Иегова кинчектерди таштап турганы учун быйанду болодыс

1, 2. Бисти нениҥ учун баштапкы абзацта айдылган јиит уулга тӱҥей деп айдарга јараар?

БИР јиит уул бай биледе чыдаган болзын. Је кенете оныҥ ада-энези божоп калган. Мынаҥ улам ол уул ачу-коронго тӱжет. Је анайда ок кӧрӧр болзо, оныҥ ада-энези бастыра акча-манадын ӱреп, керек дезе уулына коркышту кӧп тӧлӱлер артыргызып салган болтыр. Кредиторлор дезе байа уулдаҥ тӧлӱлерди некеп јадылар, је тӧлӱни ол бастыра јӱрӱмине де тӧлӧзӧ, тӧлӧп болбос.

² Бистерди бу јиит уулга тӱҥдештирерге јараар. Бистиҥ ада-ӧбӧкӧлӧрис, Адам ла Ева, толо кемдӱ болгон ло сӱреен јараш райда јаткан (Баш. 1:27; 2:7—9). Олор јажын-чакка мынайып ырысту јӱрер аргалу болгон. Је бир катап коркышту јаан тӱбек болгон. Олор кинчек эткен. Анайып олор райдагы јӱрӱмин ле јажын-чакка јӱрер аргазын јылыйткан. Олор бала-барказына кандый энчи артыргызып салгандар? Агару Бичик мындый каруу берет: «Кинчек телекейге бир кижи ажыра келген, кинчек ажыра ӧлӱм келген. Анайып ончо улус ӧлӱмдӱ боло берген, нениҥ учун дезе ончозы кинчектӱ болуп калган» (Рим. 5:12, ЈТ). Адамныҥ биске артыргызып салган энчизи — ӧлӱмге апарып јаткан кинчек. Ол коркышту јаан тӧлӱге тӱҥей. Бистиҥ кемибис те оны качан да тӧлӧп болбос (Сар. 49:8).

3. Нениҥ учун кинчектерди тӧлӱлерге тӱҥдештирерге јараар?

³ Иисус кинчектерди тӧлӱлерге тӱҥдештирген (Матф. 6:12; Лука 11:4). Кинчектер эдип турзаас, Иегованаҥ тӧлӱге акча алып турганыс деп айдарга јараар. А Иегова дезе тӧлӱбисти кайра сураар јаҥду. Је тӧлӱбисти тӧлӧп болбозоос, бистиҥ тӧлӱни јӱк ле бир неме бӧктӧӧр аргалу. Ол — ӧлӱм (Рим. 6:7, 23).

4. а) Адам ла Еваныҥ јылыйтканын улус бойлоры кайра алып болор бо? (Сарын 49:7—9). б) Агару Бичикте «кинчек» деп сӧс нени темдектейт? («Кинчек» деп рамканы кӧрӱгер.)

⁴ Адам ла Еваныҥ јылыйтып салганын кайра алатан арга бар ба? Аларга албаданган да болзоос, бисте тӱҥей ле не де келишпес эди. (Сарын 49:7—9 кычырыгар.) Иегова эмес болзо, ӱргӱлји јӱрӱмге де, тирилишке де ижемји кайдаҥ келетен эди. Бис тындулар чылап јок ло болуп калар эдис (Эккл. 3:19; 2 Пётр 2:12.).

5. Бистиҥ сӱӱштӱ Адабыс бисти Адамнаҥ келген тӧлӱнеҥ айрыырга нени эткен? (Јурукты кӧрӱгер.)

⁵ Ӧрӧги айдылган јиит уулды ойто катап сананып ийектер. Бир бай кижи оныҥ тӧлӱлерин бӧктӧӧргӧ сананган. Мыны угуп, ол уул нени сезер эди? Ол ого коркышту тыҥ быйанду болор эди дезеер? Анайып ла бистиҥ теҥеридеги сӱӱшту Иегова Адабыс бистиҥ тӧлӱни — Адамнаҥ келген кинчегисти тӧлӧӧргӧ кӱӱнзеген! Иисустыҥ айтканыла, Иегова биске андый сыйды мындый шылтактаҥ улам эдерге кӱӱнзеген: «Кудай телекейди тыҥ сӱӱгенинеҥ улам, бойы јайаган Уулын берген, ого бӱткен кажы ла кижи ӧлбӧй, ӱргӱлји јӱрӱмдӱ болзын деп» (Иоанн 3:16). Анайда ок бу сый биске Иегованыҥ јуук најызы болотон арга берет.

6. Бу јӧрмӧлдӧ нени шӱӱжерис, нениҥ учун?

⁶ Бу сый бисти кинчектердеҥ канай јайымдап јат? Бу сурактыҥ каруузын билип аларга, Агару Бичиктеги башка-башка мындый сӧстӧрдиҥ учурын шӱӱжип ийерис: јаражары, кинчекти таштаары, толынты, јайымдалары ла акту эдип јарлалары. Бу биске Иегованыҥ бисти кинчектеристеҥ јайымдаарга берген сыйын оноҥ тыҥ баалаарга болужар.

АМАДУЗЫ: ЈАРАЖАРЫ

7. а) Адам ла Ева ӱргӱлји јӱрӱмнеҥ ӧскӧ база нени јылыйтып салган? б) Адам ла Еваныҥ сӧсукпазынаҥ улам олордыҥ бала-барказыла не болуп калган? Биске кандый болуш керек? (Римдегилерге 5:10, 11).

⁷ Адам ла Ева јӱк ле ӱргӱлјиге јӱретен аргазын јылыйткан эмес, је теҥеридеги Иегова Адазыла јуук колбуларын јылыйтып салган. Озо баштап олор Кудайдыҥ балдары болгон (Лука 3:38). Је кинчек эдип ийерде, Кудайдыҥ ӧштӱлери болуп калган. Оныҥ учун Иегова олорды бойыныҥ билезинеҥ чыгара сӱрӱп ийген (Баш. 3:23, 24; 4:1). А бис олордыҥ бала-барказы болодыс, оныҥ учун биске Иеговала јаражып алар керек. (Римдегилерге 5:10, 11 кычырыгар.) Је улустыҥ кемизи де Кудайга бойы јууктап болбос. Биске болуш керек болот. Бу ӱлгерде «јаражары» деп грек сӧс бир справочникте «ӧштӱ болгон кижи ого најы болуп калар» аргалу деп айдылат. Кайкамчылу немези дезе, Иегова бисле јаражарга баштапкы алтамды бойы эткен. Ол нени эткен?

ЭП АРГАЗЫ: КИНЧЕКТЕР ТАШТААРЫ

8. Кинчекти таштаары ол не?

⁸ Кинчектӱ улусла јаражып аларга, Иегова кинчекти таштаар арга ачкан. А кинчекти таштаарга, јылыйган немениҥ баазына тӱҥей баалу неме берер керек. Јӱк ле ол тушта јылыйган неме кайра орныктырылар. Айдарда, кинчек ташталбаза, Кудайла најылажар арга јок болот (1 Иоанн 4:10, сноска).

9. Иегова јебрен Израильде кинчектер таштаар кандый арга ачкан?

⁹ Израиль албатыга Иеговала кожо јакшы колбуларлу болорго нени эдер керек деп, Кудай айдып салган. Ол кажы ла јыл ӧткӱрилетен Кинчектер ташталатан кӱн тургускан. Бу кӱнде улу абыс тайылгага тындулар экелетен болгон. Кижиниҥ јӱрӱми тындуныҥ јӱрӱмине кӧрӧ баалу болот. Оныҥ учун бу тайылгалар кижиниҥ кинчегин бӱдӱнге таштабай турган болгон. Качан израильтяндар кинчегин алынып, Иегованыҥ некелтелери аайынча тайылгалар экелип турза, Иегова олордыҥ јаманын таштап туратан (Евр. 10:1—4). Анайда ок бу тайылгалар олор кинчектӱ болгон деп эске алындыратан. Бого коштой олордыҥ кинчектери бӱдӱнге ле ӱргӱлјиге ташталзын деп, оноҥ јаан тайылга керек деп оҥдоорго болушкан.

10. Иегова бастыра улустыҥ кинчегин таштаарга нени эткен?

¹⁰ Иегова улустыҥ кинчектерин таштаарга нени эткен? Ол бойыныҥ сӱӱген Уулын јерге ийген. Иисус «кӧп улустыҥ кинчектерин јоголторго, бир катап тайылган» (Евр. 9:28). Ол «кӧп улус учун толынты эдип бойыныҥ јӱрӱмин берейин деп келген» (Матф. 20:28, ЈК 2003). Толынты — ол не?

БААЗЫ: ТОЛЫНТЫ

11. а) Толынты ол не? б) Толынтыны кандый кижи тӧлӧӧр аргалу болгон?

¹¹ Агару Бичикте кинчекти таштаарга ла јаражып аларга тӧлӧлгӧн баа — толынты деп айдылат. Толынты Иеговага Адам ла Еваныҥ јылыйтканын кайра беретен тӧзӧлгӧ болот. Адам ла Ева толо кеминде јӱрӱмин ле јажын-чакка јӱретен арганы јылыйткан. Оныҥ учун толынтыныҥ баазы олордыҥ јылыйтканына келижер учурлу (1 Тим. 2:6). Андый болордо, толынтыны эр-кемине јеткен: 1) толо кемдӱ, 2) јерге јажын-чакка јӱрер аргалу, 3) јӱрӱмин бис учун берерге белен болгон кижи тӧлӧӧр аргалу. Јӱк ле мындый кижиниҥ јӱрӱми толынты болор аргалу.

12. Иисус нениҥ учун толынты тайылга эдер аргалу болгон?

¹² Иисус нениҥ учун толынты тайылга эдер аргалу болгоныныҥ ӱч шылтагын кӧрӱп ийектер. 1) Ол толо кемдӱ кижи болгон ло ол бир де «кинчек этпеген» (1 Пётр 2:22). 2) Ол ӱргӱлјиге јердиҥ ӱстине јӱрер аргалу болгон. 3) Ол ӧлӧргӧ лӧ бис учун јӱрӱмин берерге белен болгон (Евр. 10:9, 10). Адам кинчек эдердеҥ озо кандый толо кеминде кижи болгон, Иисус база ла андый толо кеминде кижи болгон (1 Кор. 15:45). Иисус јӱрӱмин берип, керектӱ бааны тӧлӧп салган (Рим. 5:19). Анайып ол «калганчы Адам» болуп калды. Оныҥ учун Адамныҥ јылыйтканы учун тӧлӧйтӧн база бир толо кеминде кижи керек јок. Иисус «бир катап ла ӱргӱлјиге» божогон (Евр. 7:27; 10:12).

13. Кинчекти таштаары ла толынтыныҥ башказы неде?

¹³ Кинчекти таштаары ла толынтыныҥ башказы неде? Кинчекти таштаары — ол Кудайдыҥ улусла јакшы колбуларын орныктырарга эткен алтамы. Толынты — ол улустыҥ кинчегин таштаарга тӧлӧлгӧн баа. А бу кандый баа болот? Иисустыҥ бис учун тӧккӧн баалу каны (Эф. 1:7; Евр. 9:14).

ТУЗАЗЫ: ЈАЙЫМДАЛАРЫ ЛА АКТУ ЭДИП ЈАРЛАЛАРЫ

14. Оноҥ ары нени кӧрӧрис, нениҥ учун?

¹⁴ Кинчекти таштаары биске нени берет? Бу сурактыҥ каруузын билип аларга, јайымдалары ла акту эдип јарлалары ол не дегенин кӧрӱп ийектер. Мыны билип алзаас, Иегованыҥ кинчекти таштап турганын оноҥ тыҥ баалаарыс.

15, 16. а) Толынты бисти недеҥ јайымдаган? б) Кинчектеҥ ле ӧлӱмнеҥ јайымдалары керегинде сананзаар, нени сезедеер?

¹⁵ Агару Бичикте толынты јайымдап турганын темдектейт. Апостол Пётр мынайып јартаган: «Слерге адалардаҥ берилген сандырашту јӱрӱмнеҥ быртып калар мӧҥӱнле эмезе алтынла садылып алылбаганаарды, карын, јек јок ло ару кураан ошкош Христостыҥ баалу каныла садылып алылганыгарды билип јадыгар» (1 Пётр 1:18, 19).

¹⁶ Иисустыҥ тайылгазы кыйын-шыра јетирип турган кинчектеҥ ле ӧлӱмнеҥ бисти јайымдаар аргалу (Рим. 5:21). Бис Христостыҥ баалу канынаҥ эмезе јӱрӱминеҥ берилген јайымы учун Иегова ла Иисуска јаан быйанду болодыс (1 Кор. 15:22).

17, 18. а) Кудайдыҥ кӧзинде акту эдип јарлалганыстаҥ улам кандый алкыштар берилет? б) Иегова бисти акту деп кӧрӱп турганын сананзаар, слер нени сезедеер?

¹⁷ Акту эдип јарлалганы бистиҥ эткен кинчектерис учун тӧлӧӧри керек јок ло база бууры јогын темдектейт. Бу ок ӧйдӧ Иегова бойыныҥ чындык нормаларын буспай јат: ол кинчекти кӧрбӧӧчи болуп эмезе јакшы керектерис учун бисти акту эдип јарлабай јат. Иегова бистиҥ кинчектеристи таштап турган деп бӱдӱп турганыстаҥ анайда ок бис учун толынты баа тӧлӧлгӧнинеҥ улам ол бистиҥ кинчектеристи таштаарга белен болот (Рим. 3:24; Гал. 2:16).

¹⁸ Мынаҥ улам бистерге кандый алкыштар берилет? Иисусла кожо теҥериде башкарар улус акту деп јарлалып, Кудайдыҥ балдары болуп калган (Тит. 3:7; 1 Иоанн 3:1). Иегова олордыҥ кинчегин таштап салган. Ӧскӧртӧ айтса, олор качан да кинчек этпегендий болуп калган. Оныҥ учун олор каандар ла абыстар болуп иштеер аргалу (Рим. 8:1, 2, 30). Јерде јӱрер ижемјилӱ улус акту деп јарлалып, Кудайдыҥ најылары болуп калат (Иак. 2:21—23). Олордыҥ кинчектери база ташталып калган. Армагеддонды ӧдӱп чыккан кара-бајырт албатыда, јерде јажын-чакка јӱрер арга болор (Иоанн 11:26). Божоп калган «актулар да», «акту эместер де» тирилер (Ап. ижи 24:15; Иоанн 5:28, 29). Оноҥ јердеги Иегованыҥ ончо чындык ишчилери «Кудайдыҥ балдарыныҥ сӱреен јакшы јайымын алар» (Рим. 8:21, ЈТ). Теҥеридеги Иегова Адабысла јаражып алар ӧйди бис энчикпей сакып јадыбыс!

19. Иегованыҥ ла Иисустыҥ шылтузынаҥ улам, бистиҥ айалга канайып солынган? («Биске кандый туза берет» деген рамканы база кӧрӱгер.)

¹⁹ Бис качан да бастыра немезин јылыйтып, јаан тӧлӱге тӱшкен јиит кижиге тӱҥей болгоныс. Је Иегованыҥ болужынаҥ улам бистиҥ айалга солына берген. Не дезе ол бистиҥ кинчектеристи таштап, толынтыны тӧлӧп салган. Иисус Христоско бӱткенис бисти кинчектеҥ ле ӧлӱмнеҥ јайымдайт. Анайда ок Иегова бистиҥ кинчектеристи таштап салза, оныҥ кӧзинде бис кинчек этпегендий болодыс. Је эҥ учурлузы, эмди бисте Иеговала јуук, јылу колбулар болот.

20. Келер јӧрмӧлдӧ бис нени шӱӱжерис?

²⁰ Иегова ла Иисус биске нени эткенин шӱӱп сананып турзаас, олорго јаан быйанду болодыс (2 Кор. 5:15). Олор эмес болгон болзо, бисте кандый да ижемји болбос эди! Келер јӧрмӧлдӧ бир канча темдер кӧрӱп ийерис. Бу темдер, Иегова бистиҥ јаманысты таштап салган кийнинде, биске бойысты база бурулабас керек деп оҥдоорго болужар.