Иегова јаманыҥды таштап салган деп бӱдӱп тур

1, 2. Иегова кинчегисти таштап салза, бис нени сезедис? ( јурукты база кӧрӱгер.)

ДАВИД каан эткен кинчектери учун санааркап, бойын јинип туратан (Сар. 40:12; 51:3, ӱстиндеги сӧстӧр). Је ол акту јӱрегинеҥ Кудайдаҥ јаманын таштазын деп сураарда, Иегова оныҥ јаманын таштаган. Мынаҥ улам оныҥ јӱрегине амыр, јеҥил боло берген. Бистиҥ де кинчектеристи Иегова таштап салза, бисте база андый сезимдер болор (2 Сам. 12:13; Сар. 32:1).

² Иегова бистиҥ кинчектеристи, керек дезе уур да кинчектеристи, таштаарга белен деп билерге кандый јакшы! Кудай кинчектеристи таштазын деп турган болзоос, биске акту јӱрегистеҥ кинчегисти алынып, керектӱ алтамдар эдип, база андый јастыралар этпеске, бастыра ийде-кӱчистеҥ албаданар керек (Укаа 28:13; Ап. ижи 26:20; 1 Иоанн 1:9). Анчада ла бисти сӱӱндирип турганы — Иегова бистиҥ јаманысты таштаган кийнинде, кинчектеристи ойто эске алындырбай јат, олор учун кату каруузына тургуспай јат (Иез. 33:16).

3, 4. а) Сууга чӧҥӱрилген кийнинеҥ бир эједе кандый сезимдер болгон? б) Бу јӧрмӧлдӧ нени шӱӱжерис?

³ Иегова бистиҥ кинчектеристи таштап салган деп бӱдерге, кезикте кӱч болот. Иегованыҥ Керечилериниҥ билезинде чыдаган Дже́нниферле андый ла болгон. Јиит тужында ол экијӱстенип јӱрген. Канча јылдар ӧдӧрдӧ, Дженнифер Иеговага кайра келип, јӱрӱмин солып, сууга чӧҥӱрилген. Ол куучындайт: «Мен јууннаҥ јӱре береле, кей јӱрӱм јӱрӱп, аракыдап, јӱк ле акча керегинде санангам. Ол тушта мен кату, казыр кижи болгом. Је оноҥ кинчегимди алынып, Иегованы јаманымды таштазын деп јайнап сурагам. Иисустыҥ тайылгазынаҥ улам Кудайдыҥ кӧзинде мен ару болор аргалу деп оҥдогон до болзом, је бого бӱдерге тӱҥей ле кӱч болгон».

⁴ Сениҥ алдында эткен кинчектериҥди Иегова таштап салган деп бӱдерге кӱч болгон болор. Андый болзо, Давид каанныҥ темин эске алын. Иегова буурзак Кудай деп ол алаҥзыбаган. Бисти де алаҥзыбазын деп, Иегова кӱӱнзеп јат. Бу јӧрмӧлдӧ Иегова јаманысты таштап салган деп нениҥ учун бӱдер керек, анайда ок мыны эдерге не болужар деп шӱӱжип ийерис.

ИЕГОВА ЈАМАНЫСТЫ ТАШТАП САЛГАН ДЕП НЕНИҤ УЧУН БӰДЕР КЕРЕК?

5. Сатана канайып тӧгӱндеп јат? Тем куучындап беригер.

⁵ Иегова бистиҥ кинчектеристи таштап салган деп бӱдӱп турзаас, Сатананыҥ тузагына кирбезис. Сатана бисти Кудайга иштебей барзын деп, канайып ла сӱмеленер деп ундыбактар. Бойыныҥ амадузына јединерге, ол бисти кинчектерис коркышту јаман, Кудай јаманысты качан да таштабас деп санандырарга албаданар. Јебрен Коринфте болгон учуралды эске алып ийектер. Анда бир эр кижини балыр керек учун јууннаҥ туураладып салган (1 Кор. 5:1, 5, 13). Кийнинде бу кижи кинчегин алынып, кайра келген. Је Сатана ака-эјелерди оныҥ кинчегин таштабазын деп, оныҥ келгенине сӱӱнбей, оныла соок тудунзын деп албаданган. Анайда ок Сатана кинчегин алынган кижини Кудай оныҥ кинчегин качан да таштабас деп санандырарга албаданган. Мынаҥ улам кижи ӧйинеҥ ӧткӱре кунугып, Иеговага иштебей барар эди. Сатананыҥ амадузы да, тузаланып турган эп-аргалары да солынбаган. Је «бис оныҥ канайып тӧгӱнденип турганын билерис» (2 Кор. 2:5—11).

6. Бойысты бурулабаска, не болужар?

⁶ Иегова бистиҥ јаманысты таштап салган деп бӱдӱп турзаас, бойысты бурулабай барарыс. Кинчек эдип ийзеес, бойысты јинип баштайдыс (Сар. 51:17). Бу бисти кылык-јаҥысты солып, чын алтамдар эдерге кӱӱнзедер (2 Кор. 7:10, 11). Је кинчегисти алынган да кийнинеҥ, тӱҥей ле бойысты јинип турган болзоос, ийде-кӱчис чыгар. Иегова бистиҥ јаманысты таштап салган болордо, бойысты база бурулабас керек. Ол тушта бис Кудайга ару уйатту ла амыр јӱректӱ иштеер аргалу болорыс (Кол. 1:10, 11; 2 Тим. 1:3). Је Иегова јаманысты таштап салган деп бӱдерге, тӱҥей ле кӱч болзо, канайдар? Ол јаманысты таштап салган деп бойысты канайып бӱдӱмјилеер?

ИЕГОВА ЈАМАНЫСТЫ ТАШТАП САЛГАН ДЕП, БОЙЫСТЫ КАНАЙЫП БӰДӰМЈИЛЕЕР?

7, 8. Иегова бойы керегинде Моисейге нени айткан, бу бисти неде бӱдӱмјилейт? (Чыгыш 34:6, 7).

⁷ Иегова бойы керегинде нени айдып салганын шӱӱп санан. Синай кырда Кудайдыҥ Моисейле куучындашканын эске алып ийектерa. (Чыгыш 34:6, 7 кычырыгар.) Иеговада кӧп јакшы кылык-јаҥдар бар, је бу тушта ол озо ло баштап бойын «килеҥкей ле буурзак Кудай» деп айткан. Сананып кӧр: андый Кудай акту јӱрегинеҥ кинчегин алынган ишчизиниҥ јаманын канайып таштабайтан? Таштабаза, Иегова кату, казыр Кудай болор эди. Је Иегованыҥ мындый болор аргазы јок!

⁸ Иегова — чындыктыҥ Кудайы, ол бойы керегинде качан да тӧгӱн айтпас (Сар. 31:5). Оныҥ учун бис оныҥ сӧстӧрине бӱдер аргалу. Сен эткен кинчектериҥ учун эмдигенче ле бойыҥды јинип турган болзоҥ, бойыҥнаҥ сура: «Иегова кинчегин алынып турган кажы ла кижиниҥ јаманын таштап турган килеҥкей ле буурзак Кудай деп бӱдедим бе? Бӱдӱп турган болзом, айса Иегова мениҥ јаманымды таштап салган деп не алаҥзыыр?»

9. Сарын 32:5-теҥ Иегованыҥ јаманысты таштап турганы керегинде нени билип аладыс?

⁹ Иегова кинчектерди канайып таштап турганы керегинде ӱлгерлерди шӱӱп санан. Темдектезе, Давид Иегованыҥ јаманды таштап турганы керегинде мынайып бичиген: «Сен мениҥ буруумды ла кинчегимди таштап салдыҥ». (Сарын 32:5 кычырыгар.) «Кинчекти таштаары» деп кӧчӱрилген еврей сӧс «кӧдӱрерин», «аларын» эмезе «апарарын» темдектейт. Иегова Давидтиҥ јаманын таштап, оныҥ кинчектерин алала, ыраада апарып салган деп айдарга јараар. Мынайып Давид кинчегиниҥ уур јӱгинеҥ айрыларда, ого јеҥил боло берген (Сар. 32:2—4). Бисте де андый сезимдер болор аргалу. Бис кинчегисти акту јӱрегистеҥ алынган кийнинде, бойысты база јинбес керек. Нениҥ учун дезе Иегова бистиҥ уур јӱгисти алала, кинчегисти таштап салган.

10, 11. «Иегова... јаманды таштаарга белен» дегени нени темдектейт? (Сарын 86:5).

¹⁰ Сарын 86:5 кычырыгар. Давид мында Иегованы «јаманды таштаарга белен» Кудай деп айткан. Бу сӧстӧрди јартап турала, бир библеист мынайып бичиген: «Кудай улустыҥ јаманын таштаарга белен де болот, кӱӱнзеп те јат. Ол андый Кудай болот». Нениҥ учун Иегова андый? Ӱлгердиҥ экинчи бӧлӱгинде мынайып айдылган: «Сени адап турган ончо улусты улу чындык сӱӱжиҥле сӱӱйдиҥ». Ӧткӧн јӧрмӧлдӧ билип алганысла, чындык сӱӱш — ол сӱреен тыҥ, качан да ӧтпӧйтӧн сӱӱш болот. Бу сӱӱш Иегованы кинчегин алынып турган улустыҥ јаманын таштаарга кӱӱнзедет (Иса. 55:7). Иегова јаманыҥды таштап салган деп бӱдерге кӱч болзо, бойыҥнаҥ мынайып сура: «Кудайдаҥ оны килезин деп сураган кажы ла кижиниҥ јаманын Иегова таштаарга белен деп бӱдедим бе? Бӱдӱп турган болзом, айса Иегова мениҥ јаманымды таштап салган деп не алаҥзыыр?»

¹¹ Агару Бичикте Иегова бистиҥ канайып јайалганысты ла толо кемдӱ эмес болгонысты јакшы оҥдоп турган деп айдылат. Бу шӱӱлте бисти токунадып јат (Сар. 139:1, 2). Иегова улустыҥ јаманын таштаарга белен деп бӱдерге болужып турган Давидтиҥ база бир сарынын кӧрӱп ийектер.

ИЕГОВА НЕНИ УНДЫБАЙ ТУРГАНЫН СЕН ДЕ УНДЫБА

12, 13. Сарын 103:14-лӧ болзо, Иегова нени ундыбай јат, бу оны неге кӱӱнзедет?

¹² Сарын 103:14 кычырыгар. Иегова улустыҥ јаманын нениҥ учун таштаарга белен деп шылтактардыҥ бирӱзин Давид айдып салган. Ол Иегова керегинде мынайда айдат: «Ол... бисти тобрак деп ундыбай јат». Бу сӧстӧрлӧ болзо, Иегова бисти толо кемдӱ эмес болгонысты ундыбай јат. Мыны оҥдоорго, бу сӧстӧрди тереҥжиде кӧрӱп ийектер.

¹³ Иегова «бисти недеҥ эдилгенисти билер» деп Давид айткан. Кудай Адамды «јердиҥ тоозынынаҥ» јайап, толо кемдӱ де кижиге не керектӱ болгонын билер. Темдектезе, ого ажанар, уйуктаар, тынар керек болот (Баш. 2:7). Је Адам ла Ева кинчек эдип ийерде, Кудай «бисти тобрак деп ундыбай јат» деген сӧстӧр база бир јанынаҥ ачылган. Ончо улус олордоҥ кинчекти энчиленип, јастыра керектерге јайылат. Давидтиҥ сӧстӧриле болзо, Иегова бу керегинде јӱк ле билер эмес, ол оны ундыбай јат. «Ундыбай јат» деп кӧчӱрилген еврей сӧс јӱк ле санааларды эмес, је керектерди темдектеер аргалу. Айдарда, Сарын 103:14-тӧги сӧстӧрди мынайып оҥдоорго јараар: Иегова бисти јастырарыс деп билер, је бис акту јӱрегистеҥ кинчегисти алынып турзаас, ол бисти килеп, јаманысты таштап јат (Сар. 78:38, 39).

14. а) Сарын 103:12 Иегова кинчектерди бӱдӱнге таштап салат деп канайып кӧргӱзет? б) Иегова кинчектерди бӱдӱнге таштап салат деп, Давидтиҥ теми канайып кӧргӱзет? («Иегова кинчектеристи таштап, олорды ундып салат» деген рамканы кӧрӱгер.)

¹⁴ Иегова јаманысты бӱдӱнге таштап салат па? (Сарын 103:12 кычырыгар.) Давидтиҥ айтканыла, «канайып кӱнчыгыш кӱнбадыштаҥ ыраак», анайып ла Иегова кинчектеристи таштап, бистеҥ ыраадып салат. Кӱнчыгыш ла кӱнбадыш бой-бойынаҥ коркышту ыраак, олордыҥ биригер аргазы јок. Бу тем Иегова кинчектерди канайып таштап турганы керегинде нени кӧргӱзет? Бу ӱлгерди јартап турган бир справочникте мындый шӱӱлте бичилген: «Иегова кинчегисти таштап, кинчек керегинде эске алындырып ийгедий ончо немени база ундып салат. Айдарга јараар, кинчегистиҥ изи де, јыды да артпай јат». Јыт биске та нени де эске алындырып ийер аргалу. Је Иегова кинчектеристи таштап салза, кинчектеристи эске алындырып ийгедий јыт та артпай јат. Анайып кийнинде Иеговага бисти кату каруузына тургузатан кӱӱн келбес (Иез. 18:21, 22; Ап. ижи 3:19).

15. Эткен кинчектерис учун бойысты јаантайын бурулабаска не болужар?

¹⁵ Сарын 103-теги сӧстӧрди бис бойыска канайып тузаланар аргалу? Эткен кинчектерис учун бис јаантайын бойысты бурулап турзаас, бойыска мындый сурактар берерге јараар: «Иегованыҥ нени ундыбай турганын мен де ундыбай јӱредим бе? Темдектезе, Иегова мениҥ кинчектӱ болгонымды ундыбай турарда, мен мыны ундыбайдым ба? Анайда ок, Иегова кинчегин алынып турган улустыҥ, ол тоодо мениҥ де, јаманымды таштап турган. Бу керегинде мен база ундыбайдым ба? Иегованыҥ ундып салганын мен оноҥ ло ары эске аладым ба? Темдектезе, ол кинчектеримди таштап салган да болзо, олор учун качан да ойто кату каруузына тургуспас та болзо, мен олорды сананып јӱредим бе?» Иегова бистиҥ кинчектеристи бир де эске албай јат. Биске де анайып эдер керек (Сар. 130:3). Иегова кинчектеристи таштап салган деп, бӱдӱп баштазаас, бойысты бурулабай, оноҥ ло ары Кудайга сӱӱнчилӱ иштеерис.

16. Нениҥ учун эткен кинчектерис учун бойысты јаантайын бурулаары јеткерлӱ болот? Тем куучындап беригер. (Јурукты база кӧрӱгер.)

¹⁶ Бир тем кӧрӱп ийектер. Бойысты јаантайын эткен кинчектерис учун бурулаары машиналу барып јадала, јӱк ле кийнинде јолды кӧрӱп турганына тӱҥей. Эйе, маҥтадып турган кижи аварияга кирбеске, кийнинде јолды кӱскӱнеҥ кӧрӱп турар. Је ого кӧп сабада алдында јолын кӧрӧр керек. Анайып ла биске јастыраларыстаҥ неге ӱренип алганысты кӧрӧргӧ лӧ база анайып этпеске, эткен јастыраларысты кезикте эске аларга јараар. Је бис јӱк ле кинчектеристи сананып турзаас, бойысты бурулайла, сӱӱнчисти јылыйтып, Иеговага бастыра ийде-кӱчистеҥ иштебей барарыс. Оныҥ учун јаҥы телекейге апарып јаткан јолго ичкери кӧрӧктӧр. Не дезе јаҥы телекейде ончо јаман неме «санаага да, јӱрекке де келбес» (Иса. 65:17; Укаа 4:25).

ЈӰРЕГИҤДИ ОНОҤ ЛО АРЫ БӰДӰМЈИЛЕП ТУР

17. Иегова бисти сӱӱп турган деп, јаманысты таштаарга јаантайын белен деп, бойысты нениҥ учун оноҥ ло ары бӱдӱмјилеер керек?

¹⁷ Биске оноҥ ло ары Иегова бисти сӱӱп турган, кинчегисти таштаарга јаантайын белен деп јӱрегисти бӱдӱмјилеер керек (1 Иоанн 3:19). Нениҥ учун? Нениҥ учун дезе Сатана бисти Иегованыҥ сӱӱжине ле килеҥкейине турбас улус деп санандырарга, бастыра ийде-кӱчинеҥ албаданат. Оныҥ амадузы — бисти Иеговага иштебей барзын деп токтодып салары. Ол ӧйи ас артып калган деп билер, оныҥ учун оноҥ тыҥ табарулар эдер (Ачыл. 12:12). Је бис ого удура туруп, оноҥ ло ары Иеговага чындык болуп иштеерис!

18. Иегова бисти сӱӱп турган ла јаманысты таштаарга белен деп, јӱрегисти канайып бӱдӱмјилеер?

¹⁸ Ӧткӧн јӧрмӧлдӧги јӧптӧр биске Иегованыҥ сӱӱжине бӱдерге болужат. Је Иегова бистиҥ кинчегисти таштап салган деп, бойысты канайып бӱдӱмјилеер? Агару Бичикте Иегова бойы керегинде нени айдып турганына ајарып тур. Анайда ок Иегованыҥ јаманды таштап турганы керегинде ӱлгерлерди шӱӱп санан. Кудай сениҥ толо кеминде эмес болгоныҥды оҥдоп, сени килеер деп, кинчегиҥди таштап салган кийнинде, оны бӱдӱнге таштап салат деп ундыбай тур. Ол тушта Иегованыҥ килеҥкейин сезип, Давид чилеп айдар аргалу болорыҥ: «„Сен мениҥ буруумды ла кинчегимди таштап салдыҥ“. Бу учун сеге, Иегова, быйанымды айдадым!» (Сар. 32:5).