Јӧпти бис берип турзаас...

1. Јӧпти кем берер учурлу? Јартап беригер.

СЛЕРГЕ јӧптӧр берерге јарап јат па? Кезик улус «эйе» деп айдар болор. А та кемге де улуска јӧптӧр берерге эби јок болот. Је кандый да болзо, биске ака-эјелериске кезикте јӧп берер керек, нениҥ учун дезе бу бистиҥ молју болуп јат. Нениҥ учун? Иисус, бис оныҥ ӱренчиктери болорго турган болзоос, бой-бойысты сӱӱр учурлу деп айткан (Иоанн 13:35). А сӱӱжисти кӧргӱзетен аргалардыҥ бирӱзи — ака-эјеге керектӱ јӧпти ӧйинде берери болот. Агару Бичикте айдылганыла, бис «акту јӱректеҥ јӧп берип» турзаас, ака-эјелерле најылыгысты тыҥыдадыс (Укаа 27:9).

2. Аксагалдарга нени эдер керек? Нениҥ учун? («Туштажуда берилип турган јӧптӧр» деген рамканы база кӧрӱгер.)

² Јакшы јӧпти канайып беретенин озо ло баштап кем билер учурлу? Аксагалдар. Нениҥ учун дезе Иегова ла Иисус јуунды кичеезин деп олорго јакарган (1 Пётр 5:2, 3). Аксагалдар јуунды канайып кичеейт? Олор куучын-эрмектер ажыра Агару Бичикке тӧзӧлӧнгӧн шӱӱлтелер айдат. Анайда ок олор ака-эјелерге кажызына ла алдынаҥ башка јӧптӧр берет. А та кем де јууннаҥ ыраап калза, олор ого кайра келерге болужат. Аксагалдарга да, биске де јакшы јӧп берерге не болужар?

3. а) Јакшы јӧптӧр берерге канайып ӱренип алар? (Исайя 9:6; «Јӧп берип јатсаар, Иисустаҥ тем алыгар» деген рамканы база кӧрӱгер). б) Бу јӧрмӧлдӧ бис нени шӱӱжерис?

³ Агару Бичикте јакшы јӧптӧр берип туратан улус керегинде айдылат. Олордоҥ бис кӧп немеге ӱренер аргалу. Је эҥ јакшы јӧптӧрди Иисус беретен. Керек дезе ол «Ойгор јӧп береечи» деп адалган. (Исайя 9:6 кычырыгар.) Бу јӧрмӧлдӧҥ бис эки айалга шӱӱжип ийерис: 1) бистеҥ јӧп сураган тушта нени эдерис; 2) јӧп сурабаган тушта, је оны берер керек деп кӧрӱп турзаас, нени эдерис. Анайда ок јӧпти качан ла канайып берер керек деп билип аларыс.

ЈӦПТИ БИСТЕҤ СУРАП ТУРЗА

4, 5. Улус бистеҥ јӧп сураза, бойыска кандый сурак берер керек? Тем куучындап беригер.

⁴ Качан бистеҥ та кем де јӧп сурап келзе, ол кижи биске бӱдӱп турган деп сӱӱне берер болорыс. Оноҥ ого капшай ла болужарга кӱӱнзеерис. Је озо баштап бойыстаҥ мынайып сураар керек: «Кижиге јакшы јӧп берерге, менде ченемел ле билгирлер бар ба?» Кезикте кижиге кандый да јӧп бербей, оныҥ сурагын јакшы аайлап турган кижиге баштанзын деп айтса јакшы болор.

⁵ Тем кӧрӱп ийектер. Слердиҥ јуук најыгар тыҥ ооруп калган болзын. Ол эмденетен бир канча эп-арга табып алала, слердеҥ олордыҥ кажызы јакшы болор деп сурайт. Слер бу эп-аргалардыҥ кажы бирӱзин јарадар болороор, је слер врач эмезеер, ооруны эмдеерге слерде медицина јанынаҥ ӱредӱ де јок. Оныҥ учун најыгарга болужатан эҥ јакшы арга — ого ченемелдӱ специалист табыжып берери болот.

6. Јӧп берердеҥ озо, нени этсе јакшы болор?

⁶ А бис суракты јакшы аайлап турган болзоос, канайдар? Андый да болзо, биске јӧп берерге меҥдебес керек. Нениҥ учун дезе Укаа сӧстӧр 15:28-те айдылганыла, «акту кижи нени айдарын јазап сананат». Оныҥ учун нени айдар керек деп билер де болзоос, озо баштап суракты шиҥдеп, мӱргӱп, јазап шӱӱп сананар керек. Ол тушта бистиҥ берерге турган јӧбис Иегованыҥ кӧрӱм-санаазына келижип турган деп алаҥзу болбос. Бу шӱӱлтени оҥдоорго, Нафан деп судурчыла болгон учуралды кӧрӱп ийектер.

7. Нафанла болгон учуралдаҥ бис неге ӱренедис?

⁷ Давид каан Нафанга Иеговага ӧргӧӧ тударга турганын куучындаган. Нафан ого ол ло тушта: «Сананып алганыҥды эт» — деп айткан. Је бу Кудайдыҥ табыла болбогон. Давидке јӧп айдардаҥ озо, Нафанга Иегованыҥ кӧрӱм-санаазын билип алар керек болгон (1 Лет. 17:1—4). Бу учурал бистеҥ кем-кем јӧп сурап турза, «сӧс айдарга... меҥдебезе», ойгор болор деп кӧргӱзет (Иак. 1:19).

8. База нениҥ учун јӧп берерге тӱргедебес керек?

⁸ Јӧп берердеҥ озо, нениҥ учун јазап сананар керек деп, база бир шылтагын кӧрӱп ийектер. Сананып ийзеер де, кижиде слердиҥ айтканаар аайынча јӧп чыгарганынаҥ улам, јаман та не де болуп калган болзын. Ол тушта слер база бурулу болороор. Оныҥ учун јӧп берерге меҥдебегер.

ЈӦПТИ БИСТЕҤ СУРАБАГАН БОЛЗО

9. Јӧп берердеҥ озо, аксагалдарга неде бӱдӱмјиленип алар керек? (Галаттарга 6:1).

⁹ Кезикте аксагалдар «јастыра алтам» эдип турган акага эмезе эјеге јӧп берер учурлу болот. (Галаттарга 6:1 кычырыгар.) Андый кижи јаан кинчек эткелек болор, је ойгор эмес алтамдар эдип, кинчекке экелгедий јеткерлӱ айалгада болордоҥ айабас. Оныҥ учун аксагалдар ого јӱрӱмниҥ чын јолына ойто туруп аларга, болужарга албаданар (Иак. 5:19, 20). Је јӧп берердеҥ озо, олорго кижи чын јастыра алтам эткен бе деп бӱдӱмјиленип алар керек. Нениҥ учун дезе олор кижиниҥ чыгарган јӧбиле јӧпсинбей де турган болзо, Иегованыҥ кӧзинде ол јастыра ла неме этпей турган болор (Рим. 14:1—4). Је ака эмезе эје чын ла Кудайла колбуларын ӱреп турган болзо, канайдар? Аксагалдарга нени эдер керек?

10—12. Јӧп сурабаган кижиге јӧп берерге, аксагал нени эдер? (Јуруктарды база кӧрӱгер.)

¹⁰ Јӧп сурабаган кижиге јӧп берерге, јеҥил ле неме эмес. Нениҥ учун? Апостол Павелдиҥ айтканыла болзо, андый ака эмезе эје јастыра керектер эдип турганын оҥдобой турган болор. Оныҥ учун јӧпти алынарга јеҥил болзын деп, кижини озодоҥ белетеп салар керек.

¹¹ Јӧп сурабаган кижиге јӧп берери — кату јерге та нени де ӧскӱрерге турганына тӱҥей. Кижи та нени де ӧскӱрерге турган болзо, ол озо баштап јерди јымжадарга, оны казып, белетеп јат. Оноҥ ӱренди отургызып, сугарат. Аксагалга андый ла алтамдар эдер керек. Озо баштап ол кижиге јӧпти алынарга јеҥил болзын деп, оны «белетеп салат». Эптӱ ӧйдӧ куучын баштап, аксагал карындашка шӱӱжип ийетен неме бар деп айдат. Бу ла ок ӧйдӧ акага бойын јалакай ла јымжак тудунар керек. Карындаш аканыҥ ол учун санааркап турганын сезип турзын. Нениҥ учун дезе андый аканаҥ јӧпти алынарга јеҥил болор.

¹² Аксагал карындашла туштажала, «јерди» оноҥ ло ары јымжадар. Темдектезе, ол кажы ла кижи јастырып јат, оныҥ учун ого јӧп керек болот деп айдар аргалу (Рим. 3:23). Аксагал Агару Бичиктиҥ болужыла кижиге јымжак, тоомјылу этире неде јастырганын айдып берер. А кижи јастыразын алынза, оноҥ ары аксагал «ӱрен отургызып јат», чокумдап айтса, кижиге неде тӱзединер керек деп јарт айдып берет. Учында аксагал «ӱренди сугарып јат», ӧскӧртӧ айтса, кижини акту јӱрегинеҥ мактап, кожо мӱргӱп јат (Иак. 5:15).

13. Кижи јӧпти чын оҥдогон деп, аксагалдар канайып бӱдӱмјиленер?

¹³ Кезикте кижи ого айткан јӧпти јастыра оҥдоп јат. Оныҥ учун аксагалдарга кижи јӧпти чын оҥдогон деп бӱдӱмјиленип алар керек. А бӱдӱмјиленип аларга, олорго јымжак эдип берген сурактар болужар (Эккл. 12:11). Кижиниҥ каруузынаҥ ого неде ле нениҥ учун солынар керек деп, оҥдоп турганы кӧрӱне берер.

ЈӦПТИ КАЧАН ЛА КАНАЙЫП БЕРЕР

14. Ачынып калган тушта нениҥ учун јӧп бербес керек?

¹⁴ Кинчектӱ болгоныстаҥ улам бис кезикте бой-бойыбысты ачындырып саладыс (Кол. 3:13). Керек дезе бис тыҥ ачыныжып калардаҥ айабазыс деп, Агару Бичикте айдылат (Эф. 4:26). Је ачынып калган тушта качан да јӧп бербес керек. Нениҥ учун? Нениҥ учун дезе «тыҥ ачынганы, Кудайга јарагадый керектерге экелип болбос» (Иак. 1:20). Ачынган тушта айдылган јӧп јакшыга экелердиҥ ордына, айалганы оноҥ тыҥ уурладып салар. Андый болзо, бисти ачындырып салган кижиге сезимдеристи де, санаабысты да бир де айтпас керек пе? Јок, андый эмес. Је неме айдардаҥ озо токунап алар керек. Бу јанынаҥ бис Иовко јакшы јӧп берген Елиуйдаҥ ӱренер аргалу.

15. Елиуйдаҥ бис кандый тем аларыс? (Јурукты база кӧрӱгер.)

¹⁵ Канча кӱндерге Елиуй тӧгӱн токунадаачылардыҥ бурузына Иовтыҥ кандый каруу берип турганын уккан. Ол Иовты карамдаган да болзо, ого ачына берген. Не дезе Иов ӧйинеҥ ӧткӱре бойы керегинде сананып, Кудай керегинде јастыра немелер айткан. Је Елиуй куучынга киришпеген. А качан оныҥ айдатан ӧйи једип келерде, ол Иовло јымжак, тоомјылу куучындашкан. Мынаҥ улам ол Иовко јакшы јӧп берер аргалу болгон (Иов 32:2; 33:1—7). Бу учуралдаҥ бис јаан ӱредӱ аладыс: јӧпти эптӱ ӧйдӧ, јымжак ла јалакай эдип берер керек (Эккл. 3:1, 7).

ЈӦПТИ АЛЫНАРГА ЛА БЕРЕРГЕ БЕЛЕН БОЛУГАР

16. Сарын 32:8-теги сӧстӧр бисти неге ӱредет?

¹⁶ Бу јӧрмӧлдиҥ тӧс ӱлгериле болзо, Иегова: «Јӧп берип, сени кӧрӱп турарым» — деп сӧзин берет. (Сарын 32:8 кычырыгар.) Бу сӧстӧр Иегова јаантайын бисти ӱредер деп кӧргӱзет. Ол биске јӱк ле ойгор јӧптӧр берип турган эмес, је олорды тузаланарга болужат. Бу биске сӱреен јакшы тем болот! Јӧп берип турзаас, кижи бис оныҥ јанында деп, ого ойгор јӧп чыгарарга болужарга турганыс деп сезип турзын.

17. Аксагалдар Агару Бичикке тайанган чокум, јарт јӧптӧр берип турза, бис нени сезедис? (Исайя 32:1, 2).

¹⁷ Бӱгӱнги кӱнде биске анчада ла јакшы јӧптӧр керек болуп јат (2 Тим. 3:1). Агару Бичикте аксагалдар «чӧл јерде агын суудый» деп айдылат. (Исайя 32:1, 2 кычырыгар.) Нениҥ учун? Олордыҥ Агару Бичикке тайанып берген чокум, јарт јӧптӧри биске Иеговага иштеерге ийде-кӱч берет. А качан најылар биске јарагадый сӧстӧрди эмес, је чыннаҥ ла керектӱ сӧстӧрди айдып турза, бу сӱреен баалу болот. Олордыҥ сӧстӧри «кӱмӱш айакка салылган алтын аламалардый» (Укаа 25:11). Айдарда, улуска јакшы јӧптӧр берерге ле бойыска јӧптӧр алынарга ӱренер керек.