Lembrieko
10 Lembrieko pa Suleman.
Wod ma riek nyayu anyong’a i won,
Ento wod ma jakasegu en e can ni min.
2 Lonyo ma junwang’u i ayi m’atira ngo bibedo mbe ku kony,
Ento bedopwe bodhojo kud i tho.
3 Yehova biweko ngo won bedopwe* ucidh ma kec ubenege,
Ento ebicero jutimrac ku gin m’avane unegogi.
4 Cing’ ma janyap nyayu can,
Ento cing’ ma timo tic kud amora kelo lonyo.
5 Wod ma timo ku rieko coko cam i nindo mi cir,
Ento wod ma nindo akeca i saa mi kayucam nyayu lewic i wiye gire.
6 Mugisa n’i wi won bedopwe,
Ento dhu ng’atu ma rac kanu rop.
7 Jubipoy i kum won bedopwe man jubipoko mugisa i wiye,
Ento nying’ ng’atu ma rac bitop.
8 Ng’atu m’adundene riek bijolo telowic,*
Ento jubinyono ng’atu m’uweco lemkasegu.
9 Ng’atu m’atira biwotho museme,
Ento ng’atu m’uketho yo pare ugondre jubituco wiye.
10 Ng’atu ma yedo wang’e ku vupo nyayu can,
Man jubinyono ng’atu m’uweco lemkasegu.
11 Dhu won bedopwe en e kulo mi kwo,
Ento dhu ng’atu ma rac kanu rop.
12 Adegi en e gin ma nyayu dhaw,
Ento mer umo wi kier ceke.
13 Rieko nwang’ere i dend dhu ng’atu ma ng’iyo i lembe,
Ento uluth utie pi die ng’ey ng’atu m’ukoso rieko.*
14 Ju ma riek gigwoko ng’eyong’ec cuu,
Ento dhu jakasegu lwong’o nyoth.
15 Lonyo* pa jalonyo tie adhura ma tek pare.
Can mi jucan kelo nyoth i wigi.
16 Tic pa won bedopwe terojo i kwo;
Ento adwogi mi tic pa jatimrac terojo i dubo.
17 Ng’atu ma ketho wiye i kum twiny en e yo ma terojo i kwo,*
Ento ng’atu ma cayu juk rwinyo jumange.
18 Ng’atu ma umo wi adegi pare nwang’u ecwayu vupo,
Man ng’atu ma moyo rwonglembe* ma rac en e jakasegu.
19 Tek jubeweco akeca, kier romo urere ngo,
Ento ng’atu m’ubeluro i wec* pare nwang’u e riek.
20 Leb won bedopwe tie calu mola ma tar ma leng’,
Ento adunde ng’atu ma rac konyne nok.
21 Dend dhu won bedopwe tungo* dhanu dupa,
Ento jukusegu githo nikum koso rieko.
22 Mugisa pa Yehova re ma lonyo ng’atini,
Man emedo litho* moko ngo i kume.
23 Nimondo i timo mi lewic tie calu tuko ni jakasegu,
Ento rieko tie pi ng’atu ma ng’iyo i lembe.
24 Gin ma ng’atu ma rac ubelworo re ma bibino i wiye;
Ento jubimiyo ni won bedopwe gin ma iye ubeyenyo.
25 Kinde m’avuvu* ukadhu, ng’atu ma rac bibedo mbe,
Ento won bedopwe tie kathere ma bibedo mi nja.
26 Calu giramadha ma wac ni lak man yiro ni wang’,
Janyap de tie kumeno ni ng’atu m’ubeore.*
27 Lworo Yehova medo nindo mi kwo,
Ento jubijwigo oro mi jutimrac.
28 Gin ma won bedopwe ubekuro* miyo anyong’a,
Ento genogen mi jutimrac birwinyo.
29 Yo pa Yehova tie kaka ma tek ni ng’atu ma lembe mbe i wiye,
Ento etie nyoth ni jutimrac.
30 Jubiketho ngo won bedopwe upodhi,
Ento jutimrac gibikwo ngo kendo iwi ng’om.
31 Dhu won bedopwe wodho* rieko,
Ento jubijigo leb ma yero lembe ma rac.
32 Dend dhu won bedopwe ung’eyo gin ma nyayu anyong’a,
Ento dhu ng’atu ma rac weco lembe ma rac.