Канныҥ фракциялары ла канды тузаланатан медицинский процедуралар

Канныҥ фракциялары. Фракцияларды канныҥ тӧрт тӧс компоненттеринеҥ алат: эритроциттердеҥ, лейкоциттердеҥ, тромбоциттердеҥ ле плазмадаҥ. Темдектезе, эритроциттерде гемоглобин деп белок бар. Кижиниҥ ле тындулардыҥ гемоглобининеҥ алынган препараттарды кӧп кан јылыйган ла гемоглобин тыҥ астаган тушта тузаланып јат.

90 процент суудаҥ турган плазмада, кӧп гормондор, органический эмес тустар, ферменттер, тузалу ла минералду немелер ле сахар бар. Анайда ок плазмага канды койылтып токтодотон, эт-канга оорула тартыжарга болужатан белоктор ол тоодо альбумин деп белок кирет. Кандый бир оорула ооруп калар чочыду бар болзо, кижини бу оорудаҥ корулаарга, эмчилер кезикте плазманаҥ алылган гамма-глобулин тургузат. Лейкоциттердеҥ интерферондор ло интерлейкиндер алат, олорды југуш ла јӱрӱмге јеткерлӱ ооруларды эмдееринде тузалангылайт.

Христиандар эмденерге канныҥ фракцияларын тузаланарына јӧпсинер бе? Бу јанынаҥ Агару Бичикте кандый да чокум јакарулар јок, оныҥ учун христиан кижи Кудайдыҥ алдына бойыныҥ уйады аайынча јӧп чыгарат. Кезик христиандар Кудайдыҥ Израильге берген канды јерге тӧксин деген јасагына тӧзӧлӧнип, кандый бир фракцияларлу эмдердеҥ мойножот (Јаҥды такыганы 12:22—24). Кезиктери канныҥ бойын ла оныҥ тӧрт тӧс компоненттерин урдурбай да турган болзо, је кандый бир фракциялу эмди тузаланарга јӧпсинет. Нениҥ учун дезе каннаҥ алынган фракцияларды кемниҥ де јӱрӱми деп сананбай турган болор.

Сен канныҥ фракцияларын тузаланар ба, јок по деп, јӧп чыгарардыҥ алдында, мындый сурактар керегинде сананып кӧр: «Бастыра фракцияларды тузаланарынаҥ мойноп ийгенимле эт-канга ооруларла тартыжарга болужып турган эмезе канды акпазын деп койылтарга болужып турган фракцияларлу эмдердеҥ мойноп турганымды оҥдоп јадым ба? Мен канныҥ кезик фракцияларын тузаланарына нениҥ учун јӧпсинедим эмезе јӧпсинбейдим деп, эмчиге јартап болорым ба?»

Бойыстыҥ канысты тузаланатан медицинский процедуралар. Бого гемодилюция ла реинфузия кирет. Гемодилюцияны тузаланар тушта, канныҥ бир бӧлӱгин агып турган јеринеҥ туура эдип, канды кӧптӧдӧтӧн препаратла солып, бир канча ӧйдӧҥ кижиге ойто урат. Реинфузияны тузаланар тушта, операцияныҥ ӧйинде јылыйган канды јууйла, кижиге кайра урат. Кескен јеринеҥ аккан кан аруталып, оноҥ кайра кижиге урулат. Эмчилер бу процедураны башка-башка тузаланат, оныҥ учун христиан кижиге эмчидеҥ канайып тузаланарга турганын јазап сурап угар керек.

Бу процедуралар јанынаҥ јӧп чыгарып тура, бойыҥнаҥ сура: «Мениҥ канымныҥ бир кичинек бӧлӱги эди-канымнаҥ алынып, бир канча ӧйдиҥ туркунына ӧскӧ јерде кичеелип, токтош јогынаҥ иштеер аргазы токтодылган болзо, уйадым бу канды мениҥ эди-канымныҥ бӧлӱги деп јарадар ба эмезе оны јердӧӧн тӧксин деп некебес пе?» (Јаҥды такыганы 12:23, 24). «Медицинский процедураныҥ ӧйинде мениҥ канымныҥ бир канчазын алып, кандый бир солынталар эделе, ойто кайра эт-канга урулза, Агару Бичикле ӱредилген уйадым канайып кӧрӧр эди? Бойымныҥ канымды тузаланатан ончо медицинский процедуралардаҥ мойногоным, канныҥ анализтеринеҥ, гемодиализтеҥ эмезе кан айландыратан искусственный аппаратты тузаланарынаҥ мойногонымды темдектеп турганын мен оҥдойдым ба?»

Хирургиялык операция тушта, христиан кижи бойыныҥ каныла канайып тузаланары јанынаҥ, бойы јӧп чыгарар учурлу. Анайда ок медицинский анализтер эдери јанынаҥ ла канды алып, кандый бир солынталар эделе кижиге ойто урып эмдейтен эп-аргаларды база бойы сананар учурлу.