Isaya
12 I nindo maeca, ma jiji mbe ibiyero kumae:
“Afoyi, Ee Yehova,
Kum kadok nwang’u ibino ku ng’eicwiny i kuma de,
Re nok nok ng’eicwiny peri ujwik man ijuko cwinya.
2 Nen! Mungu en e both para.
Abibedo ku genogen man ndiri binega ngo;
Kum Yah* Yehova en e kero para man tego para,
Man edoko both para.”
3 Wubitwomo pii kud anyong’a
I kulo mi both.
4 I nindo maeca wubiyero kumae:
“Wudwok foyofoc ni Yehova, wulwong’ nyinge,
Wuketh tic pare ung’eyere i kind dhanu!
Wutwong’ nia nyinge dodere malu.
5 Wuwer wer mi pak* ni Yehova, kum etimo lembe ma beco ma wang’u ijo.
Wuketh lembe maeni ung’eyere i ng’om zoo.
6 Ting’ dwendi man kok kud anyong’a, in m’ibedo* i Sayuni,
Kum Ng’atu ma Leng’ mir Israel tie dwong’ i kindwu.”