Иегова бистиҥ кинчектеристи таштап турганынаҥ кандый туза бар?

1. «Мен сениҥ јаманыҥды таштап јадым» деп сӧстӧрди нениҥ учун башка-башка эдип оҥдоорго јараар?

СЛЕР кемди-кемди ачындырып ийгенеер, је ол кижи слерге: «Мен сениҥ јаманыҥды таштап јадым» — деп айткан. Слерде кандый сезимдер болор? Јеҥил боло берер дезеер? Је ол кижиниҥ сӧстӧрин канайып айлаар? Ол: «Алдырбас, болгон неме болгон ло. Бистиҥ ортобыста болгон ачынышты ундып јадым. Бис экӱ најылар болуп артып јадыс» — деп айдарга сананган ба, эмезе: «Бу суракты бӧктӧп јадыс, је оноҥ ары најылар болуп артпазыс» — деп айдарга сананган ба? Айдарда, кижи кижиниҥ јаманын таштаганында кӧп сурактар чыгат.

2. Иегова улустыҥ кинчегин канайып таштап турганы нениҥ учун кайкамчылу? (Сносканы база кӧрӱгер.)

² Иегова толо кеминде эмес улустыҥ јастыраларын канайып таштап турганы сӱреен кайкамчылу болот. Бир сарнаачы Иегова керегинде мындый сӧстӧр айткан: «Сен, улус сенеҥ айап јӱрзин деп, кинчекти таштап турганa Кудай» (Сар. 130:4). Эйе, Иегова чылап кинчекти кем де таштап болбос. Агару Бичикте Кудай улустыҥ кинчектерин таштап турганы керегинде айдылза, кезикте еврей бир сӧс тузаланылат. Ол сӧс кижи кижиниҥ јаманын таштаган тушта качан да тузаланылбай јат.

3. Иегованыҥ кинчекти таштаганы, улустыҥ кинчекти таштаганынаҥ незиле башка? (Исайя 55:6, 7).

³ Иегова кижиниҥ јаманын таштап салза, ол оны кинчектеринеҥ арчып салат деп айдарга јараар. Мынаҥ улам кижиниҥ ле Кудайдыҥ колбулары јакшы болуп калат. Бис канча да катап јастырып турган болзоос, ол бистиҥ кинчектеристи акту кӱӱнинеҥ таштап турганы учун ого јаан быйанду болодыс. (Исайя 55:6, 7 кычырыгар.)

4. Кинчекти чыннаҥ таштаары ол не дегенин оҥдоорго Иегова биске канайып болужат?

⁴ Иегова улустыҥ кинчегин канайып таштап турганы, улус бой-бойыныҥ кинчегин канайып таштап турганынаҥ чек башка болордо, кинчектерди чыннаҥ ла таштаары ол не дегенин бис оҥдоп болорыс па? Эйе. Иегова бисти мыны оҥдоп алзын деп болужарга, Агару Бичикте јилбилӱ темдер тузаланат. Олордыҥ кезигин бу јӧрмӧлдӧ шӱӱжип ийерис. Олордыҥ болужыла Иегова бисти кинчектеристеҥ канайып арчып салып турганын ла оныла колбуларысты орныктырарга канайып болужып турганын билип аларыс. Мыны ӱзе шӱӱшкен кийнинде, теҥеридеги Адабысты оноҥ тыҥ сӱӱр ле ого оноҥ тыҥ быйанду болор кӱӱнис келер.

ИЕГОВА КИНЧЕГИСТИ ЫРААК ТАШТАП САЛАТ

5. Иегова бистиҥ кинчектеристи таштап салза, нени сезедис?

⁵ Агару Бичикте кинчектер, кӧп сабада, уур јӱкле тӱҥдештирилет. Давид каан бойыныҥ сезимдери керегинде мынайып айткан: «Кинчектерим мениҥ баштаҥ ажыра. Олор меге кӧдӱрип болбойтон јӱктий, оны меге апарарга коркышту кӱч» (Сар. 38:4). Је Иегова кинчегин алынып турган улустыҥ јаманын таштап јат (Сар. 25:18; 32:5). Бу ӱлгерлерде «јаманды таштаары» деп кӧчӱрилген еврей сӧстиҥ учуры «кӧдӱрер» эмезе «апарар». Оныҥ учун Иегова бистиҥ јардыстаҥ кинчектиҥ уур јӱгин алып барат деп айдарга јараар.

6. Иегова бистиҥ кинчектеристи канча киреге ыраак таштап салат?

⁶ База бир темниҥ болужыла Иегова бистиҥ кинчектеристи канча киреге ыраак апарып салып турганын сананып ийерге јараар. Сарын 103:12-де: «Канайып кӱнчыгыш кӱнбадыштаҥ ыраак, анайып ла Кудай кинчектеристи бистеҥ ыраадып салган» — деп бичилген. Кӱнчыгыш кӱнбадыштаҥ коркышту ыраак турат, олор качан да бой-бойына јууктап болбос. Анайып ла Иегова кинчектеристи бистеҥ коркышту ыраак таштап салат. Айдарда, таштап салган болордо, ол оны база качан да эске албай јат.

7. Иегова бистиҥ кинчектеристи канайдып салат? (Михей 7:18, 19).

⁷ Иегова бистиҥ кинчектеристи ыраак апарып салат деп билип алдыс. Ол олорды оноҥ ары канайдат? Кайда да кичееп турган ба? Јок! Езекия каан Иегова Кудай керегинде мынайып айткан: «Сен мениҥ кинчектеримди јардыҥ ажыра таштап ийгеҥ» эмезе сноскада айдылганыла болзо, «кинчектеримди кӧрбӧйин деп, олорды јоголтып салгаҥ» (Иса. 38:9, 17, сноска). Мындый јурук јуралат: Иегова бурузын алынган кижиниҥ кинчектерин база кӧрбӧйин деп, ыраак таштап салган. Бу сӧстӧрди мынайып кӧчӱрерге јараар: «Сен мениҥ кинчектеримди мен качан да кинчек этпеген немедий чилеп, јоголтып салгаҥ». Бого тӱҥей сӧстӧр Михей 7:18, 19 (кычырыгар) айдылган. Анда Иегова бистиҥ кинчектеристи талайдыҥ тӱбине таштап салган деп айдылат. Озогы ӧйлӧрдӧ талайга не-не тӱшсе, оны ойто чыгарып алар арга јок болгон.

8. Бу јӧрмӧлдиҥ баштапкы бӧлӱгинеҥ бис нени билип алдыс?

⁸ Бу ончо темдердеҥ Иегова бистиҥ јаманысты таштап салза, кинчектеристи јоголтып салат, ол тушта уйадыс бисти база јибей јат деп кӧрдис. Давид айткан: «Јаман керектери ташталган, кинчектери јабылган улус ырысту. Кудай кемниҥ кинчектерин тоого албай турган, андый кижи ырысту» (Рим. 4:6—8, ЈТ). Иегова кинчектеристи канайып таштап турганын кӧрзӧ, кижи кайкаар!

ИЕГОВА КИНЧЕГИСТИ ЈОГОЛТЫП САЛАТ

9. Иегова бистиҥ кинчектеристи бӱдӱнге јоголтып салып турганын кандый темнеҥ кӧрӧдис?

⁹ Агару Бичикте Иегова бурузын алынып турган кижиниҥ кинчектерин, толынты тайылгага тӧзӧлӧнип, канайып арчып турганын кӧргӱзип турган ӧскӧ дӧ темдер бар. Ӧскӧртӧ айтса, Иегова кижини кинчектеринеҥ јунып ийзе, ол кижи ару боло берет (Сар. 51:7; Иса. 4:4; Иер. 33:8). Бу аруталыш керегинде Агару Бичикте мындый сӧстӧр бар: «Слердиҥ кинчектеригер јарык кызыл бӧстий болзо, олор ак кардый болуп калар. Кӱреҥ-кызыл бӧстий де болзо, ак тӱктий болуп калар» (Иса. 1:18). Кийим кызыл ӧҥдӱ неге-неге уймала берзе, оны чыгарарга коркышту кӱч дезеер? Је Иегова бисти кинчектеристеҥ арутап салар деп сӧзин берет, олордоҥ изи де артпас.

10. Иегова бистиҥ кинчектеристи акту кӱӱнинеҥ таштап турганын кӧргӱзерге, база кандый тем тузаланат?

¹⁰ Ӧткӧн јӧрмӧлдӧ кӧргӧнисле, Иегова бистиҥ кинчектеристи тӧлӱге тӱҥдештирет (Матф. 6:12; Лука 11:4). Бис энебистеҥ коркышту јаан тӧлӱлӱ чыкканыс. Кажы ла катап кинчек эдип турзаас, бистиҥ тӧлӱбис там ла кӧптӧп јат. Је качан Иегова бистиҥ кинчектеристи таштап јатса, ол тӧлӱни кырып салгандый болот. Оныҥ учун Иегова тӧлӧп салган немени кайра сурабай јат. Слердиҥ тӧлӱгерди кырып салза, сӱӱнчилӱ ле јеҥил боло берет дезеер. Анайып ла Иегова бистиҥ кинчектеристи таштап салза, бисте андый ла сезимдер болот!

11. Агару Бичикле болзо, бистиҥ кинчектерис «арчылып калар» дегенин канайып оҥдоор? (Апостолдордыҥ ижи 3:19, сноска).

¹¹ Апостолдордыҥ ижи 3:19, ЈТ кычырыгар. Бу ӱлгердиҥ сносказын кӧрзӧ, «јаманын таштаганы» деп кӧчӱрилген грек сӧс, «арчып салганын» темдектейт. Иегова бистиҥ тӧлӱлеристи ол эмезе кинчектеристи јӱк ле кырып салып турган эмес, ол олорды арчып салат. Темдектезе, слерге тӧлӱге бир кижи акча берген болзын. Ол оны алымдабай, тӧлӱгерди кырып салган. Је кырып салган тоолор тӱҥей ле кӧрӱнип турар дезеер? Је качан олорды арчып салза, олордоҥ не де кӧрӱнбес. Сананып ийектер, јебрен ӧйлӧрдӧ черниланы недеҥ эдип туратанын. Оны кӧӧни, чагананы ла сууны коштырыжып эдетен. Оныҥ учун бичип салганын чыкту бӧслӧ арчып ийерге јараар болгон. Арчып салган кийнинде, анда кандый сӧстӧр болгонын кем де кӧрӱп болбос. Мынайып кижиниҥ тӧлӱзин арчып салза, ол качан да тӧлӱге албагандый болуп калат. Анайып ла Иегова бистиҥ кинчектеристи јӱк ле кырып салып турган эмес, је бисти кинчектеристеҥ арутап салат. Мыны сананып ийзе, кандый јакшы! (Сар. 51:9).

12. Койу булуттар керегинде айдып, Иегова бисти неге ӱредет?

¹² Иегова база бир темниҥ болужыла бисти кинчектеҥ канайып арутап турганын јартап јат. Ол айдат: «Мен сениҥ кинчектериҥди булутла бӱркегендий чилеп бӧктӧп саларым. Кинчектериҥди койу булуттарла јажырып саларым» (Иса. 44:22). Иегова бистиҥ јаманысты таштаза, кинчектеристи койу булутла бӱркеп салгандый болот. Ол тушта олор биске бойыска да, Иеговага да кӧрӱнбей барат.

13. Иегова слердиҥ кинчектереерди таштап салза, слер нени сезедеер?

¹³ Иегова бистиҥ јаманысты таштап салган болзо, биске бойысты база бурулабас керек. Нениҥ учун дезе бис јӱрӱмистиҥ учына јетире кинчектӱ јӱрбезис. Иегова бисти арутап салат. Анайда ок Иисус Христостыҥ каны бистиҥ тӧлӱлеристи кырып салат. Керек дезе олор кайда-кайда бичилип калган артпай јат. Айдарда, јаманысты алынып турзаас, Иегова мынайып ла кинчектеристи таштап салат.

ИЕГОВА БИСКЕ ОЙТО ОНЫҤ НАЈЫЗЫ БОЛОТОН АРГА БЕРЕТ

14. Иегова бистиҥ кинчегисти таштап салган деп, бис нениҥ учун бӱдер аргалу? (Јуруктарды база кӧрӱгер.)

¹⁴ Иегова бистиҥ кинчегисти таштап салган болзо, бис оныҥ најызы болор аргалу. Оныҥ учун бис бойысты јинбезис. Биске мынайып сананбас керек: Иегова меге эмдиге ле ачынып турган, эптӱ ӧй боло ло берзе, ол мени кату каруузына тургузар деп. Јок, Иегова андый эмес! Ол бистиҥ кинчегисти таштап салган деп бӱдер керек. Судурчы Иеремия Кудайдыҥ мындый сӧстӧрин бичип салган: «Мен олордыҥ јаманын таштап саларым, кинчектерин де эске албазым» (Иер. 31:34). Бого тӱҥей шӱӱлтени апостол Павел Еврейлерге 8:12-де айткан. «Эске албазым» дегенин канайып оҥдоор?

15. Иегова бистиҥ кинчектеристи эске албай турган дегенин канайып оҥдоор?

¹⁵ Агару Бичикте «эске алары» деген сӧс кезикте «ӧткӧн ӧйдӧ не болгонын сананарын» темдектебей јат. Ол та нени де эдерин темдектеер аргалу. Темдектезе, Иисустыҥ јанында тӧҥӧшкӧ кададып салган тонокчы кижи ого айткан: «Каандыгыҥа келзеҥ, мени эске ал» (Лука 23:42, 43). Бу кижиниҥ оны эске ал деп сураганы, ол керегинде јӱк ле сананып ийзин дегени эмес, је тирилтип ийзин деп сураганы болот. Иисус оныҥ сурагын бӱдӱрер болды. Оныҥ учун Иегова бистиҥ кинчектеристи база эске албас деп айтканы, ол кинчектеристи таштап салганын кӧргӱзет. Иегова бисти кинчектерис учун эмди де, келер де ӧйдӧ кату каруузына тургуспас.

16. Иегова бистиҥ јаманысты таштап салза, бис нени аладыс?

¹⁶ База бир тем кӧрӱп ийектер. Агару Бичик бисти, толо кеминде эмес болуп калганыстаҥ улам, «кинчектиҥ кулдары» болуп калганыс деп айдат. Је Иегова бистиҥ јаманысты таштап саларда, бис «кинчектеҥ [кулданыштаҥ] јайымдалып» калганыс (Рим. 6:17, 22; Ачыл. 1:5). Оныҥ учун узак јылдарга кулданышта јӱрген кижи чилеп јайымга чыгала, сӱӱнип јадыс. Бу тем Иегованыҥ биске берген јайымын баалап турарга болужат.

17. Иегова кандый учурыла бисти эмдеп салат? (Исайя 53:5).

¹⁷ Исайя 53:5 кычырыгар. Агару Бичикле болзо, бис ӧлӱмге экелетен оорула ооруп турганыс. Је толынты тайылганаҥ улам бис јазылып калганыс (1 Пётр 2:24). Кинчек Иеговала колбуларысты ӱреп јат, је толынты дезе оныҥ најызы болотон арга берет. Кижи јаман оорунаҥ јазылып калза, сӱреен тыҥ сӱӱнип јат. Анайып ла бис кӧгӱс јанынаҥ јазылып, Иегова бисти јарадып турган деп сезип турзаас, база тыҥ сӱӱнип јадыс.

ИЕГОВАНЫ БИСТИҤ КИНЧЕКТЕРИСТИ ТАШТАП ТУРГАНЫ УЧУН БААЛАГАР

18. Иегова бистиҥ кинчектеристи таштап турганы керегинде башка-башка темдердеҥ нени билип алдыс? («Иегова бистиҥ кинчегисти канайып таштайт?» деп рамканы база кӧрӱгер.)

¹⁸ Иегова бистиҥ јаманысты таштап турган деп кӧргӱзип турган темдердеҥ нени билип алдыс? Ол бистиҥ јастыраларысты таштап салган болзо, олорды база эске албай јат. Олор учун бисти келер де ӧйдӧ кату каруузына тургуспас. Мынаҥ улам бис теҥеридеги Адабысла јакшы колбуларлу болор аргалу. Је анайда ок мындый немени ундыбас керек, Иегова бистиҥ кинчектеристи таштаганы — ол сый. Бу сыйды биске Иегова бис оны иштеп алганыс учун эмес, је сӱӱжинеҥ ле јалакайынаҥ улам берет (Рим. 3:24).

19. а) Иеговага нениҥ учун быйанду болодоор? (Римдегилерге 4:8). б) Келер јӧрмӧлдӧ нени шӱӱжерис?

¹⁹ Римдегилерге 4:8, ЈТ кычырыгар. Иеговага бистиҥ кинчектеристи таштап турганы учун јаан быйанду болодыс! (Сар. 130:4). Је ол кинчектеристи таштазын деп, биске бир неме эдер керек. Бу керегинде Иисус: «Улустыҥ кинчегин таштабас болзогор, Адагар да слердийин таштабас» — деп айткан (Матф. 6:14, 15). Оныҥ учун Иегованаҥ тем алып, улустыҥ јаманын таштап турактар. Келер јӧрмӧлдӧ улустыҥ кинчегин таштаарга, биске не болужарын билип аларыс.