Yeremia
30 Lembe pa Yehova ubino i bang’ Yeremia, uyero kumae: 2 “Yehova Mungu mir Israel uwacu kumae: ‘Kiew lembe ceke m’ayero iri i buku. 3 Kum “nen! nindo bebino,” Yehova wacu, “m’abicoko dhu dhanu para ma jutero i ng’eca, Israel man Yuda,” Yehova wacu, “man abidwogogi i ng’om m’alar amiyo ni kwarugi, e gibibedo i iye kendo.”’”
4 Eno tie lembe ma Yehova uyero ni Israel man ni Yuda.
5 Yehova uwacu kumae:
“Wawinjo dwal mi mielkum;
Ndiri re m’utie, ento kwiyocwiny ungo.
6 Akwayuwu, wukepenji ka nyo ng’atu ma nico copo nyolo nyodo.
Dong’ pirang’o ke abeneno jumaco ceke ma tek umaku the igi* ku cing’gi
Calu dhaku m’ubegonyere?
Pirang’o wang’ ceke udoko foo?
7 Akaa! Nindone tie nindo ma rac dit.*
Nindo moko mbe ma calu maeno,
Nindo mi can ni Yakobo.
Ento ebiboth kud i iye.”
8 “Man i nindo maeca,” Yehova mir udul uwacu, “abituro mberembere kud i ng’utwu, man abituro i jamtwic mwu ni ario; e juwirok* moko mbe ma bidwoki* kendo ni ng’eca migi. 9 Gibitimo ni Yehova Mungu migi man ni Daudi m’ubimo migi m’abiketho igi.”
10 “Ento in, Yakobo ma jatic para, lworo kud unegi,” Yehova wacu,
“Man ndiri kud ung’oy i ii, Ee Israel.
Kum abibodhi niai ku bor
Man abibodho nyikweyi niai kud i ng’om ma juterogi i iye i ng’eca.
Yakobo bidwogo man ebibedo yoo m’umbe masendi,
Ma ng’atu moko mbe m’ubenyayu lworo i iye.”
11 “Kum ani kudi,” Yehova wacu, “pi nibodhi.
Ento abidaru thek ceke m’alalu ii i kindgi,
In re abideri ngo;
Abimiyo iri matira* i mukero m’ukwayere,
Ento abiweki ngo nyanok de m’umbe matira.”
12 Kum Yehova uwacu kumae:
“Kaka m’utur peri thiedhere ngo.
Rem peri copo key ungo.
13 Ng’atu moko mbe ma romo cero beng’i,
Adhola peri romo key ungo.
Thieth umbe iri.
14 Dhanu ceke m’umeri akeca, wigi daru wil kudi.
Gibeseyi ngo dong’ kendo.
Kum agoyi ku goco pa jadegi,
Ku twiny pa ng’atu ma kwiny,
Nikum kier peri ma dit man dubo peri m’usagu.
15 Pirang’o ibewak pi cogoni m’uturi?
Litho peri copo key ungo!
Atimo lembuno i kumi
Pi kier peri ma dit man dubo peri m’usagu.
16 Pieno jubimvoro ju ceke m’ubemvori,
Man judegi peri ceke bicidho bende i ng’eca.
Jubikwalu ju m’ubekweli,
Man abimiyo ju ceke m’ubeyeki i cing’ weg ayeki.”
17 “Ento abidwogo leng’kum peri man abikeyo rem peri,” Yehova wacu,
“Kadok nwang’u jubelwong’i nia ng’atu ma juriemo:
‘Sayuni, ma ng’atu moko mbe m’ubesayu.’”
18 Yehova uwacu kumae:
“Nen, abecoko dhu dhanu mi hema pa Yakobo ma jutero i ng’eca,
Man kisa binega i kum kabedo pare.
Jubidogiero adhura kendo iwi ungulu got* pare,
Man ot ma tek ma wiw bicungo kakare ma dhe.
19 Foyofoc ku dwal mi ng’iero biai kud i bang’gi.
20 Wote bidoko calu ma gilar gibino ko yang’ con,
Man udul pare bicungo i wang’a ma tek.
Abitimo ju m’ubesende ceke rac.
21 Ng’atu pare ma dit bibedo ng’atu acel m’i kind jupare ma dhe,
Man jabim pare biwok kud i kindgi.
Abiketho ebibino ceng’ini man ebicoro i vuta.”
“Kum kan ungo, ng’a ma copo ng’ap* nicoro i vuta?” Yehova wacu.
22 “Wubidoko dhanu para man abibedo Mungu mwu.”
23 Nen! ng’eicwiny ma lake tek pa Yehova bituk calu avuvu,
Ebiwinyere iwi jutimrac calu vira.
24 Ng’eicwiny pa Yehova m’uopo biloko ngo ku ng’eye
Nitundo m’ebipong’o man ebitimo lembe m’ekeco i adundene.
I dong nindo mir ajiki, wubinyang’ i lembuno.