Jupoklembe

3 Maeni gi thek ma Yehova uweko gidong’ asu kara gimul i Juisrael ceke ma ging’eyo ngo pi lwiny moko acel de mi Kanan 2 (lembe maeni utimere kara dhanu m’utuk m’ulubo mir Israel ging’ey nia lwiny utie ang’o, gi ju ma nwang’u gilar ging’eyo ngo lembe ma kumeno i wang’e): 3 Rwodhi abic mi Jufilisti, ku Jukanan ceke, Jusidon, man Juhivi ma gikwo iwi Got Lebanon, niai i kum Got Baal-hermon nitundo bor i kum Lebo-hamath.* 4 Juweko thek maeno kara nikumgi jumul i Israel pi ning’eyo ka nyo gibiworo cik ma Yehova umiyo ni weggi nikadhu kud i bang’ Musa. 5 Pieno Juisrael gikwo i kind Jukanan, Juhithi, Juamor, Juperizi, Juhivi, man Juyebusi. 6 Juisrael gibed gigamu anyira migi ni mon, man gibed gimiyo awiya migi ma nyir ni wotgi, e gicaku timo ni mungu migi.

7 E Juisrael gitimo gin ma rac i wang’ Yehova, man giwil i kum Yehova Mungu migi, gitimo ni Baal man ni mbegi mi thier.* 8 Pieno ng’eicwiny pa Yehova uopo i kum Israel man elworogi i cing’ Kucan-ricathaim m’ubimo mi Mezopothamia.* Juisrael gitimo ni Kucan-ricathaim pi oro abora. 9 I ng’eye, kinde ma Juisrael gikwayu Yehova ukonygi, Yehova umiyo jalar pi nibodhogi; en e Othniel ma wod Kenaz m’umin Kaleb ma nyanok. 10 Tipo pa Yehova ubino i wiye, e edoko japoklembe mir Israel. Kinde m’ecidho i lwiny, Yehova umiyo Kucan-ricathaim m’ubimo mi Mezopothamia* i cinge man evoyo Kucan-ricathaim. 11 I ng’ey maeno, ng’om uyom* pi oro pier ang’wen. E Othniel ma wod Kenaz ugam utho.

12 Juisrael gicaku timo kendo gin ma rac i wang’ Yehova. Pieno Yehova uweko Eglon m’ubimo mi Moab uvoyo Israel, pilembe gitimo gin ma rac i wang’ Yehova. 13 M’umedo maeno, ecoro Juamon ku Juamalek i kumgi. Gitugo lwiny i dhu Israel man gimaku adhura mi ngasi. 14 Juisrael gitimo ni Eglon m’ubimo mi Moab pi oro apar abora. 15 I ng’eye Juisrael gikwayu Yehova ukonygi, e Yehova umiyo igi jalar; en e Ehud ma wod Gera mi suru pa Benjamin ma cinge tie acam. Nindo moko i ng’eye, Juisrael giore eter ajok ni Eglon m’ubimo mi Moab. 16 Nwang’u Ehud uthiedho ire palamularu ma lake kun ku kun, ma borne bot acel,* man eroye i the bongu pare i dire ma yor acwic. 17 E ecidh emiyo ajokne ni Eglon m’ubimo mi Moab. Nwang’u Eglon ucwey lee mandha.

18 Kinde m’Ehud udaru nimiyo ajok, gigam giloko ku dhanu m’uyeyo ajokne. 19 Ento saa ma gitundo i kum ayi gin m’ang’ika* mi Gilgal, elund eloko ku ng’eye man ecidh eyero kumae: “E ubimo, atie ku rwonglembe mir amung’ iri!” Ubimo ugam uyero kumae: “Wuling’!” E jutic pare ceke giweke. 20 Pieno Ehud ubino i bang’e nwang’u ebedo kende i kusika pare ma yo malu ma iye ng’ic. E Ehud uyero kumae: “Atie ku rwonglembe ma Mungu uoro iri.” E eai malu kud iwi komker* pare. 21 Ehud ugam uwodho palamularu ma n’i dire ma yor acwic ku cinge ma yor acam, e edhuye i Eglon. 22 Lak palane ku there ceke umondo truk i iye, man miyo uciko wi palane, kum Ehud uwodho ngo palamularune kud i iye; e ceth uwok kud i iye. 23 Ehud uwok kud i wang’ ot,* eciko dhugola ceke mi kusika ma yo malu man etielogi i ng’eye. 24 I ng’ey m’ecidho, jutic giloko man gineno nia dhugola ceke mi kusika ma yo malu ubedo atwiya. Pieno giyero kumae: “Eni ebekonyere* i kusika ma ng’ic ma yor i iye.” 25 Gikuro kpe nitundo wigi lal, ento kinde ma gineno nia asu ebeyabu ngo dhugola mi kusika ma yo malu, giting’o nyamufutha man giyabu dhugolanegi, e gineno rwoth migi upodho i die ng’om, ma dong’ etho!

26 Kinde ma fodi gibenyamiri, Ehud uringo, ekadhu kud i kaka mir ayi gin m’ang’ika* man etundo museme i Seira. 27 Saa m’etundo, ekudho agwara i ng’om gudi pa Efraim; e Juisrael giloro piny kud i ng’om gudi, en ke ebino telo wigi. 28 I ng’eye eyero igi kumae: “Wulub toka, kum Yehova udaru miyo judegi mwu ma Jumoab i cingwu.” E gilubo toke man gimaku kulo Yordan kaka m’emwomere i iye pi nicero dhu Jumoab kara kud gikadhi, man giweko ngo ng’atu moko acel de ukadhi. 29 I saa maeno, ginego Jumoab ma romo elufu apar (10 000), gin ceke gi jumaco ma tek man ma cwinygi de tek; kadok acel de mbe m’uboth. 30 Niai i ceng’ maeca, Jumoab gibedo i the loc mir Israel, e ng’om ugam uyom* pi oro pier abora.

31 I ng’ey Ehud ke ubino Camgar ma wod Anath, m’unego Jufilisti dak abusiel kud uluth ma lake ju cuma* ma juleko ko dhiang’; en de egam ebodho Israel.