Isaya
27 I nindo maeca, ku palamularu pare ma kwiny, ma dit man ma tek,
Yehova bipoko lembe iwi Leviathan* ma thwol m’ubemol pio pio,
Iwi Leviathan ma thwol m’ubedhokere,
Man ebinego yedi ma dit ma n’i nam.
2 Wuwer ire* i nindo maeca:
“Podho mir ulok ma wodho pigulok ma ku voyone!
3 An a Yehova, abegwoke.
Saa ceke abekwoyo pii i wiye.
Abegwoke dieceng’ ku diewor,
Kara ng’atu moko kud utime rac.
4 Kwinyo mbe i iya.
Ng’a ma copo cungo i dhoga i lwiny ku yend ukudho m’udinyo man doy?
Abiwotho i wigi man abicwinyo mac i kumgi ceke karacelo.
5 Tek ungo ke, dong’ emok kii i kum ot para ma tek.
Wek etim kuda kwiyocwiny;
Kwiyocwiny re m’etim kuda.”
6 I nindo m’ubino, Yakobo biguro ulage,
Israel bithiwo man ebiloth,
Man gibipong’o ng’ombe ku nying’gi.
7 Nyo ubekwayu jugoye ku goco pa ng’atu m’ubegoye?
Kunoke nyo ukwayu junege calku nek mi jupare ma junego?
8 Ibinyego kude man ibirieme cen ku kok ma ng’oyo ndiri.
Ebirieme kud avuvu pare ma tek i nindo mi yamu ma yo nyangu.
9 I ayi maeno re ma jubiweko kosa pa Yakobo,
Man maeni bibedo adwogi ma zoo kinde ma dubo pare biwekere:
Ebirungo kidi ceke mi pemlam
Calu kidi mi nunu ma jurungo,
Man jubiweko ngo mbegi mi thier* kadi pemlam mir udok ma ng’wice ng’ar acel de.
10 Adhura ma tek bidong’ ni uvuru;
Jubiwenjo luba man jubiweke ebidong’ calu langa.
Nyathi dhiang’ bicamu man bivuto keca,
Man ebimvoro jange.
11 Kinde ma jang’gi bithwo,
Jumamon bibino turogi cen,
Man gibikudho kugi mac.
Kum dhanu maeni ginyang’ ungo i lembe.
Pi thelembe maeno re ma Jacwic migi bitimo ngo igi kisa,
Man Ng’atu m’ucwiyogi binyutho ngo igi bero.
12 I nindo maeca, Yehova bigoyo nying yen m’uai kud i Kulo* m’ubemol mi Ndaba* mi Misiri, man jubicokowu acel acel, Ee dhanu mir Israel. 13 I nindo maeca, jubikudho agwara ma dit, man ju ma nwang’u uberwinyo i ng’om mir Asiria ku ju m’ulal mba mba i ng’om mi Misiri gibibino man gibikulo korgi piny ni Yehova iwi got ma leng’ i Yeruzalem.