Јуунды кичееп турган эр улуска быйанду болыгар

1. Бис Иисустаҥ кандый сыйлар алганыс?

ЈЕРДИҤ ӱстинде Иисус чылап улуска болушкан кижи јок. Ол јерде јӱрерде бойыныҥ ийде-кӱчин улуска болужарга тузаланган (Лука 9:12—17). Оныҥ эҥ јаан сыйы — бистер учун бойыныҥ јӱрӱмин бергени (Иоанн 15:13). Иисус тирилген де кийнинде биске болужып јат. Иисус берген сӧзи аайынча, Адазын бистерге агару тын берзин деп сураган. Анайып агару тынныҥ болужыла Иисус бисти ӱредип, токунадып јат (Иоанн 14:16, 17, сноска; 16:13). А јуунныҥ туштажуларында бис Иисустаҥ ӱренчиктер белетеерге болужатан керектӱ немени јеткилинче алып јадыс (Матф. 28:18—20).

2. Эфестегилерге 4:7, 8-те айдылган сыйлар — олор кемдер?

² Иисус бистерге база да бир сый берген. Апостол Павелдиҥ бичигениле болзо, Иисус теҥериге јӱре берген кийнинеҥ «олорды улуска сый эдип берген». (Эфестегилерге 4:7, 8 кычырыгар.) Бу сыйлар — јуунды кичееп турган эр улус (Эф. 1:22, 23; 4:11—13). Олордыҥ тоозында болушчы ишчилер, аксагалдар ла аймак кӧрӧӧчилерa. Олор кинчектӱ улус, оныҥ учун кезикте јастырып јат (Иак. 3:2). Је бистиҥ Кайраканыс, Иисус Христос, олор ажыра биске болужып турган. Олор Иисус Христостыҥ сыйлары.

3. Бис ончобыс јуунды тыҥыдарга, акаларга канайып болужарыс? Тем куучындап беригер.

³ Иисус бу акаларга јуунды тыҥытсын деп јакарган (Эф. 4:12). Је бис ончобыс бу јаан иште олорго болужар аргалу. Мыны Каандыктыҥ Туразын тударыла тӱҥдештирип ийектер. Та кем-де бетон уруп јат эмезе кирпичтер салат. А та кем-де ӧскӧ иштер эдип болужат. Темдектезе, курсак азат ла керектӱ материалдар экелет. Анайып ла јуунды тыҥыдары јанынаҥ кӧп саба ишти болушчы ишчилер, аксагалдар ла аймак кӧрӧӧчилер бӱдӱрет. Је бис олорго сӧстӧрисле, керектерисле ончобыс болужар аргалу. Эмди акалар кандый јаан учурлу иш эдип турганын ла биске сый эдип берилген акаларга ла Иисуска канайып быйанысты кӧргӱзеристи шӱӱжерис.

БОЛУШЧЫ ИШЧИЛЕР БОЛУШ ЈЕТИРЕТ

4. Баштапкы чакта јуунныҥ болушчы ишчилери кандый иш эткен?

⁴ Баштапкы чакта кезик акалар болушчы ишчиниҥ ижин бӱдӱрген (1 Тим. 3:8). Байла, апостол Павел болуш јетирген улус керегинде айдып турарда, шак ла олорды айткан болор (1 Кор. 12:28). Бу эр улус аксагалдарда јуундарды ӱредетен ле кӱдӱчиниҥ ижин бӱдӱретен арга болзын деп, јуунныҥ ӧскӧ дӧ иштерин эткен. Темдектезе, олор Агару Бичимелдиҥ копияларын эткен болор, ол эмезе ого керектӱ материалдар садып алып экелетен.

5. Болушчы ишчилер бӱгӱнги кӱнде кандый иш эдет?

⁵ Бӱгӱнги кӱнде болушчы ишчилер нени эдет? Олордыҥ ижинеҥ слерге туза болот по? Болушчы ишчилердиҥ ижи коркышту кӧп (1 Пётр 4:10). Темдектезе, олор јуунныҥ акча-манадын тоолойт, јарлаар иштиҥ участокторын эдет, бичиктер заказтап јат, аудио ло видеооборудованиени иштедет, курултайларда болушчылар болот ло Каандыктыҥ Туразын кичеейтен иштер бӱдӱрет. Олордыҥ болужынаҥ улам јуунныҥ туштажулары ла јарлаар иш аайлу-башту ӧдӧт (1 Кор. 14:40). Анайда ок болушчы ишчилер иштеер кӱндерде ӧдӱп турган туштажуныҥ кезик пункттарын ӧткӱрет ле ончо улуска айдылатан куучын-эрмектер айдат. Кезикте олорды јарлаар иштиҥ бӧлӱгиниҥ кӧрӧӧчизине болушсын деп сурайт. А кезикте аксагалдар олорды кӱдӱчиниҥ ижине кожо алып јат.

6. Слер иштеҥкей болушчы ишчилеристи нениҥ учун баалап турганаарды куучындап беригер.

⁶ Болушчы ишчилер керегинде јуундагы ака-эјелер нени айдып турганын кӧрӱп ийектер. Боливияда јадып турган Бе́берлиb эје айдат: «Олорго јаан быйан! Туштажуларыс аайлу-башту, сӱреен јакшы ӧдӧт. Олор кожоҥдор иштедет, јуруктар ла видеолор кӧргӱзет, керек болзо, мен каруулар бередим, јазаптыра куучын-эрмектер угадым. Ӱзе белен, не де керегинде санааркабай јадым. Анайда ок олор јуунды корулайт ла туштажуларга видеоконференция ажыра киретен арга ачат. Туштажуныҥ кийнинде сый эдип берилген акчаны тоологылайт, бичиктер ӱлегилейт ле Каандыктыҥ Туразын јуунадарында акту кӱӱнинеҥ турушкылап јат. Мындый акаларды канайып сӱӱбес?» А Колумбияда јадып турган, ӧбӧӧни аксагал болуп турган Ле́сли эје мынайып куучындайт: «Јуунда болушчы ишчилер бары кандый јакшы! Јуунныҥ кезик иштерин олор эдет, оноҥ башка ӧбӧӧнимди айылда кӧрбӧс тӧ эдим. Мен бу эрчимдӱ иштеп турган ака-карындаштарга јаан быйанымды айдадым. Олор ижин акту-кӱӱнинеҥ кӱӱнзеп эткилейт!» Слер бу эјелердиҥ айткан сӧстӧриле јӧпсинер болбойыгар (1 Тим. 3:13).

7. Болушчы ишчилерге быйанысты канайып кӧргӱзерис? (Јурукты база кӧрӱгер.)

⁷ Агару Бичик бисти: «Алкыш-быйанду болыгар» — деп кӱӱнзедет (Кол. 3:15). Оныҥ учун јӱк ле санаабыста быйанду болор керек эмес, је быйанысты айдып турар керек. Финляндияда јадып турган Кши́штоф деп аксагал мынайып куучындайт: «Мен болушчы ишчилерге кандый бир ижи учун, ол эмезе мениҥ кӱӱн-санаамды кӧдӱрген шӱӱлте айтканы учун быйанымды айдадым. Олорго открытка эмезе сообщение бичип јадым, оноҥ кандый-кандый библиялык ӱлгер кожуп ийедим». А Јаҥы Каледонияда јадып турган Паска́ль ла Жаэ́ль куучындагылайт: «Калганчы ӧйлӧрдӧ бис болушчы ишчилер керегинде кӧптӧдӧ мӱргӱп јадыбыс. Иеговага олор учун быйанысты айдадыс ла Иегова олорго болужып турзын деп сурайдыс». Иегова мындый мӱргӱӱлдерди угуп турган эмей, а бу јуунга јаан тузазын јетирет (2 Кор. 1:11).

АКСАГАЛДАР — «ОРТОГОРДО ИШТЕП ЈӰРГЕНДЕР»

8. Аксагалдар баштапкы чакта кандый иш эткен? (1 Фессалоникадагыларга 5:12, 13).

⁸ Аксагалдар баштапкы чакта кӧп-кӧп иштер эткен (1 Фессалоникадагыларга 5:12, 13 кычырыгар; 1 Тим. 5:17). Олор јуунныҥ сурактарын кожо кӧрӧтӧн. Анайда ок олор јуунныҥ туштажуларын ӧткӱретен ле ака-эјелердиҥ кӧгӱс јаны бек болзын деп болужарга, олорго јӧптӧр беретен (1 Фес. 2:11, 12; 2 Тим. 4:2). Је бу ла ок ӧйдӧ олор бойлорыныҥ билелерин бир де ундыбайтан. Билелерине Иеговала колбуларын тыҥыдарга болушкан, анайда ок олорды акча-манатла јеткилдеген (1 Тим. 3:2, 4; Тит. 1:6—9).

9. Аксагалдар кандый иштер эдет?

⁹ Бӱгӱнги де кӱнде аксагалдар јуунда кӧп иштер эдет. Олор сӱӱнчилӱ јарды јарлагылайт (2 Тим. 4:5). Јуунныҥ јарлайтан јерлеринде јарлаар ишти башкарат, бисти јарлаарга ла ӱренчиктер белетеерге ӱредет ле бойлоры да эрчимдӱ иштегилейт. Анайда ок аксагалдар килеҥкей ле улусты талдабас јаргычылар. Јуунда кандый бир кижи кинчек эдип ийзе, ого Иеговала колбуларын орныктырарга болужат. Бу ла ок ӧйдӧ јуун ару болзын деп кӧрӧт (1 Кор. 5:12, 13; Гал. 6:1). Је олордыҥ эҥ јаан ижи — кӱдӱчиниҥ ижи болот (1 Пётр 5:1—3). Олор библиялык куучын-эрмектер айдат, јуунныҥ кажы ла кижизин јакшы билерге албаданат ла кӱдӱчиниҥ ижин эдеер тушта, ака-эјелердиҥ кӱӱн-санаазын кӧдӱрет. Кезик аксагалдар Каандыктыҥ Тураларын тударында туружат, оныҥ не-немезин јеткилдейт, курултайлар ӧткӱрет ле больницаларла колбожотон комитеттерде ле оорыган улуска болужатан группаларда иштейт. Аксагалдар бистерге болуп, бастыра кӱчинеҥ иштегилейт!

10. Иштеҥкей аксагалдарысты нениҥ учун баалап турганаарды куучындап беригер.

¹⁰ Агару Бичикте кӱдӱчилердиҥ болужынаҥ улам Иегованыҥ койлоры «тырлажып коркыбас» деп айдылган (Иер. 23:4). Финляндияда јадып турган Йоха́нна деп сыйынныҥ учуралын кӧрӱп ийектер. Оныҥ энези јаан оруп калган болгон. Ол айдат: «Мен бойымныҥ сезимдеримди улуска куучындарга сӱӱбейтем. Је бир катап аксагалла куучындашкам, мен оны јакшы билбес болгом. Ол мени сӱреен лаптап угала, мениле кожо мӱргӱп, Иегова мени сӱӱп турган деп кӱӱнимди кӧдӱрип салган. Оныҥ кандый сӧстӧр айтканы санаама кирбейт, је ол ӧйдӧ меге сӱреен јеҥил боло берген. Мен сананзам, кӱч ӧйдӧ оны меге Иегова ийген». А слердиҥ јууныгардагы аксагалдар слерге канайып болушкан?

11. Аксагалдарга быйанысты канайып кӧргӱзерге јараар? (Јурукты база кӧрӱгер.)

¹¹ Иегова бисти аксагалдарга «олордыҥ эдип јӱрген ижи учун» быйанду болзын деп кӱӱнзейт (1 Фес. 5:12, 13, ЈТ). Финляндияда јадып турган Хенрие́тта деп эје мынайып айдат: «Аксагалдардыҥ ӧйи де, ийде-кӱчи де бистий ле ошкош. Олордо бойлорыныҥ да кӱчтери бар, је андый да болзо, олор бистерге болужарга јаантайын белен. Мен олорго кезикте: „Сен сӱреен јакшы аксагал!“ — деп айдадым». А Турцияда јадып турган Сера́ деп эје айдат: «Аксагалдарга оноҥ ло ары бойыныҥ ижин бӱдӱрерге, оморкоду керек болуп јат. Оныҥ учун олорго открытка бичип ийерге јараар, кожо ажанып ийерге эмезе кожо јарлап барып келерге јараар». Слер кажы аксагалга быйанаарды айдар эдеер? Быйанду болгоныгарды сӧстӧрӧӧрлӧ ол эмезе ӧскӧ дӧ эп-аргала кӧргӱзип салыгар (1 Кор. 16:18).

АЙМАК КӦРӦӦЧИЛЕР ЈУУНДАРДЫ ТЫҤЫДАТ

12. Иисус баштапкы чакта јуундарды кем ажыра тыҥыткан? (1 Фессалоникадагыларга 2:7, 8).

¹² Иисус јуунга јӱк ле болушчы ишчилер ле аксагалдар берген эмес, је анайда ок јорыкчы кӧрӧӧчилер берген. Нениҥ учун? Јуундарды тыҥыдарга (Ап. ижи 15:40, 41). Иисустыҥ башкартузыла, Иерусалимдеги аксагалдар Павелди, Варнаваны ла ӧскӧ дӧ эр улусты башка-башка јуундарга аткаратан (Ап. ижи 11:22). Бу јорыкчы кӧрӧӧчилер бойлорын да сананбай, керек дезе ака-эјелер учун јӱрӱмин де берерге белен болгон. (1 Фессалоникадагыларга 2:7, 8, ЈТ кычырыгар.)

13. Аймак кӧрӧӧчилер кандый иш эдет?

¹³ Аймак кӧрӧӧчилерде бош отуратан ӧй дӧ јок. Олордыҥ кезиги канча јӱс километр јерлер ӧдӱп, јуундарга барат. Кажы ла неделеде канча куучын-эрмек айдат, ака-эјелердиҥ кӱӱнин кӧдӱрерге кӱдӱчиниҥ ижин эдет, пионерлердиҥ ле аксагалдардыҥ туштажуларын, анайда ок јарлаар иштиҥ туштажуларын ӧткӱрип јат. Олор аймактыҥ ла регионныҥ курултайларын ӧткӱрет, анда куучын-эрмектер айдат. Аймак кӧрӧӧчи пионерлердиҥ сургалын ӧткӱрет, аймактыҥ пионерлериниҥ аҥылу туштажузын ӧткӱрип јат, анайда ок филиалдаҥ келген јакылталар бӱдӱрет. Бу јакылталардыҥ кезигин тӱрген-тӱкей бӱдӱрерге келижет.

14. Слер иштеҥкей аймак кӧрӧӧчилерди нениҥ учун баалайдыгар?

¹⁴ Аймак кӧрӧӧчилер јуунга кандый тузазын јетирет? Турцияда јадып турган бир ака айдат: «Аймак кӧрӧӧчиниҥ келип јӱрген кийнинеҥ ака-эјелерге болужар кӱӱним тыҥып калат. Бисте башка-башка аймак кӧрӧӧчилер болгон, је качан да олордо бисле, керек дезе менле куучындажатан ӧй јок деп бир де билдирбейтен». А ӧрӧги айдылган Йоханна сыйын бир катап аймак кӧрӧӧчиле јарлаар ишке јӱрген. Ол кӱн олор айылдар сайын јарлап јӱреле, кемге де туштабаган. Је андый да болзо, Йоханнага ол јарлаар иш коркыш јараган. Сыйын куучындайт: «Ол кӱнди качан да ундыбазым, не дезе, мениҥ эки эјем ӧскӧ јердӧӧн јарлаарга кӧчӧ берген, а мен олорго тыҥ санап туратам. Аймак кӧрӧӧчи мыны угала, мени токунадып, келер ӧйдӧ менде тӧрӧӧндӧримле, најыларымла болотон ӧй толтыра болор деп айткан. А бӱгӱнги кӱнде бой-бойыбыстаҥ ыраак јӱргенис кыска ла ӧйгӧ деген». Аймак кӧрӧӧчи слерге де болушкан учурал болгон болор (Ап. ижи 20:37—21:1).

15. а) Аймак кӧрӧӧчилердиҥ ижин баалап турганысты канайып кӧргӱзерис? (3 Иоанн 5—8). (Јурукты база кӧрӱгер.) б) Болушчы ишчилердиҥ ле аксагалдардыҥ ӱйлерин бис нениҥ учун баалап јадыс? Олорго быйанысты канайып кӧргӱзерис? («Олордыҥ ӱйлерин ундыбагар» деп рамканы кӧрӱгер.)

¹⁵ Апостол Иоанн Гайды оноҥ ло ары јорыкчы кӧрӧӧчилерге кӱндӱзек болзын деп кӱӱнзедип, сураган: «Кудайдыҥ кӱӱнзегениле, олорго јол-јорыкка керектӱ немени белетеп бер». (3 Иоанн 5—8, ЈТ кычырыгар.) А бис кӱндӱзегисти канайып кӧргӱзерис? Аргалардыҥ бирӱзи — олорды чайладып салары. База бир арга, аймак кӧрӧӧчиниҥ ӧткӱрип турган јарлаар иштиҥ туштажуларына келери. 6-чы абзацта айдылган Лесли эје база да ӧскӧ аргала болужат. «Мен олор учун мӱргӱп, Иегованы олорго ончо керектӱ немени берзин деп сурап јадым. Анайда ок ӧбӧӧнимле олорго самара бичип, олордыҥ биске болуп, эдип турган ижин тыҥ баалап турганыс деп айдадыс». Аймак кӧрӧӧчилер бис ле ошкош улус деп ундыбагар. Олор оорып та јат, та неге де санааркап јат, кезикте кунугып та јат. Оныҥ учун бистиҥ јылу сӧстӧрис, бир кичинек эткен сыйларыс олордыҥ мӱргӱӱлдерине каруу болордоҥ айабас! (Укаа 12:25).

БИСКЕ БОЛУШЧЫ ИШЧИЛЕР ЛЕ АКСАГАЛДАР КЕРЕК

16. Укаа сӧстӧр 3:27-ле болзо, акалар бойынаҥ кандый сурак сураар аргалу?

¹⁶ Бастыра јердиҥ ӱстинде ака-эјелерге јуундарды кӧрӧтӧн эр улус керек болуп јат. Сен чӧҥӱрилип калган ака болзоҥ болужып болорыҥ ба? (Укаа сӧстӧр 3:27 кычырыгар.) Сен болушчы ишчи болотон амаду тургускаҥ ба? Эмезе болушчы ишчи болуп турган болзоҥ, аксагал болорго албаданадыҥ ба?c Анайда ок Каандыктыҥ јарчыларыныҥ сургалында ӱренерге јӱрӱмиҥде нени-нени солып болорыҥ ба? Андый ӱредӱ сеге Иисустыҥ беретен јакылталарын оноҥ јакшы бӱдӱрерге болужар. Бойыҥа алаҥзып турган болзоҥ, Кудайга мӱргӱ. Анайда ок сеге берилген кандый ла јакылтаны бӱдӱрерге агару тын сура (Лука 11:13; Ап. ижи 20:28).

17. Иисус Христос — бисти кичееп турган Каан деп недеҥ кӧрӧдис?

¹⁷ Иисус бу телекейдиҥ учы келгелекте ӱренчиктериле кажы ла кӱн болор деп сӧзин берген (Матф. 28:20). Ол бойыныҥ сӧзин бӱдӱрип јат. Бис оны кайдаҥ кӧрӧдис? Иисустыҥ бистерге берген «сыйларынаҥ», ӧскӧртӧ айтса, болушчы ишчилердеҥ ле аксагалдардаҥ кӧрӧдис. Бисти кичееп турган акалар берген кысканбас, јалакай, бисти сӱӱп турган Кааныбыска јаан быйанысты айдадыс! Олорго бистер учун эдип турган ижин баалап турганысты айдып та турарыс, ӧскӧ дӧ аргаларла кӧргӱзерис. Је эҥ јаан мак Иегова Кудайыска, нениҥ учун дезе «кандый ла јакшы сыйды» ол берип турган эмей (Иак. 1:17).