Yeremia

32 Lembe pa Yehova ubino i bang’ Yeremia i oro mir apaje mi camuker p’Ubimo Zedekia mi Yuda, niwacu i oro mir apar abora mi camuker pa Nebukadnezar.* 2 Nwang’u i nindo maeca udul mony p’ubimo mi Babeli utieko Yeruzalem, man jutwiyo bang’ jabila Yeremia i Lela mi jukur i kal* p’ubimo mi Yuda. 3 Kum Ubimo Zedekia mi Yuda utwiyo bang’e, eyero kumae: “Pirang’o ibeewo lembe ma kumeni? Iyero nia, ‘Yehova uwacu kumae: “Abimiyo adhura maeni i cing’ ubimo mi Babeli man ebimake, 4 man Ubimo Zedekia mi Yuda biboth ungo kud i cing’ Jukaldayo, pilembe jubimiye andha i cing ubimo mi Babeli, ebiweco kude dhok ku dhok man ebinene wang’ ku wang’.”’ 5 ‘Ebitero Zedekia i Babeli man ebibedo kuca cil m’abiloko wang’a i kume,’ Yehova wacu. ‘Kadok nwang’u wubemeduru nikiedo i dhu Jukaldayo de, wubiloyogi ngo.’”

6 Yeremia uwacu kumae: “Lembe pa Yehova ubino i bang’a, uyero kumae: 7 ‘Nen, Hanamel ma wod Calum m’umin wuru bibino i beng’i man ebiyero kumae: “Ng’iew podho para mir Anathoth ca iri, pilembe itie ng’atu ma kwong’a m’utie ku twero mi ware.”’”

8 Hanamel ma wod umin vwa ugam ubino i bang’a tap calu ma Yehova uyero, i Lela mi jukur man ewacu ira kumae: “Akweyi, ng’iew podho para ma ni Anathoth i ng’om pa Benjamin, kum in re m’itie ku twero mi make man mi ware. Ng’iewe iri.” E agam anyang’ nia eno tie lembe ma Yehova uyero en.

9 Pieno ang’iewo podho ma ni Anathoth kud i bang’ Hanamel ma wod umin vwa. Apimo cekel* abiro man tongolo apar mi mola ma tar. 10 I ng’eye akiewo pi ng’iewne i waraga mi ng’iew, amwono dhoge, alwong’o jumulembe, man apimo sente i kilo. 11 E ating’o waraga mi ng’iew ma jumwono dhoge nimakere ku lembe ma cik ukwayu man lembang’ola, man bende ma nwang’u jumwono ngo dhoge, 12 man amiyo waraga mi ng’iewne i bang’ Baruk ma wod Neria ma wod Maaseya, i vut Hanamel ma wod umin vwa, jumulembe m’ukiewo cing’gi i the waragane, man Juyahudi ceke m’ubedo keca i Lela mi jukur.

13 I ng’eye ang’olo lembe ni Baruk i vutgi, ayero kumae: 14 “Yehova mir udul ma Mungu mir Israel uwacu kumae: ‘Ting’ waraga maeni, waraga mi ng’iew ma jumwono dhoge man ma kucelo ma ju mwono ngo dhoge, man roygi i agulu mir ulobo kara gibed agwoka pi kare m’ulwar.’ 15 Kum Yehova mir udul ma Mungu mir Israel uwacu kumae: ‘Jubing’iewo kendo udi ku podho, man podho mir ulok i ng’ombuni.’”

16 E agam arwo i bang’ Yehova i ng’ey m’amiyo waraga mi ng’iew i bang’ Baruk ma wod Neria, awacu kumae: 17 “Akaa, Ee Rwoth Ubimo ma Malu Ngbir Yehova! Nen! icwiyo polo ku ng’om ku tego peri ma dit man ku bot m’arieya. Piny moko mbe ma romo wang’u ii lee, 18 in m’i Ng’atu ma nyutho mer ma lokere ngo ni dhanu elufu, ma culo kier mi wego ni* wotgi yor i ng’eygi, i Mungu mandha, Ng’atu ma dwong’ man ma tek, ma nyinge Yehova mir udul. 19 Itie ku lembakeca ma dongo man itimo lembe ma dongo, in ma weng’i neno lembe ceke ma dhanu timo, pi nimiyo ni ng’atuman calku yo pare man calku lembe m’etimo. 20 Itimo giranyutha kud udu dupa i ng’om mi Misiri m’ung’eyere nitundo tin eni, e iketho nyingi yik i Israel man i kind dhanu ceke calu m’etie ko tin eni. 21 Man iwodho dhanu peri ma Israel kud i ng’om mi Misiri ku giranyutha, kud udu, ku cing’ ma tek, ku bot m’arieya man ku timo ma ng’oyo ndiri.

22 “I ng’ey kare, imiyo igi ng’om maeni m’igam ikwong’o nia ibimiyo ni kwarugi, ma en e ng’om ma molo cak ku miyokic. 23 Gimondo i ng’ombe man gimake, ento giworo ngo dwendi man giwotho ngo nimakere ku cik peri. Gitimo ngo lembe ceke m’ing’olo nia gitim, pieno iketho nyoth maeni ceke uwok i wigi. 24 Nen! dhanu bino man gitieko adhura maeni ku gang’ ma tek pi nimake, man nikum palamularu, ndru man thong’om,* adhura maeni bipodho andha i the cing’ Jukaldayo m’ubekiedo i dhoge; lembe ceke m’iyero utimere, calu ma in de ibeneno eni. 25 Ento in, Ee Rwoth Ubimo ma Malu Ngbir Yehova, iyero ira kumae: ‘Ng’iew iri podho ku sente man lwong’ jumulembe,’ kadok nwang’u andha jubimiyo adhura maeni i cing’ Jukaldayo de.”

26 E lembe pa Yehova ubino i bang’ Yeremia, uyero kumae: 27 “Anuti eni, an a Yehova Mungu mi dhanu ceke.* Nyo piny moko nuti de ma romo wang’u iya lee? 28 Pieno Yehova uwacu kumae: ‘Nen, abemiyo adhura maeni i cing’ Jukaldayo man i cing’ Ubimo Nebukadnezar* mi Babeli, man ebimake. 29 Man Jukaldayo m’ubekiedo i dhug adhura maeni gibimondo i iye, gibicwinyo mac i kume man gibiwang’e ku mac karacelo ku udi ma dhanu ubed uthiero lam ni Baal, man ubed ukonjo girathiera mi pigulok i wiye ni mungu mange pi ninyayu ng’eicwiny i iya.’

30 “‘Kum dhanu mir Israel man mi Yuda gibed gitimo kende kende lembe ma rac i wang’a niai i aradu migi; dhanu mir Israel gimediri ninyayu ng’eicwiny i iya ku tic mi cing’gi,’ Yehova wacu. 31 ‘Kum niai ma jugiero adhura maeni nitundo tin eni, ebed enyayu kende kende ng’eicwiny ku kwinyo i iya, pieno jucikiri nikabe cen kud i wang’a, 32 nikum racu ceke ma dhanu mir Israel ku mi Yuda gitimo pi ninyayu ng’eicwiny i iya, niwacu gin, jubim migi, judongo ma wijo migi, julam migi, jubila migi, dhanu mi Yuda man ma bedo i Yeruzalem. 33 Gimediri niloko ng’eygi ira, ento wang’gi ngo; kadok nwang’u aii pi niponjogi kendo kendo de,* ng’atu acel de mbe m’i kindgi m’uwinjo pi nijolo twiny. 34 Man giketho ayi gin m’acwiya ma judagu i ot ma nyinga lwong’ere i kume pi nicide. 35 M’umedo maeno, gigiero kaka ma malu pa Baal i Poga pa Wod Hinom,* pi niwang’u wotgi man nyiggi i mac* ni Molek, ma ke tie lembe m’ang’olo ngo man m’utundo ngo nyanok de i paru para pi nitimo lembe maeno ma judagu, m’uketho Yuda dubo.’

36 “Eni tie lembe ma Yehova ma Mungu mir Israel uwacu pir adhura maeni ma wuwacu nia jubimiyo i cing ubimo mi Babeli ku palamularu, ndru man thong’om: 37 ‘Nen, abicoko dhoggi karacelo niai kud i ng’om m’alalu igi i iye ku dhu ng’eicwiny para, kwinyo para, man kwinyo para ma lake tek; e abidwogogi i kabedo maeni man abiketho gibedo museme. 38 Gibibedo dhanu para man abibedo Mungu migi. 39 Abimiyo igi adunde acel man yo de acel kara gilwora saa ceke, pi bero migi man pi bero mi nyithindhgi yor i ng’eygi. 40 Man abitimo kugi lembariba ma rondo ku rondo, nia abijigo ngo nitimo igi bero; man abiketho lworona i adundegi, kara kud giloki man giweka. 41 Abilulara pigi pi nitimo igi bero, man abipidhogi ma tek i ng’ombuni kud adundena ceke man ku ng’eyong’ec* para zoo.’”

42 “Kum Yehova uwacu kumae: ‘Tap calu m’akelo nyoth ma dit maeni zoo iwi dhanu maeni, abikelo bende i wigi bero* ceke m’abeng’olo igi. 43 Jubidong’iewo podho kendo i ng’ombuni kadok nwang’u wubeyero nia, “etie ng’om m’udong’ ni uvuru ma dhanu kadi yedi de mbe i iye, man judaru miye i cing’ Jukaldayo.”’

44 “‘Jubing’iewo podho ku sente, jubikiewo waraga mi ng’iew man jubimwono dhoge, jubilwong’o jumulembe i ng’om pa Benjamin, i ng’om m’utieko Yeruzalem, i adhura mi Yuda, i adhura mi ng’om gudi, i adhura mi ng’om ma yor i poga, man i adhura ma yo piny, pilembe abidwogo dhanu migi ma jutero i ng’eca,’ Yehova wacu.”