Бир де алаҥзыбай, чындыктаҥ бек тудуныгар!

1. Улус кандый кудай јаҥ чын деп, нениҥ учун оҥдобой јат?

МУҤДАР тоолу кудай јаҥдар бойлорын христиандар деп аданып, јӱк олордыҥ кудай јаҥы чын деп айдыжат. Оныҥ учун мындый сурак чыгат: Бу кудай јаҥдардыҥ јӱк ле бирӱзи чын ба, эмезе Кудайга кижи кандый да кудай јаҥда болзо, башказы јок по? Оныҥ да учун кӧп улус кандый кудай јаҥ чын деп оҥдобой јат! А бис, Иегованыҥ Керечилериниҥ ӱредӱлери чын ла Кудай бистиҥ бажыруны јарадып турган деп, бир де алаҥзыбай турганыс па? Бистиҥ мындый бӱдӱмјибис тӧзӧлгӧлӱ бе? Кӧрӱп ийектер.

2. 1 Фессалоникадагыларга 1:5-ле болзо, Павел чындыкты табып алган деп, нениҥ учун бир де алаҥзыбаган?

² Апостол Павел чындыкты таап алган деп, бир де алаҥзыбаган. (1 Фессалоникадагыларга 1:5 кычырыгар.) Оныҥ мынайып бӱткени јӱк ле сезимдерге тӧзӧлӧнбӧгӧн. Ол Кудайдыҥ сӧзин јазап шиҥдеп, «ончо Агару Бичик Кудайдыҥ Тыныла берилген» деп бӱткен (2 Тим. 3:16). Ол мынайып шиҥдеп, Иисус — судурлалган Мессия деп керелер табып алган. Је иудей кудай јаҥныҥ башчылары мыны керекке албагандар. Олор Кудайды билерис дежетен, је бойлоры Кудайга јарабас керектер эдетен (Тит. 1:16). Павелдиҥ Агару Бичикке кӧрӱми чек башка болгон. Ол бу бичиктиҥ ӱредӱлериниҥ кандыйына бӱдетен, кандыйына бӱтпейтенин талдабаган. Карын, «бир де јажырбай, Кудайдыҥ амадузын» куучындап туратан (Ап. ижи 20:27).

3. Бис ончо сурактарыстыҥ карууларын таппаган да болзоос, чындыкты таап алганыс деп айдып болорыс па? («Улус „чындык Кудайдыҥ ончо керектерин учына јетире качан да аайлап болбос“» деген рамканы кӧрӱгер.)

³ Кезик улус чын кудай јаҥ олордыҥ ончо сурактарына каруузын берер учурлу деп сананат. Керек дезе, Агару Бичикте чокум каруу јок то болзо. Је мындый болор аргазы бар ба? Апостол Павелдиҥ темин кӧрӱп ийектер. Ол ака-эјелерди «ончозын ченеп кӧрӱгер» деп кӱӱнзеткен (1 Фес. 5:21). Је Павел кезик немелерди оҥдобой турган деп билген. Оныҥ учун ол айткан: «Бистиҥ билерис кезектей... Эмди кӱскӱдеҥ чилеп, боромтык сӱрди кӧрӱп јадыбыс» (1 Кор. 13:9, 12). Павел кезик немелерди бис ле чилеп јетире оҥдобой турган болгон. Је ол Иегова керегинде тӧс чындыктарды јакшы билген. Мынаҥ улам ол чындыкты таап алган деп, бир де алаҥзыбаган.

4. Чындыкты таап алганыс деп, бис канай бӱдӱмјиленер аргалу? Бу јӧрмӧлдӧҥ чындык христиандар керегинде нени билип аларыс?

⁴ Бис чындыкты таап алганыс деп бӱдӱмјиленерге, Иегованыҥ Керечилериниҥ ӱредӱлерин ле јӱрӱмин Иисустыҥ чындык бажырыш јанынаҥ артыргызып салган темиле тӱҥдештирип кӧрӧктӧр. Бу јӧрмӧлдӧҥ чындык христиандар: 1) чалуларга бажырбай турганын, 2) Кудайдыҥ Иегова деп адын тооп турганын, 3) чындыкты сӱӱп турганын ла 4) бой-бойын сӱӱп турганын билип аларыс.

БИС ЧАЛУЛАРГА БАЖЫРБАЙ ЈАДЫС

5. Иисустыҥ јӱрӱминеҥ Кудайга чын бажырары јанынаҥ нени билип алдыс ла мыны бис канайып тузаланарыс?

⁵ Иисус Иегованы тыҥ сӱӱген, оныҥ учун јӱк ле ого бажырган (Лука 4:8). Ол теҥериде де, јерде де болордо анайып јӱрген. Иисус ӱренчиктерин де јӱк Иеговага бажырзын деп ӱреткен. Ол бойы да, ӱренчиктери де Кудайга бажырарга сӱрлер тузаланбаган. Кудай — кӧскӧ кӧрӱнбес тын. Кижиниҥ кандый да эткен эдими Кудайга јуук та турбас! (Иса. 46:5). Је агарулар деп адалып турган сӱрлерди тузаланып, олорго мӱргӱӱрге јараар ба? Он јасактыҥ экинчизинде мынайып айдылган: «Ӧрӧги турган теҥеридеги, тӧмӧнги турган јердеги... немелердеҥ кандый да чалу этпе. Олорго бажырба да, иштебе де» (Чыг. 20:4, 5). Бу сӧстӧр Кудайга чын эдип бажырарга турган улуска јап-јарт.

6. Иегованыҥ Керечилери Кудайга бажырарга кемнеҥ тем алат?

⁶ Бу телекейдиҥ тӱӱкичилери, баштапкы чактыҥ христиандары јӱк ле Кудайдыҥ бойына бажырган деп айдат. Христиан серкпениҥ тӱӱкизи керегинде бир бичикте айдылганыла, алдындагы христиандардыҥ бажыратан јеринде кандый бир сӱр-темдек тургузар деп куучын боло берген болзо, олор чек јескинер эди (History of the Christian Church). Бӱгӱнги кӱнде Иегованыҥ Керечилери андый ла кӧрӱмдӱ. Бис «агаруларга» да, ангелдерге де, керек дезе Иисус Христоско до мӱргӱбей јадыс. Анайда ок бис јадып турган јеристи де кӧдӱрбей јадыс, ороонныҥ сӱр-темдектерине де бажырбай јадыс. Мынаҥ улам не де болуп калатан болзо, бис Иисустыҥ: «Кайраканга, сениҥ Кудайыҥа [Иеговага], бажыр» — деп сӧстӧриле јӱредис (Матф. 4:10).

7. Иегованыҥ Керечилери бу телекейдиҥ кудай јаҥдарынаҥ незиле аҥыланат?

⁷ Бӱгӱнги кӱнде серкпелердиҥ јарлу, мактулу башчылары тоомјыда болот. Улус андый башчылардыҥ куучынын јакшызынып угуп, олорго арай ла бажыргылабай јат. Олорды угарга болуп серкпелерге ал-камык улус келгилейт, олордыҥ бичиктерин садып алгылайт ла олордыҥ кажы ла айткан сӧзине бӱдӱп, олорго кӧп акча аткаргылап јат. Бу улус Иисустыҥ бойын кӧрӱп ийгилеген болзо, ого мындый јаан ајару эдип, оны керекке алар беди? Је Кудайга чын эдип бажырарга турган улус андый улусты макка кӧдӱргилебей јат. Бис башкарар молјулар берилген эр улусты тооп то турган болзоос, Иисустыҥ «слер ончогор — карындаштар» деген сӧстӧрин ундыбай јадыс (Матф. 23:8—10). Оныҥ учун улусты, ол тоодо кудай јаҥныҥ башкараачыларын, ол эмезе политикалык башкараачыларды кудайлар этпей јадыс. Анайда ок бу телекейдиҥ керектерине де, политиказына да киришпей јадыс. Анайып, бис бу телекейдиҥ христиан кудай јаҥдарынаҥ чек аҥыланып јадыс (Иоанн 18:36).

БИС КУДАЙДЫҤ АДЫН МАКТАП ЈАДЫС

8. Иегова улусты оныҥ адын билип, тузаланзын деп кӱӱнзеп турганы недеҥ кӧрӱнет?

⁸ Бир катап Иисус мынайып мӱргӱген: «Ада, адыҥды мактаткын!» Теҥеридеҥ улу Иегованыҥ ӱни угулды: «Мактаттым. База да мактадарым!» (Иоанн 12:28). Иисус јерде јӱрерде адазыныҥ адын макка чыгарган (Иоанн 17:26). Айдарда, чындык христиандарга Иисус ла чылап Кудайга адыла баштанып, бу атты улуска куучындап, оны јаан кӱндӱ деп кӧрӧр керек.

9. Баштапкы чактыҥ христиандары Кудайдыҥ адын тооп турган деп недеҥ кӧрӱнген?

⁹ Баштапкы чакта христиан јуун тӧзӧлгӧн кийнинде, Иегова ӧскӧ калыктардаҥ «Бойыныҥ адына учурлалган улус» талдап алган (Ап. ижи 15:14). Бу христиандар Кудайдыҥ адыла оморкоп, оны улуска куучындап туратан. Анайда ок Агару Бичикке кирген бичиктерди бичип турарда оныҥ адын база тузаланганb. Анайып, олор бойын чыннаҥ ла Кудайдыҥ адын аданып турган албаты деп кӧргӱскен (Ап. ижи 2:14, 21).

10. Иегованыҥ Керечилери — Кудайдыҥ адын аданып турган албаты деп, кандый керелер бар?

¹⁰ Иегованыҥ Керечилери Кудайдыҥ адын аданып турган албаты болот по? Кезик керелерди кӧрӱп ийектер. Кудай јаҥдардыҥ башчылары Кудайдыҥ адын јажырарга нени ле эдип јадылар. Олор Агару Бичиктиҥ кӧчӱрмелеринеҥ Кудайдыҥ адын јоголтып јат. Бажырар ӧйдӧ Кудайдыҥ адын тузаланбазын деп токтодып јатc. Андый болордо, кем-кем Иегованыҥ Керечилерин Кудайдыҥ адын чын тузаланбай турган деп бурулап болор бо? Улус Кудайдыҥ адын билзин деп, ончоны эдип турган Иегованыҥ Керечилеринеҥ ӧскӧ кудай јаҥ бар ба? Оныҥ учун бис Иегованыҥ Керечилери деп, тегин јерге адалбай јадыс! (Иса. 43:10—12). Анайып, бис Агару Бичиктиҥ «Јаҥы телекей» деп кӧчӱрмезиниҥ 240 миллионноҥ ажыра бичигин кепке базып чыгарганыс. Анда кезик кӧчӱреечилердиҥ јоголтып койгон «Иегова» деп ат керектӱ јерлерде орныктырылып калган. Анайда ок бу ат 1000-наҥ кӧп тилге чыгарылып турган Агару Бичикке тайанган бичиктеристе тузаланылып јат!

БИС ЧЫНДЫКТЫ СӰӰП ЈАДЫС

11. Баштапкы чактыҥ христиандары чындыкты сӱӱген деп недеҥ кӧрӱнген?

¹¹ Иисус, Кудай ла оныҥ амадузы керегинде чындыкты сӱӱген. Ол бу чындык аайынча јӱрӱп, оны улуска куучындаган (Иоанн 18:37). Иисусла кожо јӱрген улус та чындыкты тыҥ сӱӱген (Иоанн 4:23, 24). Темдектезе апостол Петр христиан јаҥды — «чындыктыҥ јолы» деп айткан (2 Петр 2:2). Баштапкы чактыҥ христиандары дезе, чындыкка болуп, Агару Бичикке келишпей турган христиан ӱредӱлеринеҥ, чӱм-јаҥдарынаҥ ла улустыҥ бойы сананып тапкан кӧрӱм-санаадаҥ айрылып калгандар (Кол. 2:8). Анайып ла бӱгӱнги кӱнде чындык христиандар чындыктыҥ јолыла јӱрерге албаданып јат. Олордыҥ бӱдӱмјизи Агару Бичикке тӧзӧлӧнӧт (3 Иоанн 3, 4).

12. Кандый бир солынта эдер керек болзо, Башкару јӧп нени эдет? Нениҥ учун?

¹² Иегованыҥ ишчилери бойлорын Агару Бичикти јакшы билер деп сананбай јат. Кезикте олор библиялык кандый бир ӱредӱни јастыра јартап јат эмезе јастыра башкарулар берип ийет. Је бис мыны кайкабай јадыс. Агару Бичикле болзо, чындык бойыныҥ ӧйинде јартала берзе, Кудайдыҥ ишчилери оны оноҥ јарт оҥдоор (Кол. 1:9, 10). Иегова чындыкты араайынаҥ ачат. Оныҥ учун биске бу чындык там ла јарт боло бербегенче, чыдамкай болуп сакыыр керек (Укаа 4:18). Кезикте Башкару јӧпкӧ алдында чыгарган башкартуларын эмезе кандый бир ӱредӱни оноҥ чын этире јартаарга келижет. Бу телекейдиҥ кудай јаҥдары мындый солынталарды олордӧӧн келип турган улуска ла јаразын деп эдет эмезе бу телекейдиҥ кӧрӱм-санаазына келишсин деп эдип јат. Је бис мындый солынталарды Кудайга јараарга болуп ла ого Иисус канай бажырган, анайып ла бажырарга эдип јадыс (Иак. 4:4). Анайда ок мындый солынталар, телекейдиҥ кӧрӱмин алынып турганыстаҥ улам эмес, је чындык оноҥ јарт болзын деп, албаданып турганыстаҥ улам болуп јат. Чын, бис чындыкты сӱӱп јадыс! (1 Фес. 2:3, 4).

БОЙ-БОЙЫСТЫ ТЫҤ СӰӰП ЈАДЫС

13. Чындык христиандар кандый кылык-јаҥыла аҥыланат? Иегованыҥ Керечилериниҥ бу кылык-јаҥы недеҥ кӧрӱнет?

¹³ Баштапкы чакта чындык христиандардыҥ аҥылу кылык-јаҥы — сӱӱш болгон. Иисус мынайып айткан: «Ортогордо сӱӱш болзо, слерди Мениҥ ӱренчиктерим деп, ончозы танып ийер» (Иоанн 13:34, 35). Бу кылык-јаҥ Иегованыҥ бастыра ишчилерин бириктирип јат. Бис бой-бойысты угы-тӧзисле де, арга-чагысла да ылгабай јадыс. Мындый сӱӱжисле ӧскӧ кудай јаҥдардаҥ аҥыланып јадыс. Мындый сӱӱшти бис јуунныҥ туштажуларында ла курултайларда кӧрӧдис. А бу дезе Иеговага бистиҥ ого бажырып турганыс јарап турганын кӧргӱзет.

14. Бой-бойысты тыҥ сӱӱп турганыс недеҥ кӧрӱнет? (Колоссыдагыларга 3:12—14).

¹⁴ Агару Бичик бисти бой-бойысты тыҥ сӱӱп јӱрзин деп кӱӱнзедет (1 Петр 4:8). Сӱӱштеҥ улам ака-эјелердиҥ јаманын таштап јадыс ла бой-бойыстыҥ јастыраларыска ајару этпейдис. Анайда ок јуундагы ончо улуска, ол тоодо бисти ачындырган да кижиге, кӱндӱзек ле кысканбас болуп јадыс. (Колоссыдагыларга 3:12—14 кычырыгар.) Иегованыҥ албатызын бириктирип турган сӱӱш — бисти чындык христиандар деп кӧргӱзип турган эҥ ле јаан кере болуп јат.

«КУДАЙГА БӰДЕТЕНИ ЈАҤЫС»

15. Бис Кудайга баштапкы чактыҥ христиандары ла чылап бажырып турганыстыҥ база кандый керелери бар?

¹⁵ Бис Кудайга баштапкы чактыҥ христиандары ла чылап бажырып турганыстыҥ база кандый керелери бар? Бӱгӱнги кӱнде јуундар баштапкы ла чакта чылап башкарылат. Бисте аймак кӧрӧӧчилер, аксагалдар ла болушчы ишчилер бар (Флп. 1:1; Тит. 1:5). Анайда ок бӱгӱнги кӱнниҥ христиандарыныҥ эш-нӧкӧрлӧр ортодо колбуларга, секске, кинчегин алынбай турган улуска ла канга кӧрӱми баштапкы христиандардыҥ кӧрӱминеҥ солынбаган (Ап. ижи 15:28, 29; 1 Кор. 5:11—13; 6:9, 10; Евр. 13:4).

16. Ефестегилерге 4:4—6 кандый чындык бичилген?

¹⁶ Иисустыҥ айтканыла, кӧп саба улус бойлорын Христостыҥ ӱренчиктери деп айдыжар, је керектери саҥ-тескери болор (Матф. 7:21—23). Анайда ок Агару Бичикте андый улус: «Тыштыла Кудайга берингендий болор» — деп айдылган (2 Тим. 3:1, 5). «Кудайга бӱдетени јаҥыс» деп, ондо база айдылган. (Ефестегилерге 4:4—6.)

17. Иисустаҥ тем алып, кемдер Кудайга чын бажырат?

¹⁷ Бӱгӱнги кӱнде кемдер Кудайга чын бажырып турган? Кемдер Иисустаҥ ла баштапкы чактыҥ христиандарынаҥ тем алат? Чын каруузы мындый — Иегованыҥ Керечилери. Бис Иегованыҥ билезине кирип турганысты, анайда ок Кудайды ла оныҥ амадузын билип турганысты сӱреен тыҥ баалап јадыс! Анайдарда, оноҥ ло ары бир де алаҥзыбай чындыктаҥ бек тудунып јӱректер!