Lembrieko
14 Dhaku ma riek andha giero ot pare,
Ento dhaku ma jakasegu rwombe ku cinge gire.
2 Ng’atu m’ubewotho i atira lworo Yehova,
Ento ng’atu ma yo pare ugondere* caye.
3 Uluth mi kuhaya n’i dhu jukusegu,
Ento dend dhu ju ma riek bigwokogi.
4 Kaka ma lim umbe i iye wer bedo ma leng’,
Ento tego pa thwon dhiang’ miyo mwoka lee.
5 Jamulembe mandha bicwayu ndra ngo,
Ento jamulembe mi ndra cwayu vupo ve eyuyo ayuya.
6 Jacac yenyo rieko re enwang’e ngo,
Ento ng’eyong’ec bino pio pio ni ng’atu ma tie ku nyang’ i lembe.
7 Bed bor ku ng’atu ma jakasegu,
Kum ibinwang’u ngo ng’eyong’ec i dend dhoge.
8 Nikum rieko ng’atu ma tie ku riekowang’ nyang’ i yo m’ecidho i iye,
Ento kasegu mi jukusegu wondogi.*
9 Jukusegu cayu kosa ma gitimo,
Ento ju m’atira gisayu niyiko lembe i kindgi.*
10 Adunde ng’eyo gin ma kec* ire gire,
Man ng’atu mange mbe ma copo dikere i anyong’a pare.
11 Jubirwombo ot mi jutimrac,
Ento hema mi ju ma gin atira bibedo miero.
12 Yo moko nuti ma nen nia en atira i wang’ ng’atini,
Ento i ajikine eterojo i tho.
13 Kadok i ng’iero de adunde copo nwang’ere ku litho,
Man anyong’a copo thum ku can.
14 Ng’atu ma kier i adundene bikayu adwogi mi yo pare,
Ento ng’atu ma ber kayu sukulia mi timo pare.
15 Ng’atu m’ung’eyo lembe akeca ngo yiyo lembe ceke,
Ento ng’atu ma tie ku riekowang’ ng’iyo i dagutielo pare ceke.
16 Ng’atu ma riek bedo ku wang’e man euro lembe ma rac,
Ento jakasegu dieng’ ungo* man egenere nisagu mukero.
17 Ng’atu ma ng’eicwiny make pio timo lembe ku kasegu,
Ento judagu ng’atu ma paru i lembe cuu.*
18 Ju ma ging’eyo lembe akeca ngo gibilagu kasegu,
Ento ju ma gitie ku riekowang’ gikendo ng’eyong’ec calu jamker mi wic.
19 Dhanu ma reco gibikulo korgi i wang’ dhanu ma beco,
Man jutimrac gibikulo korgi i dhugola mi weg bedopwe.
20 Ng’atu ma jacan judhugola pare de gidage,
Ento jurimb jalonyo gi dupa.
21 Ng’atu ma cayu jadhugola pare nwang’u ebetimo dubo,
Ento ng’atu ma kisa nege i kum ju ma ka kitgi mbe e jamutoro.
22 Nyo ju ma pangu lembe ma rac gibikier ungo?
Ento ju ma keco nitimo lembe ma ber gibinwang’u mer ma lokere ngo man bedoleng’.
23 Tic ceke ma tek kelo bero,
Ento weco aweca kende terojo i yeny.
24 Jamker mi wic mi ju ma riek en e lonyo migi;
Ento kasegu mi jukusegu utie kende kende kasegu.
25 Jamulembe mandha bodho kwo,*
Ento jamulembe mi ndra cwayu vupo ve eyuyo ayuya.
26 Ng’atu ma lworo Yehova gene i lembe ceke,
Man lworone bibedo ni kapondo ni awiya pare.
27 Lworo Yehova en e kulo mi kwo,
Ma uro ng’atini kud i uwic mi tho.
28 Udul dhanu en e dwong’ pa jabim,
Ento jabim ma lwak pare mbe podho.
29 Ng’atu ma yoo ni kwinyo nwang’u etie ku ng’iyo i lembe lee,
Ento ng’atu ma ciro lembe ngo nyutho kasegu pare kamaleng’.
30 Adunde m’ukwiyo miyo kwo* ni kum,
Ento kumira tie twoyo ma tobo cogo.
31 Ng’atu ma yaku ng’atu ma ka kite mbe nwang’u ebeyanyu Jacwic pare,
Ento ng’atu ma kisa nege i kum jacan yunge.
32 Racu pa jatimrac biredhe,
Ento won bedopwe binwang’u kapondo i bedocu pare.
33 Rieko yom yoo i adunde ng’atu ma nyang’ i lembe,
Ento emito pire ung’eyere i kind jukusegu.
34 Bedopwe dodo thek,
Ento dubo nyayu lewic iwi dhanu.
35 Anyong’a nego ubimo i kum jatic ma timo lembe ku rieko,
Ento kwinyo make i kum jatic ma timo lembe mi lewic.