Иеговага иштегени сӱӱнчи берет

АДА-ЭНЕМ ЛЕ КОЖО ЧЫККАНДАРЫМ

Мениҥ эне-адам Швейцариянаҥ Канаданыҥ Ти́мминс деп каладӧӧн (Онта́рио деп провинция) кӧчӱп барган. Бу кала горнодобывающий промышленностиле јарлу болгон. Мен 1934 јылда чыккам. А кайда да 1939 јылдаҥ ала энем «Каруулчы шибее» кычырып баштаган ла јуунныҥ туштажуларына јӱрӱп баштаган. Энем јуундарга барып јатса, бастыра балдарын эчидип алатан. Оноҥ бир эмеш ӧйдӧҥ энем сууга чӧҥӱрилген.

Энем Иегованыҥ Керечизи болуп каларда, адамга јарабаган. Је энем чындыкты тыҥ сӱӱген, оныҥ учун Иеговала колбуларын баштапкы јерге тургускан. Анайда ок 1940 јылдардыҥ бажында Канадада Иегованыҥ Керечилериниҥ ижи токтодуда болгон до болзо, истежӱлердеҥ коркыбай, Иеговага чындык арткан. Керек дезе адам да оны јаантайын айткылап туратан. Је энем ого бир де кату баштанбай, карын јымжак ла тоомјылу баштанган. Энемниҥ мындый сӱреен јакшы теми меге де, кожо чыккандарыма да (а бис јети бала болгоныс) чындыктыҥ јолын талдап аларга болушкан. Карын бир канча ӧйдӧҥ адам эмеш јымжай берген.

ӦЙИМДИ ТОЛО БЕРИП ИШТЕП БАШТАЙДЫМ

1950 јылда, јайгыда мен Нью-Йорктӧӧн «Рост теократии» деп курултайга барып јӱргем. Анда бастыра јердиҥ ӱстинеҥ келген кандый ла ака-эјелерле танышкам. Анайда ок Галаад сургалды божоткондордыҥ сӱреен кайкамчылу интервьюлерин угала, текши пионер болорго тыҥ кӱӱнзей бергем. Курултайдаҥ јанып келеле, мен тӱрген ле заявление бичигем. Је Канададагы филиал мени озо баштап сууга чӧҥӱрилип алзын деп кӱӱнзеткен. Оныҥ учун 1950 јылда, ӱлӱрген айдыҥ 1-кы кӱнинде сууга чӧҥӱрилгем. Бир ай ӧдӧ берерде, мени текши пионер эдип кӧстӧп салган. Оноҥ акалар мени Капуске́йсинг деп калага кӧчсин деп сурагандар. Бу кала мениҥ айылымнаҥ канча јӱс километр ыраак болгон.

1951 јылда, јаскыда Бет-Эл французский тилди билер Керечилердиҥ кемизи Квебектӧӧн кӧчӧргӧ кӱӱнзеп турган деп сураган. Не дезе анда јарчылар јетпей турган болгон. А мен јаштаҥ ла ала французский ле английский тилдерди экилезин билетем. Оныҥ учун болужар кӱӱним келген. Бот мынайып мени Руэн деген каладӧӧн кӧстӧгӧн. Бу кала керегинде статьяныҥ бажында айткан болгом. Мен анда кемди де билбес болгом — менде јӱк ле баратан адрес болгон. Је карын бастыра керектерим јакшы келиже берген, а Марсельле бис јакшы најылар болуп калганыс. Анайып Квебекте тӧрт јыл иштегем, учы јаар дезе специальный пионер де болуп калгам.

ГАЛААД СУРГАЛ ЛА САКЫЛТА

Квебекте иштеп турарымда, Галаад сургалдыҥ 26-чы клазына ӱренетен кычырту келген. Мен коркышту тыҥ сӱӱнгем! Бу ӱредӱ Са́ут-Ла́нсинг (Нью-Йорк штат) деп калада ӧткӧн. 1956 јылда, кочкор айдыҥ 12-чи кӱнинде выпуск болгон. Оныҥ кийнинде мени Кӱнбадыш Африкадӧӧн, эмдиги ӧйдӧ Ганадӧӧнb, кӧстӧп ийгендер. Је ары барардаҥ озо, документтерим белетелгенче, Канададӧӧн кайра барала, «канча да неделе» сакыыр керек болгон.

Је бу неделелер јети айга улалган. Бу айлардыҥ туркунына мен Торо́нтодо Криппстердиҥ билезинде јаткам. Анда олордыҥ Ше́йла деп кызыла танышкам. Бис бой-бойысты сӱӱй бергенис. Оноҥ мен Шейлага алыжак деп айдарга ла турарымда, меге виза једип келген. Бис экӱ кожо мӱргӱп ийеле, меге тӱҥей ле Африкадӧӧн барар керек деп шӱӱлтеге келгенис. А эм тургуза бичижип турарыс деп сананганыс. Је бой-бойыстаҥ ыраак болорго биске кӱч болгон, андый да болзо, бир эмеш ӧйдӧҥ, бис чын эткен эмтирис деп оҥдоп ийгенис.

Африкага јетире бир ай баргам. Озо баштап поездтӱ, оноҥ грузовой корабльду, учында самолётту јеткем. Анайып мен А́ккра (Гана) деп калага једип баргам. Мен областной кӧрӧӧчи болгом. Меге бастыра Гана, оныҥ јанында турган Берег Слоновой Кости (эмди Кот-д’Ивуа́р) ле Тоголе́нд (эмди То́го) деп јерлер берилген. Бу јерлерле мен филиалдыҥ берген джип деп машиназыла јӱргем. Мында иштеерге меге коркышту тыҥ јараган. Башка-башка ака-эјелерле кӧрӱжип турганымнаҥ јаан сӱӱнчи алып туратам.

Амыраар кӱндерде аймак курултайларга барып туратам. Ол тушта бисте курултайлар ӧткӱретен Туралар болбогон. Оныҥ учун акалар бамбуктаҥ јабынты тудала, оны пальманыҥ јалбырактарыла бӱркеп салатан. А бу дезе изӱ кӱннеҥ бир эмеш те болзо кӧлӧткӧ болгон. Бисте холодильник те деп неме болбогон, оныҥ учун акалар курсак азарга сойотон мал-ашты курултай ӧдӱп јаткан јердиҥ јанында туткан.

Бу курултайларда каткымчылу да учуралдар болуп туратан. Бир катап Херб Дже́ннингсc деп миссионер ака куучын-эрмек айткан. Кенетийин сценаныҥ алдына торбок чыгып келген. Ака унчукпай барган, а торбок дезе ары-бери маҥтап баштады. Карын, кӱчтӱ тӧрт ака байа торбокты тудала, кухнядӧӧн апаргандар. А отурган улус олорды изӱ колчабыжула ӱйдежип ийгиледи.

Курултай ӧдӧ берзе, неделениҥ туркунына деремнелер сайын маҥтадып, «Общество нового мира в действии» деген кино кӧргӱзип турган болгом. Киноны кӧргӱзерге, эки агаштыҥ эмезе шесттердиҥ ортозына ак бӧс тартып ийеле, проекторды иштедип ле ийзем, кино баштала беретен. Улус коркыш кайкап кӧрӧтӧн, не дезе олордыҥ кезиги јӱрӱминде андый немени кӧргӧн эмес. Олор экрандагы сууга чӧҥӱрилип јаткан улусты кӧрӧлӧ, тыҥ тажынып туратан. Бу кино улуска Иегованыҥ Керечилери — телекейлик бирлик организация деп оҥдоорго болушкан.

Мынайып Африкада иштеп турганчам, эки јыл кире ӧдӧ берген. Оноҥ 1958 јылда Нью-Йорктӧӧн телекейлик курултайга барып јӱргем. Бу курултайга Шейла база келген. Ол ӧйдӧ ол Квебекте специальный пионер болуп иштеген. Бис экӱ мынайып тушташканыска коркышту тыҥ сӱӱнгенис. Мынаҥ озо бис јӱк ле бичижип туратаныс, а туштажа береристе, алыжак па деп сураарымда, ол јӧпсинип ийген. Мен дезе Норрd акага Шейланы Галаад сургалды божодоло, мениле кожо Африкада иштезе кайдаар деп самара бичииримде, ол јараду берди. Оноҥ Шейла Ганадӧӧн једип келерде, бис алыжып алганыс. Тойыс дезе 1959 јылда, ӱлӱрген айдыҥ 3-чи кӱнинде Аккра деп калада болгон. Иегованыҥ мындый алкыштарын Кудайдыҥ ижин баштапкы јерге тургусканы́с учун алганыс деп билип ийгенис.

КАМЕРУНДА КОЖО ИШТЕЙДИС

1961 јылда бисти Камерундӧӧн аткарган. Ондо меге јаҥы филиал ачатан јакылта берилген. Мынаҥ озо мен филиалда бир де иштебегем, оныҥ учун меге кӧп немеге ӱренер керек болгон. Мыныла колбой иш баштаҥ ажыра болгон. А 1965 јылда бис балалу болорыс деп билип ийгенис. Чынынча болзо, биске ада-эне болорыс деп сананарга коркынчылу болгон. Је бу санаага араайынаҥ ӱренижип, сӱӱнип баштаарыста, анайда ок Канададӧӧн кайра барарга белетенип турганчас ла, јаман неме боло берген.

Бистиҥ балагыс ичте ле божоп калган. Врач слерде уул бала чыгар керек болгон деп айткан. Оноҥ бери 50 јылдаҥ ажып та каларда, бис оны качан да ундыбаганыс. Биске коркышту ачу да болгон болзо, сӱӱп турган миссионер ижисти оноҥ ло ары улалтканыс.

Камерунда ака-эјелер нейтралитет тутканы учун истежӱлерге табарткан. Президент талдаар ӧйдӧ айалга там катулана берген. Мынаҥ улам бистиҥ эҥ ле тыҥ санааркаган немегис бӱдӱп калды — 1970 јылда, кӱӱк айдыҥ 13-чи кӱнинде Камерунда Иегованыҥ Керечилериниҥ ижин официально токтодып салган. Олор бистиҥ беш ле ай јаткан јараш, јаҥы филиалысты айрып алган. Бастыра миссионерлерге, ол тоодо меге ле Шейлага, ороонноҥ чыксын деп, бир ле неделе берген. Биске сӱӱген ака-эјелеристи артыргызарга коркышту кӱч болгон. Бис олор учун тыҥ санааркап турдыс.

Оноҥ арыгы јарым јылды Францияда филиалда иштегенис. Ол ӧйдӧ Камерундагы акаларга канча кире аргам бар болужып туратам. Ол ло јылдыҥ јаҥар айында бисти Нигериядагы филиалдӧӧн кӧстӧп ийген. Бу филиал Камерундагы ишти база башкарып баштаган. Нигериядӧӧн келеристе ака-эјелер бисти сӱреен јылу уткыган. Ондогы филиалда бис бир канча јыл иштедис.

ЈЕҤИЛ ЭМЕС СОЛЫНТА

1973 јылда биске јеҥил эмес солынта эдерге келишкен. Нениҥ учун дезе ӱйимниҥ су-кадыгы уйадай берген. Качан бис Нью-Йорктагы курултайда болорыста, ол тыҥ ыйлай береле, мынайда айткан: «Мен база чыдажып болбозым! Ийде-кӱчим неге де јетпейт. Оноҥ ары мынайып иштеп болбос ошкожым». Ол ӧйдӧ Кӱнбадыш Африкада иштегенис 14 јылдаҥ ажа берген. Мен ӱйимле коркышту тыҥ оморкоп туратам. Ол бу ӧйдиҥ туркунына Иеговага сӱреен эрчимдӱ иштеген. Је эмди биске јеҥил эмес алтам эдер керек деп оҥдоп ийдис. Оны эдердеҥ озо бис кӧп шӱӱшкенис, Кудайыска тыҥыда мӱргӱгенис, учы-учында бис экӱге Канададӧӧн кайра барар керек деп јӧп чыгардыс. Шейла Канадада эмденип ийзе, ого эмеш јеҥил боло берер деп сананганыс. Африканаҥ јӱрерге ле ӧйисти толо берип иштеерин артыргызарга биске коркышту кӱч болгон.

Канададӧӧн кайра једип келеле, мен озогы најымла кожо иштеп баштагам. Ол Торонтоныҥ јанында машиналар саткан. Бис Шейлала кожо квартира арендага алганыс, тудунып салган мебель садып алганыс. Анайып, тӧлӱлерге кирбей, кӧчӱп алганыс. Је јӱрӱмисти уурлатпаска кӱӱнзегенис, не дезе арга боло ло берзе, ӧйисти толо берип иштеп баштаарга сананып турган болгоныс. А мындый арга бистиҥ сананганыстаҥ да тӱрген ачыла берген.

Ол ӧйдӧ Но́рвал (Онтарио деп провинция) деп калада Курултайлардыҥ Туразы тудулган. Мен ары суббот сайын болужарга барып туратам. Кийнинде мени бу Тура учун каруулу эдип кӧстӧгӧн. Ӱйимниҥ су-кадыгы оҥдоло берерде, бис бу молјуны бӱдӱрер деп јӧпсинип ийгенис. Оныҥ учун 1974 јылдыҥ кичӱ изӱ айында Курултайлардыҥ Туразындагы квартирадӧӧн кӧчӱп алганыс. Ӧйисти ойто толо берип иштеп баштаганыска тыҥ сӱӱнип турдыс!

Карын Шейланыҥ су-кадыгы оҥдолып баштаган. Эки јылдаҥ бис аймак кӧрӧӧчиниҥ ижин баштаганыс. Бистиҥ аймагыс Канаданыҥ Манито́ба деген провинциязы болгон. Ондо корон сооктор болуп туратан. Је јербойыныҥ ака-эјелери бисти изӱ сӱӱжиле јылыткан. Оныҥ учун кайда да болзоос, Иеговага иштеер керек деп оҥдоп алганыс.

ЈӦП АЛГАНЫМ

Канча јыл аймак кӧрӧӧчи болуп турганчас бисти 1978 јылда Канададагы Бет-Элдӧӧн кычырган. Је јаан удабай эби јок неме болгон. Бу учуралдаҥ бойыма јаан ӱредӱ алгам. Меге Монреа́льда ӧдӧтӧн аҥылу туштажуда бӱдӱн јарым сааттыҥ туркунына французский тилге куучын-эрмек айдатан јакылта берилген. Улуска куучын-эрмегимди угарга јеҥил эмес болгонын билип ийгем. Куучыным божой ло берерде, меге служебный отделде иштеп турган бир ака базып келеле, јӧп берген. Је меге оныҥ јӧби де, оны канайып бергени де ичиме кирбеген. Мен оныҥ сӧстӧриле бир де јӧпсинбегем. Аканыҥ јӧбине ачына бергем. Не дезе ол кижини бир де мактабай, јастыраларымды ӱзе тоолой берген деп билдирген. Эмди де оҥдоп јадым, мен андый ла јайалталу оратор эмезим деп. Ол мениҥ јаан јастырам болгон.

Бир канча кӱннеҥ мениле Бет-Элдиҥ комитединде иштеп турган ака куучындашкан. Мен ого јастырамды алынып јадым деп ле база анайып этпезим деп айткам. Оныҥ кийнинде байагы служебный отделде иштеп турган акага јолыгала, куучындажарымда ол мени лаптап угала, јаманымды таштап салган. Бу учуралдаҥ јобош болор керек деп, јаан ӱредӱ алгам (Укаа 16:18). Ол ӧйдӧ мен Иеговага кӧп мӱргӱгем ле кандый ла јӧпти угарым деп бойыма сӧзим бергем.

Канададагы Бет-Элде иштегеним 45 јылдаҥ ажа берди. Бу јылдардыҥ 40 јыл кирезин, 1985 јылдаҥ ала, филиалдыҥ комитединде иштегем. 2021 јылдыҥ кочкор айында кару ӱйим, Шейла, божоп калган. Мен оны коркышту тыҥ јоктойдым. Эмди су-кадыгым уйадап та калган болзо, Иегова меге оноҥ ло ары кӧп јакылталар берип јат. Анайып, Кудайым мени баалап турган деп сезедим. Мен эҥ ле ырысту кижи. Менде «јӱрӱмниҥ кысказын сананарга» бош то јок (Эккл. 5:20). Бу јылдардыҥ туркунына не болбоды дереер. Је сӱӱнетен немелер тӱҥей ле кӧп болгон. Иегованы баштапкы јерге тургузып, ӧйимди толо берип иштегеним 70 јылдаҥ ажа берди. Бу сӱреен јакшы ӧй болгон. Оныҥ учун бистиҥ кару јииттерис јӱрӱмин Иеговага учурлап, база анайып ла јӱрзин деп мӱргӱйдим. Не дезе јӱк ле ол тушта олордыҥ јӱрӱми сӱӱнчилӱ, јилбилӱ ле кӧгӱс алкыштарла сӱреен байлык болор!