Isaya
62 Abibedo ngo ling’ pi Sayuni,
Man abibedo ngo dii pi Yeruzalem
Nitundo ma bedopwe pare birieny calu der m’ubecaru piny,
Man ma both pare biwang’ calu dhukumac m’ubeliel ma tek.
2 “Thek bineno bedopwe peri, Ee dhaku,
Man jubim ceke bineno dwong’ peri.
Man jubilwong’i ku nying’ ma nyen,
Ma dhu Yehova re ma bicaku.
3 Ibidoko ni jamker mi wic mi leng’o i cing’ Yehova,
Jamboyo wic ma segi p’ubimo i die cing’ Mungu peri.
4 Jubilwong’i ngo kendo nia dhaku ma julandu,
Man ng’om peri de jubilwong’o ngo kendo nia uvuru.
Ento jubilwong’i nia Anyong’a para n’i iye,
Man jubilwong’o ng’om peri nia Dhaku ma junyomo.
Kum anyong’a binego Yehova i kumi,
Man ng’om peri bibedo calu dhaku ma junyomo.
5 Kum tap calu ma jalawobi nyomo nyaku ma sumba,
Woti bende binyomi.
Calu m’anyong’a nego cwar mugole pi nyamugole,*
Anyong’a binego Mungu peri de piri.
6 Aketho jukur iwi gang’kidi peri, Ee Yeruzalem.
Saa ceke kud gibed ling’, dieceng’ duu man diewor traka.
Wun ma wulwong’o nying’ Yehova,
Kud wuyom,
7 Man kud wumii ire yom nyanok de, nitundo m’eketh Yeruzalem ucung ma tek,
Eyo, nitundo m’edwoke ni jampak mi ng’om.”
8 Yehova udaru kwong’o kwong’ ku cinge ma yor acwic, ku bote ma tek kumae:
“Abimiyo ngo kendo nying cam peri ni judegi peri ucam,
Kadi umondo de bimadhu ngo kendo pigulok peri ma nyen m’itimo tic ma tek pire.
9 Ento ju m’ukayu camne bicame man gibipaku Yehova;
Man ju m’ucoko ulok gibimadhe i lela para ma leng’.”
10 Wukadhi, wukadh kud i dhugang’.
Wuyab yo pi dhanu.
Wuyiki, wuyik gengi ma dit.
Wukab kidi kud i iye.
Wuting’ ayi* malu pi dhanu.
11 Nen! Yehova utwong’o nitundo i tung’ ng’om kumae:
“Wuyer ni Nyasayuni kumae:
‘Nen! both peri ubebino.
Nen! sukulia pare ni kude,
Man cul m’ebeculo n’i wang’e.’”
12 Jubilwong’ogi nia dhanu ma leng’, ju ma Yehova uwaru,
Man jubilwong’i nia Ma juyenyo, Adhura ma juwenjo ngo.