор деп оҥдогон (2 Кор. 2:7). Ол кижи бойын бурулап, тыҥ уйалып турган болор. Оныҥ учун Павел јуунга оныҥ кинчегин акту јӱректеҥ таштап, токунатсын деген. Јуунга орныктырылган ака-эјелерге Иегованыҥ ла ака-эјелердиҥ сӱӱжи керек болуп јат. Оныҥ учун олор тыҥ кунукпазын деп, олорды мактап, болужып туругар.

Кожо мӱргӱгер. «Акту кижиниҥ тыҥыдылган мӱргӱзи кӧпти эдер аргалу» (Иак. 5:16). Лариса эје куучындайт: «Мен аксагалдарга неде алаҥзып, недеҥ коркып турганымды куучындайтам, а олор мениле кожо мӱргӱп туратан. Олор меге ачынбаган, карын Иеговала колбуларымды орныктырарга болужарга турганын оҥдогом». Тео ака айдат: «Аксагалдардыҥ мӱргӱӱлдери Иегова мени чыннаҥ ла сӱӱп турган ла мениҥ јаманымды эмес, је јакшыны кӧрӱп турган деп оҥдоорго болушкан».

Олорло најылажыгар. Јуунга јанып келген ака-эјелерге најылар керек болуп јат. Аксагал болуп турган Джастин ака мындый јӧп берет: «Олорло кожо кӧптӧдӧ јарлап, олордӧӧн айылдап туругар. Олор слерле најылажарга тыҥ кӱӱнзеп јат!» Хенри деп аксагал куучындаган: «Аксагал орныктырылган ака-эјелерле куучындажып турза, јуунда ака-эјелер база анайып ла эдерге албаданар».

Шиҥдеерге болужыгар. Кӧгӱзи тереҥ најылар јуунга кайра јанып келген ака-эјелерге Агару Бичикти ойтодоҥ јаантайын кычырарга ла шиҥдеерге болужар аргалу. Дарко деп аксагал куучындайт: «Олор Агару Бичикти шиҥдеерге кӱӱнзей берзин деп, мен табып алган кӧгӱс кӱмӱштерди куучындап турадым. Анайда ок кандый бир теманы кожо шиҥдеп ийек деп айдадым». А Клейтон деп аксагал мынайда айдат: «Орныктырылган ака-эјелерди Агару Бичиктеҥ олордо ошкош уур-кӱчтерлӱ улустыҥ темдерин таап, бойына кандый туза аларын шӱӱп сананзын деп кӱӱнзедедим».

Олорды јакшы кичеегер. Јуунга орныктырылган ака-эјелер јууннаҥ чыгарылып јаткан ӧйдӧ слерди јаргычылар деп кӧргӧн. Је эмди дезе олорды кичееп, јакшы кӱдӱчилер болыгар (Иер. 23:4). Олорды лаптап угугар, мактагар ла јаантайын куучындажып туругар. Маркус деп аксагал бойыныҥ ченемелиле ӱлежип, мынайда куучындайт: «Андый ака-эјелерле куучындашкан ӧйдӧ Агару Бичиктиҥ шӱӱлтелерин шӱӱжедис, олорды мактап јадыс ла јуунга кайра келерге албаданганы учун Иегова да, бис те оморкоп јадыс деп бӱдӱмјилейдис, оноҥ база катап качан јолугарысты куучындажып аладыс».

a Бу јӧрмӧлдӧ улустыҥ ады-јолын солып салган.