Yeremia
2 Lembe pa Yehova ubino i bang’a, uyero kumae: 2 “Cidhi man itwong’ i ith Yeruzalem nia, ‘Yehova uyero kumae:
“Apoy i kum wodhiri peri kinde m’ibino aradu,
Pi mer m’imara ko saa m’apenjo dwendi pi gamiri,
Kite m’ilubo ko toka i langa,
I ng’om ma jucoyo ngo kodhi i iye.
3 Israel ubino leng’ ni Yehova, landu wi mwoka mi cam pare.”’
‘Kier ubedo iwi dhanu ceke m’umvore.
Masendi podho i wigi,’ Yehova wacu.”
4 Wuwinj wec pa Yehova, Ee ot pa Yakobo,
Man wu juruot ceke mi ot pa Israel.
5 Yehova uwacu kumae:
“Kosa ma kani ma kwaruwu ginwang’u i bang’a,
M’uketho gikier bor mandha kuda
Man gilubo tok ayi gin m’acwiya ma tijgi mbe, uketho gin de gidoko ni piny ma tijgi mbe?
6 Gipenjo ngo kumae: ‘Yehova ni kani,
En m’e ng’atu m’uwodhowa kud i ng’om mi Misiri,
M’utelo wiwa kud i die langa,
Kud i die ng’om ngele man longoro,
Kud i die ng’om m’uthwo kaw man mi mudho ma bii,
Kud i die ng’om ma ng’atu moko mbe ma wotho i iye
Man ma ng’atu moko mbe ma bedo i iye?’
7 I ng’eye, akelowu i ng’om ma yen ma cego nyinge n’i iye,
Pi nicamu nying’gi man piny ma beco m’i iye.
Ento wumondo i iye man wucido ng’om para,
Uketho giralaga para udoko ni piny ma judagu.
8 Julam upenjo ngo kumae: ‘Yehova ni kani?’
Juponji mi Cik ung’eya ngo,
Jukwac ujai ira,
Jubila uewo lembila ku nying’ Baal,
Man gilubo tok ju ma romo miyo ngo kony moko nyanok de.
9 ‘Pieno abinyego kendo kudwu,’ Yehova wacu,
‘Man abinyego ku nyithindho mi nyithindho mwu.’
10 ‘Ento wukadh loka i dhu wat* mi Kithim man wunen.
Eyo, wuor ng’atu moko i Kedar kara enen cuu;
Wunen ka nyo lembe moko ma kumeno udaru timere de.
11 Nyo thek moko udaru wilo de mungu pare ku gin ma mungu ngo?
Ento dhanu para udaru wilo dwong’ para ku gin ma tije mbe.
12 Wunen lembuni ku zungo, wu polo;
Ndiri ma lee uketh kumwu miel krr,’ Yehova wacu,
13 ‘Kum dhanu para gitimo lembe ma reco ario ma e:
Giweka, an m’a kulo mi pii mi kwo,
Man gitong’o* igi pii m’atong’a,
Pii m’atong’a m’ung’eny ma copo gwoko ngo pii.’
14 ‘Nyo Israel utie jatic kunoke ng’eca ma junyolo i ot pa rwoth pare?
Kadong’ ke pirang’o jumiye kara juyake?
15 Nyithindh umvor* uberundo i kume;
Giting’o dwandgi.
Giketho ng’om pare udoko ni gin ma ng’oyo ndiri.
Gidhuro mac i kum adhura pare, uketho ng’atu moko mbe ma bedo i iye.
16 Dhanu mi Nof* man mi Tapanes ubecamu tatu wii.
17 Nyo in ungo m’ikelo lembuno i wii giri
Nikum Yehova Mungu peri m’iweko
Kinde m’ebetelo wii i yo?
18 Dong’ pirang’o ibemito yo mi Misiri
Pi nimadhu pii mi Cihor?*
Pirang’o ibemito yo mir Asiria
Pi nimadhu pii mi Kulo?*
19 Timo peri ma reco ucikere nitwinyi,
Man dubo peri ucikere nijuki.
Ng’ey man inyang’ nia etie lembe ma rac dit man ma kec
Niweko Yehova Mungu peri;
Ilwora ngo,’ Rwoth Ubimo ma Malu Ngbir Yehova mir udul uwacu.
20 ‘Kum arungo mberembere peri yang’ con
Man acodo nyoro peri.
Ento iyero kumae: “Abitimo ngo iri,”
Kum ibed ivuto m’irieyiri pi nitimo asara iwi ungulu gudi* ceke m’uting’ere,
Man i the yen ceke m’ujany.
21 Apidhi calu yend ulok m’ang’iya ma kwar ma gin ceke gi kodhi ma leng’;
Dong’ ke ilund idoko ni jange m’unyothere man ma welo i wang’a nenedi?’
22 ‘Kadok nwang’u ijom ku kadawasi man itiyo ku savuni lee de,
Re asu dubo peri bibedo nuti i wang’a,’ Rwoth Ubimo ma Malu Ngbir Yehova wacu.
23 Iromo yero nenedi kumae: ‘Acidara ngo.
Alubo ngo tok Baal’?
Kenen yo peri i poga.
Kepar pi lembe m’itimo.
Itie calu nyathi min ngamia ma ringo ma tek,
Ma ringo swa i yo pare m’umbe ning’eyo kaka m’ecidho i iye,
24 Calu kana mi lum m’ung’iyo ku langa,
M’ubeng’wiyo yamu kinde m’ava uopo i kume.
Ng’a ma copo cere saa m’ebeporo?
Ng’atu acel de mbe m’i kind ju m’usaye ma biol.
Gibinwang’e i nindo pare.*
25 Gwok tiendi kud uwoth ma wara mbe
Man gwok dwendi ni rieu.
Ento iyero kumae: ‘Kud isendiri mananu!
Amaru para juwirok*
Man abilubo para tokgi.’
26 Calu ma lewic maku jakwo kinde ma jurube,
E ot pa Israel de lewic umaku,
Gin, jubim migi, judongo ma wijo migi,
Julam migi man jubila migi.
27 Giyero ni yen kumae: ‘Itie vwa,’
Man ni kidi kumae: ‘In re m’inyola.’
Ento giloko ng’eygi ira, wang’gi ngo.
Man i saa mi masendi migi gibiyero kumae:
‘Ai malu man ibodhwa!’
28 Dong’ mungu peri m’iyiko irine gini kani?
Wek giai malu tek gicopo bodhi i saa mi masendi peri,
Kum wend mungu peri unyay calu wend adhura peri, Ee Yuda.
29 ‘Pirang’o wubemeduru ninyego kuda?
Pirang’o wun ceke wujai ira?’ Yehova wacu.
30 Agoyo wotwu kpe.
Gijolo ngo twiny;
Palamularu mwu giwu umvoro jubila mwu,
Calu umvor ma kayi maku.
31 Ee dhanu m’utuk, wupar pi wec pa Yehova.
Nyo adoko calu langa ni Israel
Kadi ng’om mi mudho ma sendojo?
Pirang’o dhanu para e ubewacu kumae: ‘Wabewotho mwa giwa riko.
Wabibino ngo kendo i beng’i nyanok de’?
Ento dhanu para ma buu wigi wil kuda pi nindo ma kwanere ngo.
33 Ee dhaku, iyiko yo peri ku bodho andha pi niyenyo mer!
Iponjiri giri i yo mi lembe ma reco.
34 Kadok dhu tiend robe peri de ucido ku rimb jucan ma lembe mbe i wigi,
Kadok anwang’ugi ngo ma gibeturo dhu ot peri de;
Rimbgi n’i kum dhu tiend robe peri zoo.
35 Ento ibeyero kumae: ‘Lembe mbe i wiya.
Andha ng’eicwiny pare uloko cen kud i bang’a.’
Kawoni abekelo pokolembe i wii
Pilembe iyero kumae: ‘Adubo ngo.’
36 Pirang’o ibeneno ayi m’ilokiri ko ni gin ma noki?
Lewic bimeki i kum Misiri bende,
Tap calu ma lewic ugam umeki i kum Asiria.
37 Pi thelembe maeno bende, ibiwok woko ma cingi agwaka i wii,
Kum Yehova udaru wenjo ju m’igeno;
Gibiketho ngo lembe uwoth iri miero.”