Isaya
52 Cew! Cew! Rony tego, Ee Sayuni!
Rony kendi peri ma beco, Ee Yeruzalem, adhura ma leng’!
Kum ng’atu ma jutimo ngo yaa i kume man m’ucido bimondo ngo kendo i ii.
2 Teng’ utur, ai malu man bedi, Ee Yeruzalem.
Gony nyoro m’i ng’uti, Ee Nyasayuni ma jumaku ni ng’eca.
3 Kum Yehova uwacu kumae:
“Julwori mi mananu,
Man jubiweri de m’umbe sente.”
4 Kum Rwoth Ubimo ma Malu Ngbir Yehova uwacu kumae:
“Ku kwong’a dhanu para uloro piny i Misiri pi nikwo kuca calu umondo;
I ng’eye, Asiria usendogi mananu.”
5 “Dong’ atim ang’o keni?” Yehova wacu.
“Kum jumaku dhanu para mananu.
Ju m’ubimo i wigi ubemediri nikogo kok mir aloci,” Yehova wacu,
“Man jubecayu nyinga thiri thiri, dieceng’ duu.
6 Pi thelembe maeno, dhanu para gibing’eyo nyinga;
Pi thelembe maeno, gibing’eyo nia an re m’a Ng’atu m’ubeweco i nindo maeca.
Nen, utie an!”
7 Tiend ng’atu m’ubetero lembanyong’a leng’ mire maa iwi gudi,
Ng’atu m’ubetwong’o kwiyocwiny,
Ng’atu m’ubetero lembanyong’a mi gin ma ber,
Ng’atu m’ubetwong’o both,
Ng’atu m’ubeyero ni Sayuni kumae: “Mungu peri udoko Ubimo!”
8 Winji! Jukur peri uting’o dwandgi.
Gikok kud anyong’a ma dwandgi ripo,
Kum kinde ma Yehova bidwogo Sayuni, gibineno lembene kamaleng’.*
9 Anyong’a negwu, man wukok ku mutoro ma dwendwu ripo, wun uvuru mi Yeruzalem,
Kum Yehova udaru juko cwiny dhanu pare; ewaru Yeruzalem.
10 Yehova unyutho bote ma leng’ ngbeng’ i wang’ thek ceke;
Tung’ ng’om ceke bineno tic mi both* pa Mungu mwa.
11 Wuai cen, wuai cen, wuwok ku keno, kud wumul piny moko ci m’ucido!
Wuwok kud i iye, wugwokuru giwu leng’,
Wu ju ma wuyeyo ajeni pa Yehova.
12 Kum wubitugo ngo woth ku dhu ndiri,
Kadi bikwayu de ngo nia wuring aringa,
Kum Yehova bitelo yo i weng’wu,
Man Mungu mir Israel bibedo jakur mwu yor i ng’eywu.
13 Nen! jatic para bitimo lembe ku rieko.
Jubiting’e malu lir lir,
Jubidode man jubiyunge lee mandha.
14 Tap calu ma dhanu dupa unene ku zungo,
Kum wang’e unyamere nikadhu wang’ dhanu ceke,
Man ayi kume mi yung de unyamere nisagu mi dhanu zoo.
15 I ayi maeno, ebiketho kum thek dupa bipoy.
Jubim gibitwiyo dhoggi i wang’e,
Pilembe gibineno gin ma nwang’u fodi jukoro ngo igi
Man gibiciko ithgi i kum gin ma nwang’u fodi giwinjo ngo.