Yeremia
10 Wuwinji lembe ma Yehova uyero piwu, Ee ot mir Israel. 2 Yehova uwacu kumae:
“Kud wukwany ba timo mi thek mange,
Man giranyutha mi polo kud unyay ndiri i iwu,
Pilembe nia ndiri umaku thek nikumgi.
3 Suru mi dhanu utie awonde.*
Etie kende kende yen mi luli ma jung’ondo,
Ma jabodho uyiko ku jamtic pare.
4 Giruke ku mola ma tar man mola ma kwar.
Gifwode ku nyondo man gigure ku musumali kara kud epodhi.
5 Gi calu ayi gin ma juyiko i podho pi niriemo winyo, podho mir ukuju, gicopo weco ngo;
Ukwayu juyeygi ayeya, kum gicopo wotho ngo.
Kud ilworgi, kum gicopo timo ngo dhanu rac,
Kadi gicopo timo ngo gin moko ma ber.”
6 Ng’atu moko mbe ma calu in, Ee Yehova.
I dwong’, nyingi de dwong’ man etie ku tego.
7 Ng’a m’ucikere ngo nilwori, Ee Ubimo mi thek, kum eromo kudi;
Pilembe i kind jururieko ceke mi thek man i kind ker migi ceke,
Ng’atu moko acel de mbe ma calu in.
8 Gin ceke giparu ngo lembe man gin abelu.
Niweko yen re m’umii ponji, utie awonde ma lee dit.
9 Juroyo sani mi mola ma tar kud i Tharsis man mola ma kwar kud i Ufaz;
Etie tic pa jabodho, niwacu mi cing’ jabodho ma thiedho cuma.
Bongu migi utie mi wuzi mi ble man mi thol mi rangi m’uluga.
Gin ceke jubodho re m’uyikogi.
10 Ento Yehova tie Mungu andha.
Etie Mungu ma kwo man Ubimo ma rondo ku rondo.
Nikum ng’eicwiny pare, ng’om biyengere,
Man thek moko mbe ma biciro ng’eicwiny pare ma lake tek.
11* Ibiyero igi kumae:
“Mungu m’ucwiyo ngo polo ku ng’om
Binyothiri kud iwi ng’om man kud i the polo.”
12 En re m’ecwiyo ng’om ku tego pare,
En re m’eketho ng’om ma cego piny ucungo ku rieko pare
Man en re m’epedho polo ku nyang’ i lembe pare.
Eketho lukoth mil* pi koth,
Man ekelo yamu kud i dero pare.
14 Dhanu ceke ubetimo lembe m’umbe rieko man m’umbe ng’eyong’ec.
Lewic bimaku jutic mir uka* ceke nikum ayi gin m’acwiya m’ang’ika;
Kum ayi gin m’acwiya mi cuma* pare utie ndra,
Man tipo* mbe i igi.
15 Gitie awonde,* tic mi cac.
Gibinyothiri kinde ma nindo mi pokolembe migi biromo.
16 Makapiny pa Yakobo utie ngo calu piny maeno,
Kum etie Ng’atu m’ucwiyo piny ceke,
Man Israel utie uluth mi giralaga pare.
Yehova mir udul utie nyinge.
17 Cok piny peri kud i ng’om,
In m’i dhaku ma jutieko.
18 Kum Yehova uwacu kumae:
“Nen, wang’uni abivudho* dhanu cen kud i ng’ombuni,
Man abiketho gibilimo can.”
19 Can i wiya nikum rem* para!
Rem para ma key ungo.
Man awacu kumae: “Maeni tie twoyo para andha, man acikara nicire.
20 Hema para udaru nyothere, man thondh hema para ceke udaru cot.
Wota uweka man gimbe.
Ng’atu moko mbe m’udong’ pi nitelo i hema para kadi niting’o bongu mi hema para malu.
21 Kum jukwac utimo lembe ku kasegu,
Man gipenjo ngo Yehova.
Eno re m’uketho gitimo ngo lembe ku rieko,
Man udul lim migi ceke udaru lal.”
22 Winji! Rwonglembe ubebino!
Woy ma dit ubeai kud i ng’om ma yo malu,
Pi nidwoko adhura mi Yuda ni uvuru, ni kabedo mir utho.
23 Ee Yehova, ang’eyo ma ber nia dhanu romo telo ngo wiye gire.
Ng’atu m’ubewotho umbe ku copo mi telo kadok wi dagutielo pare.
24 Ee Yehova, twinya ku pokolembe,
Ku ng’eicwiny re ngo, imaru dara.
25 Konj kwinyo peri iwi thek ma gidieng’ ungo piri
Man iwi dhanu ma gilwong’o ngo nyingi.
Kum gimvoro Yakobo,
Eyo, gimvore cil ma gidare,
Man gidwoko ng’om pare ni uvuru.