Lembrieko
26 Calu pei i saa pa oro man koth i saa mi kayucam,
Kumeno bende yung uromo ngo ku jakasegu.
2 Tap calu ma winyo ringo mananu ngo man ugwelo tuk mananu ngo,
Kumeno bende, kwong’ tundo ngo ma thelembene m’anzilo mbe.*
3 Del utie pi riuni, gwang’ utie pi kana,
Man uluth utie pi die ng’ey jukusegu.
4 Kud idwok lembe ni jakasegu nimakere ku kasegu pare
Kara kud idok rom kude.
5 Dwok lembe ni jakasegu nimakere ku kasegu pare
Kara kud epar nia e riek.
6 Calu ng’atu m’ubethumo tiende gire man m’ubenyayu ret i kume gire,*
Ng’atu m’uweko lembe i cing’ jakasegu de tie kumeno.
7 Calu tiend won abala ma leke leke,*
Lembrieko ma ai i dhu jukusegu de tie kumeno.
8 Nimiyo dwong’ ni jakasegu
Tie ve nitwiyo kidi i lacur.
9 Calu yend ukudho i cing’ jamero,
Lembrieko ma ai i dhu jukusegu de tie kumeno.
10 Calu jakil athero m’ubenyayu ret i kum dhanu swa,*
Ng’atu ma royo jakasegu i tic kunoke dhanu ma gibekadhu akadha de tie kumeno.
11 Calu gwok ma dok i bang’ ng’ok pare,
Jakasegu dok nitimo lemkasegu pare kendo kendo.
12 Nyo ineno ng’atu moko m’uparu nia e rieki?
Genogen utie lee ni jakasegu nisagu ire.
13 Janyap wacu kumae: “Nyathin umvor n’i gengi,
Umvor n’i lela ma lac!”
14 Calu dhugola ma wirere iwi tiende,
Janyap de lokere kumeno iwi kavuto pare.
15 Janyap royo cinge i tabu mi foc,
Ento eol lee dit m’ecopo dwoko ngo cingene i dhoge.
16 Janyap paru nia e riek
Nisagu dhanu abiro ma gidwoko lembe ku rieko.
17 Calu ng’atu m’umaku ith gwok,
Ng’atu m’ubekadhu akadha ma ng’eicwiny umake pi* dhaw ma pare ngo de tie kumeno.
18 Calu abelu ma kilo athero mi mac, athero man tho,*
19 Ng’atu ma wondo jadhugola pare man ewacu kumae: “Abino sembo sosi!” de tie kumeno.
20 Kaka ma yen umbe i iye, mac tho,
Man kaka ma jayernying’ umbe i iye, dhaw jik.
21 Calu makala ni cugimac man yen ni mac,
Wonali de mewo dhaw kumeno.
22 Wec pa jayernying’ gi calu cam ma mit;*
Giloro piny nitundo i ic.
23 Calu mola ma tar ma liw ma juwiro i kum adekle,
Wec mi mer m’uai kud i* adunde ma rac de tie kumeno.
24 Ng’atu m’udagu jumange umo wi adegine ku dend dhoge,
Ento yor i iye ekanu vupo.
25 Kadok nwang’u ebeweco ku bero de, kud igene,
Kum lembe ma judagu abiro n’i adundene.*
26 Kadok nwang’u vupo uumo wi adegi pare de,
Re racu pare biwok kamaleng’ i cokiri.
27 Ng’atu m’ubetong’o vur bipodho i iye,
Man ng’atu m’ung’ielo kidi, kidine bidwogo i wiye.
28 Leb ma cwayu ndra udagu ju m’etimogi rac,
Man dhok ma wondo wang’ kelo nyoth.