Слер Иеговага бир де алаҥзу јоктоҥ бӱдедеер бе?

1, 2. а) Нениҥ учун кезик улус јаҥдарга иженбей барган? б) Бу јӧрмӧлдӧ нени кӧрӧрис?

БӰГӰНГИ кӱнде кезик улус јаҥдарга чек иженбей барган. Нениҥ учун дезе оныҥ јасактары кӧп сабада бай ла аргалу-чакту улуска болужып јат. Је јокту-јойу улуска мынаҥ бир де туза јок. Бу керегинде Агару Бичикте сӱреен јакшы сӧстӧр айдылган: «Кижи кижиле башкарганда ого каршу јетирет» (Эккл. 8:9). Анайда ок кезик кудай јаҥныҥ башкараачылары бойыныҥ эткен керектериле улусты Кудайдаҥ чек чӧкӧндирип салат. Оныҥ да учун мындый улуска Агару Бичикти ӱренип баштаза, Иеговага ла оныҥ организациязына бӱдерге кӱч болуп турган.

² Иеговага ла оныҥ организациязына бӱдерге, јаҥыс ла Агару Бичикти ӱренип турган улуска кӱч болуп турган эмес, је Иеговага канча јылдардыҥ туркунына иштеп турган да улуска јеҥил эмес болот. Кезикте бистиҥ де бӱдӱмјибис ченелердеҥ айабас. Бу јӧрмӧлдӧ биске Иеговага ла оныҥ организациязына кандый айалгаларда бӱдерге кӱч болорын кӧрӱп ийектер: 1) Агару Бичик кычырып јатсаас, 2) Иегованыҥ организациязынаҥ кандый бир башкарту берилзе, 3) улу тӱбектиҥ ӧйинде ле оныҥ кийнинде.

АГАРУ БИЧИКТИ КЫЧЫРЫП ЈАТСААР, ИЕГОВАГА БӰДӰГЕР

3. Агару Бичикти кычырган ӧйдӧ кандый сурактар чыгардаҥ айабас?

³ Бис Агару Бичиктеҥ кандый бир учуралды кычырып јадала, Иегова нениҥ учун анайып этти не деп, кезикте оҥдобой јадыс. Темдектезе, Моисей тужында, суббот кӱнде бир кижи одындап барарда, Иегова оны ӧлтӱрип салзын деген. А коркышту јаан кинчек эткен кижиниҥ, Давидтиҥ, јаманын Иегова таштап койгон (Тоол. 15:32, 35; 2 Сам. 12:9, 13). Бу учуралдарды кычырган кижи мынай сананар болор: «Нениҥ учун Иегова мынайып эткен? Давид ӧскӧ ӱй кижиле конгон, кижи ӧлтӱрген, а одындап јӱрген кижи нениҥ кинчегин эдип ийген?» Оныҥ учун Агару Бичикти кычырып јаткан ӧйдӧ мындый сурактар болзо, нени ундыбас керек деп кӧрӱп ийектер.

4. Башталганы 18:20, 21-деги ле Јаҥды такыганы 10:17-деги сӧстӧр Иегова чындык Кудай деп алаҥзыбаска биске канайып болужат?

⁴ Агару Бичикте бичилген кезик учуралдардыҥ оок-теек јетирӱлери бичилбеген. Давидтиҥ учуралын кӧрзӧӧс, Давид кинчегин акту јӱрегинеҥ алынган (Сар. 51:2—4). Је суббот кӱнде одын јууп јӱрген кижи керегинде бис нени айдарыс? Ол кижи бойыныҥ јастыразын алынган ба? Эмезе ол мынаҥ озо Кудайдыҥ јасагын бускан ба? Эмезе ол тӱзедӱни керекке албаган болор. Агару Бичикте бу керегинде не де айдылбаган. Је бир немени бис јакшы билерис, Иегова оныҥ нормаларын бузуп турган керектерди кӧрӧр кӱӱни јок деп (Јаҥ. т. 32:4). Иегова та нени де эдердеҥ озо бу керекти бастыра јанынаҥ кӧрӱп јат. А кижи дезе улустаҥ кӧргӧн-укканыла эмезе бойыныҥ јастыра кӧрӱмиле башкарынат. (Башталганы 18:20, 21; Јаҥды такыганы 10:17 кычырыгар.) Бис канча ла кире Иегованы ла оныҥ нормаларын билзеес, Иегова јастырып турган деп бир де сананбазыс (Сар. 145:17).

5. Кинчектӱ болгоныстаҥ улам кӧрӱмис кандый болот? («Кинчектӱ болгоныстаҥ улам кӧрӱмис јастыра болот» деген рамканы база кӧрӱгер.)

⁵ Кинчектӱ болгоныстаҥ улам кезикте бистиҥ кӧрӱмис јастыра болуп јат. Иегова кижини бойына тӱҥей эдип јайаган. Оныҥ да учун улус кемге-кемге јаман баштанып турза, бистиҥ ичи-буурыс аҥдана берет (Баш. 1:26). Је кезикте ӱзе немени чын да эдип јадыс деп сананып турзаас, јастыра болуп калат. Темдектезе, Ниневияныҥ 120 000-наҥ кӧп кижизи кинчегин алынарда, Иегова олорды јоголтпозым деп айткан. Мынаҥ улам Иона коркышту тыҥ ачынган (Иона 3:10—4:1). Айдарда, бу учуралда Иегованыҥ кӧрӱми јастыра болгон эмес, је Ионага бойыныҥ кӧрӱмин солыыр керек болгон.

6. Нениҥ учун Иегова биске кажы ла немени јартабас аргалу?

⁶ Иегова нени эдерин, нени этпезин бойы билер. Алдында Иегова бойыныҥ кезик ишчилерине оныҥ чыгарып койгон јаргызыла јӧпсинбезе, бойыныҥ кӧрӱм-санаазын чыгара айтсын деп арга берип туратан (Баш. 18:25; Иона 4:2, 3). Керек дезе ол недеҥ улам анай эткенин, эмезе этпегенин јартап беретен (Иона 4:10, 11). Андый да болзо, Иегова нени канай эдерин бойы билип јат. Бастыра немени Иегова јайаган болордо, биске ого билеркеп, оны тӱзедетен јаҥыс јок (Иса. 40:13, 14; 55:9).

БАШКАРТУЛАР БЕРИЛЗЕ, ИЕГОВАГА БӰДӰГЕР

7. Биске нени эдерге кӱч болуп јат, нениҥ учун?

⁷ Бис Иеговага бир де алаҥзыбай јадыс. Ол бир де јастыра неме этпей јат. Је Иегованыҥ тургузып койгон улузына сӧсуккур болорго кезикте јеҥил эмес болуп јат. Мынаҥ улам бистерде мындый сурактар чыгардаҥ айабас: «Јуунда башкарып турган акалар чын ла Иегованыҥ кӧрӱмиле башкарынып турган ба эмезе бойлорыныҥ кӧрӱмиле эдип јат па?» Јебрен ӧйдӧги Израильдиҥ албатызында база мындый сурактар чыгып туратан болор. Бу керегинде 3-чи абзацта кӧргӧн болгоныс. Суббот кӱнде одындап јӱрген кижиниҥ улузы мынайып сананган болор: «Моисей одындаган кижини ӧлтӱрзин деп јакарып турарда, Иегованыҥ кӧрӱмиле башкарынган ба эмезе бойыныҥ санаазыла эткен бе?» А Урияныҥ најылары мынайып сананган болор: «Давид коркышту јаман керектеринеҥ каан ла бололо айрылып чыккан». Айдарда, Иегованыҥ тургузып салган улузына алаҥзып турзаас, Иеговага алаҥзыбай турганыс деп айдып болорыс па?

8. Озогы ла эмдиги христиан јуундардыҥ нези тӱҥей? (Апостолдордыҥ ижи 16:4, 5).

⁸ Бӱгӱнги кӱнде Иегова јердеги организациязын «бӱдӱмјилӱ ле керсӱ кул» ажыра башкарат (Матф. 24:45). Бу «кул» баштапкы чактагы Башкару јӧп чылап, Кудайдыҥ албатызын кичееп, олорго башкартуны аксагалдар ажыра берип јат. (Апостолдордыҥ ижи 16:4, 5 кычырыгар.) Аксагалдар дезе бу башкартуларды јуундарга берет. Бис организацияныҥ ла аксагалдардыҥ берип турган јакаруларын бӱдӱрип турзаас, Иеговага бӱдӱп турганысты кӧргӱзип јадыс.

9. Кандый учуралдарда биске аксагалдардыҥ јакарганын бӱдӱрерге кӱч болуп јат, нениҥ учун?

⁹ Је кезикте јууныстагы аксагалдардыҥ сӧзин угарга јеҥил эмес болуп јат. Темдектезе, бу јууктарда Иегованыҥ организациязына јаҥыртулар эдилип, кезик јуундарды бириктирип салган. Мынаҥ улам Каандыктыҥ Туралары ойгор тузаланылат. Оныҥ учун аксагалдар бисти ӧскӧ јуунга кӧчсин деп сураар болор. Бис бу ӧйдӧ бойыстыҥ најыларысты, тӧрӧӧндӧристи артыргызып койоло, ӧскӧ јуунга кӧчӧрис пе? Је бис билерис Иегова бисти кажы јуундӧӧн ийетенин теҥеридеҥ аксагалдарга айдып бербей турган деп. Мыныҥ да учун биске олордыҥ айткан сӧзин угарга јеҥил эмес болуп турган болор. Бу акаларга Иегова бӱдӱп турарда, бис олорго канайып бӱтпейтенис?b

10. Еврейлерге 13:17-ле болзо, биске нениҥ учун аксагалдарды угуп турар керек?

¹⁰ Аксагалдардыҥ айткан сӧзи ичиске кирбей де турза, олордыҥ сӧзин нениҥ учун угуп турар керек? Олорго сӧсуккур болзоос, Кудайдыҥ албатызы бирлик болуп артат (Эф. 4:2, 3). Анайда ок јуунда амыр ла сӱӱнчи болот. (Еврейлерге 13:17 кычырыгар.) Је эҥ учурлузы, аксагалдардыҥ сӧзин угуп турзаас, Иегованыҥ айтканын бӱдӱрип турганысты кӧргӱзедис. Бисти кичеезин деп, олорды Иегова тургузып салган эмей (Ап. ижи 20:28).

11. Аксагалдардыҥ чыгарган јӧбиле јӧпсинип турарга биске не болужар?

¹¹ Аксагалдардыҥ јӧбиниҥ айтканын угуп турарга биске не болужар? Аксагалдар јуунныҥ кандый бир сурагын кӧрӧргӧ јатса, олор озо ло баштап, Иеговага мӱргӱп, агару тын сурап аладылар. Анайда ок олор Агару Бичиктиҥ принциптерин ле организацияныҥ башкартуларын тузаланып јат. Аксагалдар Иегованы сӱӱндирерге кӱӱнзегилейт ле оныҥ албатызын сӱреен јакшы кичеерге албаданат. Нениҥ учун дезе олор бу молјулары учун Кудайдыҥ алдына каруулу (1 Пётр 5:2, 3). Сананып кӧрӱп ийектер, бӱгӱнги кӱнде национальный, политический, анайда ок кудай јаҥныҥ сурактарынаҥ улам бӱдӱн телекей бӧлӱнип калган. Је Кудайдыҥ албатызы бирлик. Нениҥ учун дезе олорло сок јаҥыс чын Кудай башкарып јат.

12. Кижи кинчегин чын ла алынып турган ба деп билерге, аксагалдар кандый сурактарды кӧрӧр учурлу?

¹² Иегова аксагалдарга јуунды ару тутсын деп молју берип салган. Оныҥ учун јуунда кем-кем уур кинчек эдип ийген болзо, ол кижи оноҥ ары јуунда артар ба, јок по деп сурак чыгат. Је бу кижи кинчегин чыннаҥ ла алынып турган ба? Ол эткен кинчегин кӧрӧр кӱӱни јок бо? Ол бу кинчекти Кудайдыҥ нормаларын бӱдӱрбей турган улусла јӱреле эткен болор бо? Ол андый улусла најылашпаска белен бе? Бу кинчекти база этпезим деп сананып алган ба? Аксагалдар кижиниҥ кӧрӱмин билип алала, бу кижи јуунда артар ба, јок по деп, Иеговага мӱргӱп, Агару Бичиктиҥ болужыла шиҥдеп кӧрӱп јат. Кезик учуралдарда кинчек эткен кижи јууннаҥ чыгардырып ийет (1 Кор. 5:11—13).

13. Бистиҥ јуук најыбысты эмезе тӧрӧӧнисти јууннаҥ чыгарып салган болзо, кандый сурактар биске амыр бербес болор?

¹³ Аксагалдардыҥ чыгарган јӧбиле кандый учуралда бис јӧпсинбес болорыс? Бу чыгарылып калган кижиле бис јакшы билишпес болгон болзоос, аксагалдардыҥ јӧбиле јӧпсинерге кӱч эмес болор эди. Је чыгарылып койгон кижи јуук најыбыс эмезе тӧрӧӧнис болгон болзо, мындый сурактар амыр бербес болор: «Аксагалдар бу керекти шиҥдеп турала, ӱзе немени ајаруга алган ба? Иегова олордыҥ ордына болгон болзо, мындый ла јӧп чыгарар беди?» Аксагалдардыҥ чыгарып койгон јӧбине јӧмӧжӧргӧ биске не болужар?

14. Аксагалдардыҥ јӧбине јӧмӧжӧргӧ биске не болужар?

¹⁴ Биске ундыбас керек: кинчегин алынбай турган кижини јууннаҥ чыгарзын деген јакаруны Иегова берет деп. Андый кижини јууннаҥ чыгарып салза, ого бойына да, бастыра јуунга да тузалу болот. Нениҥ учун дезе бу кижи јууннаҥ чыгарылбаза, ака-эјелер оны кӧрӱп, база кинчек эдип ийердеҥ айабас (Гал. 5:9). Ол эмезе кижи кандый кинчек эткенин оҥдобос. Мынаҥ улам ол тӱзединерге де, Иеговала колбуларын орныктырарга да кӱӱнзебес (Эккл. 8:11). Аксагалдар андый керектерди јазаптыра кӧрӧргӧ албаданат. Нениҥ учун дезе оҥдогылап јат, олор Израильде ле јаргычылар чылап јаргыны «улустыҥ адынаҥ эмес, је Иегованыҥ адынаҥ» чыгарат деп (2 Лет. 19:6, 7).

БӰГӰННЕҤ ЛЕ АЛА ИЕГОВАГА БӰДӰП, КЕЛЕР ӦЙГӦ БЕЛЕТЕНЕДИС

15. Биске нениҥ учун бӱгӱннеҥ ле ала Иегованыҥ башкартузын угуп билер керек?

¹⁵ Улу тӱбектиҥ ӧйи коркышту тӱрген јууктап келедири, оныҥ учун бистерге алдындагызына кӧрӧ, Иеговага оноҥ тыҥ иженер керек. Улу тӱбектиҥ ӧйинде биске башкартулар берилзе, бистер: «Бу башкартуларды канай бӱдӱретен ол эмезе кандый саҥ башка башкартулар берди?» — деп айдыжар болорыс. Бу башкартуларды акалар эмес, је Иегова берген деп ундыбай турзаас, бисте олорды угатан ба, укпайтан ба деп алаҥзыш болбос. Аксагалдардыҥ айтканын бӱгӱнги кӱнде угуп турзаас, келер ӧйдӧ берилетен јакаруларды бӱдӱрерге јеҥил болор (Лука 16:10).

16. Иеговага сӧсуккурыс удабас ла канайып ченелер?

¹⁶ Биске база бир немени ундыбас керек. Иегова Сатананыҥ телекейин јоголтып јатса, бис оныҥ чыгарган јаргызыла јӧп болорыс па? Бу ӧй келгелекте, чындыкты эм тура алынбаган тӧрӧӧндӧрис, најыларыс Иегованыҥ ишчилери болуп калар деп иженип јадыс. Је Армагеддоныҥ ӧйинде андый улусла не болорын Кудайдыҥ тургузып койгон Јаргычызы — Иисус — бойы кӧрӧр (Матф. 25:31—33; 2 Фес. 1:7—9). Оныҥ учун кемди килейтен, кемди килебейтен јаҥ бисте јок (Матф. 25:34, 41, 46). Айдарда, јаргыныҥ ӧйинде слер Иеговала јӧпсинереер бе эмезе Кудай слердиҥ јуугарды килебеген дейле, ого јарбынала, оныҥ ишчизи болбой барараар ба? Оныҥ учун биске Иегованыҥ кӧрӱмиле эмдештеҥ ле ала јӧпсинип турарга ӱренер керек. Оноҥ башка келер ӧйдӧ кӱч болордоҥ айабас.

17. Иегованыҥ амадузы бӱдӱп калзын деп, слер нениҥ учун кӱӱнзеп јадаар?

¹⁷ Сананып ийзеер де, слер райда деп. Иегованыҥ амадузы ӱзе бӱдӱп калган. Бу јаҥы телекейде тӧгӱн кудай јаҥдар, ач коммерция, бу телекейдиҥ политиказы да јок. Кем де оорубай да, карыбай да, божобой до јат. А Сатана ла оныҥ колтыкчылары 1 000 јылга кынјыладып койгон. Учы-тӱбинде дезе Кудай олорды јоголтып салар (Ачыл. 20:2, 3). Иеговага сӧсуккур болуп, ого бӱткенистеҥ улам јаҥы телекейге јеткениске тыҥ сӱӱнерис!

18. Тоолор 11:4—6-наҥ ла 21:5-теҥ бис неге ӱренер аргалу?

¹⁸ Канайып сананып тураар, райда слер Иеговага оноҥ ло ары сӧсуккур болороор бо? Израильдиҥ албатызы Египеттеҥ чыккан кийнинде, курсагына комыдажып баштаган. Керек дезе Иегованыҥ теҥеридеҥ берген манназын да: «Бу калаш... кӱӱнисти алды» — деп айдынгылаган. (Тоолор 11:4—6; 21:5 кычырыгар.) Мындый комыдаш бисте де улу тӱбекти ӧткӧн кийнинеҥ болордоҥ айабас. Нениҥ учун дезе бастыра јемирилген немени арутаарга канча кире ийде-кӱч ле ӧй керек болорын билбезис. Баштап тарый јердиҥ ӱсти райдый болбос болор, ондо иш коркышту кӧп болордоҥ айабас. Айдарда, улу тӱбектиҥ кийнинде, рай башталган ӧйдӧ, комыдай бербеске, Иегованыҥ болужын кӧрӱп турарга эмди ле ӱренер керек.

19. Бу јӧрмӧлдиҥ тӧс шӱӱлтелерин айдып беригер.

¹⁹ Иегова ӱзе немени чын эдип турган деп, биске бир де алаҥзыбас керек. Анайда ок Иегованыҥ кӧстӧп салган улузыныҥ сӧзин угуп турар керек. Айдарда: «Токыналу артып, Иеговага ижензеер, ийде-кӱчтӱ болорыгар» — деген сӧстӧрди ундыбай јӱректер (Иса. 30:15).