Zaburi
Pa Daudi.
35 E Yehova, cer bang’a i kesi i dhu judhoga;
Kied i dhu ju ma gibekiedo i dhoga.
2 Ting’ ban peri ma nok* ku ma dit,
Man ai icer bang’a.
3 Ting’ tong’ peri ku ley peri mi lwiny* malu i kum ju m’uriemo toka.
Wac ira* kumae: “An a both peri.”
4 Wek lewic unyay iwi ju ma gibedwaru kwo* para, man gidok pang’ pang’.
Dong’ ju ma gibecamu gamba pi ninyotha giloki ku lewic.
5 Dong’ gidok calu cung piny i wang’ yamu;
Dong’ malaika pa Yehova uriemgi cen.
6 Dong’ yo migi ubed col man udok foth
Kinde ma malaika pa Yehova uberiemo tokgi.
7 Kum giciko ira voi ka m’upondo kara umaka mi mananu;
Gitong’o ira vur ma thelembene de mbe.
8 Wek nyoth utund i wigi rek;
Wek voi ma giciko umak gin;
Wek gipodh i iye man ginyothiri.
9 Ento mutoro binega* nikum Yehova;
Abibedo kud anyong’a nikum tic pare mi both.
10 Cogona ceke biwacu kumae:
“E Yehova, ng’a ma calu ini?
Ilaru ng’atu ma jakony pare mbe kud i cing’ ju ma tek,
Ng’atu ma jakony pare mbe ku jacan kud i cing’ ju m’ubeyakugi.”
11 Jumulembe ma reco gibino,
Man gibepenja ku lembe m’ang’eyo pire ngo.
12 Giculo ira wang’ bero ku racu,
Uketho can umondo i iya* lee dit.
13 Ento kinde ma gibetwoyo, aronyara ku kendi mi saki;
Anyayu can i iya gira* ku kwirocam,
Man kinde ma rwo para udwogo ma kawang’e mbe,*
14 Awotho kun ku kun ve an’i lemcan pa jarimona kunoke p’umira;
Akulo wiya ku can calu ng’atu m’ubewagu min.
15 Ento kinde m’akier, mutoro unegogi man gicokiri karacelo;
Gikanu libo karacelo pi ninega;
Giyeco iya nziki nziki man giling’ ungo.
16 Dhanu ma giworo ngo Mungu ging’iera ku cac*
Man gikayu lakgi i kuma.
17 E Yehova, ibineno lembe anena nitundo awene?
18 E abidwoko iri foyofoc i cokiri ma dit;
Abipeki i kind piro mi dhanu.
19 Kud iwek ju ma gi judegina ma thelembene mbe gifoyiri pi can para;
Kud iwek ju m’udaga mananu gidii wang’gi i ayi ma rac.
20 Kum giyero ngo wec mi kwiyocwiny,
Ento gipangu lemndra i kum dhanu ma giweg kwiyocwiny mi ng’om.
21 Giyabu dhoggi ma lac pi nidota,
Ma nwang’u gibeyero ko kumae: “Aha! Aha! wang’wa udaru neno lembe m’itimo.”
22 Idaru neno gin maeni, E Yehova. Kud ibed ling’.
E Yehova, kud ibed bor kuda.
23 Cew man ai malu pi nicero bang’a,
Yehova Mungu para, cer bang’a i kesi para.
24 Pok lembe para nimakere ku bedopwe peri, E Yehova Mungu para;
Kud iwek gifoyiri pi can para.
25 Timba kud giyer i kindgi kumae: “Aha! wadaru nwang’u gin ma wabemito.”
Timba di kud giwac kumae: “Wadaru mwonye cen.”
26 Wek gin ceke ginwang’ lewic man acidi,
Gi ju ma gibefoyiri pi can para.
Wek ju m’ubedodiri i wiya gironyiri ku lewic man gidok pang’ pang’.
27 Ento wek ju ma mutoro negogi pi bedopwe para gikok kud anyong’a;
Dong’ giyer thiri thiri kumae:
“Wek Yehova unwang’ yung, en ma mutoro nege pi kwiyocwiny pa jatic pare.”
28 E leba bikoro pi* bedopwe peri
Man bipeki dieceng’ duu.