Кудайда ады бар ба?

Библиялык каруу

Кажы ла кижиде ады бар. Айдарда Кудайда да ады болор учурлу эмес пе? Улус најылар болзо, олор бой-бойына адыла баштанат. Бис те Кудайла најылажарга турган болзоос, биске оныҥ адын билер керек эмес пе?

Агару Бичикте Кудай айдат: «Мен Иегова. Бу Мениҥ адым» (Исаия 42:8). Кудайда кӧп титулдар бар, темдектезе, «Кӱчтӱдеҥ Кӱчтӱ Кудай», «Бий Кайракан» ла «Јайаачы». Је андый да болзо, ол бойыныҥ ишчилерине ого адын адап баштанатан арга берип, олорго кӱндӱ эткен (Башталганы 17:1; Апостолдордыҥ ижи 4:24; 1 Петр 4:19).

Агару Бичиктиҥ кӧп кӧчӱрмелеринде Чыгыш 6:3-те Кудайдыҥ ады бар. Ондо айдылат: «Авраамга, Исаакка ла Иаковко Кӱчтӱдеҥ Кӱчтӱ Кудай деп адымла келгем; је бойымныҥ: „Иегова“ — деп адымла олорго ачылбадым».

«Иегова» — бу чактардыҥ туркунына тузаланылган Кудайдыҥ адыныҥ бӱдӱми. Кезик билимчилер кӧп сабада «Яхве » деген бӱдӱмин тузаланып та турган болзо, је «Иегова» — ол Кудайдыҥ адыныҥ эҥ таркадылып калган бӱдӱми болот. Агару Бичиктиҥ баштапкы бӧлӱги јебрен еврей тилге бичилген. Ол тилде сӧстӧр оҥ јанынаҥ сол јанындӧӧн бичилет. Бу тилде Кудайдыҥ ады тӧрт туйук таныктаҥ турган — יהוה. Бу тӧрт танык алтай тилде ЙХВХ деген таныктарла кычырылып, тетраграмматон деп адалат.