Lembrieko
19 E ber nibedo jacan man niwotho i bedo cuu
Kakare nibedo jakasegu man nicwayu ndra.
3 Kasegu pa ng’atini re ma nyotho yo pare,
Man ng’eicwiny maku adundene i kum Yehova.
4 Lonyo telo jurimo dupa,
Ento jacan kadok jarimbe de biweke.
5 Jamulembe mi ndra bikoso ngo ninwang’u matira,
Man ng’atu ma cwayu vupo ve eyuyo ayuya biboth ungo.
6 Ju dupa giyenyo bero pa won yung,*
Man dhanu ceke gitie jarimb ng’atu ma miyo giramiya.
7 Umego pa jacan ceke gidage;
Ka dong’ jurimbe ke ure rukani!
Elubo tokgi m’ebekwayugi, ento ng’atu moko mbe ma dieng’ kude.
8 Ng’atu m’unwang’u rieko* nwang’u emarere gire.*
Ng’atu ma neno ng’iyo i lembe ni gin ma pire tek lembe bibedo ire miero.*
9 Jamulembe mi ndra bikoso ngo ninwang’u matira,
Man ng’atu ma cwayu vupo ve eyuyo ayuya bitho.
10 Eromo ngo nia jakasegu ukwo kwo ma yot;
Eromo ngo magwei lundo nia jatic ubim wi judongo ma wijo!
11 Andhandha rieko pa ng’atini kwiyo wi kwinyo pare,
Man en e lembe mi yung ire nia ekadh kud iwi kosa.*
12 Kwinyo p’ubimo tie calu rundo p’umvor,*
Ento bero pare tie calu thoi iwi uboko.
13 Wod ma jakasegu kelo peko iwi won,
Man dhaku ma jatiti* tie calu ot ma cwir m’umbe nijik.
14 Julagu ot ku lonyo niai kud i bang’ wego,
Ento dhaku ma riek ai i bang’ Yehova.
15 Nyap kelo nindo ma pek,
Man ng’atu* ma janyap kec binege.
16 Ng’atu ma woro lembang’ola gwoko kwo* pare;
Ng’atu ma dieng’ ungo i kum yo pare bitho.
17 Ng’atu m’ubenyutho bero ni ng’atu ma ka kite mbe cung’o banja i Yehova,
Man ebiculo ire* kawang’e pi gin m’ebetimo.
18 Twiny wodi kinde ma fodi genogen unuti,
Man kud iyeny nia etho athoa.*
19 Ng’atu ma kwiny binwang’ere ku lembe;
Tek imito nicere, bikwayu icere kendo kendo.
20 Winj juk man jol twiny
Kara idok riek i anyim peri.
21 Pangulembe mir adunde dhanu tie dupa,
Ento juk* pa Yehova re ma biloyo.
22 Gin ma jumaru akeca i bang’ ng’atini tie mer pare ma lokere ngo;
Man e ber nibedo jacan kakare nibedo jandra.
23 Lworo Yehova terojo i kwo;
Ng’atu m’utie ku lworone biyom ma cwinye kwiyo, m’umbe peko.
24 Janyap royo cinge i tabu mi foc,
Ento etimo de ngo kero moko pi nidwoko cingene i dhoge.
25 Goy jacac kara ng’atu m’ung’eyo lembe akeca ngo uponj nibedo ku riekowang’,
Man juk ng’atu ma tie ku nyang’ i lembe kara emed ng’eyong’ec pare.
26 Ng’atu ma sendo won man ma riemo min
En e wod ma nyayu lewic man acidi.
27 Woda, tek iweko niwinjo twiny,
Ibikier kud i kum wec mi ng’eyong’ec.
28 Jamulembe ma kony pare mbe cayu pokolembe m’atira,
Man dhu jutimrac mwonyo lembe ma rac.
29 Pokolembe ubedo agwoka ni jucac,
Man goco utie pi die ng’ey jukusegu.