Yeremia

7 Maeni tie lembe ma Yehova uyero ni Yeremia: 2 “Cung i dhugang’ mi ot pa Yehova man itwong’ rwonglembe ma e keca: ‘Wuwinj lembe pa Yehova, wu dhanu ceke mi Yuda ma wumondo kud i dhugang’ maeni pi nikulo korwu piny ni Yehova. 3 Yehova mir udul ma Mungu mir Israel uwacu kumae: “Wuyik yo mwu man timo mwu, e abiyiyo wumeduru nibedo i kabedo maeni. 4 Kud wugen wec mi ndra man kud wuyer kumae: ‘Eni tie* hekalu pa Yehova, hekalu pa Yehova, hekalu pa Yehova!’ 5 Kum tek andha wuyiko yo mwu man timo mwu, tek andha wumoko kii i kum pokolembe m’atira i kind ng’atini ku jirani pare; 6 tek wusendo ngo umondo, nyithikic,* man montho; tek wucwiro ngo rimb ng’atu m’ukoso ngo i kabedo maeni, man tek wulubo ngo tok mungu mange pi nikelo can i wiwu, 7 e abiyiyo iwu wumeduru nibedo i kabedo maeni, i ng’om m’amiyo ni kwaruwu pi nja.”’”*

8 “Ento wulund wugeno mwu wec mi ndra ma bimiyo ngo kony moko nyanok de iwu. 9 Wubekwalu kwo, wunego nek, wutimo abor,* wukwong’o kwong’ mi ndra, wuthiero lam ni Baal man wulubo tok mungu ma wung’eyo ngo. 10 Nyo wuromo bino cungo i wang’a i ot maeni ma nyinga lwong’ere i kume, ma wuwacu ko kumae: ‘Wabiboth,’ kadok nwang’u wubetimo lembe maeni ceke ma judagu? 11 Nyo ot maeni ma nyinga lwong’ere i kume udaru doko ni ot mi weg ayeki i weng’wu? Nen, an gira adaru neno lembuni,” Yehova wacu.

12 “‘Ento kawoni wucidh i kabedo para i Cilo, kaka m’alar aketho nyinga ubedo i iye man wunen gin m’atimo i kume nikum lembe ma reco mi dhanu para ma Israel. 13 Wulund wumeduru nitimo lembe maeno ceke,’ Yehova wacu, ‘man kadok nwang’u aweco i beng’wu kendo kendo de,* re wuwinjo ngo. Amedara nilwong’owu, ento wuyii ngo. 14 Pieno lembe ma rom m’atimo i kum Cilo re m’abitimo i kum kabedo maeni ma nyinga lwong’ere i kume, kabedo ma wugeno, m’amiyo iwu man ni kwaruwu. 15 Abibayuwu cen kud i wang’a, tap calu m’abayu ko umego mwu ceke, ma nyikway Efraim zoo.’

16 “Ento in, kud irwo pi dhanu maeni. Kud iwaki, kud irwo, kadi kud ikwaya pigi, pilembe abiwinji ngo. 17 Nyo ibeneno ngo gin ma gibetimo i adhura mi Yuda man i gengi mi Yeruzalemi? 18 Wot ubecoko yen, wego ubecwinyo mac, man jumamon ubenyobo kwen pi niyiko mukathi mi lam ni Ubimo ma dhaku mi polo,* man gibekonjo girathiera mi pigulok ni mungu mange pi ninyayu ng’eicwiny i iya. 19 ‘Ento nyo an re ma gibetima raci?’* Yehova wacu. ‘Nyo utie ngo gin gigi pi lewic migi?’ 20 Pieno, Rwoth Ubimo ma Malu Ngbir Yehova uwacu kumae: ‘Nen! Ng’eicwiny ku kwinyo para bicorere iwi kabedo maeni, iwi dhanu man iwi ley, iwi yen mi lum man iwi nying’ yen m’i ng’ombe. Ebiwang’u piny man ebinegere ngo.’

21 “Maeni tie lembe ma Yehova mir udul ma Mungu mir Israel uwacu: ‘Wucidh i weng’wu, wumed lam mwu m’awang’a ma boo iwi lam mwu mange, man wucam ring’o wun giwu. 22 Kum i nindo m’awodho kwaruwu kud i ng’om mi Misiri, aweco ngo kugi kadi ang’olo ngo igi lembe pi lam m’awang’a ma boo man pi lam. 23 Ento ang’olo igi kumae: “Wuwor dwanda, e abidoko Mungu mwu man wubidoko dhanu para. Wucikuru niwotho i yo ceke m’ang’olo kara lembe uwoth ma ber iwu.”’ 24 Re giwinjo ngo lembene kadi giciko de ngo ithgi; gilund giwotho i lembe ma reco ma gipangu,* gilubo tok thwon mir adundegi ma rac, man giloko ku ng’eygi kakare nicidho i wang’gi, 25 niai i nindo ma kwaruwu giwok kud i ng’om mi Misiri cil tin eni. Pieno amedara nioro jutic para ceke ma jubila i beng’wu, aoro ng’atuman kubang’ ceng’ kendo kendo.* 26 Re gikwero niwinja man giciko ngo ithgi. Gilund gidoko juthwon* man gifotimo lembe ma reco dong’ magwei nisagu kwarugi!

27 “Ibiyero igi lembuni ceke, ento gibiwinji ngo; ibilwong’ogi, ento gibigamu ngo dhogi. 28 Man ibiwacu igi kumae: ‘Eni tie thek m’uworo ngo dwand Yehova Mungu migi, man m’ukwero nijolo twiny. Gwokobedoleng’ udaru rwinyo, kadok aweca de jubeweco ngo pire i kindgi.’*

29 “Nyar yuk wii ma junyaru ngo* man baye, wer wer wak iwi ungulu gudi* ma lelele, pilembe Yehova udaru kwero man ewenjo dhanu m’utuk maeni m’unyayu ng’eicwiny i iye. 30 ‘Kum dhanu mi Yuda utimo lembe ma rac i wang’a,’ Yehova wacu. ‘Giketho ayi gin m’acwiya ma judagu i ot m’ulwong’ere ku nyinga pi nicide. 31 Gigiero kaka ma malu mi Tofeth ma n’i Poga pa Wod Hinom* pi niwang’u wotgi man nyiggi i mac, ma ke tie lembe m’ang’olo ngo man m’utundo ngo kadok nyanok de i paru para.’

32 “‘Pieno nen! nindo bebino,’ Yehova wacu, ‘ma jubilwong’i ngo kendo nia Tofeth kunoke Poga pa Wod Hinom,* ento Poga mi nek. Jubikunyo avu i Tofeth nitundo ma kaka moko mbe ma bidong’. 33 Man avuj dhanu maeni bidoko ni cam ni winyo mi kor polo man ni yedi mi ng’om, ma ng’atu moko mbe ma binyayu lworo i igi. 34 Abijigo dwal mir anyong’a man dwal mi foc, dwand cwar mugole man dwand nyamugole i adhura mi Yuda man i gengi mi Yeruzalem, pilembe jubidwoko ng’ombe ni uvuru.’”