Тӧс ӱредӱлердеҥ бис база неге ӱренер аргалу?

1. Агару Бичиктеги тӧс ӱредӱлер јӱрӱмеерди канайып солыды?

АГАРУ БИЧИКТЕГИ тӧс ӱредӱлер бистиҥ јӱрӱмисти сӱреен тыҥ солыган. Темдектезе, Кудайдыҥ ады — Иегова деп билип алала, бис оныла најылажып баштадыс (Иса. 42:8). Божогон кижиле не болуп турганын билип алала, божогон јуук улузыс шыралабай турган деп токунап калдыс (Эккл. 9:10). Анайда ок удабас јер сӱреен јараш рай болуп калар деп билип алала, келер ӧй керегинде ӧйинеҥ ӧткӱре кӧп санааркабай бардыс. Бисте 70-80 јаш эмес, је јажын-чакка јӱрерис деп ижемји бар (Сар. 37:29; 90:10).

2. 2 Пётр 1:12, 13-теги сӧстӧр кӧгӱзи тереҥ де христиандарга тӧс ӱредӱлерди шӱӱп сананар керек деп канайып кӧргӱзет?

² Бир канча ӧйдӧҥ бис бу тӧс ӱредӱлерге јаан ајару этпей барардаҥ айабазыс. Је тӧс ӱредӱлер сӱреен баалу деп качан да ундыбас керек. Апостол Пётр экинчи самаразын «чындыкта бек... турган» христиандарга бичиген. (2 Пётр 1:12, 13 кычырыгар.) Је Пётр удабас олордыҥ бӱткени ченелер деп оҥдогон: тӧгӱн ӱредӱчилер ле кара санаалу улус ака-эјелерди чын јолдоҥ туураладарга албаданар (2 Пет. 2:1—3). Оныҥ учун Пётр олордыҥ бӱткенин тыҥыдарга ла тӧгӱнге кирбеске болужарга, тӧс чындыктарды эске алындырган. Ака-эјелер бу чындыктарды јакшы билген де болзо, олорды ойтодоҥ шӱӱп сананганы Иеговага учына јетире чындык артарга болужар эди.

3. Нениҥ учун кажы ла христиан кижиге тӧс ӱредӱлерди шӱӱп сананар керек? Тем куучындап беригер.

³ Бис Агару Бичиктеги тӧс ӱредӱлерди канча јылдарга јакшы билер де болзоос, олор биске јаҥыдаҥ ачылар аргалу. Тем кӧрӱп ийектер. Ченемелдӱ поварга ла курсак азып јаҥы ла баштаган кижиге бир ле тӱҥей немедеҥ курсак белетеп ийзин деп сураган болзын. Канча јылдарга иштеп койгон кижи бир ле немедеҥ јӱзӱн-јӱӱр курсак белетеп ийер аргалу. Иегованыҥ ишчилери керегинде база мынайып айдарга јараар. Иеговага узак јылдарга иштеген улус ла Агару Бичикти јаҥы ла ӱренип баштаган улус Агару Бичиктеги ӱредӱлерге башка эдип кӧрӧт. Је тӱҥей ле канча јылдарга билер ӱредӱлерди шӱӱп сананып турзаар, эм тура айалгагарга тузалу болгодый јаҥы шӱӱлтелер кӧрӱп ийереер. Нениҥ учун дезе сууга чӧҥӱрилгенеердеҥ бери слердиҥ айалгагар канча катап солынган болор, организацияда башка-башка иштер бӱдӱрген болороор. Андый тӧс ӱредӱлердиҥ ӱчӱзин кӧрӱп, олордоҥ кӧгӱзи тереҥ ака-эјелер неге ӱренер аргалу деп шӱӱжип ийерис.

ИЕГОВА — ЈАЙААЧЫ

4. Иегова — Јайаачы деп билип алганыс јӱрӱмисти канайып солыган?

⁴ Агару Бичикте: «Ончозын тудаачы — Кудай» — деп айдылат (Евр. 3:4). Бис јерди ле јерде бар ончо немени ойгор, Кӱчтӱдеҥ Кӱчтӱ Јайаачы јайаган деп билип алганыс. Ол бисти јайаган болордо, бис керегинде ӱзе билер. Је эҥ учурлузы — ол бисти сӱӱп јат, анайда ок биске ырысту болорго, нени эдер керек деп билер. Ончоны Иегова Кудай јайаган деп билип алганыс бистиҥ јӱрӱмисти солыган, анайда ок јӱрӱмниҥ учуры неде деп оҥдоорго болушкан.

5. Јобош болорго биске не болужар? (Исайя 45:9—12).

⁵ Иегова — Јайаачы Кудай деп ундыбай турзаас, бу биске јобош болорго болужар. Темдектезе, Иов бойы керегинде ӧйинеҥ ӧткӱре кӧп санана береле, Иегова керегинде јастыра неме айткан. Оныҥ учун Иегова ого бир канча сурактар берди (Иов 38:1—4). Бу Иовко Иегова — Кӱчтӱдеҥ Кӱчтӱ Јайаачы болордо, ол бир де јастырбай турган деп эске алындырган. Кем де бойын Кудайдаҥ ойгор деп айдып болбос. Бу аайынча Исайя судурчы мынайып бичиген: «Той балкашла узанып турган кижиге балкаш: „Сен нени эдип јадыҥ?“ — деп айдар беди?» (Исайя 45:9—12 кычырыгар.)

6. Јайаачыныҥ ойгоры ла ийде-кӱчи керегинде анчада ла качан сананар керек? (Јурукты база кӧрӱгер.)

⁶ Канча јылдардыҥ туркунына Иеговага иштеген христиан кижи ченемелдӱ болуп калат. Андый кижи Иеговага ла оныҥ Сӧзине иженердиҥ ордына, бойыныҥ кӧрӱмине ӧйинеҥ ӧткӱре иженип баштаардаҥ айабас (Иов 37:23, 24). Оныҥ учун ого Иегованыҥ јаан ийде-кӱчин ле ойгорын шӱӱп сананып ийер керек (Иса. 40:22; 55:8, 9). Мынайып Иегова ончоны јайаган деп тӧс чындык андый кижиге јобош артарга болужар. Иегованыҥ ойгоры бистиҥ санааларыстаҥ канча киреге бийик деп оҥдоп турзаас, бойыстыҥ санааларысты андый ла учурлу деп сананбазыс.

7. Рахелага организацияныҥ јаҥы башкартуларын алынарга не болушкан?

⁷ Словенияда јадып турган Рахе́ланыҥ учуралын кӧрӱп ийектер. Ого Иегова — Јайаачы деп шӱӱп сананганы организацияныҥ солынталарына чын кӧрӱмдӱ болорго болушкан. Ол куучындайт: «Кезикте меге акалардыҥ чыгарган јӧбиле јӧпсинерге јеҥил эмес болот, темдектезе, 2023 јылдыҥ 8 номерлӱ Башкару јӧптиҥ баштанузын алза. Мен оны учын јетире кӧрӱп те салган болзом, је сценада сагалду аканы баштап ла кӧрӱп ийеле, коркышту тыҥ кайкагам. Оныҥ учун Иеговага меге мындый солынталарга эптежерге, болушсын деп мӱргӱгем». Рахела дезе, Иегова — јер ле теҥериниҥ Јайаачызы — организациязын канайып апаратанын эҥ ле јакшы билер деп оҥдоп алган. Слерге јаҥы оҥдомолды эмезе јаҥы башкартуларды алынарга кӱч болуп турза, јобош болуп, Јайаачыныҥ ойгорын ла ийде-кӱчин шӱӱп сананыгар (Рим. 11:33—36).

КУДАЙ КЫЙЫН-ШЫРАНЫ НЕНИҤ УЧУН ТОКТОТПОЙ ТУРГАН?

8. Кудай кыйын-шыраны нениҥ учун токтотпой турган деп билип алганыс бистерге канайып болужат?

⁸ Кудай нениҥ учун кыйын-шыраны токтотпой турган? Кезик улус бу сурактыҥ каруузын таппай, Кудайга ачынат эмезе Кудай јок деп санаага келгилейт (Укаа 19:3). Је улус Кудай олорды кату каруузына тургузып турганынаҥ улам эмес, је кинчектӱ болгонынаҥ улам шыралап турган деп бис билерис. Анайда ок Иегова эмдиге јетире бу калју телекейди јоголтпогон, нениҥ учун дезе ол чыдамкай болуп, сакып јат. Мынаҥ улам миллиондор тоолу улус Кудайдыҥ најылары болуп, ол кыйын-шыраны канайып токтодор деп бойыныҥ кӧзиле кӧрӧр аргалу болор (2 Пётр 3:9, 15). Бу чындыктар бисти токунадып, Кудайга оноҥ јуук болуп каларга болужат.

9. Иегова кыйын-шыраны нениҥ учун токтотпой турган деп анчада ла кандый айалгаларда сананар керек?

⁹ Биске Иегованыҥ ончо кӱчтерди јоголтотон ӧйин сакыырга, чыдамкай болор керек деп оҥдоп јадыс. Је јуук кижи божоп калза эмезе биске ле јуук улузыска јаман баштанып турза, Иегова нениҥ учун мыныҥ аайына тӱрген чыкпай турган деп сананар болорыс (Авв. 1:2, 3). Мындый ӧйдӧ Иегова кыйын-шыраны нениҥ учун токтотпой турган деп эске алынып турза, јакшы болор (Сар. 34:19)a. Анайда ок келер ӧйдӧ болотон алкыштарды ла бистиҥ кыйын-шырабыс јажын-чакка јоголып калар деп Кудайдыҥ берген сӧзин шӱӱп сананары јаан учурлу болот.

10. Энези божоп калган Энн деп эјени не токунадат?

¹⁰ Иегова нениҥ учун кыйын-шыраны токтотпой турган деп билгенис биске коркышту кӱч айалгаларды ӧдӧргӧ болужат. Индийский теҥисте Майо́тта деп ортолыкта јадып турган Энн куучындайт: «Канча јыл кайра мениҥ энем божоп калган. Ол тушта меге коркышту кӱч болгон. Је мында Иегованыҥ бурузы јок деп, мен јаантайын бойыма эске алындыратам. Карын ол база кем де шыралабазын деп кӱӱнзеп јат, анайда ок бистиҥ јууктарысты удабас тиргизер деп сӧзин берет. Бу чындыктар керегинде шӱӱп сананып турзам, јӱрегиме амыр болор берет».

11. Иегова кыйын-шыраны нениҥ учун токтотпой турган деп билип алганыс биске јарлаарга канайып болужат?

¹¹ Иегова нениҥ учун кыйын-шыраны токтотпой турган деп билгенис бисти јарлаарга кӱӱнзедет. Апостол Пётр самаразында Иегова улусты бурузын алынып, аргадалзын деп кӱӱнзеп турганынаҥ улам чыдамкай болот деп бичиген. Оноҥ ары Пётр Кудай христиандардаҥ нени некеп турганын бичип салган: «Слер кандый улус болор учурлу деп сананып кӧрӱгер. Слердиҥ јӱрӱмигер агару, эткен керектеригер Кудайга чындык болгоноорды кӧргӱзер учурлу» (2 Пётр 3:11). Андый керектердиҥ бирӱзи — јарлаар иш болот. Бис Иегова Адабыс ла чылап улусты сӱӱйдис, олорды Кудайдыҥ јаҥы телекейинде јатсын деп кӱӱнзейдис. Иегова слердиҥ јерде јадып турган улуска чыдамкай болуп, кажы ла кижиге оныҥ ишчизи болуп калатан арга берет. Јӱк сананып ийзеер де, слер Иеговала кожо иштеп, бу калју телекейдиҥ учы келгелекте, канча ла кире кӧп улуска ол керегинде билип аларга болужып јадаар! (1 Кор. 3:9).

БИС «КАЛГАНЧЫ КӰНДЕРДЕ» ЈАДАДЫС

12. «Калганчы кӱндер» керегинде судурдыҥ бӱдӱп турганы бисти неде бӱдӱмјилейт?

¹² Агару Бичикте «калганчы кӱндерде» улус кандый болуп калар деп јарт бичилип калган (2 Тим. 3:1—5). Бу судурдыҥ бӱдӱп турганы улустыҥ эдип турган керектеринеҥ иле кӧрӱнет. Бӱгӱнги кӱнде улустыҥ керектери там ла коомойтып барат. Бу бисти Кудайдыҥ Сӧзине бӱдерге јараар деп оноҥ тыҥ бӱдӱмјилейт (2 Тим. 3:13—15).

13. Бойыска кандый сурактар берер керек? (Лука 12:15—21).

¹³ Бис калганчы кӱндерде јадып турганыс деп ундыбай турзаас, ӧйисти чын тузаланарга албаданарыс. Иисус бу керегинде Лука 12:15—21-ги укаа сӧзинде куучындаган (кычырыгар). Анда бай кижи нениҥ учун «тенек кижи» деп адалган? Кӧп јӧӧжӧлӱ болгоны учун эмес, је ӧйин кереги јок немеге берип турганы учун. Ол «Кудайдыҥ кӧзине бай болорго албаданбай», бойына јӧӧжӧ јууган. Ого јӱрерге ас арткан, оныҥ учун јаан амадулар тургузары тенексӱ болгон, не дезе Кудай ого: «Бу тӱнде јӱрӱмиҥди алып баргылаар» — деп айткан. Бу бисти неге ӱредет? Бу калју телекейдиҥ учы чек јууктап келген. Оныҥ учун бойыска мындый сурактар берерге јараар: «Мениҥ амадуларым кандый? Мен ӧйимди чын тузаланып тургам ба? Балдарымды неге кӱӱнзедип тургам? Олорго кандый амадулар тургузарга болужадым? Мен ӧйимди, ийде-кӱчимди, акча-манадымды неге берип тургам: јакшы, эптӱ јадарга ба эмезе теҥеридеги байлыкты јуурга ба?»

14. Бис калганчы кӱндерде јадып турганыс деп шӱӱп сананары нениҥ учун тузалу болот?

¹⁴ Бис калганчы кӱндерде јадып турганыс деп оҥдоп турганыс бистиҥ амадуларысты солыыр аргалу. Бу мындый учурал Ми́ки деген эјеле болгон. Ол куучындайт: «Мен тындуларды сӱӱйтем, оныҥ учун школды божоткон кийнинеҥ зоология јанынаҥ ӱредӱге кирерге санангам. Анайда ок болуш керек јерде текши пионер болуп иштеерге амадагам. Бу ӧйдӧ мени јуундагы кӧгӱзи тереҥ најыларым карьерага бастыра бойымды берип ийзем, кӧгӱс амадуларга јединип болорым ба деп јазап сананарга кӱӱнзеткен. Олор меге удабас бу телекейдеҥ не де артпас деп эске алындырган. А келер ӧйдӧ менде кандый ла тындуларды шиҥдейтен ӧй толтыра болор. Оныҥ учун бийик ӱредӱ албай, кыска ла курстарга ӱренип алар деп шӱӱдим. Кийнинде мен текши пионер болуп иштеерге, јакшы иш табып алгам. Оноҥ Эквадордо јарчылар керек болордо, ары кӧчкӧм». Эмди Мики ол ло ороондо ӧбӧӧниле кожо аймак кӧрӧӧчиниҥ ижин эткилейт.

15. Сӱӱнчилӱ јарды улус алынбай турза, нениҥ учун чӧкӧбӧс керек? Тем куучындап беригер. (Јуруктарды база кӧрӱгер.)

¹⁵ Улус сӱӱнчилӱ јарды алынбай турза, биске санааркабас керек, нениҥ учун дезе олор солынар аргалу. Иисустыҥ Иаков деп карындажы керегинде сананып ийектер. Ол Иисусла кожо чыдаган. Иисус кандый кайкалдар эткенин ле Мессия керегинде судурлар ого канайып бӱткенин кӧргӧн. Анайда ок Иаков Иисуска једер ӱредӱчи јок деп билген. Је андый да болзо, ол Иисустыҥ јӱк тирилгениниҥ кийнинеҥ оныҥ ӱренчиги болуп калган. Кийнинде ол Кудайга сӱреен эрчимдӱ иштеген!b (Иоанн 7:5; Гал. 2:9). Оныҥ учун сӱӱнчилӱ јарды эм тура керекке албай турган тӧрӧӧндӧрис бисти качан да укпас деп сананбас керек. Анайда ок алдында бисти угарга кӱӱнзебеген улуска барып туругар. Бис калганчы кӱндерде јададыс, оныҥ учун јарлаар иш бӱгӱн сӱреен керектӱ болот. Бӱгӱн бистиҥ айткан сӧстӧрис кийнинде олордыҥ јӱрӱмин аргадаар аргалу. Керек дезе бистиҥ сӧстӧрис олордыҥ санаазына јӱк улу тӱбектиҥ башталганыныҥ кийнинде кирзе де, олордо чын јӧп чыгарар арга болор лоc.

ИЕГОВАНЫҤ ЭЗЕДӰЛЕРИН БААЛАП ТУРУГАР

16. Библиялык тӧс ӱредӱлерди такып кӧрӱп турганыстаҥ кандый туза бар? («Ӱредерге болужатан јепселдер» деген рамканы база кӧрӱгер.)

¹⁶ Кӧгӱс курсакты бис Иегованыҥ организациязы ажыра артыгынча аладыс. Оныҥ кезиги, темдектезе, ончо улуска куучын-эрмектер, jw.org сайттыҥ кезик статьялары ла видеолоры, анайда ок таркадатан бичиктер тӧс чындыктарды билбес улуска белетелген. Андагы шӱӱжилип турган чындыктарды бис јакшы билер де болзоос, олорды такып кӧрзӧ, јакшы болор. Бу чындыктар биске Иегованы тыҥ сӱӱрге, Агару Бичикке оноҥ тыҥ бӱдерге, анайда ок улуска библиялык ӱредӱлерди оноҥ јакшы јартаарга болужат (Сар. 19:7).

17. Библиялык тӧс ӱредӱлерди кандый учуралдарда шӱӱп сананар керек?

¹⁷ Бис, Иегованыҥ Керечилери, Агару Бичиктиҥ чокумдалып јарталган кажы ла чындыгына сӱӱнип јадыбыс. Бу ла ок ӧйдӧ бис Иеговага јууктаткан тӧс чындыктарды оноҥ ло ары баалап јадыс. Је бис Иегованыҥ организациязынаҥ башкартулар алала, олорго кӧрӧ бистиҥ санаабыс артык деп турган болзоос, бойыска бу организацияла ойгор, Кӱчтӱдеҥ Кӱчтӱ Јайаачы Иегова башкарып турган деп, эске алындырып турар керек. Бистиҥ јууктарыс эмезе бис бойыс уур-кӱчтерге табарткан болзоос, биске чыдамкай болуп, Иегова бу кыйын-шыраны нениҥ учун токтотпой турганыныҥ шылтактарын шӱӱп сананар керек. Бис калганчы кӱндерде јадып турганысты ла ӧй коркышту ас арткан деп ундыбай турзаас, бойыстыҥ ӧйисти, ийде-кӱчисти ле акча-манадысты ойгор тузаланарыс. Айдарда, Иегованыҥ эзедӱлерин оноҥ ло ары баалап јӱректер. Олор бистиҥ бӱткенисти тыҥыдып, ойгор болорго ло Иеговага чындык иштеерге болужат .