Агару Бичикти кычырганаар тузалу болзын

1. Иисус Агару Бичимелди сӱреен тыҥ баалаган деп недеҥ кӧрӱнет?

ИИСУСТЫ угарга кандый јакшы болды не! Иисус Агару Бичимелдиҥ ӱлгерлерин јаантайын санаазынаҥ айдып туратан. Јилбилӱ немези дезе, Иисустыҥ сууга чӧҥӱрилген кийнинеҥ јаан удабай айткан сӧстӧри ле божоордоҥ озо айткан кезик сӧстӧри чике ле Агару Бичиктиҥ цитаталары болгон (Јаҥ. т. 8:3; Сар. 31:5; Лука 4:4; 23:46)b. Иисус ӱч јарым јылдыҥ туркунына Агару Бичимелди јаантайын улуска кычырып, цитировать эдип, јартап туратан (Матф. 5:17, 18, 21, 22, 27, 28; Лука 4:16—20).

2. Иисуска Агару Бичимелди јакшы оҥдоорго не болушкан? (Кадарындагы јурукты кӧрӱгер.)

² Иисус јаштаҥ ла ала Кудайдыҥ Сӧзин јаантайын кычырып, угуп туратан. Бого коштой ада-энезиниҥ куучынынаҥ Агару Бичимелдиҥ сӧстӧрин уккан (Јаҥ. т. 6:6, 7)c. Оноҥ Иисус Иосиф ле Марияла кожо кажы ла суббот сайын синагога барып турар болгон (Лука 4:16). Ондо до ол Агару Бичимелдиҥ кычырылганын лаптап уккан болор. Је јаанап келеле, ол бойы кычырып баштаган. Мынаҥ улам Агару Бичимелдерди јакшы оҥдоп, баалап, кийнинде билип алганын тузаланып јӱрген. Темдектезе, Иисуска 12 јаш болордо, ӧргӧӧдӧ мындый учурал болгон: Моисейдиҥ јасагын јакшы билер ӱредӱчилер оныҥ керсӱзин кӧрӧлӧ, карууларын угала, сӱреен кайкагандар (Лука 2:46, 47, 52).

3. Бу јӧрмӧлдӧ бис нени кӧрӧрис?

³ Бис те Кудайдыҥ Сӧзин јаантайын кычырып турзаас, оны тереҥ оҥдоп, сӱӱп турарыс. Је кычырганыстаҥ оноҥ јаан туза аларга нени эдер керек? Мыны оҥдоорго, Моисейдиҥ јасагын јакшы билетен бичикчилерге, фарисейлерге ле саддукейлерге Иисус нени айтканын кӧрӱп ийектер. Бу улус Кудайдыҥ Сӧзин јаантайын кычырган, је оноҥ кандый да ӱредӱ албаган. Оныҥ учун Иисус олорго ӱч немеге јаан ајару этсин деп айткан. Иисустыҥ айтканы биске де болужар: 1) кычырганысты оноҥ јакшы оҥдоорыс, 2) кӧгӱс эрјинелерди оноҥ кӧп табарыс, 3) Агару Бичик бисти тӱзедер.

КЫЧЫРГАНААРДЫ ОҤДОП ТУРУГАР

4. Лука 10:25—29-ла болзо, Кудайдыҥ Сӧзин канайып кычырар керек?

⁴ Кычырганысты оҥдобой турзаас, туза болбос. Иисус јасакты сӱреен јакшы билер бир кижиле куучындашкан. (Лука 10:25—29 кычырыгар, ЈТ.) Бу кижи дезе ӱргӱлји јӱрӱм аларга нени эдер керек деп сураарда, Иисус айткан: «Јасакта не деп бичилген? Оны канайып оҥдоп туруҥ?» Байагы эр кижи ого Кудайды ла јуугын сӱӱри керегинде баштапкы эки јасакты айтты (Лев. 19:18; Јаҥ. т. 6:5). Је оноҥ ары бу эр кижи кандый сурак сураган эди? Ол: «А мениҥ јуугым кем?» — деп сураган. Мынаҥ бу кижи кычырып турганын оҥдобой турганы кӧрӱнип јат. А оҥдобой турганынаҥ улам јасакты јӱрӱминде канайып тузаланатанын билбес болгон.

5. Мӱргӱӱл ле меҥдебей кычырары Кудайдыҥ Сӧзин оҥдоорго канайып болужар?

⁵ Агару Бичикти оҥдоорго слерге мындый јӧптӧр болужар. Кычырардаҥ озо мӱргӱп алыгар. Нениҥ учун дезе Кудайдыҥ болужы јогынаҥ нени кычырганысты оҥдоп болбозыс. Агару тын биске кычырып јаткан тушта санааларыс туура уча бербезин деп болужар. Анайда ок меҥдебезинеҥ кычырып турзагар, материалды јакшы оҥдороор. Темдектезе, Агару Бичикти ӱнденип кычырарга эмезе бойоордыҥ Агару Бичигерди ачып алала, аудиозын угарга јараар. Анайып јӱк ле кӧс эмес, је кулак та иштеп јат. Ол тушта Кудайдыҥ Сӧзи јӱрегерге ле санаагарга тереҥ кирип калар (Иис. Н. 1:8). Кычырып ийген кийнинеҥ база катап мӱргӱп ийигер. Мӱргӱӱлеерде Иеговага оныҥ сыйы, Агару Бичик, учун быйаныгарды айдып, кычырганаарды тузаланарга болуш сурагар.

6. Кычырып јаткан тужыгарда бойоорго сурактар бергенеер ле кыскарта бичигенеер канайып болужар? (Јурукты кӧрӱгер.)

⁶ Тузалу база эки јӧп кӧрӱп ийектер. Бойоорго мындый сурактар беригер: «Мында кемдер керегинде айдылат? Бу кемниҥ сӧстӧри? Ол кемле куучындажат, нениҥ учун? Бу учурал кайда ла качан болгон?» Бу сурактар тӧс шӱӱлтелерди ле бу шӱӱлтелер бой-бойыла кандый колбулу деп оҥдоорго болужар. Анайда ок кыскарта бичигер. Бичип турзаар, кычырган-уккан немегер санаагарга артып калар. Сурактар бичигер, бойоордыҥ нени шиҥдегенеерди бичигер, нени кычырганаардыҥ тӧс шӱӱлтезин база бичип алаар. Анайда ок јӱрӱмеерде бу кычырган немени канайып тузаланарын ла сезимдереерди бичиирге ундыбагар. Мынайып бичинип турзаар, Агару Бичикти Иегованыҥ слерге бичиген самаразы деп кӧрӱп турараар.

7. Агару Бичикти кычырзаас, биске кандый кылык-јаҥ керек болор, нениҥ учун? (Матфей 24:15).

⁷ Иисустыҥ айтканыла болзо, Кудайдыҥ Сӧзин оҥдоп турарга бистерге ӧткӱн болор керек. (Матфей 24:15 кычырыгар.) Бу кылык-јаҥ шӱӱлтелердиҥ бой-бойынаҥ незиле башка болгонын, ол эмезе канайып колбулу болгонын оҥдоорго болужар. Баштап тарый кӧскӧ кӧрӱнбегедий де немени кӧрӧргӧ болужар. Анайда ок Иисустыҥ айтканыла, бӱгӱнги кӱнде судурлар канайып бӱдӱп турганын оҥдоп турарыс ла Агару Бичиктеҥ кычырганысты канайып тузаланарын билер болорыс.

8. Ӧткӱн болоры Агару Бичикти кычырарга канайып болужар?

⁸ Иегова ишчилерине ӧткӱн болорго болужып јат. Оныҥ учун мӱргӱп, бу кылык-јаҥга ӱренип аларга, Иегованаҥ болуш сурагар (Укаа 2:6). Је бойыгардыҥ јаныгардаҥ слер нени эдер аргалу? Агару Бичикти шӱӱп сананып кычырыгар. Кычырып алган немегерди ле мынаҥ озо билгенеерди тӱҥдештирип туругар. Анайда ок Агару Бичикти шиҥдеерге болужатан јепселдерди, темдектезе, «Путеводитель по публикациям Свидетелей Иеговы» деген јепселди тузаланыгар. Бу јепселдер слерге кычырган ӱлгерлердиҥ учурын оҥдоорго ло олорды јӱрӱмде тузаланарга болужар (Евр. 5:14). Кычырып јаткан тушта ӧткӱн болзоор, Агару Бичикти оноҥ јакшы оҥдороор.

КӦГӰС ЭРЈИНЕЛЕР ТАБАРГА КЫЧЫРЫГАР

9. Саддукейлер јаан учурлу кандый чындыкка бӱтпеген?

⁹ Саддукейлер Еврей Бичимелдиҥ беш бичигин јакшы билген де болзо, агару тынла бичилген јаан учурлу чындыктарды керекке албаган. Санаагарга кирет пе, бир катап олор Иисусты ченеп, бир сурак сураган. Иисус олорго мынайып каруу берди: «Моисейдиҥ тӱрбегинеҥ кычырбадыгар ба, канайып Кудай кӱйӱп турган јыраадаҥ ого айтканын: „Мен Авраамныҥ Кудайы, Исаактыҥ Кудайы ла Иаковтыҥ Кудайы“» (Марк 12:18, 26). Бу сӧстӧрди саддукейлер канча да катап кычырган болзо, Иисустыҥ сурагынаҥ олордыҥ тирилиш керегинде чындыкка бӱтпей турганы кӧрӱнет (Марк 12:27; Лука 20:38)d.

10. Агару Бичикти кычырып јатсаас, неге ајару эдер керек?

¹⁰ Бу учуралдаҥ бис неге ӱренедис? Агару Бичикти кычырып јатсаас, оныҥ кажы бир ӱлгеринде эмезе ӱзӱгинде кандый ӱредӱ бичилгенине ајарып турар керек. Анайып бис јаҥыс ла кӧскӧ кӧрӱнип турган тӧс чындыктарды эмес, је эрјинедий јажырылган принциптерди ле чындыктарды кӧрӱп турарыс.

11. Агару Бичиктеҥ кӧгӱс эрјинелер табарга, 2 Тимофейге 3:16, 17 канайып болужар?

¹¹ Кудайдыҥ Сӧзинеҥ кӧгӱс эрјинелерди канайып бедиреерге јараар? Темдектезе, 2 Тимофейге 3:16, 17-деги (кычырыгар) сӧстӧрди кӧрӱп ийектер. Ондо «ончо Бичимел... тузалу» деп айдылат. Агару Бичимел бистерди: 1) ӱредип јат, 2) кинчегисти илезине чыгарат, 3) тӱзедип јат ла 4) таскадат. Је Агару Бичиктиҥ јаантайын кычырылбай да турган бичиктери тузалу деп айдарга јараар. Кажы бир библиялык ӱзӱкти кычырып, слер оноҥ неге ӱренер аргалу деп сананып ийзеер де. Бу ӱлгерде Иегова ла оныҥ амадузы керегинде не айдылат эмезе ондо кандый принциптер бар? Ол эмезе бу ӱлгерлер кинчегисти илезине чыгарарга канайып болужат? Темдектезе, биске Иеговага јарабай турган кылык-јаҥдарыстаҥ айрылып, ого чындык артарга канайып болужып турганын сананып кӧрӱгер. Анайда ок бу ӱзӱк, темдектезе, јарлаар иште улустыҥ јастыра кӧрӱмин тӱзедерге канайып болужарын сананыгар. Бого коштой бу ӱлгерлер биске Иегованыҥ кӧрӱмин алынарга таскадар аргалу. Бу берилген тӧрт јӧпти тузаланзаар, Агару Бичикти кычырганаар тузалу да болор, кӧгӱс эрјинелер де таап турараар.

АГАРУ БИЧИКТИ КЫЧЫРАРЫ СЛЕРДИ СОЛЫЗЫН

12. Иисус фарисейлердеҥ «Кычырбаган бедигер?» деп нениҥ учун сураган?

¹² Иисус фарисейлерге де, Бичимелди улуска јастыра јартап турганын кӧргӱзерге, «Кычырбаган бедигер?» деп сурак берген (Матф. 12:1—7)e. Ол ло куучында фарисейлер Иисустыҥ ӱренчиктерин суббот кӱнди бузып турган деп бурулаган. Иисус олорго Агару Бичимелдеҥ эки тем куучындайла, судурчы Осияныҥ сӧстӧрин айткан. Фарисейлер суббот кӱнди нениҥ учун берилгенин оҥдобой турганынаҥ улам улусты бир де килебеген. Нениҥ учун Агару Бичимел бу эр улусты ӱредип болбогон? Нениҥ учун дезе олор Бичимелди улуска укааркаарга ла болуп кычырган. Мынаҥ улам олор Агару Бичимелдиҥ учурын јарт оҥдобогондор (Матф. 23:23; Иоанн 5:39, 40).

13. Агару Бичикти кандый кӱӱн-санаалу кычырар керек, нениҥ учун?

¹³ Айдарда, биске Агару Бичикти чын кӧрӱм-санаалу кычырар керек. Бу дезе јобош болорын ла ӱренерге белен болорын кӧргӱзет. Биске Кудайдыҥ Сӧзин јобош болуп алынар керек (Иак. 1:21). Јӱк ле ол тушта Агару Бичиктиҥ сӧстӧри бистиҥ јӱрегиске тереҥ кирер. Је бистиҥ кӱӱн-санаас фарисейлердий ошкош болзо, улусты килеерге ле сӱӱрге ӱренип болбозыс.

14. Агару Бичик бисти солып турган ба деп канайып билип алар? (Јурукты кӧрӱгер.)

¹⁴ Агару Бичикти кычырып тура бис солынып турганыс па деп канайып билип алар? Солынып турганы́с айландыра улуска канайып баштанып турганыстаҥ кӧрӱнер. Фарисейлер Кудайдыҥ Сӧзин кычырып тура солынган болзо, «бурулу эместерди бурулабас» эди (Матф. 12:7). Темдектезе, бис улустыҥ јакшызын кӧрӧдис пе, ол эмезе јаманын тоолойдыс па? Оҥдошпостор боло берзе, кижиге килеп, оныҥ јаманын таштап саладыс па? Эмезе оны бурулап, ачынып јӱредис пе? Бу сурактар Агару Бичик бистиҥ санааларысты, сезимдеристи ле керектеристи солып турган ба деп билип аларга болужар (1 Тим. 4:12, 15; Евр. 4:12).

АГАРУ БИЧИКТИ КЫЧЫРАРЫ БИСТИ ЫРЫСТУ ЭДЕТ

15. Иисус Агару Бичимелге кандый кӧрӱмдӱ болгон?

¹⁵ Иисус Агару Бичимелди сӱреен тыҥ сӱӱген. Оныҥ сезимдери Сарын 40:8-те судурлалып калган. Ондо мынайып айдылган: «Сениҥ табыҥды бӱдӱрерге кӱӱнзеп јадым, Кудайым. Сениҥ јасагыҥ мениҥ јӱрегимде». Оныҥ учун ол Иеговага иштеп, ӱзе јанынаҥ једимдӱ ле ырысту болгон. Анайып ла бис Агару Бичикти кычырып, бу бичикти сӱӱрге ӱренип турзаас, ырысту ла ӱзе јанынаҥ једимдӱ болорыс (Сар. 1:1—3).

16. Агару Бичикти кычырганаардаҥ оноҥ јаан туза аларга слер нени эдерге албаданараар? («Иисустыҥ сӧстӧри кычырганаарды оҥдоорго болужар» деген рамканы кӧрӱгер.)

¹⁶ Иисустыҥ сӧстӧри ле теми слерге Агару Бичиктеҥ оноҥ јаан туза аларга болушсын. Оныҥ учун Агару Бичикти кычырып јатсаар, мӱргӱӱрин ундыбагар, меҥдебегер, бойыгарга сурактар беригер ле кычырганаарды кыскарта бичип алыгар. А ӧткӱн болзоос, Агару Бичимелди јазап шӱӱп сананып, оны бистиҥ бичиктердиҥ болужыла шиҥдеп кычырарыс. Анайда ок Агару Бичиктеҥ кӧгӱс эрјинелер табарга албаданып турзаас, биске Агару Бичикти, керек дезе јакшы билбес те ӱлгерлерди тузаланарга јеҥил болор. Бого коштой Агару Бичикти чын кӧрӱм-санаалу кычырганы — солынарга болужар. Айдарда, бу јӧрмӧлдиҥ јӧптӧрин тузаланарга албаданактар. Ол тушта Агару Бичикти кычырганыстаҥ оноҥ јаан туза аларыс ла Иеговага оноҥ јуук болуп каларыс (Сар. 119:17, 18; Иак. 4:8).