Карындаштар, Марк ла Тимофейдеҥ тем алыгар

1, 2. Марк ла Тимофейди Иеговага кӧп иштеерге не токтоткон болор?

КАРУ карындаштар, Иеговага кӧпти эдерге ле јуунда ака-эјелерге оноҥ кӧп болужарга кӱӱнзейдеер бе? Андый кӱӱн слерде бар ла болор. Улуска болужарга белен болуп турган карындаштарды кӧрӧргӧ кандый јакшы! (Сар. 110:3) Је слерди та не де токтодып турган болор. Темдектезе, јӱрӱмеер канайып солынар деп санааркап турган болороор эмезе берилген јакылтаны бӱдӱрип болбозоор деп коркып турганаар. Је мындый санаалар кӧп ака-эјелерде болот.

² Марк ла Тимофей јаҥы солынталардаҥ коркып, јакылталарды бӱдӱрип болбос деп база санааркаган болор. Је олор улуска болужарга болуп, андый санааркаштарды туура эткен. Маркты алза, Павел ле Варнава оны баштапкы миссионер јорыгына кычырарда, ол энезиле кожо ӱзе немези јеткил, јаан турада јаткан болор (Ап. ижи 12:12, 13, 25). Је Марк Иеговага кӧптӧдӧ иштеерге, тӧрӧл јерин артыргызарга белен болгон. Озо баштап ол Антиохия деп калага кӧчкӧн, оноҥ Павел ле Варнавала кожо ыраак ӧскӧ јерлерге барган (Ап. ижи 13:1—5). А Тимофейди Павел кожо јарлаарга кычырып турарда, ол база ада-энезиле јаткан болор. Тимофей јиит, ченемел јок карындаш болгон, оныҥ учун акалардыҥ јакылталарын бӱдӱрип болбос деп санааркаган болор. (1 Коринфтегилерге 16:10, 11 ле 1 Тимофейге 4:12 тӱҥдештиригер.) Андый да болзо, ол санааркаштарына јай бербей, Павелле кожо барарга јӧпсинди. Бу ӧйдӧҥ ала Тимофейде сӱреен јилбилӱ јӱрӱм башталган (Ап. ижи 16:3—5).

3. а) Павел Марк ла Тимофейди сӱӱген деп кайдаҥ билерис? (2 Тимофейге 4:6, 9, 11). (Јурукты база кӧрӱгер.) б) Бу јӧрмӧлдӧ кандый сурактар шӱӱжерис?

³ Марк ла Тимофей јиит тужынаҥ ла ала јуунда јаан јакылталар бӱдӱрерге ӱренип, ченемелдӱ болуп калгандар. Павел бу карындаштарды сӱреен тыҥ баалаган. Керек дезе удабас бойыныҥ божоорын билип, бу экӱни бойына айттырткан. (2 Тимофейге 4:6, 9, 11 кычырыгар.) Нениҥ учун Павел Марк ла Тимофейге карузыган? Слер карындаштар, олорго тӱҥей болорго, кандый кылык-јаҥдарга ӱренер эдеер? Слерге Павелдиҥ балдарын сӱӱп турган ада чылап берген јӧптӧри канайып болужар?

МАРКТАҤ ТЕМ АЛЫГАР — АКА-ЭЈЕЛЕРГЕ БОЛУЖЫГАР

4, 5. Марктыҥ улуска болужарга турганы недеҥ кӧрӱнет?

⁴ Бир справочникле болзо, улуска болужары дегени — ол канча кире аргабыс бар, керек дезе јеҥил эмес те тушта, улуска албаданып болужарын темдектейт. Марк бу јанынаҥ сӱреен јакшы тем кӧргӱскен. Качан Павел оны экинчи миссионер јорыгына албаста, Марк кунугып, ачынган да болор (Ап. ижи 15:37, 38). Је мынаҥ улам Марк ака-эјелерге болушпай барган ба? Јок, болушкан.

⁵ Оноҥ ары Марк Варнавала кожо јарлап јӱрген. Кийнинде, 11 јыл кире ӧдӧ берерде, Павел Римде айылында каруулда болордо, Марк оныҥ јанында болуп, ого болушкан (Флм. 23, 24). Оныҥ учун Павел Марктыҥ кӧп болушканына сӱреен быйанду болгон (Кол. 4:10, 11).

6. Марк ченемелдӱ акаларла иштеп, кандый туза алган? (Сносканы кӧрӱгер.)

⁶ Марк ченемелдӱ акалардаҥ кӧп немеге ӱренген. Римде Павелле кожо бололо, ол Вавилондо апостол Пётрга болужарга барды. Кийнинде олор јуук најылар болуп калган деп, Пётрдыҥ Маркты «уулым» деп айтканынаҥ кӧрӱнет (1 Пётр 5:13). Пётр Маркла кожо иштеп тура, ого Иисустыҥ јӱрӱми керегинде кӧп јилбилӱ учуралдар куучындаган болор. Олорды бис Марктыҥ сӱӱнчилӱ јарынаҥ кычырып ийер аргалуa.

7. Сон У деп ака Марктаҥ кандый тем алган? (Јурукты база кӧрӱгер.)

⁷ Айдарда, Марк улуска кӧп болужып, кӧгӱзи тереҥ, ченемелдӱ акаларла кожо иштеген. А слер, карындаштар, Марктаҥ кандый тем алар аргалу? Сен болушчы ишчи эмезе аксагал болорго кӱӱнзеп тургаҥ, је эм тура некелтелерге келишпей турган болзоҥ, бойыҥнаҥ чӧкӧбӧ. Оноҥ ло ары Иеговага канча кире аргаҥ бар иштеп, ака-эјелерге болужатан аргалар бедире. Мынайып ла аксагал болуп турган Сон Уb эткен. Ол јиит тужында бойын оныла јажыт улусла тӱҥдештирип туратан. Не дезе, олордыҥ кезигине акалар кандый бир јакылталар беретен болгон, а ого бербейтен. Мынаҥ улам ого ачынчылу болгон. Сон У бойыныҥ сезимдерин аксагалдарга куучындаган. Аксагалдардыҥ бирӱзи ого: «Улус сениҥ эдип турган јакшы керектериҥди кӧрбӧй дӧ турза, олорго канча кире аргаҥ бар болужып тур» — деп јӧп берген. Ол бу јӧпти тузаланып, јажы јаанап калган ака-эјелерге ле болуш керексинип турган улуска болужып баштаган. Ол јӱрӱмин эске алып, мынайып айдат: «Улуска болужары — ол не дегенин оноҥ јакшы оҥдоп алгам. Ака-эјелерге болужып тура, мен сӱреен тыҥ сӱӱнетен болгом».

ТИМОФЕЙДЕҤ ТЕМ АЛЫГАР — АКА-ЭЈЕЛЕРДИ СӰӰП КИЧЕЕГЕР

8. Павел нениҥ учун кожо иштеерге Тимофейди талдап алган? (Филиппыдагыларга 2:19—22).

⁸ Павелге кожо јарлап јӱретен јалтанбас јарчылар керек болгон. Нениҥ учун дезе удурлажулар болуп турган јерге болгон ло јарчыны алып болбозыҥ. Озо баштап Павел ченемелдӱ Сила деп аканы кожо алган (Ап. ижи 15:22, 40). А оныҥ кийнинде ол кожо јарлап јӱрерге Тимофейди сураган. Нениҥ учун Тимофейди? Баштапкызында, Тимофей јакшы ат-јолду болгон. (Ап. ижи 16:1, 2). Экинчизинде, Тимофей акту јӱректеҥ улуска болужып туратан. (Филиппыдагыларга 2:19—22 кычырыгар.)

9. Тимофейдиҥ акту кӱӱнинеҥ ака-эјелерге болушканы недеҥ кӧрӱнет?

⁹ Тимофейдиҥ Павелле кожо иштеп баштаганынаҥ ла ала ол бойын сананбай, улусты сананып турганы кӧрӱне берген. Оныҥ учун Павел Тимофейге бир де санааркабай, Верияда артыргызып койгон. Не дезе Тимофей ол каладагы јаҥы чӧҥӱрилген ака-эјелерди јакшы кичееп, болужар деп ол билген (Ап. ижи 17:13, 14). Анайда ок Верияда артып калган Сила деп аканаҥ Тимофей кӧп немеге ӱренер аргалу болгон. Кийнинде Павел Тимофейди Фессалоника калага јаҥыскандыра аткарып ийген. Ол анда ака-эјелердиҥ бӱдӱмјизин тыҥыткан (1 Фес. 3:2). Оныҥ кийнинде 15 јылга Тимофейдиҥ ака-эјелерге сӱӱжи оноҥ тыҥ болуп калган. Ол ака-эјелерди андый тыҥ сӱӱген, кезикте олорло кожо ыйлап та туратан (Рим. 12:15; 2 Тим. 1:4). Слер, карындаштар, Тимофейдеҥ кандый тем алар эдеер?

10. У Джэ ака улуска ајару эдерге канайып ӱренип алган?

¹⁰ У Джэ деп ака улуска канайып ајару эдерине ӱренип алганын кӧрӱп ийектер. Јиит тужында ого бойынаҥ јаан ака-эјелерле куучын баштаарга кӱч болгон. Оныҥ учун ол Каандыктыҥ Туразында олорло јӱк ле јакшылажып ийеле, ӧдӧ беретен болгон. Бир аксагал У Джэге ака-эјелердиҥ кандый кылык-јаҥдары ого јарап турганын олорго айдып турзын деп јӧп берген. Анайда ок кижиге не јилбилӱ болуп турганын сананзын деп кӱӱнзеткен. У Джэ ака бу јӧптӧрди тузаланган. Бӱгӱнги кӱнде ол аксагал болуп иштеп јат. Ол айдат: «Эмди меге јаш та, јаан да улусла куучындажарга кӱч эмес. Олорло куучындажып, мен олордыҥ айалгазын ла кӱчтерин јакшы билип аладым, анайып меге олорго болужарга јеҥил болот».

11. Карындаштар јуундагы улуска канайып кӧптӧдӧ болужар аргалу? (Јурукты база кӧрӱгер.)

¹¹ Карындаштар, слер де улуска кӧптӧдӧ болужарга ӱренип алар аргалу. Туштажуныҥ алдында ла кийнинде башка-башка ака-эјелерле — јииттерле де, јажы јаанап калгандарла да — куучындажарга албаданыгар. Олордоҥ керектери кандый деп сурап, лаптап угугар. Анайып олор нени керексинип турганын јакшы оҥдоп алараар. Темдектезе, слер јажы јаанап калган эш-нӧкӧрлӧр JW Library^® деп приложениени јакшы оҥдобой турган эмезе јарлап барар кижи таппай турган деп билип алдаар. Слер олорго бистиҥ приложениени оҥдоорго болужып берер эмезе олорло кожо јарлап барар аргагар бар ба? Анайып ака-эјелердиҥ керексиништерин ајаруга алып, олорго та нени де эдип турзаар, слер јуунныҥ улузына сӱреен јакшы тем кӧргӱзереер.

ПАВЕЛДИҤ АДА ЧЫЛАП БЕРГЕН ЈӦПТӦРИН АЛЫНЫГАР

12. Павелдиҥ јӧптӧри карындаштарга канайып болужар аргалу?

¹² Павел Тимофейди ырысту јӱрӱм јӱрзин ле јарлаар иште једимдӱ болзын деп кӱӱнзеген, оныҥ учун ого бир канча тузалу јӧптӧр берген (1 Тим. 1:18; 2 Тим. 4:5). Апостол Павелдиҥ јиит најызына берген јӧптӧри слерге де, карындаштар, ырысту болорго ло јарлаар иште једимдӱ болорго болужар. Канайып? Тимофейге бичилген эки самараны чек ле слерге бичилген деп сананып, кычырыгар. Анайда ок билгенеерди јӱрӱмеерде тузаланарга албаданыгар. Эмди бир канча темдер кӧрӱп ийектер.

13. Иеговага јуук болорго не болужар?

¹³ «Кудайга чындык артарга, амаду тургузып, бу јанынаҥ тазыктырын» (1 Тим. 4:7б). Кудайга чындык болоры ол не дегени? Бу Иеговала јуук колбуда болоры ла оны сӱӱндирерин темдектейт. Бис энедеҥ Кудайга чындык болуп чыкпай јадыс. Бу кылык-јаҥды тыҥыдар керек. Оны тыҥыдарга не болужар? «Тазыктырын» деп кӧчӱрилген грек сӧс кӧп сабада маргаанныҥ алдында кӧп тазыктырынып турган спортсменге тузаланылат. Спортсменге бойын колго тудунары керек болот. Анайып ла биске де Иеговага јуук болорго болужатан кылык-јаҥдарды тыҥыдарга, бойын тудунары сӱреен керектӱ болот.

14. Бис Агару Бичикти нениҥ учун кычырадыс? Бу амадуга канайып јединер?

¹⁴ Бисте Агару Бичикти кажы ла кӱн кычыратан темигӱ болор керек. Је бу ла ок ӧйдӧ кычырып турганыстыҥ амадузын — Иеговага јуук болуп каларын — ундыбас керек. Темдектезе, Иисус ла јиит бай кижи керегинде куучыннаҥ бис неге ӱренедис? (Марк 10:17—22). Ол јиит кижи Иисус — Мессия деп алаҥзыбаган. Је ого оныҥ ӱренчиги болорго, бӱдӱмјизи јетпей турган болгон. Андый да болзо, Иисус оны сӱӱй берген ле оныла јалакай куучындашкан. Ол бу кижини ойгор јӧп чыгарзын деп кӱӱнзеген. Иисустыҥ мынайып бу кижиге баштанганынаҥ Иегованыҥ сезимдери кӧрӱнет (Иоанн 14:9). Бу куучынды ла айалгагарды шӱӱп сананып, бойоордоҥ сурагар: «Меге Иеговага оноҥ јуук болорго ло ака-эјелерге кӧпти эдерге нени эдер керек?»

15. Нениҥ учун карындашка јакшы тем болор керек? (1 Тимофейге 4:12, 13).

¹⁵ «Бӱдӱп турган улуска... тем бол». (1 Тимофейге 4:12, 13, кычырыгар.) Павел Тимофейди јӱк ле кычырарга ла ӱредерге эмес, је сӱӱшке, бӱдӱп јӱрерине ле ару јӱрерине ӱрензин деп кӱӱнзеткен. Нениҥ учун? Керектер сӧстӧргӧ кӧрӧ, канча киреге артык болот. Темдектезе, сеге ака-эјелерди оноҥ эрчимдӱ јарлаарга кӱӱнзедетен куучын-эрмек айтсын деп јакарган болзын. Сен бойыҥ эрчимдӱ туружып турган болзоҥ, сеге бу куучын-эрмекти айдарга эби јок болбос. Бу јанынаҥ бойыҥ тем кӧргӱзип турзаҥ, улус та сениҥ айтканыҥды тузаланарга кӱӱнзей берер болор (1 Тим. 3:13).

16. а) Карындаш кандый беш јанынаҥ јакшы тем болор аргалу? б) Канайып карындаш «сӧстӧ» тем болот?

¹⁶ Павел 1 Тимофейге 4:12-де карындаштар кандый беш јанынаҥ јакшы тем болор аргалу деп айдып салган. Агару Бичикти ӱренип јадала, олордыҥ кажызын ла не шиҥдеп кӧрбӧс? Темдектезе, сен «сӧстӧ» јакшы тем болорго јадыҥ. Улустыҥ кӱӱн-санаазын кӧдӱрерге, сен кандый сӧстӧр айдар эдиҥ деп сананып кӧр. Ада-энеҥле јадып турган болзоҥ, олордыҥ сеге ончо эдип турганы учун јаантайын быйаныҥды айдып тур. Туштажуныҥ кийнинеҥ программада турушкан ака-эјелерге быйаныҥды айдып, сеге анчада ла не јараганын айдып бер. Анайда ок карууларды бойыҥныҥ сӧстӧриҥле айдарга албадан. Куучыныҥда јакшы тем болорго албаданып турганыҥ кӧгӱс јанынаҥ ӧзӱп турганыҥды кӧргӱзет. (1 Тим. 4:15)

17. Карындашка кӧгӱс амадуларга јединерге не болужар? (2 Тимофейге 2:22).

¹⁷ «Јиит тужыҥныҥ кӱӱнзештеринеҥ кыйыш... актуга... јӱтки». (2 Тимофейге 2:22 кычырыгар.) Павел Тимофейди кӧгӱс амадуларга јединерге буудактап турган, анайда ок Иеговала колбуларын ӱреп салгадый ончо керектердеҥ кыйыжып јӱрзин деп кӱӱнзеткен. Кезик керектерде јаман ла неме јок. Је бу керектердеҥ улам Иеговага кӧп ӧйиҥди берип болбой турганыҥды кӧрӱп ийер болорыҥ. Оныҥ учун спортко, интернетке, видеоойындарга канча кире ӧй барып турганын сананып ий. А бу ӧйдиҥ кезигин слер Иеговага ла ака-эјелерге берип болороор бо? Темдектезе, Каандыктыҥ Туразында иштенерге суранып ийерге јараар эмезе стендле јарлаарга бичидип аларга јараар. Мындый керектерде туружып турзаҥ, кӧгӱс амадулар тургузып, ого јединерге болужатан јаҥы најылар табып алар болорыҥ.

АКА-ЭЈЕЛЕРГЕ БОЛУЖАРЫ АЛКЫШТАР ЭКЕЛЕТ

18. Нениҥ учун Марк ла Тимофейдиҥ јӱрӱми сӱӱнчилӱ ле јилбилӱ болгон деп айдарга јараар?

¹⁸ Марк ла Тимофей улуска болужарга кӧп немени артыргызып салган. Је мынаҥ улам олор сӱӱнчилӱ ле јилбилӱ јӱрӱм јӱрген (Ап. ижи 20:35). Марк башка-башка ороондорло јорыктап, андагы ака-эјелердиҥ кӱӱн-санаазын кӧдӱрген. Анайда ок ол Иисустыҥ кайкамчылу јӱрӱми керегинде бичип салган. А Тимофей дезе, Павелле кожо јуундар тӧзӧп, ака-эјелердиҥ бӱткенин тыҥыткан. Иегова бу бойын килебес карындаштардыҥ эткен ижин кӧрӱп, сӱреен тыҥ сӱӱнген.

19. Нениҥ учун карындаштарга Павелдиҥ Тимофейге бичиген јӧптӧрин алынар керек? Олор бу јӧптӧрди алынза, кандый алкыштар алар?

¹⁹ Павелдиҥ самараларынаҥ ол бойыныҥ најызын, Тимофейди, тыҥ сӱӱген деп кӧрӱнет. Је Павелди бу самараларды бичизин деп Иегова кӱӱнзеткен. Айдарда, кару карындаштар, бу самаралар слерге де бичилген болот. Бу самаралардаҥ Иегованыҥ слерди тыҥ сӱӱп турганы ла ырысту јӱрӱм јӱрзин деп кӱӱнзеп турганы кӧрӱнет. Оныҥ учун Павелдиҥ ада чылап берген јӧптӧрин алынып, улуска болужар кӱӱнигерди тыҥыдыгар. Мынайып слер бӱгӱнги де кӱнде сӱӱнчилӱ јӱререер, келер де ӧйдӧ ӱргӱлји јӱрӱм алараар. (1 Тим. 6:18, 19).