Zaburi
Ni jatel wi wer; pa Yeduthun.* Wer pa Daudi.
39 Awacu kumae: “Abigwoko yo para
Kara kud adub ku leba.
Abitwiyo dhoga kud utwindi
Tekene fodi ng’atu ma rac n’i vuta ci.”
3 Adundena ubino wang’* yor i iya.
Kinde m’abenyamu i lembe,* mac umedere niliel.
E leba uweco kumae:
4 “E Yehova, konya ang’ey kite ma ajiki para bibedo ko,
Man wend nindo para,
Kara ang’ey kite ma kwo para tie ko adundo.*
5 Kum idwoko nindo mi kwo para nok;
Man nindo mi camu ng’om para en e calu gin moko ngo* i weng’i.
Andhandha ng’atu moko ci kadok nwang’u enen nia etie museme, etie kende kende lietho. (Sela)
6 Eyo, ng’atuman ubewotho rr calu tipopiny.
Eberingo kun ku kun* mi mananu.
Ebecoko lonyo, ento eng’eyo ngo nia ebidong’ ni ng’a.
7 E Yehova, eni ke dong’ aromo geno ang’o?
In kendi m’itie genogen para.
8 Bodha kud i dubo para ceke.
Kud iwek jakasegu uketh adok ni jamcac.
9 Abedo ling’;
Acopo yabu dhoga ngo,
Pilembe in re m’itimo gin maeni.
10 Kab masendi peri kud i kuma.
Tego para uthum pilembe cingi ugoya.
11 Itwinyo ng’atini ku matira m’imiyo ire pi kosa pare,
Inyotho piny ma pigi tek lee i iye tap calu ma rudho nyotho ko.
Andhandha, dhanu tie ndhu lietho kende. (Sela)
12 Winj rwo para, E Yehova,
Winj wak para m’akwayu ko kony.
Kud ibed ling’ kinde ma piwang’a ubecwir.
Kum iri atie kende kende umondo, a jarawoth m’ubekadhu akadha calu kwaru para ceke.
13 Kud inena ku kwinyo kara anyong’a unega kendo,
Ma fodi atho ngo man abedo mbe.”