Кудайдыҥ табыла болзо меге нени эдер керек?

Агару Бичиктиҥ каруузы

Кудайдыҥ табыла болзо, слерге оны јакшы билип, ого јууктап, оны бастыра јӱрегердеҥ сӱӱп ле бастыра бойыгарла ого иштеер керек (Матфей 22:37, 38; Иаков 4:8). Бистерге Иисустыҥ јӱрӱми ле ӱредӱлери, Кудайдыҥ табын канайып бӱдӱрерин јарт кӧргӱзип јат (Иоанн 7:16, 17). Иисус Кудайдыҥ табы керегинде тегин ле куучындаган эмес, ол оныла јӱрген. Ол керек дезе, «бойымныҥ табымла эдип јӱрейин деп турган эмезим, је Мени ийген Аданыҥ табыла эдип турум» деп айдып, бу оныҥ јӱрӱминиҥ учуры деп кӧргӱскен (Иоанн 5:30).

Кудайдыҥ табыла меге нени эдер керек деп билерге, кандый бир кайкал эмезе кӧрӱлте эмезе теҥеринеҥ ӱн угатаны керек пе?

Јок, нениҥ учун дезе, Кудай бойыныҥ табын улуска Агару Бичикте бичип салган. Анда, кижи «кандый ла быйанду керекти эдерге јепселген болзын деп», бастыра керектӱ немелер бар (2 Тимофейге 3:16, 17). Кудайдыҥ кӱӱниле болзо, биске Агару Бичиктиҥ болужыла, анайда ок «сагыжысты иштедип», оныҥ табы аайынча биске нени эдер керек деп билип алар керек (Римдегилерге 12:1, 2, ЈТ; Ефестегилерге 5:17).

Мен Кудайдыҥ табын чын ла бӱдӱрип турар аргалу ба?

Эйе, бӱдӱрип ийеригер, нениҥ учун дезе Агару Бичикте: «Оныҥ [Кудайдыҥ] јакылталары уур эмес» — деп айдылат (1 Иоанн 5:3). Бу дезе, Кудайдыҥ јакылталарыла јӱрери јаантайын јеҥил деп кӧргӱспей јат. Је ол јакылталарла јӱрерге албаданганаар учун, слер сӱреен кӧп алкыштар алараар. «Кудайдыҥ сӧзин угуп, бӱдӱрип јӱргени кежиктӱ [ырысту]!» — деп, Иисус айткан (Лука 11:28).