Yob
17 “Tipona rungere, nindo para thum;
liel ubekura.
2 Jucac gitieka,
man ubekwayu wang’a unen* timo migi mi jai.
3 Akweyi, jol mukwatu* para, man gwoke i beng’i.
Ng’a mange ma bidiko cinge kuda man bicungo i kuma?
4 Kum ikanu ng’iyo i lembe cen ni adundegi;
eno re m’uketho ibedodogi ngo.
5 Eromo penjo jurimbe nia emii piny pare moko igi,
ma ke nwang’u kec ucido wang’ awiya pare.
6 Edwoka ni jamcac* i kind dhanu,
uketho adoko ng’atu m’umaku jung’iedh law i wang’e.
7 Can udwoko wang’a nyaviavia,
man wathkuma ceke tie mudho.
8 Lembene wang’u i dhanu m’atira lii,
man ng’eicwiny nego ng’atu ma lembe mbe i wiye i kum ng’atu ma woro ngo Mungu.*
9 Won bedopwe moko kii i kum tic pare,
man ng’atu ma cinge leng’ doko tek m’usagu.
10 Ento wun ceke wubin man wucak wec mwu kendo,
kum anwang’u ngo ng’atu ma riek acel de i kindwu.
11 Nindo para thum;
lembe m’apangu man yeny mir adundena de ginyothiri.
12 Gibejigo ngo niloko diewor udok dieceng’,
ma gibewacu kumae: ‘Der ucikere nibedo ceng’ini pilembe piny ucido.’
13 Tek akuro asu, Liel* re ma bidoko ni ot para;
abipedho kavuto para i mudho.
14 Abikok ni vur* kumae: ‘In i vwa!’
Ni ukoko ke kumae: ‘In i maa man nyamira!’
15 Dong’ genogen para ni kani?
Ng’a m’ubeparu nia genogen utie ira?