Zaburi
Ni jatel wi wer. Pa Daudi ma jatic pa Yehova.
36 Dubo ubeweco i adunde jatimrac,
Lworo pa Mungu umbe nyanok de i the wang’e.
2 Kum enenere gire nia pire tie tek lee
Uketho eng’iyo ngo man edagu ngo kosa pare.
3 Wec mi dhoge timojo rac man en e mir abombi;
Enyutho ngo rieko pi timo gin ma ber.
4 Epangu kadok kud iwi kavuto pare nitimo lembe ma rac.
Enwang’ere i yo ma ber ungo;
Ecerere ngo i kum lembe ma rac.
5 E Yehova, mer peri ma lokere ngo utundo i polo,
Bedoleng’ peri utundo i afuru.
6 Bedopwe peri calu gudi ma dongo;*
Lembapoka peri calu pii ma lac man ma thuc.
Igwoko* dhanu ku yedi, E Yehova.
7 E Mungu, mer peri ma lokere ngo pire tek mire maa!
Wot dhanu gipondo
I the tipo vombi.
8 Gimadhu miyo m’upong’ i ot peri nitundo ma giyeng’,
Iketho gimadh kulo mi mutoro peri.
9 Kulo mi kwo n’i beng’i;
Nikum der peri waneno der.
10 Mediri ninyutho mer peri ma lokere ngo ni ju m’ung’eyi,
Man bedopwe peri ni ju m’adundegi atira.
11 Kud iwek tiend jakuhaya unyona
Kunoke cing’ jatimrac uriema.
12 Kuca jutimrac gipodho;
Juredhogi piny man gicopo ai ungo malu.