Isaya
25 Ee Yehova, in i Mungu para.
Abidodi, abipaku nyingi,
Kum itimo lembe ma wang’u ijo,
Lembe m’ikeco niai yang’ con;
Itimo lembe m’iyero man inyutho nia itie ng’atu ma jugeno.
2 Kum idwoko adhura ni udhuru mi kidi,
Adhura ma jutieko ku gang’ ni udhuru mi nyoth.
Ot ma wiw pa jawirok utie ngo dong’ adhura;
Jubigiere ngo nyanok de kendo.
3 Pi thelembe maeno re ma dhanu ma tek biyungi;
Adhura mi thek ma weg adici bilwori.
4 Kum idoko ni kaka ma tek ni ng’atu ma nok,
Kaka ma tek ni jacan i can pare,
Kapondo ni koth ma kud avuvu,
Man the tipo ni lietho ma tek.
Kinde ma yuyo mi weg adici utie calu koth ma kud avuvu i kum gang’kidi,
5 Calu lietho ma tek i ng’om m’uthwo.
Ikwiyo woy mi juwirok.
Calu lietho ma tek kwiyo ko i the tipo afuru,
Kumeno re ma wer mi weg adici uling’.
6 I got maeni, Yehova mir udul biyiko pi dhanu ceke
Foc mi cam ma mit,
Foc mi pigulok ma leng’,*
Cemo ma mit m’upong’ ku miyo i igi,
Pigulok ma leng’, ma juluro wang’e.
8 Ebimwonyo* tho mi magwei,
Man Rwoth Ubimo ma Malu Ngbir Yehova biweyo piwang’ kud i wang’ ceke.
Ebikabu cac mi dhanu pare kud i ng’om zoo,
Pilembe Yehova en gire udaru yero lembuni.
9 I nindo maeca, gibiyero kumae:
“Nen! eni tie Mungu mwa!
Wageno en,
Man ebibodhowa.
Eni tie Yehova!
Wageno en.
Dong’ anyong’a negwa man wabed ku mutoro nikum both pare.”
10 Kum cing’ Yehova biyom iwi got maeni,
Man jubinyono i Moab i kabedone
Calu ma junyono ko lum i uweyo m’udhurere.
11 Ebirieyo cinge i iye
Calu ma ng’atu m’ubekwang’ bolo ko cinge pi nikwang’
Man ebiloro ting’iri pare
Ku cinge m’ebebolo ku bodho.
12 Ebiredho adhura ma tek cen,
Ku gang’kidi ma wiw m’ubegwoke;
Ebing’ure i ng’om nitundo i utur.