Isaya
61 Tipo pa Rwoth Ubimo ma Malu Ngbir Yehova n’i wiya,
Pilembe Yehova uwira kara atwong’ lembanyong’a ni ju ma mol.
Eora kara ariw wang’ rem mi ju ma cwinygi tur,
Atwong’ gony ni ju ma jumaku i ng’eca
Man ni ju ma jutwiyo, nia wang’gi biyabere ma lac,
2 Atwong’ oro mi bero pa Yehova
Man nindo mi culo kwor pa Mungu mwa,
Ajuk cwiny dhanu ceke m’ubewak,
3 Apong’ yeny mi ju m’ubewak pi Sayuni,
Amii igi jamruko mi wic kaka vuru,
Mo mi mutoro kaka wak,
Kendi mi pak kakar adieng’acwiny.
Man jubilwong’ogi nia yen ma dongo mi bedopwe,
Girapidha pa Yehova, kara juyunge.
4 Gibidogiero kendo uvuru ma con;
Gibiting’o kabedo ma con ma juwenjo,
Man gibidogiero kendo adhura ma junyotho,
Kabedo m’udong’ kende niai i kum dhanu m’utuk cil i kum dhanu m’utuk.
5 “Juwirok bicungo man gibikwayu udul lim mwu,
Man umondo bibedo jurufur mwu ku juyik kum yend ulok mwu.
6 Ento wun, jubilwong’owu julam pa Yehova;
Gibilwong’owu jutic pa Mungu mwa.
Wubicamu lonyo mi thek
Man wubiluluru nikum dwong’* migi.
7 Kaka lewic, wubinwang’u makapiny wang’ ario,
Man kakar acidi, gibikok kud anyong’a pi makapiny migi.
Eyo, gibinwang’u makapiny wang’ ario i ng’om migi.
Gibibedo kud anyong’a ma rondo ku rondo.
8 Kum an a Yehova, amaru pokolembe m’atira;
Adagu ayeki man gondiri.
Abimiyo cul migi i lemandha,
Man abitimo kugi lembariba ma rondo ku rondo.
9 Kodhi migi bing’eyere i kind thek
Man nyikwaygi i kind dhanu.
Dhanu ceke ma binenogi bing’eyogi,
Nia gitie kodhi ma Yehova udaru poko mugisa i wigi.”
10 Anyong’a binega lee i Yehova.
Kwo* para zoo bibedo kud anyong’a i Mungu para.
Kum edaru ronya ku kendi mi both,
Eronya ku kanzu* mi bedopwe,
Tap calu ma cwar mugole* kendo ko jamboyo wic ma segi ma calu pa jalam,
Man calu ma nyamugole rukere ko ku jamruko pare.
11 Kum calu ma ng’om ketho piny m’i iye twii
Man podho ketho piny ma jucoyo i iye twii,
Kumeno bende Rwoth Ubimo ma Malu Ngbir Yehova
Biketho bedopwe ku pak bitwii i wang’ thek ceke.