Isaya
41 “Wuwinja ling’ ling’,* wu cula;
Wek thek unwang’ tego.
Wek gicor; e giweci.
Wacoru karacelo pi pokolembe.
2 Ng’a m’uting’o ng’atu moko niai ku kaka ma ceng’ wok i iye,
M’ulwong’e i bedopwe pi nitimo ire,
Pi nimiyo ire thek
Man pi niketho edii jubim?
Ng’a m’udwokogi ni utur i wang’ palamularu pare,
Calu soka ma yamu ubekoto i wang’ atumb athero pare?
3 Eriemo tokgi, m’ekadhu m’umbe macero
I gengi ma nwang’u fodi tiende ukadhu ngo kud i iye.
4 Eni tic pa ng’a, man ng’a m’utimo lembuni,
M’ucoko dhanu m’utuk niai i acaki?
An a Yehova, a Ng’atu ma Kwong’a;
Man ni ju ma tokcen de abibedo rom.”
5 Cula unene man lworo umakugi.
Kum tung’ ng’om ucaku miel.
Gicoro ceng’ini man gibino.
6 Ng’atuman ubekonyo jawodhe
Man ubewacu ni umin kumae: “Bed tek.”
7 E jabodho ubetielo cwiny jathiedh cuma;
Ng’atu ma fwodo cuma ku nyondo
Ubetielo cwiny ng’atu ma fwodo piny iwi pogi.
Ebeyero pi tic mi mwono piny kumae: “E cuu.”
I ng’eye jugure ku musumali kara kud epodhi.
8 “Ento in, Ee Israel, in i jatic para,
In, Ee Yakobo i ng’atu m’ang’iyo,
Kodhi p’Abraham ma jarimba,
9 In m’ating’i niai kud i tung’ ng’om,
Man in m’alwong’i niai kud i thengene ma bor m’usagu.
Ayero iri nia, ‘itie jatic para;
Adaru ng’iyi; akuni ngo.
10 Lworo kud unegi, kum ani kudi.
Cwinyi kud ung’abere, kum an a Mungu peri.
Abidwoki tek, eyo, abikonyi,
Abimeki andhandha ku cinga mir acwic mi bedopwe.’
11 Nen! lewic kud acidi bimaku ju ceke ma kwinyo uopo i igi i kumi.
Ju m’ubekiedo i dhogi bidoko ni gin moko ngo, man gibithum.
12 Ibisayu kaka ju ma nwang’u benyego kudi, ento ibinwang’ugi ngo;
Jumaco m’ubekiedo lwiny i dhogi bidoko calu piny m’umbe, calu piny m’umbe nyanok de.
13 Kum an a Yehova Mungu peri, amaku cingi ma yor acwic,
An a Ng’atu m’ubeyero iri kumae: ‘Lworo kud unegi. Abikonyi.’
14 Lworo kud unegi Yakobo, in ma in ukoko,*
Wu dhanu mir Israel, abikonyowu,” Yehova ma Jawarni, Ng’atu ma Leng’ mir Israel uwacu.
15 “Nen! adwoki ni jamfwodo cam,
Jamfwodo ma nyen ma lake bith kun ku kun.
Ibinyono gudi man ibirungo igi
Man ibiketho ungulu gudi* bidoko calu cung piny.
16 Ibikworogi
Man yamu bicidho kugi cen;
Yamu ma tek bilalu igi.
Anyong’a binegi i Yehova,
Man ibiluliri i Ng’atu ma Leng’ mir Israel.”
17 “Ju ma n’i yeny ku jucan gibesayu pii, ento pii mbe.
Lebgi uthwo nikum rieu.
An a Yehova abidwoko igi lembe.
An a Mungu mir Israel, abiwenjogi ngo.
18 Abiketho kulo bimol iwi ungulu gudi ma lelele,
Man pii m’udhenyini i pambu mi poga.
Abiloko langa bidoko ni jugu mir agada
Man ng’om ngele ni kaka ma pii dhenyini i iye.
19 Abipidho yend tido i langa,
Yend utiep, yend mirthe, man yend fathula.
Abipidho yend jenevriye i pambu mi langa,
Karacelo ku yend fren man sipre,
20 Kara dhanu ceke unen man ung’ey,
Ginen cuu man ginyang’
Nia cing’ Yehova re m’utimo lembuni,
Man Ng’atu ma Leng’ mir Israel re m’ucwiye.”
21 “Wukor lembe mwu,” Yehova wacu.
“Wuwodh lembe ma wucero ko beng’wu,” Ubimo pa Yakobo uwacu.
22 “Wuwodh kizibiti man wukor iwa lembe ma bitimere.
Wukor iwa lembe ma con,*
Kara wapar pigi man wang’ey gin ma bilund wok.
Kunoke wutwong’ iwa lembe m’ubebino.
23 Wukor iwa lembe ma bitimere i nindo m’ubino,
Kara wang’ey nia wu mungu,
Eyo, wutim lembe moko, ma ber kadi ma rac,
Kara iwa uwang’ lii kinde ma wabinene.
24 Wunen! wutie gin m’umbe,
Man gin m’utimo de mbe.
Ng’atu moko ci m’ung’iyowu utie gin ma judagu.
25 Ating’o ng’atu moko niai yo malu, man ebibino,
Ng’atu acel niai yo kaka ma ceng’ wok i iye* ma bilwong’o nyinga.
Ebiwotho iwi rwodhi calu ve gin ulobo,
Calu ma jacwii agulu nyono ko ulobo.
26 Ng’a m’ukoro lembuni niai i acaki, kara wang’eye,
Kunoke niai yang’ con, kara wayer nia, ‘Eyero lemandha’?
Andha de, ng’atu moko mbe m’utwong’ lembene!
Ng’atu moko mbe m’uyere!
Ng’atu moko mbe m’uwinjo gin moko i beng’wu!”
27 An re m’alar ayero ni Sayuni kumae: “Nen! gini e!”
Man abioro jater lembanyong’a i Yeruzalem.
28 Ento amedara niyenyo, re ng’atu moko ubino mbe;
Ng’atu moko bino mbe i kindgi m’umii juk.
Man amedara nipenjogi ya gidwok wang’ lembe.
29 Nen! gin zoo gi gin m’apara.*
Tic migi tie gin moko ngo.
Ayi gin m’acwiya migi mi cuma* tie yamu man gin mandha ngo.