Isaya
55 Wubin, wun ceke ma rieu ubenegowu, wubin i bang’ pii!
Wun ma wumbe ku sente, wubin wugam* man wucam!
Eyo, wubin wugam pigulok ku cak m’umbe sente man m’umbe cul.
2 Pirang’o wubemeduru ninyotho sente pi piny ma cam* ungo,
Man pirang’o wubenyotho jamcingwu* pi piny ma yeng’ojo ngo?
Wuwinja kilili, man wucam piny ma ber,
Man anyong’a binegowu* lee i kum piny ma miyo.
3 Wucik ithwu man wubin i bang’a.
Wuwinji, e wubibedo kwo,*
Man abibedo ayika nitimo kudwu lembariba ma rondo ku rondo
Nimakere ku lembang’ola mi mer ma lokere ngo m’atimo ku Daudi, ma en e lembang’ola ma jugeno.
4 Nen! akethe ebed jamulembe ni thek,
Jatela man jadit ni thek.
5 Nen! ibilwong’o thek m’ing’eyo ngo,
Man dhanu mi thek m’ung’eyi ngo biring’ini i beng’i
Nikum Yehova Mungu peri, ma Ng’atu ma Leng’ mir Israel,
Pilembe ebiyungi.
6 Wusay Yehova kinde ma fodi eromo nwang’ere.
Wulwong’e kinde ma fodi eni ceng’ini.
7 Dong’ jatimrac uwek timo pare
Man jadubo uwek paru pare;
Wek edwog i bang’ Yehova, ma bibedo ku kisa i kume,
Edwog i bang’ Mungu mwa, pilembe ebitimo kisa lee mandha.*
8 “Kum paru para utie ngo paru mwu,
Man ayi ma wutimo ko lembe utie ngo ayi m’atimo ko lembe,” Yehova wacu.
9 “Kum tap calu ma polo tie lir lir nisagu ng’om,
Ayi m’atimo ko lembe de utie lir lir nisagu ayi ma wutimo ko lembe
Man paru para nisagu paru mwu.
10 Kum tap calu ma koth man pei cwii niai kud i polo
Man gidok ungo kuca ka fodi gitobo ngo ng’om, giketho ecego piny man etwii,
Man tek fodi gimiyo ngo kodhi ni jacoy kodhi man cam* ni jacame,
11 Wec m’uwok kud i dhoga de bibedo kumeno.
Ebidwogo ngo i bang’a ka fodi etimo ngo lembe moko,
Ento ebitimo andhandha lembe ceke ma iya yenyo,
Man ebiwotimo andha lembe m’aore ecidh etim.
12 Kum wubiwok ku mutoro,
Man jubidwogowu i kwiyocwiny.
Anyong’a binego gudi kud ungulu gudi* i weng’wu man gibigoyo muzira,
Man yen mi lum ceke bipadu cing’gi.
Man eno biketho nying’ Yehova biyik,
Giranyutha ma rondo ku rondo ma bithum ungo nyanok de.”