Јарлаарга бисти сӱӱш кӱӱнзетсин!

1. Бис 2023 јылдыҥ туштажузында нени билип алганыс?

2023 ЈЫЛДЫҤ јылдык туштажузыa сӱреен кайкамчылу болгон! Анда Агару Бичиктиҥ кезик оҥдомолдоры оноҥ тереҥжиде јарталган. Анайда ок јарлаар иш керегинде кезик јарлар айдылган. Темдектезе, улуста Улу Вавилон јайрадылган кийнинеҥ де чындыкка келетен арга болор ошкош. А 2023 јылдыҥ кӱчӱрген айынаҥ ала јарлаар иштиҥ отчёдына кӧп неме бичибезис деп айдылган. Андый болзо, эмди кӧп јарлабаска јараар ба? Јок, анайып сананбагар.

2. Нениҥ учун кажы ла кӱн оноҥ эрчимдӱ јарлаар керек? (Марк 13:10).

² Нениҥ учун кажы ла кӱн оноҥ кӧп, оноҥ эрчимдӱ јарлаар керек? Нениҥ учун дезе ӧй ас арткан. Иисус калганчы кӱндерде оныҥ ӱренчиктериниҥ эдетен ижи керегинде кандый судур айткан эди? (Марк 13:10 кычырыгар.) Матфей Иисустыҥ сӧстӧрин мынайып бичиген: «Сӱӱнчилӱ Јар јер-ӱстине јарлалар. Ол тушта чак тӱгенер» (Матф. 24:14). Мында Сатананыҥ калју телекейиниҥ учы керегинде айдылат. Иегова ол ӧйдиҥ кӱнин ле саадын тургузып салган (Матф. 24:36; 25:13; Ап. ижи 1:7). Кажы ла ӧткӧн кӱн бисти чак тӱгенер кӱнге јууктадып јат (Рим. 13:11). Је эм тургуза биске јарлаар ишке туружар керек.

3. Бис нениҥ учун јарлайдыс?

³ Мындый суракты шӱӱп сананып ийектер: «Бис нениҥ учун јарлап јадыс?» Јарлаарга бисти сӱӱш кӱӱнзедип јат. Бис јарлап турзаас, сӱӱнчилӱ јарды, улусты, а эҥ учурлузы дезе, Иегованы ла оныҥ адын сӱӱп турганысты кӧргӱзедис. Бу керегинде кӧптӧдӧ куучындажып ийектер.

СӰӰНЧИЛӰ ЈАРДЫ СӰӰП ТУРГАНЫСТАҤ УЛАМ ЈАРЛАЙДЫС

4. Јакшы солундар уксаас, бисте кандый сезимдер болот?

⁴ Јакшы солундар уксагар, слерде кандый сезимдер болот? Темдектезе, слердиҥ тӧрӧӧн кижи балалу болуп калган деп угуп ийген болороор, ол эмезе узак сакыган иш келиже берген болор. Јакшы солунды кижиниҥ капшай ла тӧрӧӧндӧрине ле најыларына куучындаар кӱӱни келет. А эҥ ле јакшы солунды — Кудайдыҥ Каандыгы керегинде сӱӱнчилӱ јарды — угараарда слерде кандый сезимдер болгон?

5. Кудайдыҥ Сӧзиндеги чындыкты баштапкы катап угараарда нени сескенеер? (Јуруктарды база кӧрӱгер.)

⁵ Эмди баштапкы ла катап Кудайдыҥ Сӧзинеҥ чындыкты уккан тужыска кайра барактар. Ол тушта бисти Кудай сӱӱп турган ла бойыныҥ билезине кожуп аларга турган деп билип алганыс. Ол оору-јоболды ла кыйын-шыраны јоголтор, анайда ок бистиҥ божоп калган јуук улузысты райда тиргизер деп билип алганыс (Марк 10:29, 30; Иоанн 5:28, 29; Рим. 8:38, 39; Ачыл. 21:3, 4). Бу чындыктар јӱрегисти коркышту тыҥ томулткан (Лука 24:32). Оныҥ учун бу чындыктарды сӱӱп баштайла, бойыста тудуп болбой барганыс. (Иеремия 20:9 тӱҥдештиригер.)

6. Эрнест ле Розаныҥ учуралы слерди неге ӱредет?

⁶ Бир билениҥ учуралын кӧрӱп ийектер. Эрне́стb 10 јаш кирелӱ болордо, оныҥ адазы божоп калган. Мынаҥ улам уулчак тыҥ кунугып, адазы теҥеридӧӧн барган ба эмезе јок ло болуп калган ба деп билерге кӱӱнзеген. Ол ада-энелӱ балдарга кӱйӱнип туратан. Эрнест арай ла кажы ла кӱн эмес адазыныҥ сӧӧгине келеле, тизеленип: «Оо, Кудай. Мениҥ адам эмди кайда? Сен меге айдып берзеҥ» — деп мӱргӱп туратан. Оноҥ 17 јыл кире ӧткӧн кийнинеҥ Эрнестке Агару Бичикти ӱренетен арга ачыларда, ол сӱреен тыҥ сӱӱнген. Кӧрӧр болзо, божогон улус нени де билбес, олор тереҥ уйкуда уйуктап јаткан улус ошкош ло келер ӧйдӧ тирилер (Эккл. 9:5, 10; Ап. ижи 24:15). Бу чындыктар Эрнесттиҥ кӱӱнин сӱреен тыҥ кӧдӱрген. Канча јылдардыҥ туркунына сананып јӱрген сурактарыныҥ карууларын Эрнест билип алган. Ол Агару Бичиктиҥ чындыктарын сӱреен тыҥ сӱӱп баштаган. Оныҥ ӱйи, Роза, база Агару Бичикти ӱренип баштаган. Ого Агару Бичиктиҥ ӱредӱлери база јараган. Мынайып 1978 јылда олор экӱ сууга чӧҥӱрилген. Оноҥ ло бери олор бу баалу чындыктарды тӧрӧӧн-тугаандарына, најыларына, ӧскӧ дӧ улуска куучындаарга, бир де ийде-кӱчин кысканбай јат. Эрнесттиҥ ле Розаныҥ болужыла 70-неҥ ажыра кижи Иеговала таныжып, сууга чӧҥӱрилген.

7. Библиялык чындыкты акту јӱрегистеҥ сӱӱп турзаас, бисте кандый сезимдер болот? (Лука 6:45).

⁷ Чын ла, Агару Бичиктеги чындыкты сӱӱп турзаас, бис унчукпай отурып болбой јадыс. (Лука 6:45 кычырыгар.) Баштапкы чакта Иисустыҥ ӱренчиктери мынайда айткан: «Нени кӧргӧнисти ле нени укканысты айтпас аргабыс јок» (Ап. ижи 4:20). Андый сезимдер бисте де болот. Бис чындыкты сӱреен тыҥ сӱӱп јадыс. Оныҥ учун оны канча ла кире кӧп улуска куучындаарга кӱӱнзейдис.

УЛУСТЫ СӰӰП ТУРГАНЫСТАҤ УЛАМ ЈАРЛАЙДЫС

8. Улуска сӱӱнчилӱ јарды куучындаарга бисти не кӱӱнзедет? («Улусты сӱӱгер. Ӱренчиктер белетегер» деген рамканы кӧрӱгер.) (Јурукты база кӧрӱгер.)

⁸ Иегова ла оныҥ Уулы, Иисус, улусты сӱӱп турган (Укаа 8:31; Иоанн 3:16). Бис олордоҥ тем алып, улусты килеп јадыс, нениҥ учун дезе олор Кудай јок јӱрген ле неге де иженер аргазы да јок (Эф. 2:12). Олор бу јӱрӱмниҥ кӱчтерине кӧмӱлип јаткан, а бисте олорго аргаданыш беретен Каандык керегинде сӱӱнчилӱ јар бар. Улусты сӱӱп ле килеп турганыстаҥ улам олорго сӱӱнчилӱ јарды куучындаарга, келишкен ле арганы тузаланарга албаданадыс. Бу јар олорго эмдештеҥ ле ала сӱӱнчилӱ болорго болужат, а келер ӧйдӧ ӱргӱлјиге јӱретен арга берет (1 Тим. 6:19).

9. Бис улуска не керегинде јарлап јадыс? Нениҥ учун? (Иезекииль 33:7, 8).

⁹ Анайда ок улусты сӱӱгенистеҥ улам олорго удабас калју телекей јоголтылар деп куучындап јадыс. (Иезекииль 33:7, 8 кычырыгар.) Иегованыҥ Керечилери эмес улусла, ол тоодо тӧрӧӧндӧрисле, не болорын сананып ла ийзеес, јӱрегиске ачу боло берет. Нениҥ учун дезе олор «јер бӱдердеҥ бери эмдиге јетире болбогон, соҥында да болбос... улу тӱбек болор» деп, бир де билбей јадылар (Матф. 24:21, ЈТ). Оныҥ учун бис олорго Иегованыҥ јаргызы болотон кӱнде не болорын айдып саларга кӱӱнзейдис. Озо баштап тӧгӱн кудай јаҥдар јоголтылар, оноҥ Армагеддондо бастыра калју телекей јоголтылар (Ачыл. 16:14, 16; 17:16, 17; 19:11, 19, 20). Кӧп-кӧп улусты бу јарды угуп, бисле кожо ару бажырышка кожулзын деп мӱргӱп јадыс. Је эм тургуза укпай турган улус керегинде, ол тоодо бистиҥ тӧрӧӧндӧрис керегинде, нени айдарга јараар?

10. Удабас не болорын нениҥ учун эмди ле јарлаар керек?

¹⁰ Ӧткӧн јӧрмӧлдӧ јарталганыла болзо, улус тӧгӱн кудай јаҥдардыҥ јоголтылып јатканын кӧрӱп ийеле, Кудайга бӱде берзе, Иегова олорды аргадап алардаҥ айабас. Андый болотон болзо, Улу Вавилонныҥ јайрадылары керегинде јарлаары сӱреен керектӱ болуп јат. Сананып ийигер: бистиҥ эмдиги айткан сӧстӧрис келер ӧйдӧ улустыҥ санаазына кирип келер болор. (Иезекииль 33:33 тӱҥдештиригер.) Байла, бистиҥ айтканыс олордыҥ санаазына кире берзе, олор ару бажырышка, орой болголокто, кожулар болор. Темдектезе, Филиппыда тӱрмеде отурган кижи Иисустыҥ сӧстӧрине јӱк ле кенетийин «тыҥ јер силкинерде» бӱдӱп баштаган (Ап. ижи 16:25—34). Анайда ла ок кенете ле Улу Вавилон јемирилзе, кезик улус санаа алынар болор. Сӱӱнчилӱ јарды эмди алынбай турган улустыҥ кӧрӱми келер де ӧйдӧ солынбас деп сананбас керек.

ИЕГОВАНЫ ЛА ОНЫҤ АДЫН СӰӰП ТУРГАНЫСТАҤ УЛАМ ЈАРЛАЙДЫС

11. Иегова Кудайыска макты, кӱндӱни ле кӱчисти канайып бередис? (Ачылта 4:11). (Јуруктарды база кӧрӱгер.)

¹¹ Улуска јарлап турганыстыҥ эҥ јаан шылтагы — бис Иегованы ла оныҥ агару адын сӱӱп турганыс. Јарлаар ишти бис теҥеридеги сӱӱген Адабысты мактайтан арга деп кӧрӧдис. (Ачылта 4:11, ЈТ кычырыгар.) Оныҥ учун «сен, Иегова, бистиҥ кӱчтӱ Кудайыс, макты, кӱндӱни ле кӱчти аларга јарамык» деп сӧстӧрлӧ акту јӱрегистеҥ јӧпсинип јадыс (Ачыл. 4:11, сноска, ЈТ). Иегова «ончоны јайаган» ла бистиҥ јӱрӱмис оноҥ камаанду деп, улуска керелер куучындап турзаас, Кудайыска макты ла кӱндӱни јетиредис. А качан јарлаар ишке ӧйисти, чыдалысты, акча-јӧӧжӧбисти, канча кире аргабыс бар, берип турзаас, бис Иеговага ийде-кӱчисти бередис (Матф. 6:33; Лука 13:24; Кол. 3:23). Биске мыны эдерге јарап турган, нениҥ учун дезе бис теҥеридеги Адабысты сӱӱп јадыс. Анайда ок оныҥ адын улуска айдарга ла ол кандый Кудай деп куучындаарга кӱӱнзейдис. Нениҥ учун?

12. Јарлаар ижисле Иегованыҥ адын канайып агарулайдыс?

¹² Бис Иегованы сӱӱп јадыс, бу сӱӱш бисти оныҥ адын агарулаарга кӱӱнзедет (Матф. 6:9). Кудайдыҥ адын Сатананыҥ јескинчилӱ јабарынаҥ арутаарга кӱӱнзейдис (Баш. 3:1—5; Иов 2:4; Иоанн 8:44). Сӱӱнчилӱ јарды угарга тургандарга Кудайыс керегинде чынды куучындаарга албаданадыс, нениҥ учун дезе чындыкты улус бис ле чилеп билзин деп кӱӱнзейдис. Иегованыҥ эҥ јаан кылык-јаҥы — сӱӱш. Оныҥ башкарузы чындык ла чын. Кудайдыҥ Каандыгы удабас кыйын-шыраны јоголтып салар, улуска амыр ла сӱӱнчи экелер (Сар. 37:10, 11, 29; 1 Иоанн 4:8). Иегова керегинде чындыкты куучындап турзаас, оныҥ адын агарулайдыс. Биске Кудайыстыҥ адын аданарга бойыска да јарап јат. Бис нени айдарга турганыс?

13. Бис Иегованыҥ Керечилери деп аданганысла нениҥ учун оморкоп јадыс? (Исайя 43:10—12).

¹³ Иегова бисти бойыныҥ керечилери эдип талдап алган. (Исайя 43:10—12 кычырыгар.) Башкару јӧптиҥ самараларыныҥ бирӱзинде бу керегинде мындый шӱӱлте болгон: «Иегованыҥ Керечизи деп атты аданары — кижиге берилген эҥ јаан кӱндӱ»c. Нениҥ учун мынайып айдарга јараар? Темдектезе, слерди бир кижи бурулап турган болзын. Је слер јаман нени де этпегенеер, кандый бир керекте бурулу эмезеер. Оныҥ учун слердиҥ аданаарды алатан керечи керек болот. Слер кандый кижини талдаар эдеер? Кемди јакшы билереер, кемге бӱдӱп турганаар, андый кижини талдаар эмезеер бе? Улустыҥ кӧзинде тоомјылу кижини дезеер? Анайып ла Иегова бисти бойыныҥ Керечилери эдип талдап алганыла, бисти јакшы билер деп кӧргӱскен. Анайда ок бис улуска Иегова сок јаҥыс чындык Кудай деп јарлаарыска бӱдӱп јат. Иегованыҥ Керечилери болотоны — биске сӱреен јаан кӱндӱ. Оныҥ да учун улуска Кудайдыҥ адын ачатан ла оныҥ адын актайтан кандый ла арганы божотпоско албаданадыс. Анайып бис Иегованыҥ Керечилери деп аданганысты калас эмес деп ле оныла оморкоп турганыс деп кӧргӱзедис (Сар. 83:18; Рим. 10:13—15).

УЧЫНА ЈЕТИРЕ ЈАРЛААРЫС

14. Удабас не болор?

¹⁴ Бис келер ӧйдӧҥ нени сакып јадыс? Иегова јарлаар ижиске алкыжын берер деп ле улу тӱбек башталгалакта, база да кӧп улус чындыкка келер деп иженип јадыс. Анайда ок кижиликтиҥ тӱӱкизинде эҥ ле кӱч ӧйлӧр болотон тушта, улу тӱбектиҥ ӧйинде, улуста Сатананыҥ ӧлӱп јаткан телекейинеҥ чыгып, биске кожулып, Иегованы мактайтан арга болор деген шӱӱлте сӱӱндирип јат (Ап. ижи 13:48).

15, 16. Бис кандый ишти оноҥ ло ары эдерис ле оны кандый ӧйгӧ јетире эдерис?

¹⁵ Эм тура бисте иш баштаҥ ажыра. Бис качан да база болбойтон иш эдедис — Кудайдыҥ Каандыгы керегинде сӱӱнчилӱ јарды бастыра јердиҥ ӱстинде јарлайдыс. Је анайда ок бу телекейдиҥ учы коркышту тӱрген јууктап келеткенин айдар керек. Ол тушта Иегованыҥ јаргы эдетен кӱни једип келзе, бистиҥ јарыс Иегованаҥ болгон деп, улус оҥдоп ийер (Иез. 38:23).

¹⁶ Айдарда, бу јӧрмӧл бисти неге кӱӱнзедет? Сӱӱшке кӱӱнзедет. Сӱӱнчилӱ јарды, улусты, эҥ ле керектӱзи, Иегованы ла оныҥ адын сӱӱрге кӱӱнзедет. Ол тушта Иегова Кудайыс: «Иш божогон!» — деп айтканча ла јарлаар ишке акту јӱрегистеҥ эрчимдӱ туружарыс.