Среда, ӱлӱрген ай 29
Иегованы акту кӱӱнимнеҥ мактаарым! Мениҥ бастыра эди-каным оныҥ агару адын мактазын (Сар. 103:1).
Иегованы сӱӱп турган улус оныҥ адын акту јӱрегинеҥ мактаарга кӱӱнзейт. Давид каан Иегованыҥ адын мактаганы — Кудайды бойын мактаганы — деп оҥдоп турган болгон. Качан бис Иегованыҥ адын угуп ийзеес, санаагыста капшай ла оныҥ сӱреен јараш кылык-јаҥдары ла коркышту кайкамчылу керектери јуралат. Давид теҥеридеги Адазыныҥ адын сӱреен тыҥ баалаган ла оны акту јӱрегинеҥ мактаарга кӱӱнзеген. Бу јанынаҥ темди биске левиттер база кӧргӱскен. Олор Кудайга тоомјызын кӧргӱзип, оныҥ агару адын мактаарга сӧс тӧ јетпес деп айткандар (Неем. 9:5). Чын ла, бис теҥеридеги Адабысты тооп, оныҥ адын мактап турзаас, оныҥ јӱрегин сӱӱндиредис. w24.02 9, абз. 6
Четверг, ӱлӱрген ай 30
Бис неге де јединип алган болзоос, оноҥ ло ары бу ла јолло барактар (Флп. 3:16, ЈТ).
Слер тургузып алган амадугарга јединип болбозоор до, Иегова слерди качан да јектебес (2 Кор. 8:12). Амадугарга јединип болбогоноордоҥ ӱредӱ алыгар. Једимдереерди ундыбагар. Агару Бичикте мынайда айдылган: «Кудай чындык, ол... эдип турган ижигерди... ундыбас» (Евр. 6:10, ЈТ). Оныҥ да учун христиан јолдо јеткен једимдеристи биске де ундыбай турар керек. Темдектезе, слер Иегованыҥ најызы болуп калганаар, ол керегинде куучындап баштаганаар ол эмезе сууга чӧҥӱрилгенеер. Канайып алдында да амадулар тургузып, ого једингенеер, эмди де оноҥ ло ары анайда эдигер. Слер Иегованыҥ болужыла кӧгӱс амадулараарга јединер аргалу. А амадугарга јӱткӱген тужыгарда, Иегованыҥ слерге канайып болушканын ла алкаганын кӧрӱп туругар. Бу слерге јаан сӱӱнчи экелер (2 Кор. 4:7). Слер чӧкӧбӧзигер, Иегова слерге арбынду алкыштар берер (Гал. 6:9). w23.05 31, абз. 16—18
Пятница, ӱлӱрген ай 31
Ада слерге Бойы карузып јат ине, нениҥ учун дезе, слер Меге карузып, Мени Кудайдаҥ келген деп бӱттигер (Иоанн 16:27).
Иеговага бойыныҥ ишчилерине сӱӱжин ле олорды баалап турганын кӧргӱзерге јарап јат. Бу бичикте ол Иисусты «сӱӱген Уулым» деп айткан эки учурал бичилген (Матф. 3:17; 17:5). Слер Иегованаҥ мындый јылу сӧстӧр угарга кӱӱнзейдеер бе? Бӱгӱн бис Иегованы бойын угуп болбозыс, је бис оны Агару Бичиктеҥ угар аргалу. Иисустыҥ сӧстӧрин кычырып турзаас, Иегова бисти баалап турган деп кӧрӧдис. Иисус Адазына сӱреен јуук болгон, оныҥ учун Адазы канайып эдер эди, Иисус анайып ла эдет. Иисустыҥ ӱренчиктери јастырып туратан, је андый да болзо, олор Иеговага чындык иштеген. Иисус олорды мактап, олорго карузып туратан. Бис Иисустыҥ бойыныҥ ӱренчиктерине айткан сӧстӧрин кычырып турзаас, бу Иегованыҥ меге айткан сӧстӧри деп сананар аргалу (Иоанн 15:9, 15). Је бисте ченелтелер болуп турза, Иегова бисти таштап ийген деп сананбас керек. Карын андый ӧйдӧ бисте ого сӱӱжисти ле ого иженип турганысты кӧргӱзетен арга болот (Иак. 1:12, JT). w24.03 28, абз. 10, 11