Tic mi Jukwenda
17 E gilund gikadhu kud i Amfipoli man Apolonia, gitundo i Thesaloniki kaka ma sinagog mi Juyahudi ubino i iye. 2 Pieno, calu m’ebedo kura pa Paulo, egam emondo i bang’gi man pi sabatu adek, eluro i lembe karacelo kugi niai kud i Lembagora; 3 ekoro man enyutho ku lembagora nia pire ubino tek nia Kristu usendere man ecer kud i kind ju m’utho, ewacu kumae: “Yesu maeni m’aberweyo pire iwu, en re m’etie Kristu.” 4 Eno uketho dhanu moko m’i kindgi gidoko juyic man gidikiri karacelo ku Paulo giku Sila; udul ma lee mi Jugiriki ma gitimo ni Mungu de gitimo kumeno, karacelo ku jumamon dupa ma pigi yik.
5 Ento kumira umondo i Juyahudi, e gicoko dhu dhanu moko ma reco ma gibino timo wayawaya i soko, man gicokiri ni ungu gicaku nyayu yakini i adhura. Gigam gitieko ot pa Yason ma gibeyenyo Paulo giku Sila kara giwodhgi woko ni udul dhanu. 6 Kinde ma ginwang’ugi ngo, giwayu Yason kud umego moko, giterogi i bang’ jubim mir adhura ma gibekok kumae: “Dhanu maeni ma ginyayu yakini kakare zoo gini kakeni bende, 7 man Yason uwok ujologi ni welo pare. Dhanu maeni ceke gibetimo tung’ ku cik pa Kaisari, ma gibewacu ko nia ubimo mange nuti ma en e Yesu.” 8 Kinde m’udul dhanu ku jubim mir adhura giwinjo lembe maeno, cwinygi ung’abere; 9 e jubim mir adhura giketho Yason karacelo ku juwagi giculo cul man giweko gicidho.
10 Umego gigam gioro Paulo giku Sila pio pio kud uthieno nica i Beroya. Saa ma gitundo kuca, giwok gimondo i sinagog mi Juyahudi. 11 Juyahudi mir adhura maeno gibino ku pidoic ma ber nisagu ju mi Thesaloniki, pilembe gijolo lembe pa Mungu kud ava ma lee; gibed ging’iyo i Lembagora cuu kubang’ ceng’ pi nineno ka nyo gin maeno utie kumeno. 12 Pieno, ju ma dupa m’i kindgi udoko juyic, man i kind Jugiriki bende jumamon dupa mir awora ku jumaco moko de. 13 Ento kinde ma Juyahudi mi Thesaloniki giwinjo nia Paulo uberweyo lembe pa Mungu i Beroya de, gigam gicidho kuca pi nicwalu udul dhanu unyay yakini. 14 E ndhundhu umego giketho Paulo ucidho yor i dhu nam, re Sila giku Timoteo gidong’ keca. 15 Ento ju ma gilwoko tok Paulo gitere nitundo i Athene; i ng’ei ma Paulo ucikogi nia giyer ni Sila giku Timoteo gibin i bang’e pio pio, gigam giloko.
16 Saa ma Paulo ubino kurogi i Athene, ng’eicwiny umake* kinde m’eneno nia adhurane upong’ kud ayi gin m’acwiya. 17 Ecaku luro i lembe ku Juyahudi i sinagog man bende ku dhanu mange ma gitimo ni Mungu, man i soko de kubang’ ceng’, karacelo ku dhanu ma gibed ginwang’iri kakeca. 18 Ento jururieko moko ma gi Juepikurio man Justoiki gicaku nyayu piem kude, jumoko gibino wacu kumae: “Ng’atu maeni ma rieko pare nok man m’ubeweco akeca e ubemito yero ang’o?” Jumange ke giwacu kumae: “Ubenen nia ebetwong’o pi mungu ma gi welo.” Giyero lembe maeno kum ebino rweyo lembanyong’a iwi Yesu man iwi cer. 19 E giting’e gitere i Areopago man giwacu kumae: “Nyo icopo kekoro iwa nia ponji ma nyen maeni m’ibeponjo utie ang’o? 20 Kum ibeyero lembe m’ubewok nyen i ithwa, man wabemito wang’ey nia thelembe mi gin maeni utie ang’o.” 21 Kum Juathene ceke man welo ma bedo keca gibed gitiyo ku saa migi m’udong’ thwolo, ndhu pi niyero man niwinjo lembe moko ma nyen. 22 E Paulo ucungo i die Areopago man ewacu kumae:
“Dhanu mir Athene, abeneno nia i gin ceke, wumiyuru lee nilworo mungu ma tung’ tung’* nisagu jumange. 23 Ku lapor, kinde m’abekadhu man abelubo kilili mandha piny ma tung’ tung’ ma wurwo i wang’e,* anwang’u kadok pemlam ma jukiewo i kume nia, ‘ni Mungu ma jung’eyo ngo.’ Pieno, gin ma wuberwo i wang’e* ma wung’eyo ngo re m’utie gin m’abetwong’o pire iwu. 24 Mungu m’ucwiyo ng’om ku piny ceke ma n’i iye, en m’e Rwoth mi polo ku ng’om, ebedo ngo i hekalu ma jugiero ku cing’; 25 kadi cing’ dhanu de copo timo ire ngo calu ve nia etie ku yeny mi piny moko, kum en re m’emiyo kwo man yuyo ku piny ceke ni dhanu zoo. 26 Man niai i kum ng’atu acel, etimo thek ceke mi dhanu kara gibed i wang’ ng’om zoo; eng’olo bende saa ma tap man eketho kieu ma dhanu gibed i iye, 27 kara giyeny Mungu, tek giyenye ku kero gicopo nwang’e, pilembe andha de eni bor ungo ku ng’atuman m’i kindwa. 28 Kum wakwo man wawotho, wabedo nuti de ni kume, calu ma jugor mwu moko de giwacu kumae: ‘Kum wan bende wan awiya pare.’*
29 “Pieno, calu ma wan awiya* pa Mungu, wacikara ngo niparu nia Mungu tie calu mola ma kwar, kadi mola ma tar, kadi kidi, kadi calu piny ma jung’iko ku bodho man ku paru pa dhanu. 30 Andha pi nindo moko, dhanu gibed gitimo lembe maeno ma gimbe ku ng’eyo, re Mungu ukwanu ngo ku lembene; ento kawoni ebetwong’o ni dhanu zoo ma gin’i kakare ceke nia gicikiri niloko cwinygi. 31 Kum edaru ketho nindo m’ebipoko i iye lembe mi ng’om ku bedopwe nikadhu kud i bang’ ng’atu m’eng’iyo; eketho ng’atu maeni ucer man enyutho ni dhanu ceke nia nindo maeno bitundo andha.”
32 E kinde ma giwinjo pi cer mi ju m’utho, jumoko gicaku cayu lembene, jumange ke giwacu kumae: “Wabikewinji kendo ma cen iwi lembe maeni.” 33 Pieno Paulo ugam uwekogi, 34 ento jumoko udikiri karacelo kude man gidoko juyic. I kindgi ubino Dionisio ma tie japoklembe i otpido mir Areopago, man dhaku moko ma nyinge Damari ku jumange bende.