Lembrieko
4 Wota, wuwinj twiny pa wego,
Wuketh wiwu kilili pi ninwang’u nyang’ i lembe,
2 Kum abimiyo iwu telowic ma ber;
Kud wucay ponji* para.
3 Abino wod m’atira ni vwa
Man nyathin ma maa umaru akeca.
4 Eponja man eyero ira kumae: “Dong’ adundeni umok kii i kum lembe para.
Wor lembang’ola para kara imediri nikwo.
5 Nwang’ rieko, nwang’ nyang’ i lembe.
Wii kud uwil man kud ilokiri cen kud i kum lembe m’abeyero.
6 Kud iweke, e ebigwoki.
Mare, e ebiketho ibibedo museme.
7 Rieko tie gin ma pire tek nisagu zoo,* dong’ nwang’ rieko,
Man m’usagu gin ceke m’inwang’u, nwang’ nyang’ i lembe.
8 Nene ni gin ma pire tek nisagu, man ebidodi.
Ebiyungi pilembe igwake.
9 Ebiketho uthac ma leng’ mi thiwe i wii;
Ebiruko wii ku jamker mi wic mi leng’o.”
10 Winji, woda, man jol lembe m’abeyero,
E oro mi kwo peri bibedo dupa.
11 Abiponji ku yo mi rieko;
Abitelo wii i yo mi bedopwe.
12 Kinde m’ibewotho, gin moko mbe ma bisendo tiendi;
Man tekene iberingo, ibikier ungo.
13 Mok kii i kum twiny, kud iwek ecidhi.
Gwoke, kum ebiketho ibibedo kwo.
14 Kud imond i gengi mi jutimrac,
Man kud iwoth i yo mi dhanu ma reco.
15 Ure, kud iwoth i iye,
Lokiri cen kud i kume, man kadh kud i ng’ete.
16 Kum gicopo nindo ngo ka fodi gitimo ngo gin ma rac.
Nindo lal kud i wang’gi ka fodi giketho ngo ng’atu moko upodho.
17 Gitungiri ku cam* mi lembe ma rac,
Man gimadhu pigulok mi rop.
18 Ento yo mi weg bedopwe e calu der m’ucaru piny kugweno,
Ma lake medere ameda nitundo i dieceng’.
19 Yo mi jutimrac tie calu mudho;
Ging’eyo ngo gin m’uketho gikier.
20 Woda, keth wii i kum lembe para;
Winj kilili mandha* lembe m’abeyero.
21 Kud ilok weng’i cen kud i kumgi;
Gwokgi i thuc mir adundeni,
22 Kum gimiyo kwo ni ju m’unwang’ugi
Man leng’kum n’i kumgi ceke.*
23 Gwok adundeni nisagu piny ceke m’igwoko,
Kum acaki mi kwo ai kud i iye.
24 Kab wec ma reco cen kud i dhogi,
Man kab bende wec mi kier cen kud i dhogi.
25 Weng’i ucikere nineno atira yor i weng’i,
Eyo, keth weng’i unen piny atira i weng’i.
26 Yik yo ma tiendi bikwanyu upot kpee,*
E gengi peri ceke bibedo museme.
27 Kud ilokiri yor acwic kadi yor acam.
Lokiri cen kud i kum gin ma rac.