Јӧпти биске берип турза...

1. Чыгарган јӧбис ойгор ло једимдӱ болзын деп не болужар? (Укаа сӧстӧр 13:10; 15:22).

БИС ончобыс ойгор јӧп чыгарарга кӱӱнзейдис, анайда ок нени-нени эдерге јатсаас, сананганыс бӱдӱп калзын деп кӱӱнзейдис. Андый болзын деп, биске јӧптӧжӧр керек деп Агару Бичикте айдылат. (Укаа сӧстӧр 13:10; 15:22 кычырыгар.)

2. Иегова биске не деп сӧзин берет?

² Эҥ јакшы јӧпти теҥеридеги ойгор Иегова Адабыс берет. Ол биске: «Јӧп берип, сени кӧрӱп турарым» — деп сӧзин берет (Сар. 32:8). Бу сӧстӧрдӧҥ Иегова бистиҥ кажыбысла јилбиркеп турган деп кӧрӱнет. Ол биске јӱк ле керектӱ јӧп берип турган эмес, је оны тузаланарга болужат.

3. Бу јӧрмӧлдӧ нени кӧрӧрис?

³ Бу јӧрмӧлдӧ бис библиялык принциптерди шӱӱжерис. Олордыҥ болужыла мындый тӧрт сурактыҥ каруузын билип аларыс: 1) Јӧпти алынарга меге кандый кылык-јаҥдар болужар? 2) Меге јакшы јӧпти кем берер аргалу? 3) Јӧпти алынарга белен болгонымды канайып кӧргӱзер? 4) Улусты мен учун јӧп чыгарзын деп, нениҥ учун сурабас керек?

ЈӦПТИ АЛЫНАРГА КАНДЫЙ КЫЛЫК-ЈАҤДАР БОЛУЖАР?

4. Берилген јӧп туза экелзин деп кандый кылык-јаҥдар болужар?

⁴ Берилген јӧп кандый да јакшы болзо, је бис оны алынбазаас, оноҥ туза болбос. Оныҥ учун биске јобош болуп, аргабысты билип турар керек. Бис та нени де билбей јадыс эмезе ченемелис јетпей јат. Мынаҥ улам кезикте биске кандый бир сурактыҥ аайына чыгарга, болуш керек болуп јат. Бис јобош болбозоос, Иегова биске болужып болбос. Нениҥ учун дезе Иегованыҥ јӧптӧрин оныҥ Сӧзинеҥ кӧрбӧй калардаҥ айабазыс (Мих. 6:8; 1 Пётр 5:5). Је јобош болзоос, Иегова биске кандый јӧп берер деп лаптап угуп, бу јӧптӧрди капшай ла тузаланарга кӱӱнзеерис.

5. Давид недеҥ улам бийиркене берер эди?

⁵ Давид каанныҥ теми бисти неге ӱредет деп сананып ийектер. Ол једимдеринеҥ улам бийиркене берердеҥ айабас болгон. Каан болуп отурардаҥ озо, ол јарлу кӱӱчи болгон. Керек дезе оны каанныҥ алдына ойноп турзын деп сураган (1 Сам. 16:18, 19). Анайда ок Давидтиҥ майлатканынаҥ бери Иегованыҥ тыны ого ийде-кӱч беретен болгон (1 Сам. 16:11—13). Бого коштой албаты да оныҥ ӧштӱлерди јеҥгенине, ол тоодо Голиаф деп кӱчтӱ јуучылды ӧлтӱргенине, тыҥ оморкоп туратан (1 Сам. 17:37, 50; 18:7). Давидтиҥ ордына бийиркек кижи болгон болзо, ол кӧп немеге јединеле, эмди ого кемниҥ де јӧби керек јок деп сананар эди. Је Давид јобош болуп арткан.

6. Давид јӧптӧрди баалаган деп недеҥ кӧрӱнет? ( јурукты база кӧрӱгер.)

⁶ Давид каан болуп каларда, оныҥ јанында ойгор јӧп берип турган улус болгон (1 Лет. 27:32—34). Давид јакшы јӧптӧрди баалаган деп оныҥ јӱрӱминеҥ кӧрӱнет. Ол јӱк ле эр улустыҥ эмес, је ӱй де улустыҥ, темдектезе, Авигеяныҥ јӧбин уккан. Авигея Навал деп кату, быйаны јок, јӱк бойын сӱӱр кижиниҥ ӱйи болгон. Давид јобош болуп, Авигеяныҥ јӧбин угарда, бу ого јаман керек этпеске болушкан (1 Сам. 25:2, 3, 21—25, 32—34).

7. Давидтеҥ неге ӱренедис? (Экклезиаст 4:13). (Јуруктарды база кӧрӱгер.)

⁷ Давидтеҥ бис неге ӱренедис? Бис та нени де јакшы аайлап турган болорыс эмезе бисте кандый бир јаҥ бар болор. Андый да болзо, бис бойыс ӱзе билерис, биске кемниҥ де јӧби керек јок деп сананбас керек. Анайда ок јӧпти кем бергенине ајару этпей, бу јӧп јакшы болзо, оны алынар керек. (Экклезиаст 4:13 кычырыгар.) Ол тушта биске бойыска да, улуска да каршу јетиргедий јаан јастыра этпезис.

МЕГЕ ЈАКШЫ ЈӦПТИ КЕМ БЕРЕР АРГАЛУ?

8. Нениҥ учун Ионафан јакшы јӧп берер аргалу болгон?

⁸ Давидтиҥ теминеҥ база бир ӱредӱни кӧрӱп ийектер. Давид Иеговала бек колбуларлу улустаҥ, анайда ок оныҥ айалгазын јакшы оҥдоп турган улустаҥ јӧп сурап туратан болгон. Темдектезе, Давид Саул каанла јаражып аларга, оныҥ Ионафан уулына баштанган. Нениҥ учун Ионафан јакшы јӧп берер аргалу болгон? Ол Иеговала јуук колбуларлу болгон, анайда ок Саулды јакшы билер болгон (1 Сам. 20:9—13). Бис мынаҥ неге ӱренерис?

9. Биске кем јакшы јӧп берер аргалу? Тем куучындап беригер (Укаа сӧстӧр 13:20).

⁹ Биске јӧп керек болзо, Иеговала бек колбуларлу ла бу сурак аайынча ченемелдӱ улуска баштанза, јакшы болорa. (Укаа сӧстӧр 13:20 кычырыгар.) Темдектезе, карындаш кижи аларга турган болзын. Ого кем јакшы јӧп берер аргалу? Биле тӧзӧбӧгӧн дӧ аканыҥ јӧптӧри Агару Бичик аайынча берилген болзо, тузалу болор. Је карындашка кӧгӱзи тереҥ, оны јакшы билер, билези ырысту эш-нӧкӧрлӧргӧ баштанза, јакшы болор. Олор Агару Бичиктеҥ де принциптер айдып берер, анайда ок олордыҥ билезине не болушканын куучындап берер аргалу.

10. Оноҥ ары нени шӱӱжерис?

¹⁰ Айдарда, биске кандый кылык-јаҥдар болужар деп, анайда ок кемдерле јӧптӧжип турза, јакшы болор деп кӧрӱп ийдис. Эмди дезе, нениҥ учун биске јӧпти алынарга белен болор керек ле нениҥ учун улусты бис учун јӧп чыгарзын деп сурабас керек деп кӧрӱп ийектер.

ЈӦПТИ АЛЫНАРГА БЕЛЕН БОЛГОНЫМДЫ КАНАЙЫП КӦРГӰЗЕР?

11, 12. а) Нени этпес керек? б) Јаан учурлу јӧп чыгарар тушта, Ровоам нени этти?

¹¹ Кезикте кижи јӧп сурап та турган болзо, је ол озодоҥ бойы јӧпти чыгарала, улустаҥ ол чын јӧп чыгарган ба деп јӱк угарга турган. Берилген јӧп кӧрӱмине келишпей турза, ол оны алынбай јат. Андый кижи јеткерлӱ айалгада болот, не дезе Ровоам каан чылап јастырып салардаҥ айабас.

¹² Соломон каан божоп каларда, оныҥ ордына каан болуп, оныҥ уулы Ровоам отурды. Соломонныҥ башкарган ӧйинде албаты јакшы јаткан. Је олордыҥ санаазыла, ол олорды ӧйинеҥ ӧткӱре кӧп иштендирген. Оныҥ учун олор Ровоамга келип, олордыҥ ижин эмеш јеҥилтсин деп сураган. Ровоам сананып ийеле, каруузын оноҥ берип ийер деп айткан. Озо баштап ол оныҥ адазына болушкан аксагалдардыҥ кӧрӱм-санаазын уккан. Бу ойгор алтам болгон (1 Каан. 12:2—7). Је оноҥ ары Ровоам олордыҥ јӧбин алынбады. Нениҥ учун? Не дезе ол озо бойы јӧпти чыгарала, аксагалдар оныҥ јӧбиле јӧпсинер болор деп сананган. Је андый болбосто, ол бойыла јажыт најыларына барды. Олордыҥ айтканы ого јараган, нениҥ учун дезе олордыҥ јӧби оныҥ сананганыла келижип турган (1 Каан. 12:8—14). Оноҥ Ровоам најыларын угала, чыгарган јӧбин албатыга јетирди. Мынаҥ улам албаты бӧлӱнип, Ровоамда јаан кӱчтер башталды (1 Каан. 12:16—19).

13. Бис јӧпти алынарга белен деп канайып оҥдоор?

¹³ Ровоамныҥ учуралы бисти неге ӱредет? Јӧп сураган кийнинде, оны алынарга белен болор керек. Озолодо бойыска јӧп чыгарала, оноҥ јӧп сурап турган болуп калдыс. Бис јӧпти алынарга белен деп, канайып оҥдоор? Бойыстаҥ мынайып сураарга јараар: «Јӧп сурайла, оноҥ ол јӧп мениҥ сананганыма келишпей турза, мен оны капшай ла јектеп саладым ба?»

14. Јӧп берилген тушта, нени ундыбас керек? Тем куучындап беригер. (Јурукты база кӧрӱгер.)

¹⁴ Тем кӧрӱп ийектер. Бир акага акчалу, јакшы иш келижип јаткан болзын. Ишке јӧпсинердеҥ озо, ол аксагалла куучындажып јат. Ака јаҥы иште ого кезикте билезинеҥ узакка јӱререрге келижер болор деп айдат. Је аксагал ого Агару Бичикле болзо, эр кижи эҥ ле озо билезиниҥ кӧгӱс јанын кичеер учурлу деп эске алындырат (Эф. 6:4; 1 Тим. 5:8). Је ака аксагалдыҥ јӧбин алынбай, ӧскӧ ака-эјелерге баштанып, бойына јарагадый јӧп сакып јат. Айдарда, ака чын ла ла јӧп сураарга турган ба эмезе оныҥ чыгарган јӧби чын ба деп бӱдӱмјиленерге турган ба? Бистиҥ ончобыска јӱрегис тӧгӱнчи деп ундыбас керек (Иер. 17:9). Берилген јӧп биске јарабай да турган болзо, эм тура ол јӧп эҥ керектӱ болордоҥ айабас.

УЛУСТЫ МЕН УЧУН ЈӦП ЧЫГАРЗЫН ДЕП, НЕНИҤ УЧУН СУРАБАС КЕРЕК?

15. Нени этпес керек? Нениҥ учун?

¹⁵ Бистиҥ кажыбыс ла јӧпти бойы чыгарар учурлу (Гал. 6:4, 5). Кандый бир сурак чыгып келзе, Агару Бичикти шиҥдеп, кӧгӱзи тереҥ ака-эјелерле јӧптӧжип турза, јакшы болор. Је бу ла ок ӧйдӧ улус бис учун јӧп чыгарар деп сакыбас керек. Та кем де ака-эјенеҥ мынайып сураардаҥ айабас: «Сен мениҥ ордыма болгон болзоҥ, нени эдеер эдиҥ?» Ол эмезе та кем де јазап сананбай, бойы шиҥжӱ ӧткӱрбей, ӧскӧ кижи кандый јӧп чыгарган ол анайып ла эдип јат.

16. Коринфтеги јуунда кандый сурак турган? Бу сурактыҥ аайына кем чыгар учурлу болгон? (1 Коринфтегилерге 8:7; 10:25, 26).

¹⁶ Бистиҥ эраныҥ баштапкы чагында Коринфте не болгонын кӧрӱп ийектер. Бу калада кажы ла кижиге мындый сурактыҥ аайына чыгар керек болгон: чалуларга учурлаган этти јиирге јараар ба? Павел христиандарга бичиген: «Чалулар не де эмес деп билерис. Сок јаҥыс Кудайдаҥ ӧскӧ кудай јок» (1 Кор. 8:4). Оныҥ учун кезик христиандар чалуларга учурлаган этти санааркабай ла алып јийтен болгон. Је кезик христиандарга андый этти јиирге уйады болдыртпайтан. (1 Коринфтегилерге 8:7; 10:25, 26 кычырыгар.) Андый учуралда нени эдерин кажы ла христиан кижи бойы кӧргӧн. Павел кижи ӧскӧ улус учун јӧп чыгарбас учурлу, анайда ок јӧп чыгарарында ӧскӧ улуска тӱҥейлешпезин деп ӱреткен. Не дезе кажы ла кижи «бойы учун Кудайдыҥ алдына каруу берер» (Рим. 14:10—12).

17. Јӧп чыгарарында улуска тӱҥейлежип турзаас, не болордоҥ айабас? Тем куучындап беригер. (Јуруктарды база кӧрӱгер.)

¹⁷ Бӱгӱнги де кӱнде андый ла айалга болуп калардаҥ айабас. Темдектезе, кажы ла христиан кижиге канныҥ фракцияларын тузаланып, эмденер бе, јок по деп бойына шӱӱп алар керекb. Бу теманы оҥдоорго јеҥил эмес те болзо, оныҥ аайына чыгып салар керек. Нениҥ учун дезе эмдениш јанынаҥ сурактарда бис бойыс јӧп чыгарып јадыс (Рим. 14:4). Бис улуска тӱҥейлежип јӧп чыгарып турзаас, ойгор болорго ӱренип албазыс. Карын Агару Бичикти шиҥдеп, бойыс јӧп чыгарып турактар. Анайып уйадысты јакшыны јаманнаҥ ылгаштырып ӱредип аларыс (Евр. 5:14). Је тереҥ шиҥжӱниҥ де кийнинеҥ бойыстыҥ айалгабыста библиялык принциптерди канайып тузаланар деп оҥдобой турзаас, канайдар? Мындый учуралда кӧгӱзи тереҥ акага эмезе эјеге баштанза, јакшы болор.

ЈӦПТӦЖИП ТУРУГАР

18. Иегова бисти канайып кичееп јат?

¹⁸ Иегова кажы ла кижи јӧпти бойы чыгарзын деп јат. Анайып ол биске алаҥзыбай турганын кӧргӱзет. Иегова биске бойыныҥ Сӧзин, Агару Бичикти, сыйлаган. Анайда ок ол биске библиялык принциптерди оҥдоорго болужатан ойгор најылар берген. Мынаҥ ӱзе Иегова бисти сӱӱп, кичееп турган Ада деп јакшы кӧрӱнет (Укаа 3:21—23). Ого быйанысты канайып кӧргӱзер?

19. Бис Иегованы канайып сӱӱндирер аргалу?

¹⁹ Сананып ийзеер де, ада-энелер балдарыныҥ ойгор болуп чыдаганын, Кудайга иштеп, улуска болужып турганын кӧрӱп, тыҥ сӱӱнип јат. Анайып ла Иегова бистиҥ кӧгӱс јанынаҥ ӧзӱп турганысты кӧрӱп, база тыҥ сӱӱнет. Бис оны сӱӱндиретен јӧп чыгарарга, улусла јӧптӧжип турзаас, бу ого сӱреен јарап јат.