Yeremia
19 Yehova uwacu kumae: “Cidh ing’iew cupa mir ulobo i bang’ jacwii agulu. Gam judongo moko mi dhanu man judongo moko mi julam, 2 man cidh i Poga pa Wod Hinom, i dhu kamondo mi Dhugang’ mir Adekle. Man kuca wok itwong’ lembe m’abeciyero iri. 3 Ibiyero kumae: ‘Wuwinj lembe pa Yehova, wu jubim mi Yuda man wu dhanu ma wubedo i Yeruzalem. Yehova mir udul ma Mungu mir Israel uwacu kumae:
“‘“Abecikelo nyoth iwi kabedo maeni, man ng’atu moko ci ma biwinjo pire, lembene bitime rac mandha.* 4 Tie pilembe gikwera man giranju kabedo maeni i ayi ma dong’ eromo ng’iyere ngo. I kabedone gibethiero lam ni mungu mange ma gin ku kwarugi man jubim mi Yuda ging’eyo ngo, man gipong’o kabedo maeni ku rimb ju m’udubo ngo. 5 Gigiero kaka ma malu pa Baal pi niwang’u wotgi i mac ni lam m’awang’a ma boo ni Baal, ma ke tie lembe m’ang’olo ngo, m’aweca de aweco ngo pire man m’utundo ngo kadok nyanok de i paru para.”’
6 “‘“Pieno nen! nindo bebino,” Yehova wacu, “ma jubilwong’o ngo kendo kabedo maeni nia Tofeth kadi Poga pa Wod Hinom, ento Poga mi Nek. 7 Abiranyu lembe ma Yuda ku Yeruzalem gipangu i kabedo maeni, man abiketho gibipodho ku palamularu i wang’ judegi migi man i cing’ ju m’ubesayu nikabu kwo migi.* Abimiyo avujgi bibedo ni cam ni winyo mi kor polo man ni yedi mi ng’om. 8 Abiketho adhura maeni bidoko ni gin ma ng’oyo ndiri man gin ma julwiyo i kume ku zungo. Dhanu ceke ma bikadhu ku keca binene ku zungo man gibilwiyo pi goco ceke m’unwang’e. 9 Abiketho gibicamu ring’ wotgi ku ring’ nyiggi man ng’atuman m’i kindgi bicamu ring’ wadi, nikum tiek ma jutieko kogi man genogen ma gikoso, saa ma judegi migi man ju m’ubesayu nikabu kwo migi* bitiekogi.”’
10 “E i ng’eye, ng’eny i cupane i wang’ dhanu m’ucidho karacelo kudi, 11 man yer igi kumae: ‘Yehova mir udul uwacu kumae: “Eni tie ayi m’abing’enyo ko i dhanu man i adhura maeni, calu ng’atu m’ubeng’enyo agulu pa jacwii agulu ma dong’ eromo cwiyere ngo kendo; man jubikunyo avu i Tofeth nitundo ma kakunyogi bibedo mbe.”’
12 “‘Eno tie gin m’abitimo i kum adhura maeni,’ Yehova wacu, ‘man i kum dhanu ma bedo i iye, pi niketho adhura maeni udok calu Tofeth. 13 Man udi mi Yeruzalem ku udi mi jubim mi Yuda bidoko ni gin m’ucido calu kabedo maeni, niwacu Tofeth, eyo, udi ceke ma jubed juthiero lam i wigi ni udul mony ceke mi polo man kaka ma jubed jukonjo lam mi pigulok i iye ni mungu mange.’”
14 Saa ma Yeremia uloko kud i Tofeth kaka ma Yehova uore ecidh eew i iye lembila, ewok ecungo i lela ot pa Yehova man eyero ni dhanu ceke kumae: 15 “Yehova mir udul ma Mungu mir Israel uwacu kumae: ‘Nen, abekelo nyoth ceke m’aweco pigi iwi adhura maeni man iwi nyithindh adhurane ceke, pilembe ku thwon migi gikwero* niworo lembe para.’”