Иисус ла чылап эрчимдӱ јарлагар

1. Иегованыҥ ишчилери нези ле башка болот?

ИЕГОВАНЫҤ ишчилери бойын христиандар деп аданып турган улустаҥ нези ле башка болот? Олор сӱӱнчилӱ јарды јарлаарында эрчимдӱ туружат (Тит. 2:14). Је кезикте јарлаар ишке барарга тыҥ ла кӱӱн јок болуп јат. Бир иштеҥкей аксагал мынайып айдат: «Мен кезикте јарлаар ишке чек ле албан кӱчле барып јадым». Слерде де андый сезимдер болгон болор.

2. Нениҥ учун кезикте јарлаар ишке барар кӱӱнис келбей јат?

² Иегованыҥ организациязында ӧскӧ иштерге кӧрӧ, јарлаар иш слерге тыҥ ла јарабай турган болор. Нениҥ учун андый болот? Нениҥ учун дезе ӧскӧ иштерде нени эдип салганыс јакшы кӧрӱнип јат. Темдектезе, Каандыктыҥ Тураларын тудуп, олорды кичееп тура, ар-бӱткенниҥ тӱбегине тӱшкен улуска болужып тура, эмезе ака-эјелерге кандый бир болуш јетирип тура бистиҥ ижис улуска туза экелип турганын јарт кӧрӱп јадыс. Анайда ок ака-эјелерле бирлик, нак иштенгенистеҥ ле олор бисти баалап турганынаҥ сӱӱнчи аладыс. А јарлаар ишти алза, бис јылдаҥ јылга јарлап ла јадыс, бас ла јадыс, је угуп турган улустыҥ тоозы ас. Керек дезе кезик улус удурлажып та јат. Телекейдиҥ учы там ла јууктаганы сайын сӱӱнчилӱ јарды угатан улустыҥ тоозы да астаар деп бис оҥдоп јадыс (Матф. 10:22). Јарлаар иште туружар кӱӱнис ӧчпӧй, јалбыштанып турзын деп биске не болужар?

3. Лука 13:6—9-гы укаа сӧстӧҥ Иисус керегинде нени билип аладыс?

³ Иисустыҥ јарлаар иште эрчимдӱ иштегени биске тем болот. Ол качан да јарлаар ижин токтотпогон. Карын, там ла там кӧптӧдӧ иштенип, ончо ийде-кӱчин берген. (Лука 13:6—9, ЈТ кычырыгар.) Ол бойын ӱч јылдыҥ туркунына инжирин кичееп, оноҥ тӱжӱм алар деп иженип турган виноград ӧскӱреечиле тӱҥдештирген. Иисус анайып ла еврейлерге ӱч јылдыҥ туркунына јарлаган болгон, је олордыҥ кӧп сабазы оны укпаган. Је канайып виноград ӧскӱреечи агаштаҥ неме болбос деп сананбаган, анайып ла Иисус улустаҥ чӧкӧбӧй, олорды оноҥ ло ары ӱреткен. Јердеги јӱрӱминиҥ калганчы айларында ол еврейлердиҥ јӱрегин томултарга оноҥ тыҥ албаданган.

4. Иисуска јарлаарга не болушкан?

⁴ Бис бу јӧрмӧлдӧ Иисустыҥ, анчада ла калганчы алты айдыҥ туркунына јарлаар иште эрчимдӱ турушканы керегинде шӱӱжип ийерис (Лука 10:1-ге берилген јартамалда «Агару Бичиктиҥ ӱренетен чыгармазында» «мыныҥ кийнинде» деген сӧстӧрди кӧрӱгер.) Бис Иисустыҥ берген јакарулары аайынча јӱрзеес, јарлаар иште эрчимдӱ туружатан кӱӱнис база тыҥый берер. Айдарда, Иисуска јарлаар ишке эрчимдӱ туружарга не болушкан: 1) ол Иегованыҥ табын јӱрӱминде баштапкы јерге тургускан; 2) ол Агару Бичиктиҥ судурлары аайынча јӱрген; 3) ол Иегованыҥ болужына иженген; 4) ол сӱӱнчилӱ јарды тӱҥей ле кем-кем угар деп алаҥзыбаган.

ИИСУСКА ИЕГОВАНЫҤ КӰӰН-ТАБЫН БӰДӰРЕРИ БАШТАПКЫ ЈЕРДЕ БОЛГОН

5. Иисус Иегованыҥ кӱӱн-табын баштапкы јерге тургускан деп недеҥ кӧрӱнет?

⁵ Иисус «Кудайдыҥ Башкарузы керегинде сӱӱнчилӱ јарды» эрчимдӱ јарлаган, нениҥ учун дезе шак ла мыны эдерге, Иегова оны ийген деп ол билген (Лука 4:43, ЈТ). Бу иш оныҥ јӱрӱминде баштапкы јерде турган. Керек дезе јердеги јӱрӱминиҥ калганчы да айларында ол «калаларга ла јурттарга кирип», јарлап јӱрген (Лука 13:22). Анайда ок Иисус бойыныҥ јаҥы ӱренчиктерин јарлаарга ӱреткен (Лука 10:1).

6. Иегованыҥ организациязында јакылталардыҥ эҥ јааны кандый? (Јурукты база кӧрӱгер.)

⁶ Бӱгӱнги де кӱнде сӱӱнчилӱ јарды јарлаары сӱреен керектӱ иш болот. Бисти бу ишти этсин деп Иегова ла Иисус кӱӱнзеп јат (Матф. 24:14; 28:19, 20). Иегованыҥ организациязындагы ончо јакылталар бу ишле колбулу. Темдектезе, бисле кожо Иеговага бажырарга турган улуска Каандыктыҥ Туралары тудулат. Бет-Элде де ончо иш јарлаар ишле база колбулу болот. Анайда ок ар-бӱткенниҥ тӱбектериниҥ ӧйинде ака-эјелерге болужып тура, бис олорго кӧгӱс графигинеҥ тудунарга ла јарлаар ижин артыргыспаска база болужадыс. Иегова сӱӱнчилӱ јарды јарлаарын эҥ керектӱ иш деп кӧрӱп јат. Бис мыны ундыбай турзаас, јарлаар иште кӧптӧдӧ туружарга албаданарыс. Венгрияда јадып турган Я́нош деп аксагал айдат: «Иегова биске кӧп башка-башка јакылталар берет. Је олордыҥ эҥ јааны — јарлаар иш деп бойыма јаантайын эске алындырадым».

7. Нениҥ учун Иегова бисти оноҥ ло ары јарлазын деп кӱӱнзейт? (1 Тимофейге 2:3, 4).

⁷ Биске јарлаар иште оноҥ ло ары эрчимдӱ иштеерге не болужар? Биске кажы ла кижиге Иегова чылап кӧрӧр керек. А Иегова канча ла кире кӧп улус сӱӱнчилӱ јарды угуп, алынзын деп кӱӱнзейт. (1 Тимофейге 2:3, 4, ЈТ кычырыгар.) Иегова бисти ченемелдӱ јарчылар болзын деп ӱредип јат. Нениҥ учун дезе бистиҥ куучындап турган сӱӱнчилӱ јар улустыҥ јӱрӱмин аргадайт. Темдектезе, «Улусты сӱӱгер. Ӱренчиктер белетегер» деген брошюра биске улусла куучындажарга болужат. Оныҥ јӧптӧрин тузаланып турзаас, улус Агару Бичикти ӱренерге ле Христостыҥ ӱренчиги болорго кӱӱнзей берердеҥ айабас. Эм тургуза олор Кудайга иштеерге кӱӱнзебезе де, кийнинде бистиҥ айткан сӧстӧристи эске алып, улу тӱбектиҥ учы јеткелекте, Кудайга иштеерге кӱӱнзей берер болор. Је бис эмди олорго куучындабазаас, олордо мындый арга кайдаҥ болотон.

ИИСУС БИБЛИЯЛЫК СУДУРЛАР ААЙЫНЧА ЈӰРГЕН

8. Иисуска ӧйин ойгор тузаланарга, кандый судурлар болушкан?

⁸ Иисус библиялык судурлар канайып бӱдер деп оҥдогон. Темдектезе, оныҥ јердеги ижи ӱч јарым јылдыҥ туркунына улалар деп ол билген (Дан. 9:26, 27). Анайда ок ол кыйнадып, ӧлтӱртер деп билер болгон (Лука 18:31—34). Иисус кандый судурлар ого бӱдер деп оҥдоп, ӧйин чын тузаланатан. Оныҥ учун ол јарлайтан кӱӱнине ӧчӧргӧ бербей, берилген јакылтаны учына јетире бӱдӱрип саларга, бастыра ийде-кӱчинеҥ албаданган.

9. Агару Бичиктеги судурлар јарлаар кӱӱнисти канайып тыҥыдат?

⁹ Агару Бичиктиҥ судурлары биске јарлайтан кӱӱнисти тыҥыдарга болужат. Олордыҥ бӱдӱп турганын кӧрӱп, бу телекейдиҥ учы јууктап келгенин јарт оҥдоп јадыс. Агару Бичикте калганчы кӱндерде улустыҥ кылык-јаҥы канайып солынар, анайда ок телекейдеги айалга кандый болор деп судурлалып калган. Бого коштой, Даниилдиҥ бичигинде «калганчы кӱндерде» тӱндӱк каанныҥ ла тӱштӱк каанныҥ ортозында удурлажулар болор деп судурлалган. Мыны бис бӱгӱнги кӱнде Великобритания ла США деп ороондордыҥ Россия ла оныҥ союзниктериле тартыжып турганынаҥ кӧрӧдис (Дан. 11:40). Анайда ок бис Даниил 2:43—45-те айдылган јаан чалуныҥ тамандары — ол Англо-Американский телекейлик держава деп оҥдоп јадыс. Удабастаҥ ла Кудайдыҥ Башкарузы улустыҥ башкарузын јоголтып салар деп бӱдедис! Эйе, библиялык судурлар бу эски телекейдиҥ учы коркышту јуук деп јарт кӧргӱзип јат. Мыны оҥдогоныс бисти сӱӱнчилӱ јарды оноҥ ло ары эрчимдӱ јарлаарга кӱӱнзедет.

10. Агару Бичиктиҥ база кандый судурлары бисти јарлаарга кӱӱнзедип јат?

¹⁰ Агару Бичикте келер ӧй керегинде сӱреен сӱӱнчилӱ судурлар бичилип калган. Олор керегинде улуска куучындаарга кӱӱнзеп јадыс. Доминиканский Республиканыҥ Кэ́рри мынайып куучындайт: «Иегова биске андый јакшы јӱрӱм белетеп салган! Бу керегинде ончо улус билзин деп кӱӱнзеп јадым, не дезе улустыҥ эмди јӱрӱми коркышту кӱч. Олорго бу сӱӱнчилӱ јар сӱреен керектӱ болуп јат». Агару Бичиктеги судурлар јарлаар ишти Иегова башкарып турган деп оҥдоорго болужат. Бу оҥдомол бисти кандый ла улуска јарлаарга кӱӱнзедет. Венгрияда јадып турган Ле́йла айдат: «Кезикте кижи мени укпас болор деп сананып јадым. Је албаданып тӱҥей ле јарлайдым, не дезе Исайя 11:6—9-гы сӧстӧр Иегованыҥ болужыла кандый ла кижи солынар аргалу деп меге оҥдоорго болужып јат». Замбияда јадып турган Кри́стофер мынайда айдат: «Марк 13:10-до бичилген судурла болзо, сӱӱнчилӱ јар бастыра јердиҥ ӱстиле јарлалар. Оныҥ учун бу судурдыҥ бӱдеринде туружатан аргамды сӱреен баалап јадым». А сени кандый судурлар јарлаарга кӱӱнзедет?

ИИСУС ИЕГОВАНЫҤ БОЛУЖЫНА ИЖЕНГЕН

11. Нениҥ учун Иисуска оноҥ ло ары эрчимдӱ јарлаарга Иеговага иженер керек болгон? (Лука 12:49, 53).

¹¹ Иисус Иегова ого оноҥ ло ары эрчимдӱ јарлаарга болужар деп билген. Ол јаантайын улуска јалакай, тоомјылу баштанган да болзо, ӱзе улус јарды алынар деп сакыбаган: кезик улусты бу јар ачындырар, кезиги бу јарды токтодорго албаданаар. (Лука 12:49, 53, ЈТ кычырыгар.) Темдектезе, кудай јаҥныҥ башчылары Иисустыҥ јарын угар кӱӱндери јок болгон, олор канча катап Иисусты ӧлтӱрерге арга бедиреген (Иоанн 8:59; 10:31, 39). Је Иисус јарлаар ижин токтотпогон, нениҥ учун дезе Иегова оныҥ јанында деп билген. Ол айткан: «Мен јаҥыскан эмес, мениле кожо мени ийген Ада. [...] Ол мени јаҥыскан артырбады, нениҥ учун дезе мен јаантайын оныҥ кӱӱнин бӱдӱрип јадым» (Иоанн 8:16, 29, ЈТ).

12. Иисус ӱренчиктерин истежӱлердиҥ де ӧйинде јарлазын деп канайып белетеген?

¹² Иисус ӱренчиктерине, олор Иегованыҥ болужына иженер аргалу деп эске алындырган. Истежӱлер башталза, Иегова олорды бир де артыргыспас деп канча катап айдып туратан (Матф. 10:18—20; Лука 12:11, 12). Је бу ок ӧйдӧ олорго ајарыҥкай болор керек болгон (Матф. 10:16; Лука 10:3). Иисус Кудайдыҥ Башкарузы керегинде угарга кӱӱнзебей турган улуска калас куучындабазын деген (Лука 10:10, 11). Анайда ок истежӱлер башталза, качкылазын деп айткан (Матф. 10:23). Иисус јарлаар иште эрчимдӱ иштеп, Иегова ого болужар деп алаҥзыбаган да болзо, бойын јеткерлӱ айалгага тургуспаган (Иоанн 11:53, 54).

13. Иегова биске болужар деп, нениҥ учун алаҥзыбай јадыс?

¹³ Бӱгӱн бис кӧп удурлажуларга табартып јадыс (Ачыл. 12:17). Оныҥ учун Иегованыҥ болужы јок оноҥ ары эрчимдӱ јарлап болбозыс. Је Иегова биске болужар деп бис нениҥ учун алаҥзыбайдыс? Иоанныҥ 17-чи бажалыгында Иисустыҥ сӧстӧрин эске алып ийектер. Анда ол Иегованы апостолдорын корулазын деп сураган. Иегованыҥ каруу бергени кийнинде јарт кӧрӱне берген. Темдектезе, Апостолдордыҥ ижи деп бичикте Кудай ӱренчиктерге истежӱниҥ ӧйинде эрчимдӱ јарлаарга канайып болушканы керегинде кӧп учуралдар бичилип калган. Анайда ок Иисус бойыныҥ мӱргӱӱлинде јӱк ле апостолдорды корулазын деп эмес, је олорды угуп турган улусты да корулазын деп сураган. Айдарда, Иегова сени де корулаар. Ол эмдиге јетире Иисустыҥ мӱргӱӱлине каруу берип јат. Апостолдорго ол канайып болушкан, анайып ла ол сеге де болужар (Иоанн 17:11, 15, 20).

14. Јарлаар иште бисти не де токтодып болбос деп, нениҥ учун алаҥзыбай јадыс? (Јурукты база кӧрӱгер.)

¹⁴ Бу телекейдиҥ учы там ла јууктаганы сайын сӱӱнчилӱ јарды да јарлаарга там ла кӱч болор деп оҥдоп јадыс. Андый да болзо, Иисустыҥ айтканыла, биске бу ишти оноҥ ло ары эрчимдӱ бӱдӱрерге керектӱ болуш берилер (Лука 21:12—15). Бис Иисустаҥ ла оныҥ ӱренчиктеринеҥ тем алып, улусла кериш-урушпай јадыс. Бисти угар ба, јок по деп улус бойлоры кӧрзин. Кезик ороондордо ака-эјелер јайым јарлап болбой јат. Андый да болзо, олор бойына иженбей, Иеговага иженип, тӱҥей ле јарлап јадылар. Иегова баштапкы чакта да ака-эјелерге болушкан, бӱгӱнги де кӱнде берилген ишти учына јетире бӱдӱрип саларга база болужар (2 Тим. 4:17). Иеговага бӱткӱлинче иженип турзаас, јарлаар иште бисти не де токтодып болбос.

ИИСУС СӰӰНЧИЛӰ ЈАРДЫ КЕМ-КЕМ АЛЫНАР ДЕП АЛАҤЗЫБАГАН

15. Иисустыҥ јарлаар ижи калас эмес деп бӱткени недеҥ кӧрӱнет?

¹⁵ Иисус сӱӱнчилӱ јарды тӱҥей ле та кем де алынар деп алаҥзыбаган. Оныҥ учун бу ого јарлаар ишке кӱӱнин ӧчӱрбей, эрчимдӱ јарлаарга болушкан. Темдектезе, б. э. 30-чы јылыныҥ учында не болгонын кӧрӱп ийектер. Иисус кӧп улус оны угуп турганын кӧрӱп ийеле, олорды ажы быжып, јуунадатан ӧйи јууктап келген кыраларла тӱҥдештирген (Иоанн 4:35). Бир јыл кире ӧдӧ берерде, ол ӱренчиктерине: «Јууйтан аш кӧп» деп айткан (Матф. 9:37, 38 ЈТ). Кийнинде ол база катап айткан: «Јууйтан аш кӧп... Оныҥ учун аш јуунадатан иштиҥ Башкараачызынаҥ ишчилер ийзин деп сурагар» (Лука 10:2, ЈТ). Иисус Кудайдыҥ Башкарузы керегинде јарды угатан улус табылар деп бӱткен. Оноҥ андый улус табылып турарда, ол сӱреен сӱӱнетен болгон (Лука 10:21).

16. Иисустыҥ укаа сӧстӧри биске јарлаар ишке чын кӧрӱмдӱ болорго канайып болужат? (Лука 13:18—21). (Јурукты база кӧрӱгер.)

¹⁶ Иисус ӱренчиктерине јарлаар ишке чын кӧрӱмдӱ болзын деп болушкан. Олордыҥ бӱдӱрип турган ижи сӱреен јаан једимдӱ болор деп ӱреткен. Тем эдип эки укаа сӧс кӧрӱп ийектер. (Лука 13:18—21, ЈТ кычырыгар.) Иисус бир укаа сӧзинде Кудайдыҥ Башкарузы керегинде јарды јаан агаш болуп ӧзӧтӧн горчицаныҥ кичинек ӱренине тӱҥдештирген. Бу дезе, сӱӱнчилӱ јарды кӧп улус алынар ла оныҥ ӧзӱмин не де токтодып болбос дегенин темдектейт. Иисус база бир укаа сӧзинде ачыткы керегинде айткан. Бу дезе, Кудайдыҥ Башкарузы керегинде јар бастыра јердиҥ ӱстине таркадылар дегенин темдектейт. Бу јар улусты солынарга кӱӱнзедип јат, баштап тарый олордыҥ солынганы улуска кӧрӱнбей де турган болзо. Анайып Иисус ӱренчиктерин олордыҥ јарлап турган јары кӧп улуска тузалу болор деп бӱдӱмјилеген.

17. Биске јарлаар ишке чын кӧрӱмдӱ болорго база не болужат?

¹⁷ Качан бис ижистиҥ сӱреен јакшы једимин кӧрӱп турзаас, улуска сӱӱнчилӱ јарды јарлайтан кӱӱнис там тыҥыйт. Кажы ла јыл миллиондор тоолу улус бисле кожо Агару Бичикти ӱренип, Кайраканныҥ Эҥирине келгилейт. Јӱс муҥдар улус сууга чӧҥӱрилип, бисле кожо сӱӱнчилӱ јарды јарлап баштагылайт. Бис Кудайдыҥ Башкарузы керегинде јарды база канча кижи алынарын билбезис. Је Иегова кара бајырт улусты јууп турган деп билерис. Ол бу улусты улу тӱбектиҥ ӧйинде аргадап аларга јат (Ачыл. 7:9, 14). Аш јуунадатан иштиҥ Башкараачызы, Иегова, кыраларда јетире аш јуулбаган деп кӧрӱп јат. Оныҥ учун бис оноҥ ло ары јарлаарыс.

18. Бис Христостыҥ ӱренчиктери деп недеҥ кӧрӱнет?

¹⁸ Иисустыҥ ӱренчиктери јаантайын эрчимдӱ јарлаарыла аҥыланатан. Апостолдордыҥ јалтанбас болгонынаҥ улам улус олорды «Иисусла кожо јӱрген[дер]» деп таныгылап ийетен (Ап. ижи 4:13). Бис те, бистиҥ Ӱредӱчибис, Иисус Христос чылап јалтанбас болорго ло албаданып јарлаарга кӱӱнзейдис.